Esdras 1:1-11
1 Náa awúu̱n rí mbá tsiguʼ dí niʼtáñajunʼ Ciro rey ndrígóo Persia, Jeobá nixkajxi̱i̱ a̱jkiu̱u̱n* Ciro rey ndrígóo Persia mu maríya̱ʼ mbá xtángoo náa xúgíʼ xuajin rí niʼtáñajunʼ mu mambanúu ajngóo Jeobá dí niʼtáriyaʼ Jeremías. Xtángoo dí niʼnirámáʼ naʼthí:
2 “Rígi̱ nindxu̱u̱ dí naʼthí Ciro rey ndrígóo Persia: ‹Jeobá, Dios bi̱ naʼtáñajunʼ mekhuíí nixniúʼ mbá xúgíinʼ xa̱bu̱ ñajunʼ bi̱ kúwá náa tsu̱du̱u̱ ku̱ba̱ʼ ga̱jma̱a̱ nirajkuáa ñawúnʼ dí ma̱ni̱ mbá guʼwá náa Jerusalén, dí rígá náa Judá.
3 Ikha jngóo asndu tsáa má dí ikháanʼ bi̱ nindxu̱u̱ xa̱bu̱ xuajñuu, Dios ndrígóo gáxtáa ga̱jma̱á nindxu̱u̱, ma̱ngaa gaʼga̱a̱ náa Jerusalén dí rígá náa Judá, gaʼni májáanʼ goʼwóo Jeobá, Dios ndrígóo Israel. Ikhaa nindxu̱u̱ Dios bi̱ gajkhun, rí goʼwóo nirígá náa Jerusalén.*
4 Asndu tsáa má bi̱ xtáa xóo xa̱bu̱ na̱ʼkha̱á tséʼniuu asndu náá, rí gumbáyíí bi̱ kúwi̱i̱n mijngii gajmíi̱n.* Guxnáá oro, plata, rí guáʼdáá, xujkhúʼ ga̱jma̱a̱ tsigijñaʼ dí na̱ʼkha̱ a̱jkiu̱ún muxna, mu maguma̱a̱ goʼwóo Dios bi̱ gajkhun, dí nirígá náa Jerusalén›”.
5 Ikhú bi̱ kuya̱ edxu̱u̱ náa mámbá guʼwíin xa̱bu̱ Judá ga̱jma̱a̱ Benjamín, ndxajkun gajmiún levitas, niniratamijná mu matangi̱i̱n ga̱jma̱a̱ muni̱ májáanʼ goʼwóo Jeobá dí nirígá náa Jerusalén, xúgíinʼ ikhiin Dios bi̱ gajkhun nixkajxi̱i̱ a̱jkiu̱ún muni̱ rígi̱.
6 Ga̱jma̱a̱ bi̱ kúwi̱i̱n mijngii gajmiún nimbañúún nixnún,* rí niguma ga̱jma̱a̱ oro ma̱ngaa rí niguma ga̱jma̱a̱ plata, rí guáʼdáá, xujkhúʼ, i̱ʼwáʼ rí gíʼdoo numuu ga̱jma̱a̱ tsigijñaʼ dí ni̱ʼkha̱ a̱jkiu̱ún muxna.
7 Ma̱ngaa rey Ciro nikuʼma rí maʼga̱a̱ xúgíʼ rí najmaa náa goʼwóo Jeobá dí Nabucodonosor niguwíi náa Jerusalén ga̱jma̱a̱ ni̱jkha̱ kagu̱u̱ náa goʼwóo dios ndrígóo.
8 Rey Ciro ndrígóo Persia nixnúu ñajunʼ Mitrídates, bi̱ nindxu̱u̱ tesorero* dí maguwíi rígi̱ ga̱jma̱a̱ maʼnirámáʼ náa mbá i̱yi̱i̱ʼ rí maʼga inuu Sesbazar,* bi̱ kayá edxu̱u̱ náa xuajin chíʼgíiʼ* ndrígóo Judá.
9 Rígi̱ ninindxu̱u̱ dí nigumarámáʼ náa i̱yi̱i̱ʼ: 30 Canasta rí niguma ga̱jma̱a̱ oro, 1,000 canasta rí niguma ga̱jma̱a̱ plata ma̱ngaa fróʼóó i̱mbá 29 canasta,
10 xua̱a̱ rí majkhaʼ rí niguma ga̱jma̱a̱ oro nindxu̱u̱ mbá 30, ma̱ngaa rí niguma ga̱jma̱a̱ plata nindxu̱u̱ 410 ga̱jma̱a̱ fróʼóó i̱mbá 1,000 i̱ʼwáʼ rí majmaa.
11 Mbá xúgíʼ rí majmaa ninindxu̱u̱ 5,400 rí niguma ga̱jma̱a̱ oro ma̱ngaa dí plata. Sesbazar ni̱jkha̱a̱ kagu̱u̱ xúgíʼ rígi̱, índo̱ nitangiín náa Jerusalén bi̱ ni̱jkha̱ kiʼdiin náa Babilonia.
Mbaʼa nota
^ Náa ajngáa hebreo naʼthí, “nixkajxi̱i̱ espíritu ndrígóo”.
^ O mbáa “bi̱ xtáa náa Jerusalén”.
^ Náa ajngáa hebreo naʼthí, “xa̱bu̱ bi̱ kúwá náa xtáa”.
^ Náa ajngáa hebreo naʼthí, “nini̱ gújkhúʼ ñawúúnʼ ga̱jma̱a̱”.
^ O “bi̱ naguduun mbújkha̱a̱”.
^ O “tribu”.
