I̱yi̱i̱ʼ rí na̱jkha̱ inún Hebreos 6:1-20
6 Ikha jngóo xúgi̱ rí niniʼñááʼlú má kidííʼ kiʼsngáa rí nijmañulúʼ ginii kayuuʼ ga̱jma̱a̱ numuu Cristo, gagajáánʼlú má xúʼko̱ xóo mbáa xa̱bu̱ nikhi̱i̱, xátangaánlú muʼgíiʼ rajkhúu, xó muʼthá, rí mata̱nga̱a̱ a̱jkiu̱lú náa ñajunʼ rí niʼni dí ragíʼdoo numuu, rí maguaʼdáá fe náa Dios,
2 kiʼsngáa ga̱jma̱a̱ numuu rí najngún iyááʼ, rí nuxkrami̱i̱nʼ, rí magabiín* bi̱ nikháñún ga̱jma̱a̱ rí mixtandiʼíín cuenta asndu kámuu.
3 Muʼnilú rígi̱ á mu Dios nandoo.
4 Ga̱jma̱a̱ numún bi̱ nindrigú aguʼ timbá miʼtsú, ndiyáá xú kaʼnii nindxu̱u̱ regalo rí na̱ʼkha̱ mekhuíí, nindrigú espíritu santo,*
5 ga̱jma̱a̱ ndiyáá xú kaʼnii phú nindxu̱u̱ ajngá rawuunʼ Dios rí májánʼ ga̱jma̱a̱ tsiakii ndrígóo mbiʼi* rí na̱ʼkha̱,
6 mú nitsíngúunʼ náa fe, xa̱bu̱ buʼko̱ xándoo matangi̱ín mbu̱júu̱ʼ mu mata̱nga̱a̱ a̱jkiu̱ún, numuu rí ikhiin nudujmaa mbu̱júu̱ʼ A̱ʼdióo Dios náa ixi̱ ga̱jma̱a̱ nuni̱ májthi̱i̱ʼ náa inún xa̱bu̱.
7 Numuu rí Dios naʼni tsajkurámuuʼ ku̱ba̱ʼ índo̱ naʼgañu̱u̱ iya ruʼwa dí naxnúu má xúʼko̱, ga̱jma̱a̱ nda̱wa̱á nakráʼáan iná rí nambáñún bi̱ nudu.
8 Mú, á mu ku̱ba̱ʼ naʼni rí makráʼáanʼ tsuwan’, tsíñún guyáá, githáán má rí majuiʼtátsrígú ga̱jma̱a̱ nda̱wa̱á mikha̱a̱.
9 Mú a̱ngui̱nʼ bi̱ nandoʼ ka̱yala, maski má nuʼthá xígi̱, ikháanʼ ndu̱ya̱a̱ gajkhun rí náa ikháanʼla rígá dí itháan májánʼ dí ma̱ndoo maʼga kaguáanʼ mu makáwáanʼla.
10 Numuu rí Dios nindxu̱u̱ jmbii, ga̱jma̱a̱ tsémbumuu kaʼyoo ñajunʼ rí nu̱nila, ma̱ngaa ngajua rí nisngajmá ga̱jma̱a̱ numuu mbiʼyuu, índo̱ nimbáñún bi̱ ikhaa niraʼwíin ga̱jma̱a̱ rí numbáñúlá má xúʼko̱.
11 Mú nanduxu rí mámbáa dí ikháanʼla masngájma rí naʼni má xúʼko̱ ga̱jma̱a̱ xúgíʼ a̱jkiu̱u̱n, mu xúʼko̱ xáʼni a̱jma̱ a̱jkiu̱u̱n magiʼthu̱u̱n rí kuaʼti̱i̱nlú asndu índo̱ gártumuu mbiʼi,
12 mu xúʼko̱ xáguajta tsiskáanʼla, guyaridúún bi̱ ga̱jma̱a̱ numuu fe rí guáʼdáá ga̱jma̱a̱ rí naʼngo̱o̱ a̱jkiu̱ún nundrigúu rí nijuiʼthá makánún.
13 Numuu rí índo̱ Dios nixná ajngóo náa Abrahán nijmuu mbiʼyuu mu makudaminaʼ rí maʼnimbánuu, numuu rí xándoo maxná ajngóo ga̱jma̱a̱ numuu bi̱ itháan mba̱a̱ ki xóo ikhaa.
14 Niʼthúu̱n: “Gajkhun rí ma̱ni̱ tsajkurámáánʼ ga̱jma̱a̱ ma̱ni̱ rí maʼni mbaʼáanʼla”.
15 Ikha jngóo nda̱wa̱á rí Abrahán nisngájma rí niʼngo̱o̱ a̱jkiu̱u̱n, nigruigú rí nijuiʼthá makánáán.
16 Numuu rí xa̱bu̱ nuxna ajngún ga̱jma̱a̱ numuu mbiʼyuu mbáa bi̱ itháan mba̱a̱, rígi̱ naʼni dí xárígá xkujndu, numuu rí nuthi nasngájma rí nindxu̱u̱ gajkhun dí nuxudamíjna̱.
17 Ikhaa má kayuuʼ índo̱ Dios nindoo masngájma kaʼwu náa bi̱ mundrigúu rí ikhaa nikudaminaʼ, rí nandoo ma’ni tséxtiʼkhuu,* nijmuu mbá rí masngájma* dí gajkhun maʼnimbánuu rí niʼthí.
18 Dios xándoo maʼninduwaʼ, ma̱ngaa ajngóo rí nixná ga̱jma̱a̱ rí nikudaminaʼ maʼni tsixtiʼkhuu, ikháanʼ bi̱ nigayútúʼulú mu makáwáánʼ náa ikhaa, maguaʼdáálu tsiakii mu murajthuun jxa̱ʼ dí kuaʼti̱i̱nlú rí wíji̱ náa inulú.
19 Rí kuaʼti̱i̱nlú rígi̱ nindxu̱u̱ gajkhun ga̱jma̱a̱ wíji̱ jxa̱ʼ xóo mbá ancla ndrígóo barco rí nambáyulú makuwáanʼ ga̱jma̱a̱ ninújngoo náa krajngaa cortina,
20 náa nito̱ʼo̱o̱ ginii bi̱ niʼni mújúunʼ kamba̱a̱, ikhaa nindxu̱u̱ Jesús, bi̱ ni̱jkha̱nú ninindxu̱u̱ ndxajkun bi̱ phú kayá edxu̱u̱ asndu kámuu xó má Melquisedec.
Mbaʼa nota
^ O “matujxi̱ín”, “mbuya̱a̱”.
^ O “consejo ndrígóo”.
^ Náa ajngáa griego naʼthí, “niʼni ginuu”.
