I̱yi̱i̱ʼ rí na̱jkha̱ inún Hebreos 12:1-29
12 Numuu rí kuwáanʼ náa majñúnʼ mbaʼin wéñuuʼ xa̱bu̱, gurígúu dí narikulú ga̱jma̱a̱ aʼkhá rí tséjyúu eʼni majngrádáánʼ ma̱ngaa gaʼngulú magaʼyulú má xúʼko̱ náa rí kaʼyoo magaʼyulú,
2 guyejxi̱i̱ má xúʼko̱ Jesús bi̱ kayá edxu̱u̱ ga̱jma̱a̱ bi̱ naʼni májáanʼ fe ndrígúlú. Numuu rí nindxaʼwáminaʼ náa gagi rí magruigú nda̱wa̱á niʼngo̱o̱ índo̱ nijuiʼdujmaa náa ixi̱,* táxmiéjuunʼ rí magajnúu gamajkuu ga̱jma̱a̱ nigi̱ʼi̱ náa nijniu mújúunʼ xíliúu* Dios.
3 Xúʼko̱, gundxaʼwamíjna̱ májánʼ náa bi̱ niʼngo̱o̱ índo̱ xa̱bu̱ aʼkhá nithán ajngáa tséguíi, bi̱ i̱ndó nini̱ gawumíjná má ikhiin. Mu xúʼko̱ xáʼni néʼnga̱la ga̱jma̱a̱ xákanajkala.
4 Ikháanʼla asndu xóó má tséyóoʼ rí magadíí eʼdiala índo̱ kuwáanʼ ru̱ni̱ gajmiála aʼkhá rúʼko̱.
5 Nimbumala mbá kayuuʼ consejo rí na̱jkha̱ inala bi̱ nindxa̱la asndu xóo e̱ji̱n: “A̱ʼdióʼ nindxa̱a̱ʼ, xáta̱ya̱a̱ asndu xóo ragíʼdoo numuu índo̱ Jeobá* naxpríguáaʼ, ni xákaguabáánʼ índo̱ ikhaa gáxpríguáaʼ,
6 numuu rí Jeobá* naxprígún bi̱ nandoo kaʼñún ga̱jma̱a̱ naxpájthiin xúgíinʼ bi̱ nagruiguíin xóo e̱ji̱i̱n”.
7 Ikháanʼ ndayóoʼ rí maʼngala numuu rí nindxu̱u̱ xóo rí naxpríguala,* Dios naʼniala xóo e̱ji̱i̱n, tsáá lá mbáa ada̱ bi̱ anu̱u̱ tséxprígúu rá.
8 Mú, á mu ikháanʼ na̱nguá nijuaxpríguála xóo rí kaʼyulú xúgiáánʼ, nindxa̱la e̱ji̱i̱n i̱mba̱a̱, raʼkháa bi̱ phú e̱ji̱i̱n ikhaa.
9 Ma̱ngaa anu̱lú* bi̱ ni̱ndxu̱ún xa̱bu̱ numbaaʼ, nixprigulú ga̱jma̱a̱ ikháanʼ ndiʼyamajkhún, mu ma̱ndoo makuwáánʼ má xúʼko̱, lá itháán xáʼyóoʼ rí muʼnimbulú kuʼyáá Anu̱lú bi̱ naxná ikhulú xóo makuwáanʼ ga̱jma̱a̱ espíritu santo* ndrígóo ráʼ.
10 Numuu rí ikhiin nixpri̱gúlú mbá nguáthá mbiʼi xó má rí májánʼ ndiyáá ikhiin, mú Dios naʼni mu mambáyulú má ikháanʼ ga̱jma̱a̱ xúʼko̱ maʼni mikaʼwáánʼ xó má ikhaa.
11 Gajkhun má rí índo̱ nuxpriguáaʼ tséʼni rí manigua̱a̱ʼ nagawáanʼ.* Mú nda̱wa̱á, bi̱ najuaxpríguíí naʼni rí ma̱jma̱a̱ náa ikhaa dí tsímáá ga̱jma̱a̱ rí májánʼ.
12 Ikha jngóo gu̱ni̱ maʼni gújkhúʼ ñawánla ga̱jma̱a̱ ragómiala dí nánguá gíʼdoo tsiakii,
13 ga̱jma̱a̱ gu̱ni̱ májáanʼ má xúʼko̱ kamba̱a̱ náa muʼgua, mu xúʼko̱ xákájuíi rajkuála dí endi̱i̱, maʼni̱i̱la.
14 Guʼyáʼ xóo makuwáanʼla tsímáá gajmiála xúgíinʼ, ga̱jma̱a̱ rí makuwáanʼla kaʼwu, numuu rí á mu mbáa tséʼni rígi̱, xáʼyoo Tátá.
15 Gakuwáanʼla xawii, mu xúʼko̱ nimbáa xáguanúu rí xágruigú rí májánʼ wéñuuʼ a̱jkiu̱u̱n Dios ga̱jma̱a̱ rí xákráʼáan nimbá ajmu̱u̱ iná rí mbi̱i̱ʼ, dí maʼni marigá xkujndu ga̱jma̱a̱ rí maʼni gachíin mbaʼin.
16 Gu̱ya̱a̱ tsumáá, numuu rí xáʼyóoʼ maxtáa náa ikháanʼla nimbáa bi̱ nabóoʼ xkawiʼ kayuuʼ gajmíi̱n eʼwíinʼ,* nimbáa bi̱ tséʼyamajkhuu rí mitsúʼkháan, xó má Esaú bi̱ niriʼkuroʼoo dí kaʼyoo xóo a̱ʼdá giʼnii ga̱jma̱a̱ káaʼ mbá ganitsu.
17 Numuu rí ikháanʼ ndu̱ya̱a̱ dí nda̱wa̱á nindoo magruigúu dí maguma tsajkurámáanʼ, mú nánguá nikánáa, maski ajndu nimbi̱ya̱ʼ mu mariʼkhu̱u̱ rí niraʼwíí maʼni anu̱u̱, nándáa rí niyambáá.*
18 Numuu rí ikháanʼ na̱nguá nixuʼmamijná náa rí ma̱ndoo muru̱gua̱la ga̱jma̱a̱ rí nakha riʼyu̱u̱, ni má náa mbá du̱u̱n rí miskuniʼ, ni má náa rí mikrína mbiʼ, ni má náa mbá giñámbiʼ,
19 ni má náa aʼwóo mbá trompeta, ni má náa aʼwóo bi̱ naʼthí. Índo̱ xa̱bu̱ xuajen nidxawíín aʼwá rúʼko̱, ninda̱ʼa̱ rí xájuiʼthúún itháan.
20 Numuu rí táʼngu̱u̱n niʼni kiʼtáñajunʼ rígi̱: “Á mu mbáa xujkhúʼ na̱jkha̱ kanuu náa kúbá gíʼmaa rí muxnáá ga̱jma̱a̱ itsí”.
21 Ga̱jma̱a̱ dí nirígá ninindxu̱u̱ gamíi wéñuuʼ, rí asndu Moisés niʼthí: “Asndu nagúʼwún rí namíñúʼ”.
22 Mú ikháanʼla nixuʼmamijná náa kúbá Sion, náa mbá xuajen ndrígóo Dios bi̱ ndaʼya, náa Jerusalén dí rígá mekhuíí, náa mbaʼin wéñuuʼ ángeles
23 ndiwi̱ín, ga̱jma̱a̱ náa nigimbíin ejín giʼnuu bi̱ kiʼnirámáʼ mbiʼñún mekhuíí, náa Dios, bi̱ naʼnimbánuu xkujndu ndrígu̱ún xúgíinʼ, ga̱jma̱a̱ bi̱ jmbiin bi̱ nuniñamíjna̱ rí espíritu santo maxnún ikha ga̱jma̱a̱ rí xúgi̱ niʼni kájxi̱i̱n.
24 Jesús bi̱ nañambáá náa rí nambánún* náa mbá rí nuxi̱ʼ ga̱jma̱a̱ náa eʼdi rí nijuaxtíjyááʼ dí naʼthí itháan májánʼ ki xóo eʼdiuu Abel.
25 Gu̱ya̱a̱la májánʼ, numuu rí xáʼyóoʼ mu̱ni̱ gáʼdu̱u̱nʼ mudxawíín náa bi̱ xtáa raʼthí, numuu rí á mu tákáwíin bi̱ nini̱ gáʼdu̱u̱nʼ mudxawíín rí naʼthí mbáa bi̱ xtáa náa tsu̱du̱u̱ ku̱ba̱ʼ ga̱jma̱a̱ numuu Dios. Xúʼko̱ má mangáánʼ ¡xákáwáánʼ á mu tsédxawíín bi̱ naʼthí asndu mekhuíí!
26 Nákhá ikhú aʼwóo niʼni rí ku̱ba̱ʼ maʼba̱a̱n, mú rí xúgi̱ ikhaa nakudaminaʼ maʼni: “Imbóó nuthu itháan ma̱ni̱ rí maʼba̱a̱n raʼkháa i̱ndó ku̱ba̱ʼ ma̱ngaa mekhu”.
27 Ajngáa “imbóó nuthu itháan” nandoo gáʼthúu̱n rí maʼnigámbáa xúgíʼ rí naʼba̱a̱n dí niguma, mu maguanúu i̱ndó rí tséʼba̱a̱n.
28 Ikha jngóo, numuu rí ikháanʼ mundríguíi mbáa Xa̱bu̱ Ñajunʼ* bi̱ tséʼbangayii, gundriʼgú má xúʼko̱ rí májánʼ wéñuuʼ a̱jkiu̱u̱n, mu ga̱jma̱a̱ numuu ikhaa ma̱ndoo mu̱ʼni̱ ñajunʼ rí mitsúʼkháan náa Dios, gamiñulúʼ kuʼyáá ga̱jma̱a̱ gamajkhu.
29 Numuu rí Dios ndrígúlú nindxu̱u̱ mbá aguʼ rí naʼni gámbáa.
Mbaʼa nota
^ O “trono ndrígóo”.
^ O “najuiʼsngála”.
^ Náa ajngáa griego naʼthí, “anu̱u̱ xuyulú”.
^ O “naʼni rí maraxtaa gíná”.
^ Náa ajngáa griego naʼthí, “nándáa rí nindoo maʼni”.
^ O “mediador”. Náa ajngáa griego nandoo gáʼthúu̱n mbáa xa̱bu̱ bi̱ nambáñún a̱jmi̱i̱n xa̱bu̱ mu mambanún.
^ O “Reino”.
