Rí na̱jkha̱ inún Efesios 4:1-32
4 Ikhúún’ bi̱ xtáá náa guʼwá e̱jua̱nʼ ga̱jma̱a̱ numuu Tátá, natakháñala rí gakuwáanʼ xó má kaʼyoo dí nindrígú náa nijuatsaʼwála:
2 Ganindxa̱la xa̱bu̱ guabaaʼ, xákiʼnáanʼla ga̱jma̱a̱ gaʼngo̱o̱ a̱jkia̱la kuyamíjna̱; gusngajmá dí nandala kuyamíjna̱,
3 gunimíjna dí makuwáanʼla mbá kambájxala má xúʼko̱, xó má espíritu* niruwáanʼla, narígá rígi̱ numuu rí kuwáanʼla tsímáá.
4 Rígá mbóó xuwiʼ ga̱jma̱a̱ rígá mbóó espíritu, xúʼko̱ má, rígá mbóó rí kuaʼti̱i̱nla náa rí nijuatsaʼwála.
5 Mbáwíí Tátá xtáa, mbóó fe rígá ga̱jma̱a̱ mbóó xóo rí najnguála iyááʼ.
6 Náa xúgíinʼ xtáa mbáa Dios, ikhaa nindxu̱u̱ Anu̱ún xúgíinʼ, gíʼdoo tsiakii náa xúgíinʼ, ikhaa ma̱ndoo majmiuu xúgíinʼ ga̱jma̱a̱ tsiakii ndrígóo rígá náa xúgíinʼ.
7 Dios nisngájma náa mámbáa dí ikháanʼ rí májánʼ wéñuuʼ a̱jkiu̱u̱n, rígi̱ nikujmaa índo̱ Cristo niruiʼtáa regalo rígi̱ náa ikháanʼlú.
8 Numuu rí náa Kiʼniraʼmáʼ naʼthí: “Índo̱ ikhaa nitsima̱a̱, ni̱jkha̱ kagui̱i̱n bi̱ kajchún náa guʼwá e̱jua̱nʼ ga̱jma̱a̱ nixníin xa̱bu̱ xóo regalo”.
9 Mú, ndiéjunʼ eyoo gáʼthúu̱n ajngáa rí “nitsima̱a̱” xá. Lá raʼkháa nandoo gáʼthúu̱n dí nákha ginii nigajtaa mbayííʼ ngijyooʼ, xóo muʼthá, náa ku̱ba̱ʼ ráʼ.
10 Bi̱ nigajtaa ikha̱á má nindxu̱u̱ bi̱ nitsimuu náa itháan mitsídánʼ ki xóo mekhu mu maʼnimbánuu xúgíʼ.
11 Nixníin tikhuun xóo apóstoles, tikhuun xóo profetas,* tikhuun xóo bi̱ nutaraʼa ajngáa rí májánʼ, tikhuun xóo báxtúu ga̱jma̱a̱ bi̱ nusngáa.
12 Nixníin mu muniratiin xa̱bu̱ bi̱ niraʼwíin Dios, muni̱ ñajunʼ dí mumbañún eʼwíinʼ ga̱jma̱a̱ muxnáá tsiakii xuyuuʼ Cristo,
13 asndu índo̱ xúgiáánʼ gákuwáánʼlú mbá jnduʼ ga̱jma̱a̱ numuu fe ma̱ngaa náa ku̱ma̱ jmbu ndrígóo A̱ʼdióo Dios, asndu índo̱ gájmáánʼ xóo mbáa xa̱bu̱ nikhi̱i̱ ga̱jma̱a̱ rí muʼguanú maʼni mbríguáanʼ gajmiúlú Cristo.
14 Ikha jngóo guniʼñááʼ ranindxu̱lu e̱ji̱n; mu xúʼko̱ xúʼgo̱ gi̱i̱ ñuʼún gáʼni iyaʼ, ga̱jma̱a̱ xúʼgo̱ gi̱i̱ ñuʼún gáʼni giñánʼ dí nindxu̱u̱ xúgíʼ enii kiʼsngáa, ma̱ngaa numún xa̱bu̱ bi̱ najmañún muni̱ nduwiinʼ eʼwíinʼ.
15 Mú ikháanʼlú índo̱ nuʼthá rí gajkhun, gaganiánʼ ga̱jma̱a̱ ngajua náa xúgíʼ dí nu̱ʼni̱ náa bi̱ kayá edxu̱u̱, Cristo.
16 Ga̱jma̱a̱ numuu ikhaa, xúgíʼ xuwiʼ naruwaminaʼ májánʼ ga̱jma̱a̱ mámbá rí kaʼyoo nambáyúu náa ndayóoʼ. Índo̱ mámbá rí kaʼyoo náa xuwiʼ naʼni ñajunʼ xó má gíʼmaa, rígi̱ nayambáá mu xuyuuʼ xa̱bu̱ mbaja̱a̱, mu xúʼko̱ xúgíʼ xuwiʼ mawiji̱ jmbu náa ngajua.
17 Ikha jngóo natakháñala náa mbiʼyuu Tátá, rí ni xákuwáanʼ* xóo kúwíin xa̱bu̱ numbaaʼ ikhiin i̱ndó nundxaʼwamíjná dí ragíʼdoo numuu.
18 Náa ku̱ma̱ ndrígu̱ún rígá dí mikrína ga̱jma̱a̱ kúwá wájíʼ náa vida rí kaʼyoo Dios numuu dí tsíkru̱ʼu̱u̱n, ma̱ngaa a̱jkiu̱ún migújkhúʼ wéñuuʼ.
19 Numuu rí nánguá etiñu̱u̱nʼ, ikha jngóo nuxnaximíjna̱ muni̱ xúgíʼ enii dí xkawiʼ* ga̱jma̱a̱ nagua̱ʼa̱ muni̱ xúgíʼ enii dí mitsaga.
20 Mú ikháanʼ nijma̱ñala dí Cristo na̱nguá ninindxu̱u̱ xúʼko̱ kaʼnii,
21 á mu rí gajkhun dí nidxawíínla ga̱jma̱a̱ nijuiʼsngála náa majñu̱u̱ʼ ikhaa ga̱jma̱a̱ dí gajkhun dí rígá náa Jesús.
22 Ikháanʼ nijmañala dí ndayóoʼ muriʼku̱u̱ rí xóo xa̱bu̱ nindxa̱la, xóo muʼtá dí ni̱nila nákha ginii, numuu dí rúʼko̱ niʼni dí maʼga racháanʼla itháan ga̱jma̱a̱ numuu dí nagua̱ʼa̱ mu̱ni̱ rí naʼni nduwáanʼla.
23 Ndayóoʼ dí muriʼku̱u̱ i̱mba̱ nuxi̱ʼ xóo endxa̱ʼwa̱a̱ e̱dxa̱laʼ*
24 ndayóoʼ rí muriʼkumijnáa kayuuʼ xóo xa̱bu̱ nindxa̱la xó má Dios nandoo, rígi̱ nindxu̱u̱ májánʼ ga̱jma̱a̱ jmbu.
25 Xúgi̱ rí niniʼñááʼ xúgíʼ enii rí minduwaʼ, mámbáa gíʼmaa maʼthúu̱n rí gajkhun xa̱bu̱ numba ga̱jma̱a̱, numuu rí xúgiáanʼ ni̱ndxu̱lú mbóó xuwiʼ.
26 Índo̱ gákiʼnáanʼ, xákiéʼkala; xúniʼñáánʼ rí asndu marámáaʼ a̱jkha̱ʼ ka̱ʼníí kuwáanʼ rakiʼnáaʼla.
27 Xúniʼñáánʼ rí Gixa̱a̱ mato̱ʼo̱o̱ mu maʼniala mu̱ni̱ dí raʼkhí.
28 Bi̱ naʼni kúwáʼ ni xáʼni kúwáʼ itháan, gíʼmaa mañajunʼ gakhi̱i̱ mu maʼni mbá ñajunʼ májánʼ ga̱jma̱a̱ ñawúunʼ mu xúʼko̱ magiʼdoo mbá rí maxnúu bi̱ ndayóoʼ.
29 Xútala ajngáa rí tséjmaa.* Guta̱la dí maxnún tsiakii eʼwíinʼ índo̱ ndayóoʼ ga̱jma̱a̱ dí mambáñún bi̱ nudxawanla.
30 Ma̱ngaa xúni̱ dí maxtáa gíná espíritu santo* ndrígóo Dios, ga̱jma̱a̱ numuu ikhaa nindrígula sello mu xúʼko̱ makáwáanʼ mbiʼi rí majuiʼtsiwáanʼla.
31 Xúyexíi sia̱nʼ, xájmanguala, xákiʼnáanʼ, xúndxaʼwa, xájmala ajngáa dí maʼni gawúúnʼ eʼwíinʼ ma̱ngaa xúnila xúgíʼ enii dí ra̱májánʼ.
32 Rí gíʼmaa mu̱ni̱, ganindxa̱la májáanʼ a̱jkia̱la gajmiála eʼwíinʼ, gusngajmá dí nandala kuyamíjna̱, agáwíinʼ a̱jkia̱la kuyamíjna̱, gu̱ni̱ mba̱a̱ a̱jkia̱la kuyamíjna̱, xó má Dios niʼni mba̱a̱ a̱jkiu̱u̱n kaʼyala ga̱jma̱a̱ numuu Cristo.
Mbaʼa nota
^ O “xi̱ʼ”.
^ O “gaʼyee”, “bi̱ nuthi dí marigá”.
^ Náa ajngáa griego naʼthí, “xájngruigala”.
^ Náa ajngáa griego naʼthí, “espíritu ndrígóo ku̱ma̱ ndrígála”.
^ Náa ajngáa griego naʼthí, “niʼga”.
