Esdras 10:1-44
10 Esdras naʼtájkháan ga̱jma̱a̱ naʼthí pa̱jnu̱ ga̱jma̱a̱ numuu aʼkhá rígi̱, kambasmu̱ʼu̱u̱n xtáa rambiyaʼ náa inuu goʼwóo Dios bi̱ gajkhun. Ikhú nigímbíin mbájndi mbaʼin xa̱bekha, gu̱ʼu̱ ga̱jma̱a̱ e̱ji̱n bi̱ kúwá náa Israel. Xa̱bu̱ mangiin kúwá rumbiyaʼ wéñuuʼ.
2 Secanías a̱ʼdióo Jehiel, bi̱ naguwáʼ náa e̱ji̱i̱n Elam, niʼthúu̱n Esdras: “Ikháanʼxu̱ táguajún jmbu náa Dios ndrígúxu̱ índo̱ nidiin* gu̱ʼu̱ bi̱ naguwáʼ náa i̱ʼwáʼ xuajin dí rígá náa ku̱ba̱ʼ rígi̱. Rígá xóó dí májánʼ magíʼnuu Israel.
3 Gambanúlú gajmiúlú Dios ndrígúlú ga̱jma̱a̱ guxuʼmíin magúun xúgíinʼ gu̱ʼu̱ buʼko̱ gajmiún e̱jñu̱ún. Mu xúʼko̱ munimbulú ikha ndrígóo Jeobá, ikháánʼlú ga̱jma̱a̱ bi̱ nduyamajkuíí ga̱jma̱a̱ xúgíʼ a̱jkiu̱ún* kiʼtáñajuunʼ ndrígóo Dios ndrígúlú. Guʼni xó má naʼthí náa Xtángoo.
4 Atujxa̱a̱ʼ, ikháán kaʼyaaʼ matanimbáníí xkujndu rígi̱. Ikháanʼxu̱ kuwáanʼ ga̱jma̱á nindxa̱a̱ʼ. Gakhi̱i̱ a̱jkia̱a̱nʼ gátani̱ ga̱jma̱a̱ atanimbáníí”.
5 Ikha jngóo Esdras nitu̱jxu̱u̱ ga̱jma̱a̱ niʼthún bi̱ kuya̱ edxu̱u̱ náa ndxajkun, levitas ga̱jma̱a̱ xúgíinʼ xa̱bu̱ Israel rí muxna ajngún dí muni̱ rí nijuiʼthá maguma. Ikhiin nixna ajngún rí munimbáníí.
6 Esdras xtáa náa inuu goʼwóo Dios bi̱ gajkhun ga̱jma̱a̱ ikhí ni̱jkha̱ náa cuarto* dí Jehohanán a̱ʼdióo Eliasib gíʼdoo náa guʼwá rí nduyamajkuíí Dios. Ni̱jkha̱ ikhí, mú tákuiʼtsu ni má tágáan iyaʼ numuu rí nixtáa ngíná ga̱jma̱a̱ numuu rí táguájun jmbu bi̱ nitangiín náa ni̱jkha̱ kiʼdiin.
7 Ikhú nixuʼma ajngáa náa xúgíʼ Judá ga̱jma̱a̱ náa xúgíʼ Jerusalén rí xúgíinʼ bi̱ nitangiín náa ni̱jkha̱ kiʼdiin mbaʼyóoʼ magimbíin náa Jerusalén.
8 Xó má rí nimbánúún príncipes ga̱jma̱a̱ xabuanii, á mu mbáa tséjkha̱ rí ajtsú mbiʼi, xa̱bu̱ buʼko̱ muxkriya̱a̱ʼ náa kúwá bi̱ nitangiín ga̱jma̱a̱ xúgíʼ rí gíʼdoo magajta káyííʼ.
9 Ikha jngóo xúgíinʼ xa̱bekha bi̱ kúwá náa Judá ga̱jma̱a̱ náa Benjamín nigimbíin náa Jerusalén índo̱ niʼni ajtsú mbiʼi: Mbiʼi 20 ñajunʼ gu̱nʼ rí mijna gu̱wa̱ʼ igu̱nʼ. Xúgíinʼ xa̱bu̱ xuajin, nitri̱gi̱i̱n náa rexo̱o̱ goʼwóo Dios bi̱ gajkhun, niguíʼiin ga̱jma̱a̱ numuu xkujndu rí mijngíjyúu rígi̱ ma̱ngaa numuu dí ra̱ʼkhá tháán exnúu ruʼwa.
10 Ikhú ndxajkun Esdras nitu̱jxu̱u̱ ga̱jma̱a̱ niʼthún: “Ikháanʼla táguajún jmbu índo̱ nidiin gu̱ʼu̱ bi̱ naguwaáʼ ga̱jma̱a̱ xúʼko̱ niʼni rí maʼni itháán mba̱a̱ aʼkhúun Israel.
11 Ikha jngóo gutha̱a̱n Jeobá ga̱jma̱a̱ numuu aʼkhála, Dios ndrígu̱ún wajin xiʼñála ga̱jma̱a̱ gu̱ni̱mbala kuya̱a̱. Gu̱ni̱ wajímijná náa xa̱bu̱ bi̱ kúwá náa ku̱ba̱ʼ rígi̱ ga̱jma̱a̱ guxuʼmíin magúun guʼyala bi̱ naguwaáʼ”.
12 Xúgíinʼ xa̱bu̱ xuajin nithi ga̱jma̱a̱ mbá aʼwá gakhi̱i̱: “Kaʼyuxu̱ munimbáníí xó má ikháán niratá.
13 Mú kúwíin mbaʼin xa̱bu̱ ga̱jma̱a̱ kuwáánʼlú náa mbiʼi ruʼwa. Na̱nguá kaʼnii maguanúxu rexa̱a̱, numuu rí xkujndu rígi̱, xámbánuu káaʼ mbá mbiʼi o a̱jma̱ mbiʼi, numuu dí ra̱ʼkhá tháán nikiéʼkuxuʼ.
14 Mbá péñu, atatsíñááʼ rí príncipes ndrígúxu̱ maguanún ga̱jma̱a̱ xtiʼkuxu mu mbuyáá xóo gámbánúu mu xúʼko̱ xúgíinʼ xa̱bekha bi̱ kúwíin náa xuajñuxu bi̱ nidiin gu̱ʼu̱ bi̱ naguwaáʼ, maguwáʼ gi̱i̱ mbiʼi rí ikháanʼ má gúʼgíʼ, mbóó gáguwáʼ gajmiún xabuanii ga̱jma̱a̱ bi̱ nunimbaníí xkujndu náa mámbá xuajin, asndu gáwi̱ji̱ rakásngáñu̱u̱ʼ Dios ndrígúxu̱ ga̱jma̱a̱ numuu rígi̱”.
15 Mú Jonatán a̱ʼdióo Asahel ga̱jma̱a̱ Jahzeya a̱ʼdióo Ticvá táʼndún maguma rígi̱, xúʼko̱ má Mesulam ga̱jma̱a̱ Sabetái bi̱ nindxu̱ún levitas mangiin táʼndún maguma rígi̱.
16 Ikha jngóo xúgíinʼ bi̱ nitangiín náa ni̱jkha̱ kiʼdiin ninimbaníí xó má nimbánúún. Ndxajkun Esdras ga̱jma̱a̱ bi̱ kuya̱ edxu̱u̱ náa mámbá guʼwíin xa̱bu̱, xúgíinʼ bi̱ kiʼnirámáʼ mbiʼñún, nigímbíin wájíʼ rí maʼni timbá mbiʼi dí gu̱wa̱ʼ igu̱nʼ mú mbuyáá itháan ga̱jma̱a̱ numuu xkujndu rígi̱.
17 Timbá mbiʼi rí timbá igu̱nʼ niguámbu̱u̱n ninimbaníí xkujndu rígi̱ ga̱jma̱a̱ numún xúgíinʼ xa̱bekha bi̱ nidiin gu̱ʼu̱ bi̱ naguwaáʼ.
18 Nikujmaa rí tikhuun e̱jñu̱ún ndxajkun nidiin gu̱ʼu̱ bi̱ naguwaáʼ. E̱ji̱i̱n Jesúa a̱ʼdióo Jehozadac ma̱ngaa e̱ji̱i̱n a̱ngui̱i̱n, ninindxu̱u̱ Maaseya, Eliezer, Jarib ga̱jma̱a̱ Guedalías.
19 Ikhiin nixudami̱jna̱ dí muxuʼmiin magúun guʼñún. Ma̱ngaa mbaʼyóoʼ muxnajxi̱i̱ mbáa mugu̱ e̱jmba̱a̱ ga̱jma̱a̱ numuu rí nikiéʼkhun.
20 E̱ji̱i̱n Imer ninindxu̱u̱ Hananí ga̱jma̱a̱ Zebadías,
21 e̱ji̱i̱n Harim ninindxu̱u̱ Maaseya, Elías, Semaya, Jehiel ga̱jma̱a̱ Uzías,
22 e̱ji̱i̱n Pasjur ninindxu̱u̱ Elioenái, Maaseya, Ismael, Netanel, Jozabad ga̱jma̱a̱ Eleasá.
23 Ga̱jma̱a̱ bi̱ nindxu̱ún levitas: Jozabad, Simeí, Quelaya (xóo muʼthá, Quelitá), Petahías, Judá ga̱jma̱a̱ Eliezer,
24 bi̱ nuni̱ ajmúú ninindxu̱u̱ Eliasib ga̱jma̱a̱ bi̱ nuñewa̱a̱n xkrugua ninindxu̱u̱ Salum, Télem ga̱jma̱a̱ Urí.
25 E̱ji̱i̱n Parós bi̱ ninindxu̱ún israelitas ninindxu̱u̱ Ramías, Izías, Malkiya, Mijamín, Eleazar, Malkiya ga̱jma̱a̱ Benaya,
26 e̱ji̱i̱n Elam ninindxu̱u̱ Matanías, Zacarías, Jehiel, Abdí, Jeremot ga̱jma̱a̱ Elías,
27 e̱ji̱i̱n Zatú, ninindxu̱u̱ Elioenái, Eliasib, Matanías, Jeremot, Zabad ga̱jma̱a̱ Azizá,
28 e̱ji̱i̱n Bebái ninindxu̱u̱ Jehohanán, Hananías, Zabái ga̱jma̱a̱ Atlái,
29 e̱ji̱i̱n Baní ninindxu̱u̱ Mesulam, Maluc, Adaya, Jasub, Seal ga̱jma̱a̱ Jeremot,
30 e̱ji̱i̱n Pahat-Moab ninindxu̱u̱ Adná, Kelal, Benaya, Maaseya, Matanías, Bezalel, Binuí ga̱jma̱a̱ Manasés,
31 e̱ji̱i̱n Harim ninindxu̱u̱ Eliezer, Isiya, Malkiya, Semaya, Shimeón,
32 Benjamín, Maluc ga̱jma̱a̱ Semarías,
33 e̱ji̱i̱n Hasum ninindxu̱u̱ Matenái, Matatá, Zabad, Elifélet, Jeremái, Manasés ga̱jma̱a̱ Simeí,
34 e̱ji̱i̱n Baní ninindxu̱u̱ Maadái, Amram, Uel,
35 Benaya, Bedeya, Kelúhi,
36 Vanías, Meremot, Eliasib,
37 Matanías, Matenái ga̱jma̱a̱ Jaasú,
38 e̱ji̱i̱n Binuí ninindxu̱u̱ Simeí,
39 Selemías, Natán, Adaya,
40 Macnadebái, Sasái, Sharái,
41 Azarel, Selemías, Semarías,
42 Salum, Amarías ga̱jma̱a̱ José,
43 ga̱jma̱a̱ e̱ji̱i̱n Nebo ninindxu̱u̱ Jeiel, Matitías, Zabad, Zebiná, Jadái, Joel ga̱jma̱a̱ Benaya.
44 Xúgíinʼ ikhiin nidiin gu̱ʼu̱ bi̱ naguwaáʼ ga̱jma̱a̱ nixuʼmiin maguáan ikhiin gajmiún e̱jñu̱ún.
Mbaʼa nota
^ O “nijkuá kudíinxu náa guʼwúxu”.
^ Náa ajngáa hebreo naʼthí, “naguíʼiin náa inuu”.
^ O “náa nupiʼtsu”.
