Esdras 3:1-13
3 Índo̱ niʼni juwan igu̱nʼ, israelitas kúwíin má náa xuajñún, xúgíinʼ nigimbíin náa Jerusalén ga̱jma̱a̱ mbóó numuu.
2 Jesúa a̱ʼdióo Jehozadac ga̱jma̱a̱ a̱ngui̱i̱n bi̱ nindxu̱ún ndxajkun, xó má Zorobabel a̱ʼdióo Sealtiel ga̱jma̱a̱ a̱ngui̱i̱n, nigíʼdi̱i̱ nini̱ májáanʼ náa nakarámáʼ tsigijñaʼ ndrígóo Dios ndrígu̱ún xa̱bu̱ Israel, mu muxnajxi̱ tsigijñaʼ dí mikarámáʼ, xó má kiʼniraʼmáʼ náa Xtángoo ndrígóo Moisés, xa̱bi̱i̱ Dios bi̱ gajkhun.
3 Maski ajndu nimíñúún nini̱ xa̱bu̱ xuajin bi̱ kúwá mijngii, nini̱i̱ náa nakarámáʼ tsigijñaʼ, náa má gíʼ nákha ginii. Nda̱wa̱á nigíʼdi̱i̱ nixnájxi̱ tsigijñaʼ gamajkhu dí mikarámáʼ náa inuu Jeobá: Tsigijñaʼ dí nuxnajxi̱ miʼcha̱ ga̱jma̱a̱ tsigijñaʼ dí nuxnajxi̱ wakíʼ.
4 Ikhú niniri̱ya̱a̱ʼ Ndxo̱o̱ guʼwá xtúguá,* xó má kiʼniraʼmáʼ ga̱jma̱a̱ xúgíʼ mbiʼi nixnajxi̱ tsigijñaʼ dí nakarámáʼ, xó má kaʼyoo mixnájxi̱ mámbá mbiʼi.
5 Nda̱wa̱á nixnajxi̱ tsigijñaʼ dí nakarámáʼ tséjtsi mbiʼi, ma̱ngaa nixnajxi̱ tsigijñaʼ índo̱ nagi̱ʼi̱ gu̱nʼ rudiiʼ ga̱jma̱a̱ xúgíʼ tsigijñaʼ rí najuixnájxi̱ náa ndxa̱a̱ ndrígóo Jeobá dí mitsúʼkháan, xó má tsigijñaʼ rí na̱ʼkha̱ a̱jkiu̱ún muxna, asndu tsáa bi̱ nandoo maxnúu Jeobá.
6 Asndu timbá mbiʼi dí maʼni juwan igu̱nʼ nigíʼdi̱i̱ nixnajxi̱ tsigijñaʼ gamajkhu dí nakarámáʼ náa inuu Jeobá, maski ajndu xóó tséwi̱ji̱ rajkhúu náa guʼwá rí nduyamajkuíí Jeobá.
7 Ikhú nixnún mbújkha̱a̱ bi̱ nuxui̱ʼta̱ itsí ga̱jma̱a̱ bi̱ nuni̱ xúgíʼ enii ñajunʼ dí mitsaanʼ.* Ma̱ngaa nixnún ganitsu, vino, aceite bi̱ sidonios ga̱jma̱a̱ bi̱ tirios mu magún kudúún ixi̱ cedro dí rígá náa Líbano asndu náa Jope, manújngún kudúún xígií náa lamáa,* xó má niʼtáñajunʼ rey Ciro ndrígóo Persia.
8 Dí maʼni a̱jma̱ tsiguʼ dí niguáʼnú náa goʼwóo Dios bi̱ gajkhun náa Jerusalén, dí maʼni a̱jma̱ igu̱nʼ, Zorobabel a̱ʼdióo Sealtiel ga̱jma̱a̱ Jesúa a̱ʼdióo Jehozadac nigíʼdi̱i̱ niñajunʼ mbóó gajmiún a̱ngiu̱ún, ndxajkun, levitas ga̱jma̱a̱ xúgíinʼ bi̱ nitangiín náa Jerusalén bi̱ ni̱jkha̱ kiʼdiin. Nirajkua̱a̱ ñawúúnʼ levitas bi̱ guáʼdáá itháan dí 20 tsigúúnʼ mu mbuyáá xóo eguma ñajunʼ náa goʼwóo Jeobá.
9 Ikha jngóo Jesúa gajmíi̱n e̱ji̱i̱n ma̱ngaa a̱ngui̱i̱n, Cadmiel gajmíi̱n e̱ji̱i̱n, bi̱ naguwáʼ náa e̱ji̱i̱n Judá, nigimbíin mu muxnún ikha bi̱ kúwá ruñajunʼ náa goʼwóo Dios bi̱ gajkhun. Ma̱ngaa nigimbíin e̱ji̱i̱n Henadad gajmiún e̱jñu̱ún ma̱ngaa a̱ngui̱i̱n, bi̱ mangiin nindxu̱ún levitas.
10 Índo̱ bi̱ niñajunʼ nigíʼdi̱i̱ nigíʼ rajkúu guʼwá náa nduyamajkuíí Jeobá, ndxajkun kugíʼ xtíin dí nuni̱ ga̱jma̱a̱ ñajunʼ ma̱ngaa nidiégún trompeta, levitas ga̱jma̱a̱ e̱ji̱i̱n Asaf nidiégún címbalos. Ikhiin niguájun mu muni̱ mba̱a̱ Jeobá, xó má ikha rí nixná rey David ndrígóo Israel.
11 Nigíʼdi̱i̱ nini̱ mba̱a̱ Jeobá ga̱jma̱a̱ nixnáa núma̱aʼ. Mámbá tungoo nini̱ ajmúú: “Numuu dí ikhaa nindxu̱u̱ májáanʼ, nandoo kaʼyoo* Israel asndu kámuu”. Nda̱wa̱á xúgíinʼ xa̱bu̱ xuajin nigíʼdi̱i̱ nixujxi̱ aʼwún ga̱jma̱a̱ nini̱ mba̱a̱ Jeobá, numuu rí nigi̱ʼi̱ rajkhúu goʼwóo Jeobá.
12 Mbaʼin ndxajkun, levitas, bi̱ kuya̱ edxu̱u̱ náa mámbá guʼwíin xa̱bu̱ ga̱jma̱a̱ bi̱ nindxu̱ún má xabuanii bi̱ ndiyáá má xú káʼnii nindxu̱u̱ guʼwá dí nirígá nákha ginii, nigíʼdi̱i̱ nimbi̱ya̱ʼ gakhi̱i̱ índo̱ ndiyáá dí nigi̱ʼi̱ rajkhúu guʼwá. Mú mbaʼin nigi̱ʼdi̱i̱ nindxa̱ʼwa̱ ga̱jma̱a̱ xúgíʼ tsiaki̱i̱ ndrígu̱ún numuu rí nikúwá gagi.
13 Asndu rakáʼnii ma̱ta̱ya̱a̱ á mu numbi̱ya̱ʼ o nundxa̱ʼwa̱ rí nadxúún. Ra̱ʼkhá tháán gakhi̱i̱ endxa̱ʼwa̱ xa̱bu̱ asndu mitsínguánʼ ewán.
