I̱yi̱i̱ʼ rí na̱jkha̱ inún Hebreos 4:1-16

  • Gamii rí xata̱ʼa̱álú náa rí ndayáa xu̱u̱ʼ Dios (1-10)

  • Pablo naʼthí rí ndayóoʼ mata̱ʼa̱álú náa ndayáa xu̱u̱ʼ Dios (11-13)

    • “Ajngá rawuunʼ Dios ndaʼya” (12)

  • Jesús nindxu̱u̱ ndxajkun bi̱ phú kayá edxu̱u̱ (14-16)

4  Numuu rí wíji̱ mambanúu rí mundrígú rí mata̱ʼa̱a̱lú náa ndayáa xu̱u̱ʼ ikhaa, ikha jngóo tsumáá wéñuuʼ gúʼni̱,* raʼkháa gáʼni dí mbáa dí ikháanʼla xákhánán rí mata̱ʼa̱a̱ ikhí. 2  Numuu rí mangáanʼ nijuiʼtúlú ajngáa rí májánʼ xó má ikhiin, mú ikhiin na̱nguá nimbáñún ajngáa rí nidxawíín, numuu rí na̱nguá nikúwá mbá kambájxu̱u̱n náa fe gajmiún bi̱ ninimbu̱ún. 3  Mú ikháanʼ bi̱ nisngajmá rí kuaʼdáá fe, nata̱ʼa̱álú náa rí ndayáa xu̱u̱ʼ rí ikhaa má niʼthí: “Ikha jngóo índo̱ nikásngañu̱nʼ nikuʼdáminaʼ ma̱ni̱ rígi̱: ‹Xáta̱ʼa̱án náa rí nda̱ya̱a̱ xu̱ʼ›”, maski ajndu ñajunʼ ndrígu̱ún niwájxi̱ má asndu nákhá nigi̱ʼi̱ numbaaʼ. 4  Numuu rí náa mbá dí kiʼnirámáʼ ikhaa naʼthí ga̱jma̱a̱ numuu rí maʼni juwan mbiʼi: “Dios ndiyáa xu̱u̱ʼ náa xúgíʼ ñajunʼ rí niʼni índo̱ niʼni juwan mbiʼi”. 5  Ma̱ngaa naʼthí: “Xáta̱ʼa̱án náa rí nda̱ya̱a̱ xu̱ʼ”. 6  Mú, numuu rí ndayóoʼ rí tikhuunʼ matu̱ʼu̱u̱n ikhí, ga̱jma̱a̱ timbíin bi̱ nijuiʼthúún ajngáa rí májánʼ na̱nguá nitu̱ʼu̱u̱n numuu rí túnimbu̱ún, 7  ikhaa natanga̱a̱ nagíiʼ i̱mba̱ mbiʼi, índo̱ naʼthí “xúgi̱” náa salmo ndrígóo David mba̱yu̱u̱ʼ mbiʼi nda̱wa̱á. Xó má rí niguámbá nijuiʼthá: “Á mu ikháanʼ xúgi̱ nudxa̱wíín aʼwóo, xúni̱ gújkhúʼ a̱jkia̱la”. 8  Á mu rí Josué ni̱jkha̱ kagui̱i̱n náa rí mbuya̱a̱ xu̱únʼ, Dios xátanga̱a̱ maʼthí nda̱wa̱á ga̱jma̱a̱ numuu i̱mba̱ mbiʼi. 9  Ikha jngóo náa xuajñuu Dios naguanúu xóó imbóó mbiʼi rí muda̱a̱ xu̱únʼ, xóo sábado.* 10  Numuu rí xa̱bu̱ bi̱ nito̱ʼo̱o̱ náa rí ndayáa xu̱u̱ʼ Dios, ndiyáa má xu̱u̱ʼ náa xúgíʼ ñajunʼ rí naʼni ma̱ngaa, xó má Dios ndiyáa xu̱u̱ʼ náa ñajunʼ rí niʼni. 11  Ikha jngóo guʼnilú xó má eʼngo̱o̱ mu matu̱ʼu̱lú náa rí ndayáa xu̱u̱ʼ, mu xúʼko̱ nimbáa xájpatríguíi maʼni ikháá má kayuuʼ xóo nini̱ bi̱ túnimbu̱u̱n. 12  Numuu rí ajngá rawuunʼ Dios ndaʼya ga̱jma̱a̱ gíʼdoo tsiakii. Mixíníʼ itháan ki xóo xúgíʼ espada rí a̱jma̱ inuu, nato̱ʼo̱o̱ asndu itháan mi̱jnu̱ʼ náa a̱jkiu̱u̱n* xa̱bu̱, nasngájma dí rígá awúún* ga̱jma̱a̱ rí mbájníí,* narkuájíiʼ itsu̱ ga̱jma̱a̱ gájtsu̱u̱,* naʼngo̱o̱ nasngájma ku̱ma̱ ga̱jma̱a̱ rí nandoo maʼni a̱jkiu̱lú. 13  Nimbá rí nigumawíi rígá ngo̱ʼo̱o̱ náa iduu ikhaa, xúgíʼ rígá pa̱jnu náa iduu bi̱ ikháanʼ kaʼyulú muxnájxi̱i̱ cuenta. 14  Numuu rí kuáʼdaalú ndxajkun bi̱ phú kayá edxu̱u̱ bi̱ itháan mba̱a̱, bi̱ nita̱ʼa̱a̱ náa mekhuíí ikhaa nindxu̱u̱ Jesús A̱ʼdióo Dios, ikha jngóo guʼthá má xúʼko̱ ga̱jma̱a̱ numuu fe rí kuaʼdáálu náa ikhaa. 15  Numuu rí na̱nguá kuáʼdaa mbáa ndxajkun bi̱ phú kayá edxu̱u̱ bi̱ xándoo magáwíinʼ a̱jkiu̱u̱n kaʼyoo rí tséʼngulú gúʼni̱, kuáʼdaalú mbáa bi̱ nimínuuʼ xúgíʼ xó má ikháanʼlu, mú ikhaa ragíʼdoo aʼkhá. 16  Ikha jngóo xámiñulu mu̱ʼgua̱ kanuu náa xíliúu* Dios, náa rígá rí májánʼ wéñuuʼ a̱jkiu̱u̱n, mu magáwíinʼ a̱jkiu̱u̱n kaʼyulú ga̱jma̱a̱ muxkamaa rí májánʼ wéñuuʼ a̱jkiu̱u̱n índo̱ phú ndayóoʼ mixtámbáyulú.

Mbaʼa nota

^ Náa ajngáa griego naʼthí, “gamiñulú”.
^ Atayáá glosario, sábado.
^ O “ámiu̱u̱n”.
^ O “xi̱ʼ”. Atayáá glosario, xi̱ʼ.
^ O “alma”. Atayáá glosario, alma.
^ O “ngáñúu itso̱”.
^ O “trono ndrígóo”.
TRADUCCIÓN DEL NUEVO MUNDO DE LAS SANTAS ESCRITURAS
Hebreos 4
me̱ʼpha̱a̱
Araxnuu Biblia náa Internet
https://cms-imgp.jw-cdn.org/img/p/1001061103/univ/art/1001061103_univ_sqr_xl.jpg
nwt