Rí na̱jkha̱ inún Filipenses 4:1-23
4 A̱ngui̱nʼ nindxa̱la, ikháanʼ bi̱ nandoʼ ka̱ya̱la, ra̱ʼkhá tháán nandoʼ rí mba̱ya̱la, ikháanʼ nu̱ni̱ rí maxtáá gagi ga̱jma̱a̱ nindxa̱la bi̱ ikhúúnʼ niʼngo̱ʼ nidaaʼ,* gaguajún jmbu má xúʼko̱ náa Tátá xó má ni̱tala nákha ginii.
2 Natakáñuu Evodia ga̱jma̱a̱ Síntique rí mbíníí gúndxa̱ʼwa̱míjna̱ ga̱jma̱a̱ rí muni̱ má xúʼko̱ ñajuunʼ Tátá.
3 Ga̱jma̱a̱ ikháán bi̱ natiejunʼ mbóó ga̱jma̱á nindxu̱ʼ, nanda̱ʼa̱a̱ʼ rí matambáñún má xúʼko̱ gu̱ʼu̱ bugi̱ bi̱ nini̱ tsiakimíjna̱ rí majuiʼtáraʼa ajngáa rí májánʼ ga̱jma̱á nindxu̱ʼ ga̱jma̱a̱ Clemente ma̱ngaa eʼwíinʼ bi̱ niñejunʼ mbóó ga̱jma̱á nindxu̱ʼ, bi̱ mbiʼñún nigumarámáʼ má náa libro rí ndaʼya.*
4 Gaʼdxala má xúʼko̱ ga̱jma̱a̱ numuu Tátá. Natangu̱ún na̱tala mbu̱júu̱ʼ: ¡Gaʼdxala!
5 Mu xúgíinʼ gúyáá rí nindxa̱la xa̱bu̱ bi̱ nakru̱ʼu̱u̱n dí marathu̱u̱n. Tátá xtáa mijngii.
6 Xáxmiéjuanla ga̱jma̱a̱ numuu nimbá, tséʼniuu má xóo kuwáanʼla, gutájkháan,* gunda̱ʼa̱ ga̱jma̱a̱ xúgíʼ a̱jkia̱la, ma̱ngaa gu̱xna̱a̱ núma̱aʼ Dios, gu̱ni̱ mbaʼyoo rí ndayála,
7 ikhú tsímáá ndrígóo Dios dí rígá itháan ñuʼún rí nimbáa xa̱bu̱ numbaaʼ tséʼngo̱o̱ gíkro̱ʼo̱o̱ mañewu̱u̱n a̱jkia̱la, mañewu̱u̱n ku̱ma̱ ndrígala ga̱jma̱a̱ numuu Cristo Jesús.
8 Rí i̱wáá kayuuʼ a̱ngui̱nʼ, gundxa̱ʼwa̱míjna̱ má xúʼko̱ náa xúgíʼ rí nindxu̱u̱ gajkhun, náa xúgíʼ rí gíʼdoo numuu, náa xúgíʼ rí nindxu̱u̱ jmbu, xúgíʼ rí nindxu̱u̱ kaʼwu, náa xúgíʼ rí naʼni marigá ngajua, xúgíʼ rí tsétanumáá, náa xúgíʼ rí nindxu̱u̱ májánʼ ga̱jma̱a̱ náa xúgíʼ rí kaʼyoo magruigú gamajkhu.
9 Gu̱ni̱ xúgíʼ rí nijmañala ga̱jma̱a̱ rí nindrígú náa ikhúúnʼ, xúʼko̱ má rí nidxawíínla rí ni̱tha̱, rí ndi̱yo̱ʼ ni̱ni̱ ga̱jma̱a̱ Dios bi̱ naxná rí tsímáá maxtáa ga̱jma̱á nindxa̱la.
10 Nadxuʼ wéñuuʼ, núma̱a̱ má Tátá, rí xúgi̱ naxmiéjuanla ku̱yo̱ʼ mbu̱júu̱ʼ, maski má nixmiéjuanla ku̱yo̱ʼ mú na̱nguá niguaʼdáá xóo musngajmála.
11 Na̱nguá etha̱la rígi̱ numuu dí rígá mbá rí ndayóʼ, ikhúúnʼ nijmañuʼ maxtáá gagi tséʼniuu má xóo kaʼnii xtáá.
12 Ikhúúnʼ naniʼnuuʼ rí tsingíná ma̱ngaa rí magúʼdoo. Nijmañunʼ mbá dí raʼkháa xúgíinʼ xa̱bu̱ eyáá, rí maxtáá gagi, tséʼniuu á mu maxkidxuʼ, rí magúʼdoo wéñuuʼ o rí xágúʼdoo nditháan.
13 Gúʼdoo tsiakii mu ma̱ni̱ xúgíʼ núma̱a̱ má bi̱ naxnúʼ tsiakii.
14 Ikha jngóo, ra̱ʼkhá tháán májánʼ ni̱ni̱la rí ikháanʼ nimbáyuʼ índo̱ ninújngoʼ náa mbiʼi mingíjyúuʼ.
15 Ikháanʼ filipenses, ndu̱ya̱a̱ má májánʼ rí nda̱wa̱á rí nidxawíín timbá miʼtsú ajngáa rí májánʼ índo̱ ikhúúnʼ nigájnaaʼ náa Macedonia, nimbáa bi̱ náa nagimbíi̱n* na̱nguá nimbayúʼ, i̱ndó ikháanʼ nimbáyúʼla,
16 numuu rí nákha xóó xtáá náa Tesalónica, ikháanʼ nixuʼmá rí ndiyóoʼ majmuʼ, asndu a̱jma̱ nuthu, raʼkháa mbá miʼtsúú ni̱ni̱la.
17 Raʼkháa ga̱jma̱a̱ numuu rí nandoʼ dí makhánúʼ, mú nandoʼ dí ñajunʼ ndrígala dí nindxu̱u̱ májánʼ mba̱ja̱a̱ náa inuu Dios.
18 Ikha jngóo gúʼdoo má xúgíʼ rí ndayóʼ, gúʼdoo asndu itháan. Gúʼdoo má xúgíʼ rí ndayóʼ numuu rí Epafrodito nixnájxu̱ʼ rí ikháanʼ nixuʼguánʼ, mbá tsigijñaʼ rí ndataun rí Dios ndaʼyoo rí nindxu̱u̱ májánʼ.
19 Ga̱jma̱a̱ numuu rígi̱, Dios ndrígóʼ majmuu rí gíʼdoo mu maxnála xúgíʼ rí gáʼyala ga̱jma̱a̱ numuu Cristo Jesús.
20 Náa Anu̱lú Dios gáʼga gamajkhu asndu kámuu mbiʼi. Xúʼko̱ gáʼni.*
21 Gu̱thu̱u̱n dí narajxi̱ín xúgíinʼ xa̱bi̱i̱ Cristo Jesús bi̱ xtáa mbóó gajmíi̱n. Angiu̱lú bi̱ xtáá gajmíʼ, nurajxáanʼla.
22 Xúgíinʼ xa̱bi̱i̱ Jesús, mú itháan bi̱ kúwá náa goʼwóo César, nurajxáanʼla.
23 Garigá náa a̱jkia̱la rí májánʼ wéñuuʼ a̱jkiu̱u̱n Tátá Jesucristo.
Mbaʼa nota
^ Náa ajngá griego naʼthí, “corona”.
^ O “libro náa kiʼnirámáʼ mbiʼñún bi̱ makuwá”.
^ O “gu̱ni̱ tsajkuun”.
^ O “Amén”.
