I̱yi̱i̱ʼ rí na̱jkha̱ inún Hebreos 8:1-13
8 Rígi̱ nindxu̱u̱ rí phú nandulú gúʼthá: Ikháanʼ kuaʼdaa mbáa ndxajkun bi̱ phú kayá edxu̱u̱ bi̱ nindxu̱u̱ xígi̱ kaʼnii ga̱jma̱a̱ ikhaa nigi̱ʼi̱ náa níjñu mújúunʼ xíliúu Dios bi̱ phú mba̱a̱ náa mekhuíí,
2 ikhaa nindxu̱u̱ bi̱ nañambáá náa rí phú mikaʼwu ga̱jma̱a̱ náa guʼwá xtíin rí gajkhun rí nikujxi̱ Jeobá,* raʼkháa xa̱bu̱ú.
3 Numuu rí xúgíinʼ ndxajkun bi̱ phú kuya̱ edxu̱u̱ nitri̱gi̱i̱n mu muxnajxi̱ regalo rí kaʼyoo Dios ga̱jma̱a̱ tsigijñaʼ, ikha jngóo ndxajkun bi̱ phú kayá edxu̱u̱ bugi̱ ndiyóoʼ magiʼdoo mbá rí maxnájxi̱.
4 Á mu ikhaa xtáa náa tsu̱du̱u̱ ku̱ba̱ʼ, xánindxu̱u̱ ndxajkun, numuu rí kúwá má xa̱bekha bi̱ nuxnajxi̱ tsigijñaʼ xó má naʼthí náa Xtángoo.
5 Ñajunʼ mitsúʼkháan rí nuni̱ xa̱bu̱ bugi̱ nindxu̱u̱ mbá xtiʼkhuu ga̱jma̱a̱ mbá ndájkua̱ dí narígá mekhuíí, xó má eʼthí náa kiʼtáñajunʼ rí Dios nixnúu Moisés índo̱ inu maʼni guʼwá xtíin: “Ataniminaʼ mu matani̱ ikháá má kayuuʼ xó má xtiʼkhuu rí niwasngájmaaʼ náa kúbá”.
6 Mú rí xúgi̱ Jesús nigruigú mbá ñajunʼ rí itháán májánʼ, numuu rí ma̱ngaa nindxu̱u̱ bi̱ nañambáá* náa rí nimbánúún dí itháan májánʼ, dí nimbánúún rígi̱ nigájnuu náa xtángoo ga̱jma̱a̱ rígá mambanúu numuu dí nigájnuu náa dí Dios nikudaminaʼ rí nindxu̱u̱ itháan májánʼ.
7 Á mu timbá rí nimbánúún ninindxu̱u̱ májánʼ, xáʼyóoʼ má mambanún rí a̱jma̱ nuthu.
8 Numuu rí nakujmaa kaʼwu dí ikhaa ndaʼyoo mbá dí ra̱májánʼ náa xa̱bu̱ xuajen índo̱ naʼthí: “‹Gu̱ya̱a̱, na̱ʼkha̱nú mijngii mbiʼi, eʼthí Jeobá,* rí mambanúʼ nuxi̱ʼ gajmíʼ bi̱ kúwá náa goʼwóo Israel ga̱jma̱a̱ bi̱ kúwá náa goʼwóo Judá.
9 Xánindxu̱u̱ xóo rí nimbánuʼ gajmíʼ wajin xiʼñúúnʼ mbiʼi rí niguajthun ñawúúnʼ mu maguwíin náa ku̱ba̱ʼ ndrígóo Egipto. Ikhiin na̱nguá ninimbu̱u̱n náa rí nimbánuʼ gajmíʼ, ikha jngóo niniʼñúuʼ raxmiéjunʼ ka̱ñu̱u̱n›, eʼthí Jeobá.*
10 ‹Rí mambanúʼ gajmíʼ bi̱ kúwá náa goʼwóo Israel nda̱wa̱á dí mbiʼi rúʼko̱, eʼthí Jeobá,* ikhaa nindxu̱u̱ rígi̱. Magídáʼ xtángoo ndrígóʼ náa ku̱ma̱ ndrígu̱ún ga̱jma̱a̱ maniraʼmáʼ náa a̱jkiu̱ún.* Ikhúúnʼ mani̱ndxu̱ʼ Dios ndrígu̱ún ga̱jma̱a̱ ikhiin mani̱ndxu̱ún xuajñunʼ.
11 ‹Ga̱jma̱a̱ nimbáa ni xáʼsngún xa̱bu̱ xuajñuu ni má a̱ngui̱i̱n xáʼthúún: “¡Ataniʼniiʼ Jeobá!”.* Numuu rí xúgíinʼ muniʼniúnʼ asndu bi̱ itháan majkhiinʼ ga̱jma̱a̱ asndu bi̱ itháan wanii.
12 Ga̱jma̱a̱ ikhúúnʼ magáwíinʼ a̱jkiu̱nʼ ka̱ñu̱u̱n náa dí raʼkhí eni̱ ma̱ngaa ni xármáʼáan a̱jkiu̱nʼ itháan eʼni aʼkhá ndrígu̱ún›”.
13 Índo̱ niʼthí ga̱jma̱a̱ numuu “nuxi̱ʼ rí nimbánuu”, ikhaa niniñuuʼ maʼni wayuu rí ginii, ikha jngóo rí naguanúu kidíí naʼni wayuu ga̱jma̱a̱ inu mandáti̱ga̱a̱.
Mbaʼa nota
^ O “mediador”. Náa ajngáa griego nandoo gáʼthúu̱n mbáa xa̱bu̱ bi̱ nambáñún a̱jmi̱i̱n xa̱bu̱ mu mambanún.
^ O “ámiuún”.
