Rí na̱jkha̱ inún Efesios 5:1-33
5 Guyaridáá Dios, numuu rí ikhaa nandoo kaʼyala xóo e̱ji̱i̱n
2 ga̱jma̱a̱ gajngruigala má xúʼko̱ náa kamba̱a̱ ndrígóo ngajua, xó má Cristo ma̱ngaa nindoo kaʼyulú ikháanʼ ga̱jma̱a̱ nixnáximinaʼ ga̱jma̱a̱ numulú xóo mbá rí najuixnájxi̱ ga̱jma̱a̱ mbá tsigijñaʼ rí ndataun eʼyoo Dios.
3 Gíʼmaa mu̱nila xóo eni̱ xa̱bu̱ bi̱ nduyamajkuíí Dios, nditháan xútamíjná ga̱jma̱a̱ numuu dí xa̱bu̱ nubúúnʼ xkawiʼ kayuuʼ gajmiún eʼwíinʼ,* ni má xúgíʼ enii rí mitsaga, o rí magua̱ʼa̱ maguaʼdáála.
4 Ma̱ngaa xúni̱ rí majtiʼ, ni xútha ajngáa rí tséjmaa mbá kayuu’, ni má ajngá mbi̱ji̱* rí mitsaga, nimbá dí rakáʼyoo. Rí phú gíʼmaa mu̱ni̱, guxna̱a̱la núma̱aʼ.
5 Ikháanʼ má ndu̱ya̱a̱ ga̱jma̱a̱ nakrua̱ʼa̱la májánʼ rí nimbáa bi̱ nabóo’ xkawiʼ kayuuʼ gajmíi̱n eʼwíinʼ,* nimbáa bi̱ mitsagaa, nimbáa bi̱ nagua̱ʼa̱ magiʼdoo dí nindxu̱u̱ xóo matayamajkhún xándú, magruigúu rí kaʼyoo náa Naʼtáñajunʼ* Cristo ga̱jma̱a̱ Dios.
6 Nimbáa xáʼni nduwáanʼla ga̱jma̱a̱ ajngáa dí ragíʼdoo numuu, ga̱jma̱a̱ numuu rígi̱ naʼni rí Dios makiʼnáa kaʼñún xa̱bu̱ bi̱ tsénimbu̱u̱n.
7 Ikha jngóo, xúnila xóo eni̱ ikhiin;
8 numuu rí nákha ginii nini̱ndxa̱la mikrína, mú rí xúgi̱ nindxa̱la aguʼ numuu rí kuwáanʼ mbóó gajmiála Tátá. Ikha jngóo gajngruigala xóo e̱ji̱i̱n aguʼ,
9 rí naxná aguʼ nindxu̱u̱ xúgíʼ enii rí májánʼ, rí jmbu ga̱jma̱a̱ rí gajkhun.
10 Gu̱ya̱a̱ má xúʼko̱ ndiéjunʼ rí phú nanigu̱u̱ʼ Tátá,
11 guniʼñááʼla ru̱ni̱ dí ragíʼdoo numuu dí rígá náa mikrína. Rí phú gíʼmaa mu̱ni̱ gusngajmá pa̱jnu.
12 Numuu rí asndu majti’ nindxu̱u̱ rí marata xúgíʼ rí ikhiin nuni̱ ngu̱ʼwa̱.
13 Mú aguʼ nasngájma xúgíʼ mu makujmaa pa̱jnu,* rí nasngájma nindxu̱u̱ aguʼ ga̱jma̱a̱ xúgíʼ rí nakujmaa nindxu̱u̱ aguʼ.
14 Xó má najuiʼthá: “Ikháán bi̱ nanuʼ, arajxu̱u̱nʼ, atujxa̱a̱ʼ náa majñúnʼ wajinʼ, ga̱jma̱a̱ Cristo mambiʼii náa ikháán”.
15 Ikha jngóo tsu̱máá wéñuʼ gúnila mu xúni̱ xóo nuni̱* xa̱bu̱ skágunʼ, gu̱nila xóo xa̱bu̱ bi̱ nduyáá,
16 gajmala májánʼ mbiʼi rí naguanúu,* numuu rí mbiʼi nindxu̱u̱ mingíjyúuʼ.
17 Ikhaa numuu rígi̱, guniʼñááʼ ranindxa̱la skágunʼ ga̱jma̱a̱ gakrua̱ʼa̱la májánʼ ndiéjunʼ rí nandoo Jeobá.*
18 Ma̱ngaa xájngáanʼla ga̱jma̱a̱ vino, numuu dí rúʼko̱ naʼni rí xúñewa̱a̱n dí mu̱ni̱; rí phú gíʼmaa mu̱ni̱, guguaʼdáála kájxi̱ espíritu.*
19 Guxnamíjnála tsiakii índo̱ gúni̱ salmos, índo̱ gúni̱ mba̱a̱ Dios ga̱jma̱a̱ ajmúú rí naxnúu gamajkhu, gu̱nila ajmúú ga̱jma̱a̱ gu̱ni̱ mba̱a̱ Jeobá* náa awúu̱n a̱jkia̱la,
20 guxnáa má xúʼko̱ núma̱aʼ Anu̱lú Dios ga̱jma̱a̱ numuu xúgíʼ náa mbiʼyuu Tátá ndrígúlú Jesucristo.
21 Gunimbala kuyamíjna̱, numuu rí nunimbala ku̱ya̱a̱ Cristo.
22 Gu̱ʼu̱ bi̱ ninuju̱nʼ gunimbu̱u̱n kuñún ajmbiu̱ún, xó má nunimbu̱u̱n kuyáá Tátá,
23 numuu rí xa̱biya̱ nindxu̱u̱ bi̱ kayá edxu̱u̱ náa a̱ʼgiu̱u̱, xó má Cristo kayá edxu̱u̱ náa nagimbíi̱n,* bi̱ niʼni kríyaaʼ xuwiʼ rígi̱.*
24 Xó má bi̱ nagimbíi̱n nunimbu̱u̱n kuyáá Cristo, xúʼko̱ má gu̱ʼu̱ ma̱ngaa ndayóoʼ munimbu̱u̱n kuñún ajmbiu̱ún náa xúgíʼ.
25 Xa̱bu̱ bi̱ ninigu̱nʼ, gaʼndala kuñu̱u̱n má xúʼko̱ guʼyalaʼ, xó má Cristo nandoo kaʼñún bi̱ nagimbíi̱n ma̱ngaa nixnáximinaʼ ga̱jma̱a̱ numún ikhiin,
26 niʼni rígi̱ mu maraʼwíin mani̱ndxu̱ún kiejuunʼ náa Dios ma̱ngaa niʼni kaʼwi̱ín ga̱jma̱a̱ iyaʼ ndrígóo ajngáa rí gajkhun,
27 mu bi̱ nagimbíi̱n mani̱ndxu̱ún mitsiʼñíin náa ikhaa, xánindxu̱ún mitsagiin, ni xágixturigi̱i̱n, nimbá dí rúʼko̱ xáguáʼdáá, gíʼmaa mani̱ndxu̱ún mikaʼwiin ga̱jma̱a̱ xáguáʼdáá nimbá aʼkhúún.
28 Xúʼko̱ má xa̱bu̱ bi̱ ninigu̱nʼ ndayóoʼ maʼndún kuñún má xúʼko̱ guʼñu̱ún xó má nandún kuyáá xuñúúnʼ. Xa̱biya̱ bi̱ nandoo kaʼyoo a̱ʼgiu̱u̱ xúʼko̱ má eyoo kaʼyaminaʼ ma̱ngaa,
29 numuu rí nimbáa na̱nguá ewiyu̱u̱ʼ kaʼyoo xuyuuʼ, rí naʼni naxnúu rí mi̱khu̱ ga̱jma̱a̱ nañewu̱u̱n májánʼ, xó má Cristo naʼni gajmíi̱n bi̱ nagimbíi̱n,
30 numuu rí ikháanʼ kaʼyulú náa xuyuuʼ.
31 “Ikha jngóo xa̱biya̱ maniñuuʼ anu̱u̱ ga̱jma̱a̱ ru̱dúu̱, i̱ndó a̱ʼgiu̱u̱ gáxtáa* ga̱jma̱a̱ mu nájmi̱i̱n maguánú mani̱ndxu̱ún mbóó xuwiʼ”.
32 Ajngáa ngu̱ʼwa̱ rí mitsúʼkháan rígi̱ nindxu̱u̱ mba̱a̱. Xúgi̱ xtáá rata̱la̱ ga̱jma̱a̱ numuu Cristo ma̱ngaa numún bi̱ nagimbíi̱n.
33 Ga̱jma̱a̱ numuu xúgíʼ rí ni̱tha̱, mámbáa rí ikháanʼ gíʼmaa maʼndoo kaʼyoo a̱ʼgiu̱u̱ xó má eyoo kaʼyaminaʼ ikhaa. Ma̱ngaa a̱ʼgu̱ gíʼmaa mbaʼyamajkuu wéñuuʼ ajmbio̱o̱.
Mbaʼa nota
^ O “ajngáa katsijma”.
^ O “Reino ndrígóo”.
^ O “nijuaxpríguíí”.
^ Náa ajngáa griego naʼthí, “xájngruigala”.
^ Náa ajngáa griego naʼthí, “gutsila tiempo rí naguanúu”.
^ O “xi̱ʼ”.
^ Rígi̱ nindxu̱u̱ congregación.
^ Ajngáa rígi̱ náa griego nandoo gáʼthúu̱n, maruwaminaʼ ga̱jma̱a̱ mbá dí mirakha.
