Rí na̱jkha̱ inún Filipenses 1:1-30
1 I̱yi̱i̱ʼ rígi̱ niʼnirámáʼ Pablo ga̱jma̱a̱ Timoteo, ñumbáá ndrígóo Cristo Jesús, rígi̱ na̱jkha̱ inún xúgíinʼ xa̱bi̱i̱ Cristo Jesús ga̱jma̱a̱ bi̱ kuya̱ edxu̱u̱ ma̱ngaa siervos ministeriales* bi̱ kúwíi̱n náa Filipos:
2 Garigá rí májánʼ wéñuuʼ a̱jkiu̱u̱n Dios náa ikháanʼla ga̱jma̱a̱ dí tsímáá ndrígóo Anu̱lú Dios ma̱ngaa ndrígóo Tátá Jesucristo.
3 Naxna̱a̱ má xúʼko̱ núma̱aʼ Dios ndrígóʼ índo̱ narmáʼáan a̱jkiu̱nʼ ka̱ya̱la,
4 mámbá rí natakáñuu ga̱jma̱á numala. Natajkháan ga̱jma̱a̱ gagi,
5 numuu rí niñejunʼ gakhi̱i̱ mu majuiʼtáraʼa ajngáa rí májánʼ asndu nákha timbá mbiʼi asndu mbiʼi xúgi̱.
6 Numuu rí nda̱yo̱o̱ gajkhun rígi̱: Rí bi̱ nigíʼdu̱u̱ mbá májánʼ ñajunʼ náa ikháanʼla maʼni má xúʼko̱ asndu mambóo, asndu índo̱ gáʼkha̱nú mbiʼi ndrígóo Cristo Jesús.
7 Májánʼ má nindxu̱u̱ rí ikhúúnʼ mandxa̱ʼwa̱mínáʼ xúgi̱ kaʼnii ga̱jma̱a̱ numala, numuu rí kuwáanʼla náa a̱jkiu̱nʼ. Numuu rí ikháanʼ nikuwáanʼ rumbáyuʼla índo̱ nixtáá guʼwá e̱jua̱nʼ kaxtoʼóʼ ga̱jma̱a̱ cadena, índo̱ nijmuʼ xtángoo mu mambáyúu ajngáa rí májánʼ mu nimbá xárikoo rí majuiʼtáraʼa, xúgi̱ kaʼnii dí ikhúúnʼ ga̱jma̱a̱ ikháanʼla nandoo nambáyulú rí májánʼ wéñuuʼ a̱jkiu̱u̱n Dios.
8 Dios ndaʼyoo rí ndaʼñáanʼla wéñuuʼ ga̱jma̱a̱ rí nandoʼ ka̱ya̱la ikha̱á má xóo dí Cristo nandoo kaʼyala.
9 Rígi̱ nindxu̱u̱ dí na̱nda̱ʼa̱ índo̱ natajkháan:* Dí ngajua ndrígála maʼga rajoo má xúʼko̱ ma̱ngaa dí maguaʼdáá mbá ku̱ma̱ kájxi̱ ga̱jma̱a̱ dí xúgíʼ gikrua̱ʼa̱la,
10 mu mbu̱ya̱a̱la ndiéjuunʼ dí itháan gíʼdoo numuu ma̱ngaa rí xáguaʼdáá aʼkhála ga̱jma̱a̱ dí xúni̱ majngrádiinʼ eʼwíinʼ asndu mbiʼi ndrígóo Cristo
11 ga̱jma̱a̱ dí marigá mbaʼa wéñuuʼ rí ma̱jma̱a̱ náa ikháanʼla* dí na̱ʼkha̱ ga̱jma̱a̱ numuu Jesucristo, mu xúʼko̱ magruigú gamajkhu ga̱jma̱a̱ maguma mba̱a̱ Dios.
12 A̱ngui̱nʼ nandoʼ dí mbu̱ya̱a̱la rí xóo xtáá, nañambáá mu mawán ri̱go̱o̱ ajngáa rí májánʼ,
13 numuu rí xúgíinʼ soldado bi̱ nuñewa̱a̱n xa̱bu̱ ñajunʼ bi̱ xtáa Roma ga̱jma̱a̱ xúgíinʼ eʼwíinʼ nduyáá rí kaxtoʼóʼ ga̱jma̱a̱ cadena rígi̱ numuu Cristo.
14 Rí xúgi̱ mbaʼin a̱ngiu̱lú bi̱ nuni̱ ñajuunʼ Tátá niguáʼdáá itháan tsiakii núma̱aʼ má ga̱jma̱a̱ cadena dí kaxtoʼóʼ ga̱jma̱a̱, ma̱ngaa kúwá rusngajma rí tsémiñún mutaraʼa ajngá rawuunʼ Dios.
15 Gajkhun má rí tikhuun kúwá rutaraʼa ga̱jma̱a̱ numuu Cristo numuu rí naxígu̱u̱n ga̱jma̱a̱ rí nandún muni̱ mbrígúmíjná gajmiún eʼwíinʼ, mú tikhuun nuni̱ ga̱jma̱a̱ mbá numuu májánʼ.
16 Bi̱ iwáá bugi̱, nuthi ga̱jma̱a̱ numuu Cristo numuu rí guáʼdáá ngajua, ga̱jma̱a̱ nduyáá dí ikhúúnʼ nikánúʼ ñajunʼ rí matambáyúu ajngáa rí májánʼ;
17 mú eʼwíinʼ nuni̱ i̱ndó mu magi̱ʼdu̱u̱n, raʼkháa ga̱jma̱a̱ mbá numuu májánʼ, numuu rí nuni̱ mu magúʼdo’ xkujndu xúgi̱ rí xtáá kaxtoʼóʼ ga̱jma̱a̱ cadena.
18 Ndiéjunʼ niʼngo̱o̱ nirígá ga̱jma̱a̱ numuu rígi̱ rá. Rí majuiʼtáraʼa ga̱jma̱a̱ numuu Cristo, tséʼniuu á mu nuni̱ ga̱jma̱a̱ mbá numuu májánʼ o na̱nguá, naʼni rí maxtáá gagi. Maʼdxuʼ má xúʼko̱
19 numuu rí nda̱yo̱o̱ dí ga̱jma̱a̱ numuu rí ikháanʼ nutajkáanla maʼni rí ikhúúnʼ makríñu̱u̱nʼ ga̱jma̱a̱ rí espíritu ndrígóo Jesucristo nambáyuʼ.
20 Rígi̱ nambánii ga̱jma̱a̱ dí nandoʼ ma̱ngaa rí gúʼthu̱u̱n dí xáguʼdoo mbá numuu rí matiyu̱ʼ. Nda̱yo̱o̱ gajkhun rí nimbá xárikoʼ dí ma̱ta̱ má xúʼko̱, mu xúʼko̱ ma̱ni̱ mba̱a̱ Cristo ga̱jma̱a̱ xuyuʼ xó má ni̱ʼkhá ragúnʼ ra̱ni̱, tséʼniuu á mu xtáá nda̱ya o nakháñunʼ.
21 Á mu ikhúúnʼ xtáá, nindxu̱u̱ mu ma̱ni̱ ñajuunʼ Cristo, á mu nakháñunʼ májánʼ má.
22 Á mu naxtáá xóó náa xuwiʼ rígi̱ ma̱ndoo ma̱ni̱ itháan ga̱jma̱a̱ numuu Cristo. Ikhúúnʼ xátala ndiéjunʼ rí gáraʼwi̱i̱.
23 Numuu rí na̱nguá e̱yo̱o̱ ndiéjunʼ gáraʼwi̱i̱ náa a̱jma̱ enii rígi̱, numuu rí nandoʼ dí makríñu̱u̱nʼ náa xuwiʼ rígi̱ mu maxtáá ga̱jmu̱ʼ Cristo, rí nindxu̱u̱ itháan májánʼ.
24 Mú, ga̱jma̱a̱ numala ikháanʼ ndayóoʼ rí maxtáá má xúʼko̱ náa xuwiʼ rígi̱.
25 Ikha jngóo, ga̱jma̱a̱ numuu rígi̱, maxtáá má xúʼko̱ ga̱jma̱á nindxa̱la mu muʼgua ru̱ni̱ má xúʼko̱ ñajuunʼ Dios ma̱ngaa rí makuwáanʼ má xúʼko̱ gagi ga̱jma̱a̱ numuu fe ndrígála,
26 mu xúʼko̱ maʼdxala wéñuuʼ kuya̱a̱ Cristo ga̱jma̱a̱ numuʼ índo̱ ikhúúnʼ gáxtáá mbu̱júu̱ʼ ga̱jma̱a̱ nindxa̱la.
27 Gakuwáanʼla* xó má nambánii ga̱jma̱a̱ ajngáa rí májánʼ numuu Cristo, tséʼniuu á mu na̱jkhá gáyala o na̱nguá, nandoʼ dí madxawun rí guajunla gújkhúʼ ga̱jma̱a̱ kuwáan’ mbá kambájxala,* dí xúgiáanʼ nu̱nila ñajunʼ* dí miʼtáraʼa ajngáa rí májánʼ ga̱jma̱a̱ numuu rí kuaʼdáá,
28 xámiñala kuñu̱u̱n bi̱ nakiʼníin kuyala. Numuu dí rígi̱ nasngájma dí ikhiin mambíin ga̱jma̱a̱ ikháanʼ makáwáanʼla, rígi̱ na̱ʼkha̱ náa Dios.
29 Numuu dí náa Cristo raʼkháa i̱ndó nindrígú ñajunʼ dí maguaʼdáá fe náa ikhaa ma̱ngaa dí mumíniiʼ numuu ikhaa.
30 Ikhaa numuu rúʼko̱ rí kuwáanʼ ruraʼnííla gamiéjunʼ dí ndi̱ya̱a̱la rí ikhúúnʼ niraʼnuu, ga̱jma̱a̱ xó má ndu̱ya̱a̱la dí kaʼníí xtáá raraʼnuu.
Mbaʼa nota
^ O “bi̱ nuñambáá”.
^ O “na̱ni̱ tsajkuun”.
^ Náa ajngáa griego naʼthí, “xndú taun rí májánʼ”.
^ O “gu̱ni̱”.
^ Náa ajngáa griego naʼthí, “espíritu”.
