I̱yi̱i̱ʼ rí na̱jkha̱ inún Hebreos 7:1-28
7 Numuu rí Melquisedec, rey ndrígóo Salem ga̱jma̱a̱ ndxajkun ndrígóo Dios bi̱ phú mba̱a̱, nigájnuu gáraʼnuminaʼ ga̱jma̱a̱ Abrahán índo̱ ikhaa nitanga̱a̱ ni̱jkha̱ gágudíin reyes, ikhaa niʼni tsajkurámaaʼ
2 ga̱jma̱a̱ Abrahán nixnúu* mbá chíʼgíiʼ* xúgíʼ rí gíʼdoo. Ginii kayuuʼ, mbiʼyuu najuiʼtájuíi “rey bi̱ naʼni rí jmbu”, ma̱ngaa nindxu̱u̱ rey ndrígóo Salem, xóo muʼthá, “rey bi̱ naʼni marigá rí tsímáá”.
3 Numuu rí tákujmaa tsáa ninindxu̱u̱ anu̱u̱ ni má ru̱dúu̱, ni má náa ni̱ʼkha̱, ni má rí xóo nixtáa ga̱jma̱a̱ rí xóo nikháñuu, mú rí niʼnimbríguii ga̱jma̱a̱ A̱ʼdióo Dios, ikhaa nindxu̱u̱ ndxajkun má xúʼko̱ asndu kámuu mbiʼi.
4 Gu̱ya̱a̱ nguáthá gíʼdoo numuu xa̱bu̱ bugi̱, bi̱ Abrahán wajin xiʼñúlú nixnúu mbá chíʼgíiʼ* rí itháán májánʼ rí nigu̱u̱ náa ni̱jkha̱ gáxmínaʼ.
5 Gajkhun má, rí xó má naʼthí náa Xtángoo, rí e̱ji̱i̱n Leví bi̱ nitri̱gi̱i̱n mani̱ndxu̱ún ndxajkun bi̱ guáʼdáá ñajunʼ dí muruma mbá chíʼgíiʼ* náa xa̱bu̱ xuajen, xóo muʼthá náa a̱ngiu̱ún, maski ajndu bugi̱ naguwáʼ* náa Abrahán.
6 Mú xa̱bu̱ bugi̱, na̱nguá e̱ʼkha̱ náa e̱ji̱i̱n Leví, mú nigruigú mbá chíʼgíiʼ* rí Abrahán nixnúu ga̱jma̱a̱ ikhaa niʼni tsajkurámaaʼ bi̱ wíji̱ magruigúu rí nijuiʼthá.
7 Nimbáa xándoo maʼni gaʼduunʼ rí bi̱ gi̱ʼtha̱ niguma tsajkurámaaʼ niʼni bi̱ giʼnii.
8 Ma̱ngaa náa timbá dí nirígá, bi̱ nundrigú mbá chíʼgíiʼ* ni̱ndxu̱ún xa̱bu̱ numbaaʼ bi̱ nakháñún, mú náa i̱mba̱ dí nirígá, nindxu̱u̱ ga̱jma̱a̱ numuu bi̱ najuiʼthá rí xtáa ndaʼya.
9 Ma̱ngaa asndu ma̱ndoo muʼthá dí Leví, bi̱ nagruigú mbá chíʼgíiʼ* ma̱ngaa nixná mbá chíʼgíiʼ índo̱ Abrahán nixná xtiʼkhuu,
10 numuu dí Leví xóó tségumaa* náa wajin xiʼñúuʼ índo̱ Melquisedec nigájnuu gáraʼnuu.
11 Ikha jngóo á mu rí manindxu̱lú xa̱bu̱ bi̱ ragíʼdoo aʼkhá ma̱ndoo ma̱ʼkha̱ ga̱jma̱a̱ numuu ndxajkun bi̱ naguwáʼ náa Leví (xó má rí naʼthí náa Xtángoo rí nikhánún xa̱bu̱ xuajen), náá numuu rí mbaʼyóoʼ makujmaa i̱mba̱a̱ ndxajkun bi̱ majuiʼthá ga̱jma̱a̱ numuu rí nindxu̱u̱ ndxajkun xó má Melquisedec raʼkháa xóo Aarón rá.
12 Numuu rí ñajunʼ ndrígu̱ún ndxajkun naxtiʼkhuu, xúʼko̱ má ndayóoʼ rí maxtiʼkhuu Xtángoo ma̱ngaa.
13 Numuu rí xa̱bu̱ bi̱ najuiʼthá ga̱jma̱a̱ numuu ni̱ʼkha̱ náa i̱mba̱ tribu ga̱jma̱a̱ nimbáa bi̱ na̱ʼkha̱ náa tribu rúʼko̱ na̱nguá niyambáá náa nakarámáʼ tsigijñaʼ.
14 Ga̱jma̱a̱ nakujmaa kaʼwu dí Tátá ndrígúlú ni̱ʼkha̱ náa e̱ji̱i̱n Judá, mú Moisés na̱nguá niʼthí rí makuwíin ndxajkun náa tribu rúʼko̱.
15 Ga̱jma̱a̱ nakujmaa itháán kaʼwu índo̱ nakujmaa i̱mba̱a̱ ndxajkun bi̱ nindxu̱u̱ xóo Melquisedec,
16 bi̱ na̱nguá nigruigú rí mani̱ndxu̱u̱ ndxajkun xó má naʼthí náa xtángoo rí na̱ʼkha̱ náa xa̱bu̱ numbaaʼ, ninindxu̱u̱ ga̱jma̱a̱ tsiakii rí maxtáa rí nditháan xáʼga̱nú mambáa.
17 Numuu dí rígi̱ rí najuiʼthá ga̱jma̱a̱ numuu ikhaa: “Ikháán nindxa̱a̱ʼ ndxajkun asndu kámuu xó má Melquisedec”.
18 Ikha jngóo kiʼtáñajunʼ rí nijuiʼthá nákha ginii, nánguá gíʼdoo numuu, numuu rí nánguá gíʼdoo tsiakii ni má nánguá ejmaa.
19 Xtángoo na̱nguá nijuixná mu maʼni jngudi̱i̱ aʼkhá, mú índo̱ ni̱ʼkha̱nú rí kuaʼti̱i̱nlú rí nindxu̱u̱ itháán májánʼ, niʼngo̱o̱ niʼni jngudi̱i̱ʼ, ga̱jma̱a̱ numuu ikhaa nandoo nuxuʼmámíjná náa Dios.
20 Ma̱ngaa Dios nixná ajngóo rí gajkhun maʼnimbánuu rígi̱
21 (numuu rí kúwá xa̱bu̱ bi̱ ninindxu̱ún ndxajkun bi̱ Dios na̱nguá nixná ajngóo ga̱jma̱a̱ numún, mú xa̱bu̱ bugi̱ ninindxu̱u̱ ndxajkun ga̱jma̱a̱ numuu ajngáa rí nixná bi̱ niʼthúu̱n, “Jeobá* nixná ajngóo rí maʼnimbánuu ga̱jma̱a̱ xáriʼku̱u̱ rí niʼthí: ‹Ikháán nindxa̱a̱ʼ ndxajkun asndu kámuu›”),
22 Jesús ni̱jkha̱nú ninindxu̱u̱ mbá rí nasngájma rí gajkhun maʼga̱nú marigá rí nimbánúún rí nindxu̱u̱ itháán májánʼ.
23 Ga̱jma̱a̱ numuu rí nakháñún rúʼko̱ naʼni rí ndxajkun nánguá eyoo muni̱ itháan ñajunʼ ndrígu̱ún, ikha jngóo ndiyóoʼ makuwá mbaʼin ndxajkun bi̱ muriʼkuwíín eʼwíinʼ.
24 Numuu rí ikhaa xtáa asndu kámuu mbiʼi, ikha jngóo nda̱wa̱a̱ tsáa mariʼkuriya̱a̱ʼ.
25 Ikhaa ma̱ngaa kijmarataa mu maʼni káwíin mbá kayuuʼ bi̱ nuxuʼmamijná náa Dios ga̱jma̱a̱ numuu ikhaa, numuu rí xtáa má xúʼko̱ ndaʼya mu maʼthí ga̱jma̱a̱ numún ikhiin.
26 Numuu rí ndayúlú mbáa ndxajkun bi̱ phú kayá edxu̱u̱ xóo ikhaa: Bi̱ nindxu̱u̱ jmbii, bi̱ ragíʼdoo aʼkhúun, bi̱ kaʼwii, bi̱ na̱nguá xtáa gajmíi̱n xa̱bu̱ aʼkhá ga̱jma̱a̱ nindxu̱u̱ itháán mba̱a̱ ki xóo mekhu.
27 Ikhaa na̱nguá nindxu̱u̱ xóo eʼwíinʼ ndxajkun bi̱ phú kuya̱ edxu̱u̱, numuu rí na̱nguá eyóoʼ rí maxnájxi̱ tsigijñaʼ tsejtsí mbiʼi, ginii ga̱jma̱a̱ numuu aʼkhúun, nda̱wa̱á ga̱jma̱a̱ numún xa̱bu̱ xuajen, numuu rí káaʼ mbóó miʼtsú niʼni asndu kámuu índo̱ nixnájximinaʼ.
28 Numuu rí Xtángoo nagruigi̱i̱n xa̱bu̱ bi̱ rígá rí tséʼngu̱u̱n gúni̱ mu mani̱ndxu̱u̱n ndxajkun bi̱ phú kuya̱ edxu̱u̱, mú ajngáa rí nijuixná nda̱wa̱á rí Xtángoo, nigi̱ʼi̱ mbáa Ada̱ mu mani̱ndxu̱u̱ ndxajkun bi̱ phú kayá edxu̱u̱, ga̱jma̱a̱ niʼni xúgíʼ rí Dios gíʼthu̱u̱n maʼni ikhaa, ninindxu̱u̱ kájxi̱i̱ asndu kámuu.
Mbaʼa nota
^ Náa ajngáa griego naʼthí, “nikuiʼtáa”.
^ O “diezmo”.
^ O “diezmo”.
^ Náa ajngáa griego naʼthí, “nigájnún náa tsu̱du̱u̱”.
^ O “diezmo”.
^ O “diezmo”.
^ O “diezmo”.
^ Náa ajngáa griego naʼthí, “kaʼníí xóó xtáa náa tsu̱du̱u̱”.
