Rí na̱jkha̱ inún Efesios 3:1-21
3 Ga̱jma̱a̱ numuu rígi̱ ikhúúnʼ Pablo, xtáá náa guʼwá e̱jua̱nʼ ga̱jma̱a̱ numuu Cristo Jesús ma̱ngaa ga̱jma̱a̱ numala ikháanʼ bi̱ nindxa̱la xa̱bu̱ numbaaʼ...
2 Mbáa ikháanʼla nidxawíín má, rí nigruígú ñajunʼ rí maxnaráʼa rí májánʼ wéñuuʼ a̱jkiu̱u̱n Dios* mu mambáyala,
3 rí Dios nisngájmuʼ maniʼnúuʼ ngu̱ʼwa̱ rí mitsúʼkháan xó má ninirámáʼ mbá chíʼgíiʼ náa inala nákha ginii.
4 Ikha jngóo, índo̱ gúraxnula rígi̱, mbu̱ya̱a̱la nguáthá mba̱a̱ ekro̱ʼo̱ʼ ngu̱ʼwa̱ rí mitsúʼkháan ga̱jma̱a̱ numuu Cristo.
5 Xa̱bu̱ bi̱ nikúwá nákhá wajyúuʼ na̱nguá nijuixnún rí muniʼnuuʼ ngu̱ʼwa̱ rígi̱, rí espíritu* nisngájmúún apóstoles bi̱ kaxtaʼwíin ga̱jma̱a̱ profetas:*
6 Núma̱aʼ má ga̱jma̱a̱ numuu ajngáa rí májánʼ, xa̱bu̱ numbaaʼ kúwá mbóó gajmiún Cristo Jesús, ga̱jma̱a̱ numuu rígi̱ mundrigúu rí magruigú Jesús, mani̱ndxu̱ún mbóó xuwiʼ ga̱jma̱a̱ makánún mangiin dí Dios nikudaminaʼ maxnúlú.
7 Ni̱jkhánú ninindxu̱ʼ ñumbáá numuu rí májánʼ wéñuuʼ a̱jkiu̱u̱n Dios maski ajndu rakáʼyoʼ, nigruigú regalo rígi̱ ga̱jma̱a̱ tsiakii ndrígóo ikhaa.
8 Ikhúúnʼ, bi̱ ni̱ndxu̱ʼ itháán chíʼgíiʼ náa bi̱ kaxtaʼwíin, nigruigú rí májánʼ wéñuuʼ a̱jkiu̱u̱n Dios mu matarúʼún ajngáa rí májánʼ xa̱bu̱ numbaaʼ, rí Cristo mbaʼa wéñuuʼ rí gíʼdoo maʼni tsajkurámáanʼlu.
9 Mu ma̱ni̱ mbuyáá xúgíinʼ xú káʼnii ejuixnáraʼa ngu̱ʼwa̱ rí mitsúʼkháan dí nirígá ngo̱ʼo̱o̱ mba̱yu̱u̱ʼ tsiguʼ náa Dios, bi̱ niʼniwíi xúgíʼ dí rígá.
10 Nirígá rígi̱ mu bi̱ nutañajunʼ ga̱jma̱a̱ bi̱ guáʼdáá mbá ñajunʼ náa mekhuíí mbuyáá mixtiʼkhu enii ku̱ma̱ ndrígóo Dios náa bi̱ nagimbíi̱n.*
11 Rígi̱ nambríguii ga̱jma̱a̱ rí ikhaa nindoo dí marigá asndu kámuu mbiʼi, rí ikhaa nigíʼ náa majñu̱u̱ʼ Cristo Jesús bi̱ nindxu̱u̱ Tátá ndrígúlú.
12 Ga̱jma̱a̱ numuu ikhaa, ikháanʼ tsémiñulu muʼthá ga̱jma̱a̱ nda̱a̱ gamíi ma̱ngaa nda̱a̱ dí erikulú dí mu̱ʼgua̱ kanuu náa Dios, numuu dí kuaʼdáá fe náa Cristo.
13 Ikha jngóo nanda̱ʼa̱la dí xúni̱ guabamijná ga̱jma̱a̱ ga̱ʼkhu̱ dí ikhúúnʼ naraʼnuu ga̱jma̱a̱ numala, numuu dí rígi̱ naʼni marigá gamajkhu náa ikháanʼla.
14 Rígi̱ numuu dí nasmbatígoʼ náa inuu Anu̱lú,
15 núma̱aʼ má ga̱jma̱a̱ numuu ikhaa xúgíinʼ bi̱ kúwá mekhuíí ga̱jma̱a̱ bi̱ kúwá náa tsu̱du̱u̱ ku̱ba̱ʼ nandoo nduya.*
16 Natajkháan* náa ikhaa numuu dí nindxu̱u̱ mbáa Dios bi̱ itháan mba̱a̱, naniñuuʼ rí a̱jkia̱la magiʼdoo tsiakii ga̱jma̱a̱ espíritu ndrígóo,
17 mu ga̱jma̱a̱ numuu fe ndrígála Cristo maxtáa náa a̱jkia̱la ga̱jma̱a̱ ngajua. Ma̱ngaa natajkháan mu maguajunla gújkhúʼ xóo mbá ixi̱ mba̱a̱ rí na̱jkha̱ mi̱jnu̱ʼ ajmu̱u̱ náa ku̱ba̱ʼ,
18 mu xúʼko̱ xúgíinʼ xa̱bi̱i̱ Cristo, majmiin mikru̱ʼu̱u̱n, nguáthá ma̱ja̱nʼ, mbaʼ, mitsídanʼ ga̱jma̱a̱ mi̱jnu̱ʼ,
19 ma̱ngaa rí muniʼnuuʼ ngajua ndrígóo Cristo rí itháan gíʼdoo numuu ki xóo ku̱ma̱, mu ikháanʼla maguaʼdáá kájxi̱ cualidad dí Dios naxná.
20 Dios bi̱ naʼni rí tsiakii ndrígóo marigá náa ikháanʼla, ma̱ndoo maʼni itháán ki xóo rí nunda̱ʼa̱ ga̱jma̱a̱ rí nundxaʼwamíjná,
21 ikhaa kaʼyoo magruigú gamajkhu náa majñu̱únʼ bi̱ nagimbíi̱n ga̱jma̱a̱ numuu Cristo Jesús asndu kámuu mbiʼi. Xúʼko̱ gáʼni.*
Mbaʼa nota
^ O “rí májánʼ wéñuuʼ a̱jkiu̱u̱n maski ajndu rakáʼyulú”.
^ O “xi̱ʼ”.
^ O “gaʼyee”, “bi̱ nuthi rí marigá”.
^ Náa ajngáa griego naʼthí, “xúgíinʼ familia nundri̱gú mbiʼñún”.
^ O “na̱ni̱ tsajkuun”.
^ O “Amén”.
