Esdras 4:1-24
4 Xa̱bu̱ sia̱nʼ ndrígóo Judá ga̱jma̱a̱ Benjamín nidxawíín rí bi̱ ni̱jkha̱ kiʼdiin nitangi̱i̱n, kúwá runi̱ mbá guʼwá náa mbuyamajkuíí Jeobá, Dios ndrígóo Israel.
2 Mbá nacha̱ nigún kanuu náa Zorobabel ga̱jma̱a̱ bi̱ kuya̱ edxu̱u̱ náa mámbá guʼwíin xa̱bu̱, ikhiin nithúún: “Guniʼñúxuʼ muñajunʼ ga̱jma̱á nindxa̱la. Mangáanʼxu̱ nduyamajkuííxu* Dios ndrígala ga̱jma̱a̱ nuxnajxi̱ tsigijñaʼ asndu nákha mbiʼi dí rey Esar-Hadón ndrígóo Asiria ni̱ʼkha̱ kaguáanʼxu̱ náa mbaaʼ rígi̱”.
3 Mú Zorobabel, Jesúa ga̱jma̱a̱ eʼwíinʼ bi̱ kuya̱ edxu̱u̱ náa mámbá guʼwíin xa̱bu̱ Israel, nithúún: “Ikháanʼla xúmbáyuxu̱ mu̱ni̱i̱xu̱ goʼwóo Dios ndrígúxu̱. I̱ndó má ikháanʼ gúni̱i̱xu̱ goʼwóo Jeobá, Dios ndrígóo Israel, xó má nikuʼmáanʼxu̱ mu̱ni̱ rey Ciro, rey ndrígóo Persia”.
4 Ikhú xa̱bu̱ bi̱ kúwá mijngii, nini̱ rí judíos majmáa a̱jkiu̱ún* má xúʼko̱ ga̱jma̱a̱ ninimiñún mu xúʼko̱ xúni̱ májáanʼ guʼwá.
5 Ndiñíinʼ bi̱ muxnún consejo mu xágájnuu májánʼ awan rí kúwá rundxaʼwamíjna̱ muni̱ asndu náa xúgíʼ mbiʼi rí nixtáa raʼtáñajunʼ rey Ciro ndrígóo Persia asndu índo̱ nigíʼdu̱u̱ niʼtáñajunʼ rey Darío ndrígóo Persia.
6 Índo̱ nigíʼdu̱u̱ niʼtáñajunʼ rey Asuero, ninirámáʼ mbá i̱yi̱i̱ʼ náa nini̱ tsu̱du̱ún xa̱bu̱ Judá ga̱jma̱a̱ Jerusalén.
7 Mbiʼi rí nixtáa raʼtáñajunʼ rey Artajerjes ndrígóo Persia, Bislam, Mitrídates ga̱jma̱a̱ Tabeel ma̱ngaa xó má eʼwíinʼ a̱ngui̱i̱n niniraʼmáʼ mbá i̱yi̱i̱ʼ náa inuu rey Artajerjes. Ikhiin nitajuíi náa ajngáa arameo ga̱jma̱a̱ niniraʼmáʼ ga̱jma̱a̱ ajngáa arameo.*
8 *Rehúm, mbáa bi̱ gíʼdoo mbá ñajunʼ mba̱a̱ náa xa̱bu̱ ñajunʼ ga̱jma̱a̱ Simsái bi̱ nindxu̱u̱ secretario niniraʼmáʼ náa inuu rey Artajerjes náa nini̱ tsu̱di̱i̱ Jerusalén.
9 (I̱yi̱i̱ʼ rígi̱ niʼnirámáʼ Rehúm, mbáa bi̱ gíʼdoo mbá ñajunʼ mba̱a̱ náa xa̱bu̱ ñajunʼ, Simsái bi̱ nindxu̱u̱ secretario ga̱jma̱a̱ eʼwíinʼ a̱ngui̱i̱n, jueces ga̱jma̱a̱ xa̱bu̱ ñajunʼ bi̱ na̱nguá guáʼdáá wéñuuʼ numún, secretarios, xuajin Erec, xa̱bu̱ babilonios, xa̱bu̱ bi̱ kúwi̱i̱n náa Susa, xóo muʼthá bi̱ nindxu̱ún elamitas
10 ga̱jma̱a̱ i̱ʼwáʼ xuajin dí ni̱jkha̱ kiʼdiin niʼni Asnapar bi̱ gíʼdoo numuu ga̱jma̱a̱ najmaʼniiʼ, mu makuwíin náa xuajin ndrígóo Samaria, ma̱ngaa eʼwíinʼ xa̱bu̱ bi̱ kúwi̱i̱n xígií náa narámaaʼ a̱jkha̱ʼ* náa mañu Éufrates.*
11 Rígi̱ nindxu̱u̱ mbá copia ndrígóo i̱yi̱i̱ʼ dí nixuʼma).
“Rey Artajerjes rígi̱ nindxu̱u̱ dí nuxuʼma xa̱bia̱a̱ʼ bi̱ kúwá xígií náa narámaaʼ a̱jkha̱ʼ náa mañu Éufrates:
12 Nutanxu rey, rí judíos bi̱ nigájnaán náa xtaa, nitsima̱án náa kúwáanʼxu, niguánúu má náa Jerusalén. Ikhiin kúwá runi̱i̱ xuajin rí tséʼnimbo̱o̱ ga̱jma̱a̱ bi̱ ra̱májáanʼ, ma̱ngaa nagún raguámbu̱u̱n runi̱ xtájtsí ga̱jma̱a̱ nutsua̱ju̱u̱n rajkhúu.
13 Ma̱ngaa nutanxu rey, rí á mu nuni̱ májáanʼ xuajin ga̱jma̱a̱ naguámbúun runi̱i̱ xtájtsí ní xúni̱ numáá xúgíʼ rí kaʼyoo ga̱jma̱a̱ i̱ʼwáʼ rí gánda̱ʼa̱a̱ rey. Ga̱jma̱a̱ rígi̱ maʼni rí ni xáxtagimbóó mba̱a̱ mbújkha̱a̱ rí maʼga inún reyes.
14 Rí nuda̱a̱xu na̱ʼkha̱ náa guʼwá rí naratañájunʼ* ga̱jma̱a̱ ra̱májánʼ nindxu̱u̱ rí muniʼñááʼ rí magíʼnuu mbá dí ra̱májánʼ rey. Ikha jngóo nuxuʼmáxuʼ i̱yi̱i̱ʼ rígi̱ mu ma̱ta̱ya̱a̱ rey,
15 ga̱jma̱a̱ majuiʼyáá xóó itháan náa libro rí nixtagijxi̱i̱ náa niniraʼmáʼ wajin xiʼñáaʼ. Ikhí ma̱ta̱ya̱a̱ rí xuajin rígi̱ nindxu̱u̱ mbá xuajin rí tséʼnimbo̱o̱, nuni̱ rí magíʼnún dí raʼkhí reyes ga̱jma̱a̱ mbaʼa xuajin ma̱ngaa ikhí nixuximi̱jna̱ asndu nákha wajyúuʼ. Numuu rúʼko̱ jngóo niguma gámbáa.
16 Nu̱ta̱nʼxu̱ rey, rí á mu naguma májáanʼ xuajin ga̱jma̱a̱ nawájxi xtájtsí, ikhú ni xáratañéjuíínʼ nimbá xuajin dí rígá xígií náa narámaaʼ a̱jkha̱ʼ náa mañu Éufrates”.
17 Rey niriʼñuu Rehúm, mbáa bi̱ gíʼdoo mbá ñajunʼ mba̱a̱ náa xa̱bu̱ ñajunʼ ga̱jma̱a̱ Simsái bi̱ nindxu̱u̱ secretario, xó má eʼwíinʼ a̱ngui̱i̱n bi̱ kúwá náa Samaria ga̱jma̱a̱ xúgíinʼ xa̱bu̱ bi̱ kúwá xígií náa narámaaʼ a̱jkha̱ʼ náa mañu Éufrates:
“¡Narajxáanʼla!
18 Niraxnuu kaʼwu* i̱yi̱i̱ʼ dí nixuʼmála náa inuxu̱ʼ.
19 Ikhúún nitañajunʼ rí majuiʼyáá xóó itháan, ga̱jma̱a̱ nijuiʼyáá rí asndu nákha wajyúuʼ, xuajin rúʼko̱ tséʼnimbo̱o̱ kaʼñún reyes ga̱jma̱a̱ rí ikhaa mbaʼa nuthu nikujximínáʼ wéñuuʼ.
20 Nikúwíin mbaʼin reyes bi̱ niguáʼdáá tsiaki̱i̱ náa Jerusalén bi̱ nitañajunʼ náa xúgíʼ xuajin dí rígá xígií náa narámaaʼ a̱jkha̱ʼ náa mañu Éufrates, niruma xúgíʼ rí kaʼyoo ga̱jma̱a̱ i̱ʼwáʼ mbújkha̱a̱ dí ninda̱ʼa̱.
21 Ikha jngóo gutañájúúnʼ xa̱bu̱ rí mutsi̱ji̱ ñajunʼ ga̱jma̱a̱ rí xúni̱ májáanʼ xuajin asndu índo̱ ikhúún gátha.
22 Tsumáá lá gúni, mu xúniʼñáánʼ dí rígi̱ gáʼni rí magíʼnuu itháan dí raʼkhí rey”.
23 Nda̱wa̱á rí nigixnuu copia ndrígóo i̱yi̱i̱ʼ dí rey Artajerjes nikuʼma inuu Rehúm, Simsái bi̱ nindxu̱u̱ secretario ga̱jma̱a̱ eʼwíinʼ a̱ngui̱i̱n, ikhiin nigún mbá nacha̱ náa Jerusalén ga̱jma̱a̱ nithúún judíos rí muniña̱a̱ʼ ñajunʼ rí nuni̱.
24 Mbiʼi rúʼko̱ niwi̱ji̱ rí naguma májáanʼ goʼwóo Dios, dí rígá náa Jerusalén, ga̱jma̱a̱ niwi̱ji̱ asndu ragajma tsiguʼ dí niʼtáñajunʼ rey Darío ndrígóo Persia.
Mbaʼa nota
^ Náa ajngáa hebreo naʼthí, “nduʼyáaʼxu̱”.
^ Náa ajngáa hebreo naʼthí, “ninii guabaʼ ñawúúnʼ”.
^ O mbáa “Nigumarámáʼ ga̱jma̱a̱ ajngáa arameo nda̱wa̱á nijuiʼtájuíi”.
^ O “oeste”.
^ O “nindxu̱u̱ mbayuuʼ dí rígá itháan mitsínguánʼ náa mañu”.
^ Náa ajngáa arameo naʼthí, “Ikháanʼxu naphú idú rí na̱ʼkha̱ náa naratañájunʼ”.
^ O mbáa “Nitajuíi ga̱jma̱a̱ niraxnuu”.
