I̱yi̱i̱ʼ rí na̱jkha̱ inún Hebreos 2:1-18
2 Ikha jngóo gíʼmaa muʼgíʼ májánʼ edxu̱lúʼ, itháan ki xóo rí naguʼwunlú nu̱ʼni̱ náa xúgíʼ rí niʼdxawíín, mu xúʼko̱ xúniʼñáánʼ raguáʼdáá fe.
2 Numuu rí á mu ajngáa rí Dios niʼthí náa majñúnʼ ángeles rí nithúún wajin xiʼñúlú ninindxu̱u̱ gajkhun ga̱jma̱a̱ bi̱ nanújngurámuuʼ xtángoo ma̱ngaa bi̱ tséʼnimbo̱o̱ nimínuuʼ xó má kaʼyoo,
3 xú káʼnii gándoo gúʼni̱ kawumijnálú á mu ikháanʼ tsíñewa̱a̱n rí maguma kawáánʼlú rí itháan mba̱a̱ rá. Numuu rí Tátá ndrígúlú ninindxu̱u̱ ginii bi̱ niʼthí ga̱jma̱a̱ bi̱ nidxawíín nithulú rí xúʼko̱ má nindxu̱u̱,
4 Dios nisngájma rí nindxu̱u̱ gajkhun rígi̱ índo̱ niʼni milagro dí itháan mba̱ʼu̱, ma̱ngaa índo̱ naxná espíritu santo* ndrígóo xó má eyoo.
5 Numuu rí ikhaa na̱nguá niniñuuʼ rí ángeles mutañajuíínʼ ku̱ba̱ʼ rí ma̱ʼkha̱ dí niʼtálú.
6 Mú mbáa testigo niʼthí rígi̱: “Tsáá lá nindxu̱u̱ xa̱bu̱ mu magiwa̱a̱nʼ a̱jkia̱a̱nʼ xtayáá rá. O tsáá lá nindxu̱u̱ a̱ʼdióo xa̱bu̱ numbaaʼ mu matiewa̱a̱n rá.
7 Na̱nguá gíʼdoo wéñuuʼ numuu nitani̱i̱ ikhaa ki xóo ángeles, nitani̱ rí magruigú gamajkhu ga̱jma̱a̱ rí maguma mba̱a̱, niraxnájxi̱i̱ ñajunʼ rí nitani̱ ga̱jma̱a̱ ñawáanʼ.
8 Xúgíʼ nitastiga̱ náa agoo rajkhúu”. Índo̱ nijuixnáá rí maʼtáñajuunʼ xúgíʼ, Dios niniñuuʼ rí maʼtáñajuunʼ mbá xúgíʼ, rí xúgi̱ maski ajndu na̱nguá eʼyáá xúgíʼ rí ikhaa naʼtáñajuunʼ,
9 mú nduʼyáá má rí Jesús bi̱ na̱nguá gíʼdoo wéñuuʼ numuu nigumaa ki xóo ángeles, bi̱ nigruigú gamajkhu ga̱jma̱a̱ niguma mba̱a̱ numuu rí niʼngo̱o̱ nimínúuʼ asndu índo̱ nikháñuu, mu ga̱jma̱a̱ numuu rí májánʼ wéñuuʼ a̱jkiu̱u̱n Dios ikhaa nimínuuʼ ma̱ngaa nikhañúu ga̱jma̱a̱ numún xúgíinʼ xa̱bu̱.
10 Xúgíʼ dí rígá, rígá mu maʼni mba̱a̱ Dios, rígá ga̱jma̱a̱ numuu ikhaa mu xúgíinʼ e̱ji̱i̱n mudrigú gamajkhu, Dios ndiʼyoo rí májánʼ majmiuu bi̱ kayá edxu̱u̱ mu mani̱ndxu̱u̱ jmbii ga̱jma̱a̱ rí nimínúuʼ, á mu ikhaa nagíʼnuu xúgíʼ rígi̱ ikhaa ma̱ndoo maʼni káwíin xúgíinʼ ikhiin.
11 Numuu rí xó má bi̱ naʼni kaʼwi̱ín ga̱jma̱a̱ bi̱ kúwá ragu̱ma̱ kaʼwi̱ín mbáwíí anu̱ún, ikha jngóo ikhaa tsétiyu̱u̱ʼ rí maʼthúún a̱ngui̱i̱n,
12 índo̱ naʼthí: “Mathu̱u̱n mbiʼyaaʼ a̱ngui̱nʼ ma̱ngaa ma̱ni̱ mba̱a̱n ga̱jma̱a̱ ajmúú náa majñu̱únʼ bi̱ nagimbíi̱n”.
13 Ma̱ngaa naʼthí: “Makumu̱ʼ ka̱yo̱o̱ ikhaa” ma̱ngaa xóó naʼthí: “¡Guya̱a̱! Ikhúúnʼ gajmíʼ e̱ji̱n bi̱ Jeobá* nixniúnʼ”.
14 Numuu rí “e̱ji̱n” bugi̱ ni̱ndxu̱ún* xuwiʼ ga̱jma̱a̱ itsu̱,* Jesús ma̱ngaa ni̱jkha̱nú ninindxu̱u̱ xuwiʼ ga̱jma̱a̱ itsu̱ mu ga̱jma̱a̱ numuu rí nikháñuu ma̱ndoo maʼni gámbáa bi̱ naʼni rí makañúlú, xóo muʼthá, Gixa̱a̱.
15 Mu maʼni káwíin xúgíinʼ bi̱ ninindxu̱ún ñumbáá náa xúgíʼ mbiʼi rí nikúwá ga̱jma̱a̱ numuu rí nimiñúún makhañún.
16 Numuu rí ikhaa na̱nguá ni̱ʼkha̱ gámbáñún ángeles, ni̱ʼkha̱ mu mambáñún bi̱ naguwáʼ náa Abrahán.
17 Ikha jngóo ikhaa ndiyóoʼ rí mani̱ndxu̱u̱ ikha̱á xó má “a̱ngui̱i̱n” náa mbá xúgíʼ, niʼni rígi̱ mu ma̱ndoo mani̱ndxu̱u̱ mbáa ndxajkun bi̱ phú kayá edxu̱u̱, bi̱ naʼni ñajuunʼ Dios, bi̱ nagáwíinʼ a̱jkiu̱u̱n ga̱jma̱a̱ bi̱ nindxu̱u̱ jmbii ga̱jma̱a̱ mu xúʼko̱ maxnáxi̱ mbá tsigijñaʼ rí maʼni dí xúgíinʼ xa̱bu̱ aʼkhá mambajxíín gajmiún Dios.*
18 Numuu rí ikhaa mínaaʼ má nimínuuʼ índo̱ nindri̱ga̱ tsáʼkhá náa inuu, nigumarataa mu mambáñún bi̱ nundri̱ga̱ tsáʼkhá náa inún.
