Esdras 5:1-17
5 Nda̱wa̱á, profeta* Ageo ga̱jma̱a̱ profeta Zacarías, a̱ʼdá xíñíiʼ Idó, nigíʼdi̱i̱ nitamijná gajmiún judíos bi̱ kúwáʼ náa Judá ga̱jma̱a̱ bi̱ kúwá náa Jerusalén ga̱jma̱a̱ numuu mbiʼyuu Dios ndrígóo Israel, bi̱ xtáa gajmíi̱n ikhiin.
2 Ikhú Zorobabel a̱ʼdióo Sealtiel ga̱jma̱a̱ Jesúa a̱ʼdióo Jehozadac nigíʼdi̱i̱ niñajunʼ mbu̱júu̱ náa goʼwóo Dios dí rígá náa Jerusalén. Profetas ndrígóo Dios nikúwíin gajmiún ikhiin.
3 Nákha ikhú, Tatenái bi̱ xtáa raʼtáñajunʼ náa xuajin rúʼko̱ xígií náa narámaaʼ a̱jkha̱ʼ* náa mañu Éufrates ga̱jma̱a̱ Setar-Bozenái gajmíi̱n a̱ngui̱i̱n nigún náa kúwi̱i̱n ikhiin ga̱jma̱a̱ nirajxu̱u̱n: “Tsáá niʼtáñajuanla dí mu̱ni̱ guʼwá rígi̱ ga̱jma̱a̱ rí mambála ñajunʼ rígi̱ rá.”
4 Ma̱ngaa nirajxu̱u̱n: “Xú káʼnii mbiʼñún xa̱bu̱ bi̱ kúwá ruñajunʼ gi̱i̱ rá.”
5 Mú Dios nixtáa rañewu̱u̱n xabuanii bi̱ nindxu̱ún judíos, túniña̱a̱ʼ ruñajunʼ asndu índo̱ gúxuʼma i̱yi̱i̱ʼ náa inuu Darío ga̱jma̱a̱ matanga̱a̱ dí niriʼña̱a̱ ikhaa ga̱jma̱a̱ numuu rígi̱.
6 Rígi̱ nindxu̱u̱ mbá copia ndrígóo i̱yi̱i̱ʼ dí niʼnirámáʼ Tatenái xa̱bu̱ ñajunʼ bi̱ naʼtáñajunʼ náa xuajin rúʼko̱, dí gíʼ xígií náa narámaaʼ a̱jkha̱ʼ náa mañu Éufrates ga̱jma̱a̱ Setar-Bozenái gajmíi̱n a̱ngui̱i̱n bi̱ nindxu̱ún xa̱bu̱ ñajunʼ bi̱ na̱nguá guáʼdáá wéñuuʼ numún bi̱ naguwáʼ xígií náa narámaaʼ a̱jkha̱ʼ náa mañu Éufrates, nixuʼma rígi̱ náa rey Darío.
7 Dí niniraʼmáʼ naʼthí xígi̱:
“Rígi̱ na̱jkha̱ inuu rey Darío:
¡Araxtaa tsímáá!
8 Nutha̱a̱nʼxu rey rí ni̱jkuáxu náa goʼwóo Dios bi̱ mba̱a̱, náa mbayuuʼ Judá. Ndi̱ya̱a̱xu̱ rí kúwá runi̱i̱ ga̱jma̱a̱ itsí mba̱ʼu̱. Ma̱ngaa nudujma ixi̱ náa pared. Ga̱jma̱a̱ nagido̱o̱ʼ ñajunʼ, núma̱aʼ má ga̱jma̱a̱ numuu rí xa̱bu̱ nuñajunʼ ga̱jma̱a̱ gagi ma̱ngaa najmún xúgíʼ tsiaki̱i̱ ndrígu̱ún.
9 Ikha jngóo nirajxu̱u̱n xabuanii ndrígu̱ún: ‹Tsáá niʼtáñajuanlá dí muni̱ guʼwá rígi̱ ga̱jma̱a̱ rí mambála ñajunʼ rígi̱ rá.›
10 Ma̱ngaa nirajxu̱u̱n xú káʼnii mbiʼñún mu xúʼko̱ munirámáʼ, mu ikháán ma̱ndoo ma̱ta̱ya̱a̱ tsíin nindxu̱ún bi̱ nuyégún edxu̱u̱ náa ñajunʼ rúʼko̱.
11 Ikhiin niriʼña: ‹Nindxu̱xu̱ xa̱bi̱i̱ Dios bi̱ naʼtáñajunʼ mekhuíí ga̱jma̱a̱ náa ku̱ba̱ʼ. Kúwáanʼxu runi̱i̱ guʼwá dí niguma nákha ginii rí niʼni mbáa rey ndrígóo Israel bi̱ nigiʼdoo numuu, niʼni ga̱jma̱a̱ niguámbóo.
12 Mú anu̱xu̱ nini̱ rí makiʼnáa Dios bi̱ naʼtáñajunʼ mekhuíí. Ikha jngóo niniñúúnʼ náa ñawúunʼ rey Nabucodonosor ndrígóo Babilonia, bi̱ nindxu̱u̱ caldeo. Rey bugi̱ bi̱ niʼni gámbóo guʼwá ga̱jma̱a̱ ni̱jkha̱ kagui̱i̱n xa̱bu̱ náa Babilonia.
13 Mú índo̱ niʼni timbá tsiguʼ rí xtáa raʼtáñajunʼ rey Ciro ndrígóo Babilonia, rey Ciro má niʼtáñajunʼ dí maguma̱a̱ guʼwá ndrígóo Dios.
14 Ma̱ngaa rey Ciro nikuʼma dí murawíi náa guʼwá rí nduyamajkuíí dios ndrígu̱ún xa̱bu̱ Babilonia, xua̱a̱ dí niguma ga̱jma̱a̱ oro ma̱ngaa dí niguma ga̱jma̱a̱ plata dí Nabucodonosor niguwíi náa guʼwá rí nduyamajkuíí Dios náa Jerusalén ga̱jma̱a̱ ni̱jkha̱ kagu̱u̱ náa nduyamajkhún dios ndrígu̱ún xa̱bu̱ Babilonia. Ga̱jma̱a̱ nixnáá xúgíʼ rúʼko̱, xa̱bu̱ bi̱ nigumbiʼyuu Sesbazar,* bi̱ nigíiʼ Ciro mu mani̱ndxu̱u̱ xa̱bu̱ ñajunʼ ndrígóo.
15 Ciro niʼthúu̱n: “Adédxuuʼ rígi̱ ga̱jma̱a̱ ayu̱u̱ʼ xtaa’ náa guʼwá rí nduʼyamajkuíí Dios, dí rígá náa Jerusalén ga̱jma̱a̱ goʼwóo Dios gaguma̱a̱ náa rígá má nákha ginii”.
16 Índo̱ Sesbazar ni̱jkha̱nú, nigíʼ rajkúu goʼwóo Dios dí rígá náa Jerusalén. Asndu nákha ikhú nigi̱ʼdu̱u̱ nigu̱ma̱a̱, mú xóó tseguámbá›.
17 Ikha jngóo á mu májánʼ eʼyoo rey, nunda̱ʼa̱a̱xu rey rí mataxuʼmáa mbáa mu maʼga gáʼyoo ga̱jma̱a̱ numuu rígi̱ náa narajxi̱i̱ xúgíʼ rí xtaʼdáá ga̱jma̱a̱ i̱yi̱i̱ʼ ndrígóo Babilonia, á mu gajkhun dí rey Ciro niʼtáñajunʼ rí maguma̱a̱ goʼwóo Dios náa Jerusalén. Ma̱ngaa nunda̱ʼa̱a̱xu rí mataxuʼmá ajngáa mudxáwíínxu̱ dí gáraʼwíí maʼni rey”.
