I̱yi̱i̱ʼ rí na̱jkha̱ inún Hebreos 3:1-19
3 Ikha jngóo, a̱ngui̱nʼ bi̱ kaʼwiin, bi̱ niwatsaʼwála rí maʼgua̱a̱ mekhuíí, gundxaʼwamíjna̱ ga̱jma̱a̱ numuu Jesús bi̱ nuniʼniiʼ xóo apóstol ga̱jma̱a̱ ndxajkun bi̱ phú kayá edxu̱u̱.
2 Ikhaa ninindxu̱u̱ jmbii náa bi̱ nigíiʼ, xó má Moisés ninindxu̱u̱ jmbii náa xúgíʼ goʼwóo Dios.
3 Numuu rí Jesús kaʼyoo magruigú mbá gamajkhu mba̱a̱ ki xóo Moisés, xó má mbáa bi̱ naʼni guʼwá nagruigú itháán gamajkhu ki xóo guʼwá.
4 Gajkhun má dí xúgíʼ guʼwá dí rígá xtáa tsáa niʼni, mú bi̱ niʼni xúgíʼ dí rígá nindxu̱u̱ Dios.
5 Moisés ninindxu̱u̱ jmbii índo̱ niñambáá náa xúgíʼ goʼwóo Dios, ñajunʼ dí niʼni nisngájma dí majuiʼthá nda̱wa̱á,
6 mú Cristo ninindxu̱u̱ jmbii xóo ada̱ índo̱ nijuixnáá mañewu̱u̱n goʼwóo Dios. Ga̱jma̱a̱ ikháanʼlu gajkhun ni̱ndxu̱lú goʼwóo á mu nurajtumijná asndu náa iwáá mbiʼi rí nandoo nuʼthá, ma̱ngaa rí kua̱ʼti̱i̱n dí nu̱ʼni̱ mbaʼumijna̱ ga̱jma̱a̱.
7 Xó má Dios nijmuu espíritu santo* ndrígóo mu maʼthí: “Á mu ikháanʼ xúgi̱ nudxa̱wíín aʼwóo,
8 xúni̱ gújkhúʼ a̱jkia̱la xó má bi̱ nini̱ makásngañu̱nʼ náa ku̱ba̱ʼ mijxooʼ,* mbiʼi dí nindri̱ga̱ tsáʼkhá náa inuʼ,
9 náa wajin xiʼñála nindri̱ga̱ tsáʼkhá inuʼ ga̱jma̱a̱ túnimbu̱u̱n maski ajndu ndiyáá mbaʼa rí ni̱ni̱ náa mbá 40 tsiguʼ.
10 Ikha jngóo niwi̱yuʼ kañu̱u̱n xa̱bu̱ bugi̱, ikhú ni̱tha̱: ‹Nu̱ni̱ má xúʼko̱ xó má exnáa a̱jkiu̱ún ikhiin ga̱jma̱a̱ táguánú muniʼnuuʼ kambo̱ʼ›.
11 Ikha jngóo índo̱ nikásngañu̱nʼ nikuʼdáminaʼ ma̱ni̱ rígi̱: ‹Xáta̱ʼa̱án náa rí nda̱ya̱a̱ xu̱ʼ›”.
12 Tsumáá gúnila a̱ngui̱nʼ, raʼkháa gáʼni dí mbáa dí ikháanʼ ma̱jma̱a̱ dí raʼkhí náa a̱jkiu̱u̱n ga̱jma̱a̱ xágiʼdoo fe numuu rí nitsíngúunʼ náa Dios bi̱ ndaʼya.
13 Rí phú gíʼmaa muni̱ guxnamíjná tsiakii mámbá mbiʼi, nákha xóó ndajyúuʼ rí nuxná mbiʼíí “xúgi̱”, mu tsiakii ndrígóo aʼkhá rí minduwaʼ xárígá náa nimbáa dí ikháanʼla.
14 Numuu rí phú gajkhun makánulúʼ mangáanʼ rí nigruigú Cristo,* i̱ndó á mu nurajtumijná asndu iwáá mbiʼi náa ajngáa rí nidrígúlú asndu nákha ginii.
15 Xó má najuiʼthá: “Á mu ikháanʼ xúgi̱ nudxa̱wíín aʼwóo, xúni̱ gújkhúʼ a̱jkia̱la xó má nirígá nákha ni̱ni̱ makásngañu̱u̱nʼ”.
16 Numuu dí, tsíin lá ninindxu̱ún bi̱ nidxawíín, mú nini̱ dí makiʼnáa xá. Lá raʼkháa xúgíinʼ bi̱ nigájnún náa Egipto bi̱ nixnúún ikha Moisés ráʼ.
17 Ma̱ngaa, tsíin lá ni̱ndxu̱ún bi̱ niwiyu̱u̱ʼ kaʼñún Dios náa mbá 40 tsiguʼ rá. Lá raʼkhíin bi̱ nixudami̱jná aʼkhá, bi̱ nikháñún náa ku̱ba̱ʼ mijxooʼ ráʼ.
18 Ga̱jma̱a̱, tsíin lá ni̱ndxu̱ún bi̱ niʼthún rí xáta̱ʼa̱án náa mbayáa xu̱u̱ʼ xá. Lá raʼkháa bi̱ túnimbu̱u̱n ráʼ.
19 Ikha jngóo na̱jkua̱nú nduʼyáá rí táta̱ʼa̱án numuu rí ndiñúunʼ fe.
