Rí na̱jkha̱ inún Filipenses 3:1-21
3 Dí iwáá kayuuʼ, a̱ngui̱nʼ nindxa̱la, gaʼdxala má xúʼko̱ ga̱jma̱a̱ numuu Tátá. Tségúúnʼ maniraʼmáʼ kikháá, numuu dí rígi̱ mañewa̱nla.
2 Guñewumíjna̱ náa xúwánʼ; ma̱ngaa guñewumíjna̱ náa bi̱ muniala dí raʼkhí; ga̱jma̱a̱ náa bi̱ nurujtu xuwiʼ.
3 Numuu rí ikháanʼ ni̱ndxu̱lú bi̱ gajkhun nithu xtóo xuyuuʼ tsáʼkhún, ikháanʼ bi̱ kuwáanʼlú ru̱ʼni̱ ñajuunʼ Dios náa majñu̱u̱ʼ espíritu ndrígóo ikhaa, kuwáánʼ ru̱ʼni̱ mbaʼumíjna̱lú ga̱jma̱a̱ numuu Cristo Jesús ma̱ngaa tsékumulú kuʼyáá xuwiʼ,
4 maski ajndu xtáa mbáa bi̱ naku̱mu̱u̱ dí gíʼdoo mbá numuu dí maku̱mu̱u̱ kaʼyoo xuwiʼ, ikhaa ni̱ndxu̱ʼ ikhúúnʼ.
Á mu mbáa nandxa̱ʼwáminaʼ dí gíʼdoo mbá numuu dí maku̱mu̱u̱ kaʼyoo xuwiʼ, ikhúúnʼ gúʼdoo itháan:
5 Migiñuʼ mbiʼi nda̱wa̱á rí nixtáá nithu xtóo xuyuuʼ tsáʼkúnʼ, ni̱ndxu̱ʼ xa̱bu̱ Israel, bi̱ na̱ʼkha̱ náa e̱ji̱i̱n* Benjamín, ni̱ndxu̱ʼ hebreo numuu rí anu̱ʼ ga̱jma̱a̱ ru̱dúʼ ni̱ndxu̱ún hebreos, ma̱ngaa ni̱ndxu̱ʼ fariseo numuu rí nanimbánuu xtángoo;
6 niʼni kájxi̱ a̱jkiu̱nʼ rí asndu ni̱ni̱ gíníi bi̱ nagimbíi̱n* ga̱jma̱a̱ ninimbánuu dí náa xtángoo naʼthí dí nindxu̱u̱ jmbu, ma̱ngaa nisngajmá dí ragúʼdoʼ aʼkhúnʼ.
7 Mú rí ikhúúnʼ ndi̱yo̱o̱ dí nigiʼdoo numuu, rí xúgi̱ nda̱yo̱o̱ dí nánguá gíʼdoo numuu ga̱jma̱a̱ numuu Cristo.
8 Ma̱ngaa nda̱yo̱o̱ dí xúgíʼ ragíʼdoo numuu, índo̱ ikhúúnʼ na̱ni̱ mbríguii ga̱jma̱a̱ ku̱ma̱ dí gúʼdoʼ náa Cristo Jesús, bi̱ nindxu̱u̱ Tátá ndrígóʼ. Ga̱jma̱a̱ numuu ikhaa niniʼñúuʼ xúgíʼ dí ragíʼdoo numuu ma̱ngaa nda̱yo̱o̱ asndu xóo mbá ru̱tsu̱u̱ náskha, mu xúʼko̱ maʼngo̱ʼ mada̱a̱ʼ rí mambajxu̱ʼ ga̱jmu̱ʼ Cristo
9 mu makujmaa rí xtáá mbóó ga̱jmu̱ʼ ikhaa, na̱nguá ni̱ndxu̱ʼ jmbii numuu rí nanimbánuu Xtángoo, nindxu̱u̱ numuu rí Dios ndaʼyoo dí ni̱ndxu̱ʼ mbáa xa̱bu̱ májáanʼ numuu rí gúʼdoo fe náa Cristo, Dios ndaʼyoo rí ni̱ndxu̱ʼ jmbii numuu rí gúʼdoʼ fe.
10 Rí phú nandoʼ, nindxu̱u̱ rí maniʼníiʼ ikhaa, maniʼnúuʼ tsiakii rí niʼniga̱bi̱i̱* ga̱jma̱a̱ mamínuuʼ xó má ikhaa nimínuuʼ, ma̱ngaa rí makhañúʼ xó má ikhaa nikháñuu,
11 mu mba̱yo̱o̱ á mu ma̱ndoo magabi̱i̱ʼ ikhúúnʼ gínún náa majñúnʼ wajinʼ.
12 Raʼkháa ga̱jma̱a̱ numuu rí nigruígú má rí ma̱daaʼ ni má rí ni̱ndxu̱ʼ xa̱bu̱ jmbii, xtáá ra̱ni̱ tsiakimínáʼ mu magruigú rí ma̱daaʼ numuu dí nda̱yo̱o̱ dí Cristo Jesús niraʼwún mu magruígú rígi̱.
13 A̱ngui̱nʼ, xóó má tséyóo á mu maʼngo̱ʼ ma̱daaʼ. Mú rígi̱ nindxu̱u̱ rí na̱ni̱: Nambumuʼ ka̱yo̱o̱ rí niguanúu kidíiʼ ga̱jma̱a̱ naʼgíʼ naxmatríyamínáʼ mu maguajtúun rí wíji̱ ma̱ʼkha̱,
14 na̱ni̱ tsiakimínáʼ mu maʼngo̱ʼ ma̱daaʼ rí Dios naxnúʼ mu maxtáá mekhuíí ga̱jma̱a̱ numuu Cristo Jesús.
15 Ikha jngóo, ikháanʼ bi̱ ni̱ndxu̱lú gújkiáánʼ gundxaʼwamíjna̱ ga̱jma̱a̱ numuu rígi̱, á mu mixtiʼkhu xóo endxaʼwamíjna̱, Dios má gásngájmala xóo phú gíʼmaa mundxaʼwamíjna̱.
16 Asndu xkáʼníí má, tséʼniuu má nguáthá ndijáanʼlú, gajngruigulú xó má gíʼmaa náa kamba̱a̱ rúʼko̱.
17 A̱ngui̱nʼ, mbá xúgiáanʼ guyaridoʼ ga̱jma̱a̱ gu̱ya̱a̱ xóo kúwá* bi̱ nunimbaníí xkri̱da rí ikháanʼxu niʼgíʼ.
18 Numuu rí kúwá mbaʼin bi̱ nákha ginii na̱tha̱ mbaʼa nuthu ga̱jma̱a̱ numún, mú rí xúgi̱ asndu nambi̱ya̱ʼ na̱tha̱ ga̱jma̱a̱ numún, numuu rí ni̱ndxu̱ún xa̱bu̱ sia̱nʼ náa ixi̱* rí nikháñúu Cristo.
19 Ikhiin guáʼthi̱i̱n rí maguma gámbíin ga̱jma̱a̱ dios ndrígu̱ún nindxu̱u̱ awu̱ún; nuni̱ mbaʼumíjna̱ má xúʼko̱ ga̱jma̱a̱ rí phú gíʼmaa maʼni matiñu̱u̱nʼ, ma̱ngaa i̱ndó nundxaʼwamíjna má xúʼko̱ ga̱jma̱a̱ dí rígá náa tsu̱du̱u̱ ku̱ba̱ʼ.
20 Mú xuajñulú ikháanʼ rígá mekhuíí, ga̱jma̱a̱ ikhí ra̱ʼkhá tháán kua̱ʼthi̱i̱n mbáa bi̱ maʼni káwáanʼlu, ikhaa nindxu̱u̱ Tátá Jesucristo,
21 ikhaa majmuu tsiakii ndrígóo mu mariʼkhu̱u̱ xuyulúʼ dí tséjmaa mu mani̱ndxu̱u̱ xóo xuyuuʼ ikhaa rí naxpíbínʼ, ikha̱á má tsiakii rí najmuu mu maʼtáñajuunʼ xúgíʼ dí rígá.
Mbaʼa nota
^ O “tribu”.
^ O “congregación”.
^ O “nikujxi̱i̱”, “niʼni mbaʼya̱a̱”.
^ Náa ajngáa griego naʼthí, “jngruigu̱u̱n”.
