Esdras 6:1-22
6 Ikhú rey Darío niʼtáñajunʼ dí majuiʼyáá xóó itháan náa guʼwá dí naxtagijxi̱i̱ i̱yi̱i̱ʼ ndrígóo Babilonia ga̱jma̱a̱ náa naxtagijxi̱i̱ rí gíʼdoo numuu.
2 Náa xuajin dí kúgumaʼá ndrígóo Ecbátana, náa mbayuuʼ Media, nijui̱ʼya̱a̱ mbá rollo náa kiʼnirámáʼ ajngáa rígi̱:
3 “Náa timbá tsiguʼ dí niʼtáñajunʼ rey Ciro, rey Ciro niʼtáñajunʼ rígi̱ ga̱jma̱a̱ numuu goʼwóo Dios dí rígá náa Jerusalén: ‹Rí judíos guni̱ májáanʼ guʼwá mu ikhí ma̱ndoo muxnajxi̱ tsigijñaʼ ga̱jma̱a̱ guʼgíiʼ rajkhúu. Rí mitsídánʼ guʼwá gíʼmaa maʼni 27 metro,* rí ma̱ja̱nʼ gíʼmaa maʼni 27 metro,
4 magiʼdoo mbá ajtsú tseniʼ itsí mba̱ʼu̱ ga̱jma̱a̱ mbá tseniʼ dí xajpa. Goʼwóo rey maʼni numuu xúgíʼ dí majmaa.
5 Ma̱ngaa, gatanga̱a̱ xúgíʼ xua̱a̱ dí niguma ga̱jma̱a̱ oro ma̱ngaa dí plata náa goʼwóo Dios rí Nabucodonosor niguwíi náa guʼwá rí nduyamajkuíí Dios dí nirígá náa Jerusalén ga̱jma̱a̱ ni̱ʼkha̱ kagu̱u̱ náa Babilonia. Mbaʼyóoʼ matrámáanʼ náa kaʼyoo náa guʼwá dí nduyamajkuíí Dios náa Jerusalén ga̱jma̱a̱ muniña̱a̱ʼ náa goʼwóo Dios›”.
6 “Ikha jngóo ikháanʼla, Tatenái, bi̱ naʼtáñajunʼ náa mbaaʼ dí rígá xígií náa narámaaʼ a̱jkha̱ʼ* náa mañu Éufrates, Setar-Bozenái gajmíi̱n a̱ngui̱i̱n, xa̱bu̱ ñajunʼ bi̱ na̱nguá guáʼdáá wéñuuʼ numún bi̱ kúwá náa mbaaʼ dí rígá xígií náa narámaaʼ a̱jkha̱ʼ náa mañu Éufrates, gutsíngúunʼla ikhí.
7 Xúrikháá dí maguma májáanʼ goʼwóo Dios. Xa̱bu̱ ñajunʼ ndrígu̱ún judíos ga̱jma̱a̱ xabuanii ndrígu̱ún judíos muni̱ májáanʼ goʼwóo Dios náa nirígá nákhá ginii.
8 Mu, mumbáñún xabuanii judíos muni̱i̱ goʼwóo Dios, natañájuanla rígi̱: Gíʼmaa muni̱ numáá xúgíʼ dí gáʼyóoʼ ga̱jma̱a̱ mbújkha̱a̱ ndrígóo rey, dí nuxna xa̱bu̱ bi̱ kúwá náa xuajin dí rígá xígií náa narámaaʼ a̱jkha̱ʼ náa mañu Éufrates, mu xúʼko̱ xágui̱ji̱ ñajunʼ rígi̱.
9 Xáʼyóoʼ matígo̱o̱ mbá mbiʼi rí mu̱xnu̱u̱ ndxajkun bi̱ kúwá náa Jerusalén xúgíʼ rí gúnda̱ʼa̱la o asndu kaʼnii má dí gáʼñúuʼ xóo e̱jín xédí, mugu̱ e̱jmba̱a̱ ga̱jma̱a̱ e̱jín múgú mu muxnajxi̱ tsigijñaʼ dí nakarámáʼ náa inuu Dios bi̱ xtáa mekhuíí, xúʼko̱ má trigo, idú, vino ga̱jma̱a̱ aceite.
10 Mu xúʼko̱ ikhiin maguaʼdáá má xúʼko̱ rí muxnajxi̱ xóo tsigijñaʼ rí manigu̱u̱ʼ Dios bi̱ naʼtáñajunʼ mekuíí ga̱jma̱a̱ mutajkáan ga̱jma̱a̱ numuu rey gajmíi̱n e̱ji̱i̱n.
11 Ma̱ngaa nitañájunʼ rí á mu mbáa tséʼnimbo̱o̱ xtángoo rígi̱, muríyaʼ mbá ixi̱ náa goʼwóo, muxuxíi xa̱bu̱ ga̱jma̱a̱ mudujmaa ikhí. Goʼwóo muni̱la̱ mbá letrina* náa magún xúgíinʼ xa̱bu̱ ga̱jma̱a̱ numuu rí niʼni.
12 Dios bi̱ niʼni rí mbiʼyuu marigá ikhí,* gaʼni gámbáa rey o xuajin bi̱ xáʼnimbo̱o̱ xtángoo rígi̱ ga̱jma̱a̱ naʼni gámbóo goʼwóo Dios dí rígá náa Jerusalén. Ikhúún, Darío, natañájunʼ rígi̱. Gambanúu má nacha̱”.
13 Ikha jngóo, Tatenái, bi̱ naʼtáñajunʼ náa mbaaʼ dí rígá xígií náa narámaaʼ a̱jkha̱ʼ náa mañu Éufrates, Setar-Bozenái gajmíi̱n a̱ngui̱i̱n ninimbaníí mbá nacha̱ xúgíʼ dí niʼtáñajunʼ rey Darío.
14 Xabuanii ndrígu̱ún judíos ndiya̱a̱ tsiaki̱i̱ ga̱jma̱a̱ rí niʼtáriyaʼ profeta* Ageo ga̱jma̱a̱ Zacarías, a̱ʼdá xíñíiʼ Idó, túniña̱a̱ʼ ruñajunʼ ga̱jma̱a̱ ñajunʼ ni̱jkha̱ ragi̱ʼi̱ má xúʼko̱ asndu niguámbá raguma májáanʼ xó má nikuʼma maguma Dios ndrígóo Israel ma̱ngaa xó má niʼtáñajunʼ maguma Ciro, Darío ga̱jma̱a̱ rey Artajerjes ndrígóo Persia.
15 Niguámbúun runi̱i̱ guʼwá índo̱ niʼni ajtsú ñajuunʼ gu̱nʼ adar,* náa majun tsiguʼ dí xtáa raʼtáñajunʼ rey Darío.
16 Ikhú israelitas, ndxajkun, levitas ga̱jma̱a̱ eʼwíinʼ bi̱ ni̱jkha̱ kiʼdiin nini̱ ndxo̱o̱ goʼwóo Dios ga̱jma̱a̱ gagi.
17 Mu maguma ndxo̱o̱ goʼwóo Dios, nixnajxi̱i̱n 100 xedi̱, 200 mugu̱ e̱jmba̱a̱, 400 e̱jín múgú ga̱jma̱a̱ nixnajxi̱ tsigijñaʼ ga̱jma̱a̱ numuu aʼkhúún xúgíinʼ xa̱bu̱ xuajin Israel mbá 12 chivátu,* xó má mbaʼa xuajin majkhaʼ* ndrígóo Israel.
18 Xó má kiʼnirámáʼ náa libro ndrígóo Moisés, ikhiin nirui̱ʼti̱i̱n ndxajkun gajmiún levitas náa mámbá nguéjmi̱i̱n mu muni̱ ñajunʼ náa goʼwóo Dios dí rígá náa Jerusalén.
19 Bi̱ nitangi̱i̱n náa ni̱jkha̱ kiʼdiin, niniri̱ya̱a̱ʼ ndxa̱a̱ Pascua 14 ñajuunʼ rí timbá igu̱nʼ.
20 Xúgíinʼ ndxajkun ga̱jma̱a̱ levitas niʼni kaʼwiin numuu rí xúgíinʼ nini̱ kaʼwumijnáá. Ikhú nixiyáa xujkhúʼ bi̱ mixnájxi̱i̱ náa Pascua ga̱jma̱a̱ numún xúgíinʼ bi̱ ni̱jkha̱ kiʼdiin, ga̱jma̱a̱ numún ndxajkun ma̱ngaa numún ikhiin.
21 Nda̱wa̱á israelitas bi̱ nitangiín náa ni̱jkha̱ kiʼdiin ni̱ʼphu̱ tsigijñaʼ rí nijuixnájxi̱. Nipiʼtsu mbóó gajmiún xúgíinʼ bi̱ nigimbíin bi̱ niniña̱a̱nʼ runi̱ xúgíʼ dí xkawiʼ rí nuni̱ xa̱bu̱ xuajin rúʼko̱, mu xúʼko̱ mbuyamajkuíí* Jeobá, Dios ndrígóo Israel.
22 Ma̱ngaa niniri̱ya̱a̱ʼ ga̱jma̱a̱ gagi Ndxo̱o̱ Pan dí ragíʼdoo Levadura* mbá juwan mbiʼi, numuu rí Jeobá niʼni dí makuwá gagi ma̱ngaa niʼni dí rey ndrígóo Asiria maxtáa ga̱jma̱á nindxu̱ún ma̱ngaa rí mambáñún náa nigu̱ma̱a̱ goʼwóo Dios bi̱ gajkhun, Dios ndrígóo Israel.
Mbaʼa nota
^ O “oeste”.
^ O mbáa “náa nagadíi náskha, náa nagadíi ambá”.
^ Xóo muʼthá, náa Jerusalén o náa guʼwá rí nduyamajkuíí Dios.
^ O “gaʼyee, bi̱ naʼthí dí marigá”.
^ O “tsu̱jtu e̱jmba̱a̱”.
^ O “tribu”.
^ Náa ajngáa hebreo naʼthí, “mbuyáaʼ”.
