Rí na̱jkha̱ inún Efesios 1:1-23
1 I̱yi̱i̱ʼ rígi̱ niʼnirámáʼ Pablo, apóstol ndrígóo Cristo Jesús xó má nindoo Dios mu maʼga inún xa̱bi̱i̱ Jesús bi̱ kúwá náa Éfeso, bi̱ kúwá jmbu náa Dios ga̱jma̱a̱ kúwá mbá kambájxu̱u̱n gajmiún Cristo Jesús:
2 Garigá rí májánʼ wéñuuʼ a̱jkiu̱u̱n Dios náa ikháanʼla ga̱jma̱a̱ dí tsímáá ndrígóo Anu̱lú Dios ma̱ngaa ndrígóo Tátá Jesucristo.
3 Gaguma mba̱a̱ Dios ga̱jma̱a̱ Anu̱u̱ Tátá ndrígúlú Jesucristo, numuu rí naʼni tsajkurámáánʼlú ga̱jma̱a̱ espíritu santo* ndrígóo náa mekhuíí ga̱jma̱a̱ numuu dí kuwáánʼ gajmiúlú Cristo,
4 numuu dí ikhaa niraʼwáánʼlú nákha xóó tséguma numbaaʼ mu makuwáánʼlú mbóó jnduʼ gajmiúlú Cristo, mu musngajmá ngajua ga̱jma̱a̱ manindxu̱lú kaʼwáánʼ ma̱ngaa dí xáguaʼdáá aʼkhúlú náa ikhaa.
5 Numuu rí nákhá wapháá má niraʼwáánʼlú mu manindxu̱lú xóo e̱ji̱i̱n ga̱jma̱a̱ numuu Jesucristo, xó má rí ikhaa nanigu̱u̱ʼ ga̱jma̱a̱ rí nandoo,
6 mu muxnáálú gamajkhu ga̱jma̱a̱ numuu rí májánʼ wéñuuʼ a̱jkiu̱u̱n dí ikhaa nisngájmulú náa majñu̱u̱ʼ A̱ʼdióo bi̱ nandoo kaʼyoo.
7 Ga̱jma̱a̱ numuu ikhaa nindoo nikáwáánʼlú numuu rí eʼdiuu niʼtsiwáanʼlú ga̱jma̱a̱, xúʼko̱ aʼkhúlú nijngudi̱i̱ numuu rí májánʼ wéñuuʼ a̱jkiu̱u̱n Dios maski ajndu rakáʼyulú.
8 Ikhaa nisngájmulú rí májánʼ wéñuuʼ a̱jkiu̱u̱n ma̱ngaa rí muniʼnuunʼ xúgíʼ ku̱ma̱ ga̱jma̱a̱ dí makru̱ʼu̱lú,
9 niʼni rí muniʼnúunʼ ngu̱ʼwa̱ rí mitsúʼkháan rí ikhaa nandoo maʼni. Xó má rí ikhaa nanigu̱u̱ʼ maʼni, ikhaa mínaaʼ má
10 nigíʼ mbá awan rí mambanúu mbiʼi rí kaʼyoo, mu maruwa̱a̱ xúgíʼ dí rígá mu maʼni̱i̱ imbóó náa Cristo, dí rígá mekhuíí ga̱jma̱a̱ dí rígá náa tsu̱du̱u̱ ku̱ba̱ʼ. Xúʼko̱, náa ikhaa,
11 bi̱ kuwáánʼ mbóó gajmiúlú ga̱jma̱a̱ Dios niʼni rí mundrígúu dí ikhaa nikudaminaʼ, ikhaa wapháá niraʼwáánʼ numuu rí xúʼko̱ nindoo, ikhaa naʼnimbánuu xúgíʼ dí naraʼwíí maʼni xó má nandoo,
12 mu ga̱jma̱a̱ numulú ikháanʼ maguma mba̱a̱ Dios, ikháanʼ bi̱ nini̱ndxu̱lú giniáánʼ bi̱ niguaʼdáá fe náa Cristo.
13 Mú ikháanʼla mangáanʼ niguaʼdáá fe náa ikhaa nda̱wa̱á rí nidxa̱wíín ajngáa rí gajkhun, ajngáa rí májánʼ ga̱jma̱a̱ numuu rí maguma káwáanʼla, nda̱wa̱á dí ikháanʼ ninimbala ga̱jma̱a̱ numuu ikhaa, dí ga̱jma̱a̱ espíritu santo nindrígulá sello dí nijuiʼthá makhánulúʼ,
14 rígi̱ nindxu̱u̱ mbá rí nasngájma rí gajkhun wíji̱ mundrígúu rí nijuiʼthá makhánulúʼ, mu xúʼko̱ rí kaʼyoo Dios majuiʼninumáá mu ma̱ndoo makríyáaʼ ga̱jma̱a̱ mu xúʼko̱ magruigú gamajkhu.
15 Ikha jngóo mangúún, asndu nákha nidxawun fe dí kuaʼdáá ikháanʼla náa Tátá Jesús ga̱jma̱a̱ ngajua dí nusngajmá náa xúgíinʼ xa̱bi̱i̱ ikhaa,
16 naxna̱a̱ má xúʼko̱ núma̱aʼ Dios ga̱jma̱á numala. Na̱tha̱ má xúʼko̱ ga̱jma̱á numala índo̱ natajkháan*
17 mu Dios ndrígóo Tátá Jesucristo, Anu̱lú bi̱ kaʼyoo magruigú xúgíʼ gamajkhu maxnala ku̱ma̱* ga̱jma̱a̱ rí masngájmala mu xúʼko̱ maʼga ramajñala itháán xóo phú nindxu̱u̱ ikhaa.
18 Ikhaa niʼni rí mambiʼi iduu a̱jkia̱la* mu mbu̱ya̱a̱ ndiéjunʼ rí kuáʼti̱i̱n mundrígúu náa ikhaa nindxa̱ʼwála, mu mbuya̱a̱ ndiéjunʼ rí gíʼdoo numuu rí ikhaa nigujxi̱i̱ mu makhánún bi̱ ni̱ndxu̱ún xa̱bi̱i̱ Jesús
19 mu mbuʼyáá nguáthá mba̱a̱ tsiakii ndrígóo rí nisngájma náa ikháanʼlú bi̱ nuʼnimbulú kuʼyáá. Tsiakii rígi̱ nakujmaa náa xúgíʼ dí niʼniwíi,
20 tsiakii rígi̱ nijmuu náa Cristo índo̱ nikujxi̱i̱* náa majñúnʼ wajinʼ ga̱jma̱a̱ nigíiʼ náa nijniun mújúunʼ mekhuíí,
21 rígi̱ niʼni dí magiʼdoo numuu ki xóo xúgíinʼ xa̱bu̱ ñajunʼ, xúgíinʼ bi̱ guáʼdáá mbá ñajunʼ, xúgíinʼ bi̱ guáʼdáá tsiakii, xúgíinʼ reyes ga̱jma̱a̱ náa xúgíinʼ xa̱bu̱ bi̱ guáʼdáá numún, raʼkháa náa i̱ndó mbiʼi xúgi̱,* ma̱ngaa náa mbiʼi rí ma̱ʼkha̱ nda̱wa̱á.
22 Ikhaa nigrui̱ga̱ xúgíʼ náa agoo rajkhúu ga̱jma̱a̱ niʼni rí mbayá edxu̱u̱ náa xúgíʼ rí kaʼyoo náa nagimbíi̱n,*
23 bi̱ ñajúúnʼ xó má xuyuuʼ, mu ikhiin maʼni kájxi̱i̱n ga̱jma̱a̱ xúʼko̱ má xúgíʼ dí rígá maʼni kájxi̱, xó má bi̱ naʼni marigá kájxi̱ xúgíʼ.
Mbaʼa nota
^ O “na̱ni̱ tsajkuun”.
^ Náa ajngáa griego naʼthí, “espíritu ndrígóo ku̱ma̱”.
^ O “ámiala”.
^ O “niʼnigabi̱i̱”, “niʼni mbaʼya̱a̱”.
^ O “congregación”.
