Esdras 9:1-15
9 Ga̱jma̱a̱ índo̱ niguámbá niguma xúgíʼ rígi̱, príncipes niguwáʼ kanuu ga̱jma̱a̱ nithu̱nʼ: “Xuajin Israel, ndxajkun ga̱jma̱a̱ levitas nuni̱ má xúʼko̱ dí xkawiʼ xó má naguʼwún nuni̱ xa̱bu̱ xuajin dí rígá mijngii, nuni̱ xó má eni̱ xa̱bu̱ cananeos, hititas, perizitas, jebuseos, ammonitas, moabitas, egipcios ga̱jma̱a̱ xóo eni̱ amorreos.
2 Numuu dí ikhiin gajmiún e̱jñu̱ún nidiin gu̱ʼu̱ bi̱ kúwá náa xuajin rúʼko̱, ikha jngóo ikhiin bi̱ nindxu̱ún mbá xuajin kaʼwu nindawamíjna̱ gajmiún xa̱bu̱ xuajin bi̱ kúwá náa ku̱ba̱ʼ rúʼko̱. Timbíin bi̱ nini̱ rígi̱ ninindxu̱ún príncipes mangiin xa̱bu̱ ñajunʼ bi̱ raguáʼdáá wéñuuʼ numún”.
3 Índo̱ nidxawuun rígi̱, nixkuʼturiyaʼ xtíin mbi̱jua̱ dí kaʼgíiʼ awúún ga̱jma̱a̱ xtíin mbi̱jua̱ dí ragíʼdoo ñawúunʼ ma̱ngaa nirubu xtátsiu̱u̱nʼ ga̱jma̱a̱ sta̱wu̱nʼ ma̱ngaa niʼgúnʼ numuu rí asndu tsiánguá niʼniuʼ.
4 Ga̱jma̱a̱ numuu rí xígi̱ nini̱ bi̱ nitangi̱i̱n náa ni̱jkha̱ kiʼdiin, xúgíinʼ bi̱ nduyamajkuíí ga̱jma̱a̱ xúgíʼ a̱jkiu̱ún* ajngóo Dios ndrígóo Israel nigimbíin náa gúnʼ. Ikhúún niguanúʼ náa gúnʼ ga̱jma̱a̱ niguanúʼ tsiánguá asndu índo̱ nixnajxi̱ tsigijñaʼ dí tsígáʼ rí najuixnájxi̱ wakíʼ.
5 Índo̱ ni̱jkha̱nú hora muxnajxi̱ tsigijñaʼ dí tsígáʼ rí najuixnájxi̱ wakíʼ, nitujxu̱ʼ náa gúnʼ nda̱wa̱á rí nini̱ majtimínáʼ. Ikhú ga̱jma̱a̱ xtíñúʼ* dí nithu, nismbátigo̱ʼ ga̱jma̱a̱ nikujxí ñawúnʼ náa inuu Jeobá, Dios ndrígóʼ.
6 Nitha̱: “Dios ndrígóʼ nati̱yu̱ʼ wéñuuʼ ku̱mu̱ʼ, tséʼngo̱o̱ a̱jkiu̱nʼ makujxí inuʼ náa ikháán, Dios ndrígóʼ. Numuu dí ra̱ʼkhá tháán mbaʼa dí raʼkhí ninixu̱* ga̱jma̱a̱ rí nikiéʼkuxuʼ ni̱jkha̱nú asndu náa mekhuíí.
7 Asndu nákha mbiʼi dí nikúwíin wajin xiʼñúnxu̱ asndu mbiʼi xúgi̱ ra̱ʼkhá tháán nikiéʼkuxu. Ga̱jma̱a̱ numuu rí nikiéʼkuxu ikháanʼ mangiin reyes ndrígúxu̱ ga̱jma̱a̱ ndxajkun ndrígúxu̱, nijuixnájxáanʼ náa ñawúúnʼ eʼwíinʼ reyes ndrígóo i̱ʼwáʼ xuajin. Niradiáanʼxu̱ ga̱jma̱a̱ espada, nigún kudáanʼ, nirawíi dí guáʼdááxu ma̱ngaa nini̱ majtiáanʼ ga̱jma̱a̱ ikháá má rígá xúgi̱.
8 Mú, mbá xngaa nitasngájma dí nagáwíinʼ a̱jkia̱a̱nʼ xtayuxu, Jeobá Dios ndrígúxu̱. Nitatsiñunxu̱ rí tikuáanʼ makáwáanʼxu̱ ga̱jma̱a̱ niraxnúxu̱ náa makuwáanʼxu̱ májánʼ, náa xtaa rí nindxu̱u̱ mikaʼwu, mu xúʼko̱ makuwáanʼxu̱ gagi,* Dios ndrígúxu̱, ma̱ngaa niraxnúxu̱ʼ mbá chíʼgíiʼ* tsiaki̱i̱ náa majñuuʼ rí naguma gínáanʼxu̱.
9 Maski ajndu ikháanʼ nindxu̱xu̱ ñumbáá, ikháán Dios ndrígúxu̱ na̱nguá nitatsíñuxu̱ índo̱ niguma gínáanʼ, nitasngájmuxu̱ ngajua rí tsétumuu* ma̱ngaa nitani̱ dí reyes ndrígóo Persia musngajma rí májánʼ a̱jkiu̱ún ku̱yuxu̱. Xúʼko̱ niraxnáanʼxu̱ tsiaki̱i̱ mu muxujxíi guʼwáaʼ ga̱jma̱a̱ mu̱ni̱ májáanʼxu̱ rí niguma gámbáa ga̱jma̱a̱ niraxnúxu̱ mbá xtájtsí náa Judá ga̱jma̱a̱ náa Jerusalén.
10 Dí xúgi̱ Dios ndrígúxu̱ ndiéjunʼ gándoo gútha̱nʼxu̱, niniʼñáánʼxu̱ kiʼtáñajunʼ ndrígáaʼ,
11 rí ikháán niraxnúxu̱ náa majñu̱únʼ xa̱bia̱a̱ʼ profetas.* Ikháán niratúxu: ‹Ku̱ba̱ʼ rí ikháanʼ maʼngala mundrígúu nindxu̱u̱ mitsaga numuu rí xa̱bu̱ bi̱ kúwíin náa ku̱ba̱ʼ rúʼko̱ nindxu̱ún mitsagiin. Ikhiin nuni̱ rí xkawiʼ ga̱jma̱a̱ nini̱ majtíí rí mitsaga náa xúgíʼ ku̱ba̱ʼ.
12 Ikha jngóo xátatsiʼñááʼ rí waʼxiaaʼ munuju̱nʼ gajmiún jiámiu̱ún ni ma jiámiáanʼ munigu̱nʼ gajmiún waʼxiuunʼ. Nditháan xátaʼyáʼ dí makuwá tsímáá ni má rí maguaʼdáá. Xúʼko̱ kaʼnii muguaʼdáála tsiaki̱i̱, muphula dí májánʼ rí ma̱jma̱a̱ náa ku̱ba̱ʼ ga̱jma̱a̱ muniʼñááʼ mundrígúu e̱jña̱la asndu kámuu›.
13 Nda̱wa̱á rí nigíʼnuxu̱ xúgíʼ rígi̱, numuu dí raʼkhí ni̱ni̱xu ma̱ngaa numuu dí ra̱ʼkhá tháán nikiéʼkuxu̱, maski ajndu ikháán Dios ndrígúxu̱, na̱nguá nitaniunxu̱ xó má kaʼyoo numuu rí nikiéʼkuxuʼ, ikháán nitatsíñánʼ rí makáwáanʼxu̱ bi̱ kúwáanʼxu gi̱i̱ xúgi̱,
14 lá xúnimbuxu̱ mbu̱júu̱ kiʼtáñajunʼ ndrígáaʼ ga̱jma̱a̱ mudiinxu̱ xa̱bu̱ bi̱ nuni̱ rí xkawiʼ ráʼ. Lá xakiʼnán wéñuuʼ rí asndu matani̱ gámbáanʼxu̱ mbá kayuuʼ rí nimbáa xáʼngo̱o̱ makríyáaʼ ráʼ.
15 Tátá Jeobá Dios ndrígóo Israel, ikháán ni̱ndxa̱ʼ jmbii numuu rí tikuáanʼxu̱ niʼngo̱o̱ nikáwáanʼxu̱ asndu mbiʼi rígi̱. Naguwáaʼxu náa inaaʼ ikháán ga̱jma̱a̱ aʼkhúxu̱ numuu rí nda̱wa̱á dí ninixu̱ xúgíʼ rígi̱, nimbáa dí ikháanʼxu̱ rakáʼyoo mawi̱ji̱ náa inaaʼ ikháán”.
Mbaʼa nota
^ Náa ajngáa hebreo naʼthí, “naguíʼiin náa inuu”.
^ O “xtíñuʼ rí mbi̱jua̱ dí kuʼwúnʼ awúún ga̱jma̱a̱ xtíñuʼ rí mbi̱jua̱ dí ragíʼdoo ñawúunʼ”.
^ Náa ajngáa hebreo naʼthí, “dí raʼkhí ni̱nixu̱ nixtagimbóo náa edxuxu̱”.
^ Náa ajngáa hebreo naʼthí, “mu maxpíbínʼ iduxu̱”.
^ O “lajuíin”.
^ O “gaʼyee, bi̱ nuthi dí marigá”.
