Esdras 8:1-36
8 Bugi̱ nindxu̱ún bi̱ kuya̱ edxu̱u̱ náa mámbá guʼwíin xa̱bu̱ xó má ni̱ʼkha̱ ragumaraʼmáʼ mbiʼñún bi̱ nigájna̱á ga̱jma̱á nindxu̱ʼ náa Babilonia mbiʼi rí nixtáa raʼtáñajunʼ rey Artajerjes:
2 Guersom bi̱ na̱ʼkha̱ náa e̱ji̱i̱n Finehás, Daniel bi̱ na̱ʼkha̱ náa e̱ji̱i̱n Itamar, Hatús bi̱ na̱ʼkha̱ náa e̱ji̱i̱n David,
3 ma̱ngaa Zacarías a̱ʼdióo Secanías, bi̱ na̱ʼkha̱ náa e̱ji̱i̱n Parós, gajmíi̱n mbá 150 xa̱bekha bi̱ kiʼniraʼmáʼ mbiʼñún,
4 ma̱ngaa Elieho-Enái a̱ʼdióo Zerahías bi̱ na̱ʼkha̱ náa e̱ji̱i̱n Pahat-Moab, gajmíi̱n mbá 200 xa̱bekha,
5 ma̱ngaa Secanías a̱ʼdióo Jahaziel bi̱ naguwáʼ náa e̱ji̱i̱n Zatú, gajmíi̱n mbá 300 xa̱bekha,
6 xúʼko̱ má Ébed a̱ʼdióo Jonatán bi̱ naguwáʼ náa e̱ji̱i̱n Adín, gajmíi̱n mbá 50 xa̱bekha,
7 ma̱ngaa Jesayá a̱ʼdióo Atalía bi̱ naguwáʼ náa e̱ji̱i̱n Elam, gajmíi̱n mbá 70 xa̱bekha,
8 ma̱ngaa Zebadías a̱ʼdióo Miguel bi̱ naguwáʼ náa e̱ji̱i̱n Sefatías, gajmíi̱n mbá 80 xa̱bekha,
9 ma̱ngaa Abdías a̱ʼdióo Jehiel bi̱ naguwáʼ náa e̱ji̱i̱n Joab, gajmíi̱n mbá 218 xa̱bekha,
10 ma̱ngaa Selomit a̱ʼdióo Josifías bi̱ naguwáʼ náa e̱ji̱i̱n Baní, gajmíi̱n mbá 160 xa̱bekha,
11 ma̱ngaa Zacarías a̱ʼdióo Bebái, gajmíi̱n mbá 28 xa̱bekha,
12 ma̱ngaa Johanán a̱ʼdióo Hacatán bi̱ naguwáʼ náa e̱ji̱i̱n Azgad, gajmíin mbá 110 xa̱bekha,
13 bi̱ naguwáʼ náa e̱ji̱i̱n Adonicam, xígi̱ kaʼnii mbiʼñún bi̱ iwáá kayuuʼ nitangi̱i̱n: Elifélet, Jeiel ga̱jma̱a̱ Semaya, gajmiún mbá 60 xa̱bekha,
14 ma̱ngaa Utái ga̱jma̱a̱ Zabbud bi̱ naguwáʼ náa e̱ji̱i̱n Bigvái, gajmiún mbá 70 xa̱bekha.
15 Nigímbíin náa rawuunʼ mañu dí na̱jkha̱ náa Ahavá, niguanúxu ikhí mbá ajtsú mbiʼi. Mú, índo̱ ndiʼñíinʼ náa majñu̱únʼ xa̱bu̱ xuajin ma̱ngaa náa majñu̱únʼ ndxajkun, na̱nguá nixkamaa nimbáa levita.
16 Ikha jngóo nikuʼmá ajngáa maguwáʼ bi̱ kuya̱ edxu̱u̱, bi̱ ni̱ndxu̱u̱ Eliezer, Ariel, Semaya, Elnatán, Jarib, Elnatán, Natán, Zacarías ga̱jma̱a̱ Mesulam, xúʼko̱ má bi̱ nusngáa, Joiarib ga̱jma̱a̱ Elnatán.
17 Nikuʼmíin rí magún gútamijná gajmiún Idó, bi̱ kayá edxu̱u̱ náa mbaaʼ rí mbiʼyuu Casifía. Ni̱thu̱u̱n rí munda̱ʼa̱a̱ Idó gajmíi̱n a̱ngui̱i̱n, ikhiin nindxu̱ún e̱jñu̱ún xa̱bu̱ bi̱ niñejunʼ náa guʼwá rí nduyamajkuíí Dios* bi̱ kúwá náa Casifía, rí maguwáʼ kudiin xa̱bu̱ bi̱ muñejunʼ náa goʼwóo Dios ndrígúxu̱.
18 Núma̱a̱ má rí Dios ndrígúxu̱ niñewu̱nxu̱ májánʼ wéñuuʼ* ikha jngóo niguwáʼ kuya̱a̱ Serebías, mbáa xa̱bu̱ bi̱ nandxaʼwóo májánʼ edxu̱u̱, bi̱ na̱ʼkha̱ náa e̱ji̱i̱n Mahlí, a̱ʼdá xíñíiʼ Leví, a̱ʼdióo Israel, mbóó ni̱ʼkha̱ gajmíi̱n e̱ji̱i̱n ma̱ngaa a̱ngui̱i̱n. Mbá xúgíinʼ ninindxu̱ún 18 xa̱bekha.
19 Ma̱ngaa niguwáʼ ku̱ya̱a̱ Hasabías ga̱jma̱a̱ Jesayá, bi̱ naguwáʼ náa e̱ji̱i̱n Merarí gajmiún a̱ngiu̱ún ma̱ngaa e̱jñu̱ún. Mbá xúgíinʼ ninindxu̱ún mbá 20 xa̱bekha.
20 Ga̱jma̱a̱ nikúwá mbá 220 xa̱bu̱ bi̱ muñajunʼ náa guʼwá rí nduyamajkuíí Dios,* bi̱ David gajmíi̱n príncipes nixnún ñajunʼ rí mumbañún levitas. Xúgíinʼ ikhiin nigumaraʼmáʼ mbiʼñún.
21 Ikhú nitañájunʼ rí ikhí, náa rawuunʼ mañu Ahavá murkuéyimijnáxu̱* mu xúʼko̱ muxurígumijná náa inuu Dios ga̱jma̱a̱ munda̱ʼa̱a̱xu̱ ikha xú kaʼnii gútanga̱a̱nʼxu̱ gajmiú e̱jñu̱xu̱ ma̱ngaa xúgíʼ dí guáʼdááxu.
22 Niti̱yu̱ʼ gándo̱ʼo̱o̱ rey, soldado ga̱jma̱a̱ bi̱ kudrámiúnʼ wáyú muñawu̱nxu̱ kamba̱a̱, numuu rí ni̱tha̱a̱nxu̱: “Dios ndrígúxu̱ xtáa rañewu̱u̱n bi̱ nduyáaʼ, mú nakásngañu̱u̱ʼ wéñuuʼ kaʼñún bi̱ nambumún kuyáá”.
23 Ikhaa rúʼko̱ numuu rí nirkuéyimijnáxu̱ ga̱jma̱a̱ ninda̱ʼa̱a̱xu̱ Dios ndrígúxu̱ rí mambáyuxuʼ ga̱jma̱a̱ numuu rígi̱, ikhaa niʼdxawuun dí nitakáñíínxu̱.
24 Nda̱wa̱á nigúwíin wájííʼ mbá 12 bi̱ kuya̱ edxu̱u̱ náa ndxajkun, Serebías ga̱jma̱a̱ Hasabías, mbóó gajmiún mbá gu̱wi̱i̱nʼ a̱ngiu̱ún.
25 Ikhú nigiéwan plata, oro ga̱jma̱a̱ rí majmaa dí rey ga̱jma̱a̱ bi̱ nuxnáá consejo ma̱ngaa príncipes ga̱jma̱a̱ xúgíinʼ israelitas bi̱ nikúwá ikhí nixna mu majmaa náa goʼwóo Dios ndrígúxu̱.
26 Ikha jngóo nigiéwan ga̱jma̱a̱ nixnajxún mbá 22,230 kilo* plata, ma̱ngaa mbá 100 xúgíʼ dí majmaa dí ki̱wu̱n mbá 68 kilo* plata, ma̱ngaa mbá 3,420 kilo* oro,
27 ma̱ngaa mbá 20 xua̱a̱ majkhaʼ dí oro rí minumuu mbá 1,000 dáricos* ma̱ngaa a̱jma̱ rí majmaa dí nindxu̱u̱ cobre dí májánʼ, rí maña̱ʼ asndu naxpíbínʼ, dí ra̱ʼkhá tháán gíʼdoo numuu xó má oro.
28 Ikhú ni̱thu̱u̱n: “Ikháanʼ nindxa̱la mikaʼwáanʼ náa inuu Jeobá xúʼko̱ má dí majmaa nindxu̱u̱ mikaʼwu, plata ga̱jma̱a̱ oro nindxu̱u̱ tsigijñaʼ dí ni̱ʼkha̱ a̱jkiu̱ún muxnáá Jeobá, Dios ndrígu̱ún wajin xiʼñála.
29 Guñewa̱a̱nla májánʼ asndu índo̱ gáxtagiewan mbu̱júu̱ náa inún ndxajkun bi̱ kuya̱ edxu̱u̱ ma̱ngaa náa inún levitas ga̱jma̱a̱ náa príncipes bi̱ kuya̱ edxu̱u̱ náa mámbá guʼwíin xa̱bu̱ Israel náa Jerusalén, náa cuarto* ndrígóo goʼwóo Jeobá”.
30 Ndxajkun ga̱jma̱a̱ levitas nindrigú plata ga̱jma̱a̱ oro ma̱ngaa dí majmaa dí nigiewan mu maʼga̱a̱ kiʼda náa Jerusalén, náa goʼwóo Dios ndrígúxu̱.
31 Mbiʼi 12 ñajuunʼ dí timbá igu̱nʼ niniʼñáánʼxu̱ mañu Ahavá ga̱jma̱a̱ nigíʼdi̱i̱ nijkuáʼxu̱ Jerusalén. Dios ndrígúxu̱ niñewu̱nxu̱ májánʼ wéñuuʼ náa kamba̱a̱ ma̱ngaa niʼni káwáanʼxu náa ñawúúnʼ xa̱bu̱ sia̱nʼ ma̱ngaa náa kuʼwáʼ.
32 Nda̱wa̱á nijkuánuxu náa Jerusalén ga̱jma̱a̱ niguanúxu ikhí mbá ajtsú mbiʼi.
33 Índo̱ niʼni a̱jkhu̱ mbiʼi nigiéwanxu̱ plata, oro ga̱jma̱a̱ dí majmaa náa goʼwóo Dios ndrígúxu̱, nda̱wa̱á nixnajxíixu rígi̱ náa ndxajkun Meremot a̱ʼdióo Uriya, ikhí ma̱ngaa nixtáa Eleazar a̱ʼdióo Finehás ma̱ngaa Jozabad a̱ʼdióo Jesúa ga̱jma̱a̱ Noadías a̱ʼdióo Binuí bi̱ nindxu̱ún levitas.
34 Xúgíʼ nigixnuu ga̱jma̱a̱ nigie̱wan, nda̱wa̱á nigumaraʼmáʼ nguáthá ki̱wu̱n xúgíʼ.
35 Xa̱bu̱ bi̱ nitangi̱i̱n náa ni̱jkha̱ kiʼdiin náa Babilonia, nixnajxi̱ tsigijñaʼ dí mikarámáʼ náa inuu Dios ndrígóo Israel, mbá 12 xedi̱ nixnajxi̱i̱n náa xúgíʼ Israel, 96 mugu̱ e̱jmba̱a̱, 77 e̱jín múgú ma̱ngaa mbá 12 chivátu* xóo tsigijñaʼ ga̱jma̱a̱ numuu aʼkhá. Xúgíʼ rígi̱ nijuixnájxi̱ náa inuu Jeobá xóo tsigijñaʼ gamajkhu dí mikarámáʼ.
36 Nda̱wa̱á nitu̱nxu̱ sátrapas* ndrígóo rey dí ikhaa niʼtáñajunʼ ma̱ngaa xa̱bu̱ ñajunʼ bi̱ kúwíin xígií náa narámaaʼ a̱jkha̱ʼ* náa mañu Éufrates, ikhiin nimbañúún xa̱bu̱ xuajin ma̱ngaa niñambáá náa goʼwóo Dios bi̱ gajkhun.
Mbaʼa nota
^ O “netineos”. Náa ajngáa hebreo naʼthí, “bi̱ nixnajxi̱mijna̱”.
^ O “ñawúunʼ Dios ndrígúxu̱ nirígá náa ikháanʼxu̱”.
^ Náa ajngáa hebreo naʼthí, “bi̱ nixnajxi̱mijna̱”.
^ O “mbuyamiʼchííxu̱”.
^ Náa ajngáa hebreo naʼthí, “a̱jma̱ talentos”.
^ Náa ajngáa hebreo naʼthí, “100 talentos”.
^ O “náa nupiʼtsu”.
^ O “tsu̱jtu e̱jmba̱a̱”.
^ Xígi̱ mbiʼñún ‹bi̱ nuñewa̱a̱n náa naʼtáñajunʼ rey›. Gi̱i̱ naʼthí ga̱jma̱a̱ numún xa̱bu̱ ñajunʼ bi̱ nikúwá náa xuajin majkhaʼ náa mbayuuʼ persa.
^ O “oeste”.
