Rí na̱jkha̱ inún Efesios 6:1-24
6 E̱ji̱n, gunimbala má xúʼko̱ kuñu̱u̱n ana̱la ga̱jma̱a̱ rudála numuu dí rúʼko̱ nanigu̱u̱ʼ Tátá, ga̱jma̱a̱ nindxu̱u̱ jmbu.
2 “Atayamajkuíí ana̱a̱ʼ ga̱jma̱a̱ ru̱dáaʼ”. Rígi̱ nindxu̱u̱ timbá kiʼtáñajunʼ dí maʼni maguma tsájkuramáánʼ.
3 “Mu xúgíʼ rí gátani̱ magajnúu májánʼ ga̱jma̱a̱ maraxtaa mba̱yu̱u̱ʼ mbiʼi náa tsu̱du̱u̱ ku̱ba̱ʼ”.
4 Xabuanii,* xúni̱ rí makásnga̱ñu̱únʼ e̱jña̱la, guxprígún ga̱jma̱a̱ gunimbanuu xó má naʼthí ikha ndrígóo* Jeobá.*
5 Ñumbáá, gunimbala kuñu̱u̱n xa̱bu̱ numbaaʼ bi̱ ni̱ndxu̱ún patriáanla, gu̱ni̱ ga̱jma̱a̱ gamajkhu ma̱ngaa kañiiʼ a̱jkia̱la gúni̱, gu̱ni̱ rí asndu xóo nunimbala kuya̱a̱ Cristo.
6 Raʼkháa i̱ndó, índo̱ kúwá ruyala mu manigu̱u̱nʼ xa̱bu̱, gu̱ni̱ xóo ñumbáá ndrígóo Cristo bi̱ nuni̱ ga̱jma̱a̱ xúgíʼ a̱jkiu̱ún* rí nandoo Dios.
7 Gu̱ni̱ ga̱jma̱a̱ májánʼ ñajunʼ rí kaʼyala, asndu xóo rí nu̱ni̱ ñajuunʼ Jeobá* raʼkháa náa xa̱bu̱ú,
8 numuu rí ikháanʼ má ndu̱ya̱a̱ rí mámbáa má magruigúu rí Jeobá* maxnáa asndu ndiéjunʼ má rí májánʼ gáʼni, tséʼniuu á mu nindxu̱u̱ ñumbáá o na̱nguá.
9 Ga̱jma̱a̱ ikháanʼla bi̱ nutañajúúnʼ ñumbáá, gu̱niu̱u̱la má xúʼko̱ dí májánʼ ñumbiála, xúnimiñún, numuu rí ikhiin ga̱jma̱a̱ ikháanʼ má ndu̱ya̱a̱ rí mbáwíi bi̱ naʼtáñajunʼ xtáa mekhuíí ga̱jma̱a̱ ikhaa tséraʼwíin xa̱bu̱.
10 Rí iwáá kayuuʼ gaguaʼdáá má xúʼko̱ tsiakii ndrígóo Tátá numuu rí tsiakii ndrígóo nindxu̱u̱ mba̱a̱.
11 Guʼgíʼ mbá kájxi̱ ajua̱nʼ rí na̱ʼkha̱ náa Dios, mu xúʼko̱ xájngutíguanʼla náa tsáʼkhá dí nagrui̱ga̱ Gixa̱a̱;
12 numuu rí na̱nguá exmíjná gajmiúlú bi̱ gíʼdoo xuyuuʼ ga̱jma̱a̱ itsu̱u̱,* nagiʼdulú gajmiúlú xa̱bu̱ ñajunʼ bi̱ kuya̱ edxu̱u̱ náa numbaaʼ mikrína rígi̱, nagiʼdulú gajmiúlú xa̱bu̱ wéñiiʼ bi̱ kúwá mekhuíí.
13 Ikha jngóo guʼgíʼ mbá kájxi̱ ajua̱nʼ dí na̱ʼkha̱ náa Dios, mu maʼngala muraʼníí índo̱ gáʼkha̱nú mbiʼi dí ra̱májánʼ náa inala ga̱jma̱a̱ nda̱wa̱á dí niʼngala niraʼníí xúgíʼ rígi̱, guguajún gújkhúʼ.
14 Ikha jngóo gakuwáanʼla jmbu, guʼgíʼ má xúʼko̱ cinturón dí gajkhun, gaguʼwánla ajua̱nʼ dí nañewu̱u̱n tsúxtala rí nindxu̱u̱ jmbu
15 gajngráʼala raxtá* ga̱jma̱a̱ gakuwáanʼ xawii mu mutaraʼa ajngáa rí májánʼ dí na̱ʼkha̱ kayóo dí tsímáá.
16 Kámbá mbiʼi, gu̱ya̱ má xúʼko̱ escudo mba̱a̱ rí nindxu̱u̱ fe, rí mambáyala muraʼníí xúgíʼ ku̱dú* dí gíʼdoo agiuuʼ dí nakunguanʼ Gixa̱a̱.*
17 Ma̱ngaa gajmala casco dí maʼni káwáanʼ ga̱jma̱a̱ espada ndrígóo espíritu,* xóo muʼthá ajngá rawuunʼ Dios.
18 Ma̱ngaa gutajkáan* xúgíʼ mbiʼi ga̱jma̱a̱ tsiakii ndrígóo espíritu, gunda̱ʼa̱a̱ Dios ga̱jma̱a̱ mixtiʼkhu enii xóo gutajkáan. Ga̱jma̱a̱ numuu rúʼko̱ gakuwáanʼ xawii ga̱jma̱a̱ gutajkáan má xúʼko̱ ga̱jma̱a̱ numún xa̱bi̱i̱ Dios.
19 Gutajkáan ga̱jma̱a̱ numuʼ mangúún mu magúʼdoo ajngáa rí ma̱ta̱, ga̱jma̱a̱ xámiñuʼ ma̱ta̱ ajngáa ngu̱ʼwa̱ rí mitsuʼkáan dí nindxu̱u̱ ajngáa rí májánʼ,
20 dí Dios nikungu̱u̱nʼ ma̱ta̱, ikha jngóo kaxtoʼóʼ ga̱jma̱a̱ cadena, ma̱ngaa rí xámiñúnʼ ma̱ta̱ xó má giʼmún ma̱ta̱.
21 Mu ikháanʼla ma̱ngaa mbu̱ya̱a̱ xú káʼnii xtáá, Tíquico, mbáa ndxájulú bi̱ nandulú kuʼyáá ga̱jma̱a̱ nindxu̱u̱ jmbii náa ñajuunʼ Tátá, ikhaa maʼtála xúgíʼ rígi̱.
22 Nakuʼnguáanʼ náa ikháanʼla ga̱jma̱a̱ numuu rígi̱: Mu mbu̱ya̱a̱la xú káʼnii kúwáanʼxu ma̱ngaa mu maʼni̱i̱ a̱jkia̱la.
23 Nagúʼthu̱u̱n rí a̱ngiu̱lú makuwá tsímáá ga̱jma̱a̱ gaguaʼdáá ngajua náa fe rí na̱ʼkha̱ náa Dios bi̱ nindxu̱u̱ Anu̱lú ga̱jma̱a̱ náa Tátá Jesucristo.
24 Rí májánʼ wéñuuʼ a̱jkiu̱u̱n Dios garigá náa xúgíinʼ bi̱ nandún kuyáá Jesucristo bi̱ nindxu̱u̱ Tátá ndrígúlú ga̱jma̱a̱ mbá ngajua rí nditháan xámbáa.
Mbaʼa nota
^ Gi̱i̱ i̱ndó naʼthí ga̱jma̱a̱ numuu xa̱biya̱.
^ Náa ajngáa griego naʼthí, “matagiwánʼ ku̱ma̱ ndrígu̱ún náa”.
^ Náa ajngáa griego naʼthí, “eʼdi”.
^ O “cháda”.
^ O “flecha”.
^ Náa ajngáa griego naʼthí, “xa̱bu̱ Xkawi̱i̱ʼ”.
^ O “xi̱ʼ”.
^ O “gu̱ni̱ tsajkuun”.
