I̱yi̱i̱ʼ rí na̱jkha̱ inún Hebreos 5:1-14

  • Jesús gíʼdoo itháan numuu náa ndxajkun bi̱ phú kuya̱ edxu̱u̱ bi̱ nindxu̱ún xa̱bu̱ numbaaʼ (1-10)

    • “Xó má Melquisedec” (6, 10)

    • “Nijmañuu ndiéjuunʼ eyoo gáʼthúu̱n rí matanimba̱a̱ʼ ga̱jma̱a̱ numuu xúgíʼ náa rí nimínuuʼ” (8)

    • Ga̱jma̱a̱ numuu ikhaa ma̱ndoo makáwáánʼ asndu kámuu (9)

  • Dí narígá índo̱ tséndxaʼwa̱a̱ májánʼ edxu̱ún (11-14)

5  Numuu rí asndu tsáa xa̱bíi bi̱ nawáxtíya̱a̱ʼ mu mani̱ndxu̱u̱ ndxajkun bi̱ phú kayá edxu̱u̱, nagi̱ʼi̱ mu maʼni ñajuunʼ Dios ga̱jma̱a̱ mambáñún xa̱bu̱, ma̱ngaa mu maxnájxi̱ tsigijñaʼ ga̱jma̱a̱ numuu aʼkhá. 2  Ikhaa ma̱ndoo maʼniún rí májánʼ bi̱ nakiéʼkhún numuu rí tséyáá rí eni̱, numuu rí ma̱ngaa naʼniminaʼ ga̱jma̱a̱ rí tséʼngo̱o̱ gáʼni, 3  ikhaa rúʼko̱ numuu rí ndayóoʼ maxnájxi̱ tsigijñaʼ ga̱jma̱a̱ numuu aʼkhúun, xó má naʼni ga̱jma̱a̱ numún xa̱bu̱ xuajen. 4  Nimbáa xa̱bu̱ xándoo magruigú ikháá ñajunʼ rígi̱, i̱ndó á mu Dios naxnúu xó má nirígá ga̱jma̱a̱ numuu Aarón. 5  Xúʼko̱ má, Cristo na̱nguá nigíminaʼ ikháá rí manidxu̱u̱ ndxajkun bi̱ phú mbayá edxu̱u̱, nigíiʼ bi̱ niʼthúu̱n: “Ikháán nindxa̱a̱ʼ a̱ʼdióʼ; ga̱jma̱a̱ xúgi̱ ni̱jkhánú ninindxu̱ʼ ana̱a̱ʼ”. 6  Xó má naʼthí i̱mba̱ náa rí kiʼnirámáʼ: “Ikháán nindxa̱a̱ʼ ndxajkun asndu kámuu xó má Melquisedec”. 7  Índo̱ nixtáa náa tsu̱du̱u̱ ku̱ba̱ʼ,* Cristo ninda̱ʼa̱ mixtambáyíí ga̱jma̱a̱ aʼwá gakhi̱i̱, niʼtájkháan ga̱jma̱a̱ xúgíʼ a̱jkiu̱u̱n* ga̱jma̱a̱ xtambi̱ya̱ʼ náa bi̱ maʼngo̱o̱ maʼni kríya̱a̱ʼ náa rí makhañúu, ga̱jma̱a̱ niwán rí niʼthí numuu rí nimíñuu kaʼyoo Dios. 8  Maski ajndu ikhaa ninindxu̱u̱ a̱ʼdióo, mú nijmañuu ndiéjuunʼ eyoo gáʼthúu̱n rí matanimba̱a̱ʼ ga̱jma̱a̱ numuu xúgíʼ náa rí nimínuuʼ. 9  Nda̱wa̱á rí niʼnimbo̱o̱ náa xúgíʼ,* ni̱jkha̱nú ninindxu̱u̱ bi̱ maʼni káwíin asndu kámuu xúgíinʼ bi̱ nunimbu̱ún kuyáá. 10  Numuu rí Dios nigíiʼ mu mani̱ndxu̱u̱ ndxajkun bi̱ phú kayá edxu̱u̱ xó má Melquisedec. 11  Kuaʼdáá mbaʼa rí muʼthá ga̱jma̱a̱ numuu ikhaa, mú naʼni mingíjyúuʼ ma̱rata, numuu rí ikháanʼla nánguá eyoo gíkrua̱ʼa̱la nacha̱. 12  Ikháanʼ, xúgi̱* gíʼmaa má rí musngáala, mú mbu̱júu̱ ndayóoʼ rí mbáa magíʼdu̱u̱ maʼsngála rí nigíʼdi̱i̱ nijmañala ga̱jma̱a̱ numuu ajngá rawuunʼ Dios. Mbu̱júu̱ʼ ndayála yáʼdú raʼkháa rí muphula ganitsu gújkhúʼ. 13  Bi̱ naʼga̱a̱n má xúʼko̱ yáʼdú, tséninuuʼ ajngáa rí májánʼ ndrígóo Dios dí nasngájma rí nindxu̱u̱ jmbu, numuu rí nindxu̱u̱ mbáa ada̱ chíʼgíiʼ. 14  Mú ganitsu gújkhúʼ kaʼñúún mu̱phu̱ xabuanii, bi̱ nijmañún mundxaʼwamíjna̱ ga̱jma̱a̱ rúʼko̱ niʼni rí majmiin mbuyáá xóo mixtiʼkhu nindxu̱u̱ rí májánʼ ga̱jma̱a̱ dí ra̱májánʼ.

Mbaʼa nota

^ Náa ajngáa griego naʼthí, “mbiʼi rí nixtáa xóo xuwiʼ”.
^ O “ámiu̱u̱n”.
^ Náa ajngáa griego naʼthí, “niʼni kájxi̱i̱”.
^ Náa ajngáa griego naʼthí, “mba̱yu̱u̱ʼ má”.
TRADUCCIÓN DEL NUEVO MUNDO DE LAS SANTAS ESCRITURAS
Hebreos 5
me̱ʼpha̱a̱
Araxnuu Biblia náa Internet
https://cms-imgp.jw-cdn.org/img/p/1001061103/univ/art/1001061103_univ_sqr_xl.jpg
nwt