I̱yi̱i̱ʼ rí na̱jkha̱ inún Hebreos 9:1-28
9 Dí nimbánúún nákhá ginii, gíʼdoo xtángoo náa naʼthí xú kaʼnii gíʼmaa munimbaníí ñajunʼ ndrígu̱ún dí mitsúʼkháan ga̱jma̱a̱ mbá guʼwá xtíin náa rí mbuyamajkuíí dí rígá náa tsu̱du̱u̱ ku̱ba̱ʼ.
2 Nigumaratáá náa timbá níʼkhóo guʼwá xtíin, náa rígá candelabro,* mesa ga̱jma̱a̱ pan rí najuixnájxi̱ náa nagumbiʼyuu rí mikaʼwu.
3 Mú náa kidxuuʼ rí maʼni raga̱jma̱ cortina rí krajngaa, ikhí rígá i̱mba̱ níʼkhóo guʼwá xtíin rí nagumbiʼyuu rí phú mikaʼwu.
4 Ikhí rígá náa nakarámáʼ dí ndataun rí ki̱ʼni̱ ga̱jma̱a̱ oro, ga̱jma̱a̱ ikhí rígá e̱jna̱ dí nimbánúún* gajmiún Dios rí kagu̱u̱ mbawíí oro, ikhí ka̱ʼwa̱n rayaʼ dí oro náa kajkuáa maná* ma̱ngaa ikhí ka̱ʼwa̱n ixu̱u̱ Aarón rí ni̱ʼkha̱ riʼyu̱u̱ ga̱jma̱a̱ itsí wajpa* náa kiʼnirámáʼ xtángoo ndrígóo Dios,
5 náa tsu̱du̱u̱ trámiinʼ querubines bi̱ nambiʼiin, ikhiin nuruguáá ga̱jma̱a̱ xkamijxoo xpíjpiún náa rí nagúgoo ga̱jma̱a̱.* Mú raʼkháa xúgi̱ nindxu̱u̱ mbiʼi rí muʼthá kuduun ga̱jma̱a̱ numuu rígi̱.
6 Nda̱wa̱á rí niguma májáánʼ xúgíʼ rígi̱, ndxajkun natu̱ʼu̱u̱n tsejtsí mbiʼi náa timbá níʼkhóo guʼwá xtíin mu muni̱ ñajunʼ rí mitsúʼkháan,
7 mú náa raga̱jma̱ níʼkhóo, nato̱ʼo̱o̱ ndxajkun bi̱ phú kayá edxu̱u̱ káaʼ mbá miʼtsú rí mbá tsiguʼ, mbáwíí eto̱ʼo̱o̱ ga̱jma̱a̱ nayéjkha̱ má xúʼko̱ eʼdi mu maxnájxi̱ ga̱jma̱a̱ numuu ikhaa, ma̱ngaa numuu aʼkhá ndrígu̱ún xa̱bu̱ xuajen rí tséni kiejuunʼ.
8 Xígi̱ kaʼnii eʼni makruʼulú espíritu santo,* índo̱ káʼníí xóó rígá timbá guʼwá xtíin, kamba̱a̱ rí xóo kaʼnii mu̱ʼgua̱ náa rí mikaʼwu, xóó tsékujmaa.
9 Guʼwá xtíin rígi̱ nindxu̱u̱ mbá xkri̱da náa mbiʼi rí kuwáanʼ xúgi̱ ga̱jma̱a̱ nasngájma regalo rí najuixnáá Dios ga̱jma̱a̱ tsigijñaʼ rí najuixnájxi̱. Mú rígi̱ tséʼngo̱o̱ gáʼni rí xa̱bu̱ bi̱ naʼni ñajunʼ rí mitsúʼkháan magiʼdoo mbá ku̱ma̱ mikaʼwu.
10 Rígi̱ i̱ndó naʼthí ga̱jma̱a̱ numuu ganitsu ga̱jma̱a̱ dí naʼwa̱a̱n ma̱ngaa rí xóo mixtiʼkhu eni̱ kaʼwumijnáá,* nindxu̱u̱ rí xtángoo na̱nda̱ʼa̱ maguma ga̱jma̱a̱ numuu xuyuuʼ xa̱bu̱ ga̱jma̱a̱ ndayóoʼ magumambaníí tsiakii asndu índo̱ gáguma májáanʼ xúgíʼ dí rígá.
11 Cristo ni̱ʼkha̱ xóo ndxajkun bi̱ phú kayá edxu̱u̱, ni̱ʼkha̱ kagu̱u̱ xúgíʼ rí májánʼ dí kuaʼdáálu xúgi̱, nito̱ʼo̱o̱ náa guʼwá xtíin rí itháan gíʼdoo numuu ga̱jma̱a̱ rí itháan májánʼ dí raʼkháa xa̱bu̱ numbaaʼ nini̱, xóo muʼthá, dí na̱nguá niguma náa numbaaʼ rígi̱.
12 Ikhaa nito̱ʼo̱o̱ mbóó miʼtsú asndu kámuu náa rí mikaʼwu, mú táto̱ʼo̱o̱ ga̱jma̱a̱ eʼdiuu tsu̱jtuunʼ ni má ejín xédí, niʼni ga̱jma̱a̱ eʼdiuu mínaaʼ, ma̱ngaa niʼngo̱o̱ niʼni káwáánʼ asndu kámuu.*
13 Numuu rí ndxajkun najmún eʼdiún tsu̱jtuunʼ ga̱jma̱a̱ xédi ma̱ngaa nu̱da̱ʼ idiuuʼ a̱ʼdá xédí náa bi̱ niguma tsagiin mu xúʼko̱ maguma kaʼwíín náa inuu Dios,
14 mú eʼdiuu Cristo itháan gíʼdoo numuu, numuu rí ikhaa niʼni xó má ikha rí naxná espíritu dí rígá kámuu, nixnáximinaʼ náa Dios ga̱jma̱a̱ tágiʼdoo nimbá aʼkhúun, niʼni kaʼwi̱i̱ ñajunʼ dí ragíʼdoo numuu dí niʼnilú mu xúʼko̱ maguaʼdáá mbá ku̱ma̱ kaʼwu ga̱jma̱a̱ xúʼko̱ ma̱ndoo mu̱ʼni̱ ñajunʼ mitsúʼkháan ndrígóo Dios bi̱ ndaʼya.
15 Ikha jngóo ikhaa nindxu̱u̱ bi̱ nañambáá* náa rí nimbánúún nuxi̱ʼ, mu xúʼko̱ bi̱ nijuatsaʼwún mundrígú rí nijuiʼthá makánún kámuu. Ndiyóoʼ rí mbáa makhañúu mu ma̱ndoo maʼtsiwíin, ga̱jma̱a̱ xúʼko̱ maguma káwíin náa dí raʼkhí nini̱, rí nimbánúún nákha ginii.
16 Índo̱ rígá mbá rí nambánún ndayóoʼ rí makhañúu xa̱bu̱ bi̱ nakudaminaʼ maʼnimbánuu rígi̱,
17 á mu kaʼníí xtáa ndaʼya xa̱bu̱ bi̱ nikudaminaʼ rígi̱, rí nimbánúún ragíʼdoo numuu, mu magiʼdoo numuu ndayóoʼ rí mbáa makañúu.
18 Ma̱ngaa ndiyóoʼ magadíí eʼdi, mu xúʼko̱ ma̱ndoo magi̱ʼdu̱u̱ majmaa* rí nimbánúún nákhá ginii.
19 Nda̱wa̱á rí Moisés niʼthún xúgíinʼ xa̱bu̱ xuajen xúgíʼ kiʼtáñajunʼ rí na̱ʼkha̱ náa Xtángoo, niguajthun eʼdiún ejín xédí ga̱jma̱a̱ tsu̱jtuunʼ ma̱ngaa iyaʼ ga̱jma̱a̱ mugu̱ rí maña̱ʼ xngeʼdi ma̱ngaa iná rí majkhaʼ* ikhú nixtíjyooʼ libro* ga̱jma̱a̱ náa xúgíinʼ xa̱bu̱ xuajen,
20 ga̱jma̱a̱ niʼthí: “Rígi̱ nindxu̱u̱ eʼdi rí nimbánuu rí Dios nikuʼma munimbáníínla”.
21 Ma̱ngaa nixtíjyooʼ ga̱jma̱a̱ eʼdi náa guʼwá xtíin, ma̱ngaa xúgíʼ rí najmaa náa ñajunʼ rí mikaʼwu.
22 Xúʼko̱ kaʼnii, xó má eʼthí náa Xtángoo, rí xúgíʼ naguma kaʼwi̱i̱ ga̱jma̱a̱ eʼdi ga̱jma̱a̱ á mu tségadíí eʼdi, Dios tséʼni mba̱a̱ a̱jkiu̱u̱n kaʼyoo aʼkhúún xa̱bu̱.
23 Xígi̱ kaʼnii ndiyóoʼ maguma kaʼwi̱i̱ xtiʼkhuu dí rígá mekhuíí, mú dí rígá mekhuíí na̱nda̱ʼa̱ tsigijñaʼ dí itháan májánʼ.
24 Numuu rí Cristo na̱nguá nito̱ʼo̱o̱ náa rí mikaʼwu náa rí xa̱bu̱ numbaaʼ nini̱ dí nindxu̱u̱ xóo mbá xtiʼkhuu rí gajkhun rígá, Cristo nito̱ʼo̱o̱ mekhuíí, ikha jngóo dí xúgi̱ naxnáximínáʼ náa inuu Dios ga̱jma̱a̱ numulú.
25 Tárígá rígi̱ mu ikhaa maxnáximinaʼ mbaʼa nuthu xó má eʼni ndxajkun bi̱ phú kayá edxu̱u̱ índo̱ nato̱ʼo̱o̱ náa rí mikaʼwu mámbá tsiguʼ ga̱jma̱a̱ eʼdi, dí raʼkháa eʼdiuu ikhaa.
26 Á mu xúʼko̱, ikhaa ndiyóoʼ mamínuuʼ mbaʼa nuthu asndu nákha nigi̱ʼi̱ numbaaʼ, mú rí xúgi̱ nikujmaa mbóó miʼtsú asndu kámuu, asndu índo̱ gártumuu* mbiʼi rí kuwáanʼ,* mu maʼnijgudi̱i̱ʼ aʼkhá ga̱jma̱a̱ tsigijñaʼ ndrígóo.
27 Xó má nda̱a̱ rí mawijijthu̱u̱n* rí makañúún xa̱bu̱ mbóó miʼtsú, mú nda̱wa̱á dí rígi̱ mixtadiʼíín cuenta,
28 xúʼko̱ Cristo ma̱ngaa, nixnájximinaʼ káaʼ mbóó miʼtsú mu magu̱ aʼkhá* ndrígu̱ún mbaʼin xa̱bu̱, ga̱jma̱a̱ índo̱ gátanga̱a̱ rí maʼni a̱jma̱ nuthu, ní xátanga̱a̱ mu marígúu aʼkhá ga̱jma̱a̱ mbuyáá bi̱ guáʼthi̱i̱n wéñuuʼ makáwíin.
Mbaʼa nota
^ Rígi̱ nindxu̱u̱ xóo mbá ndélá rí gíʼdoo juwan agiuuʼ.
^ O “arca del pacto”.
^ Náa ajngáa griego naʼthí, “itsí rí nimbánúún”.
^ O “rí nagúgoo ga̱jma̱a̱ rí nandoo nambáxi̱ín”. Náa ajngáa griego naʼthí, “rí nagúgoo ga̱jma̱a̱”, ma̱ngaa ma̱ndoo manindxu̱u̱ índo̱ mbáa xa̱bu̱ naxnáxi̱ mbá tsigi̱jñaʼ mu Dios maʼni mba̱a̱ a̱jkiu̱u̱n kaʼyoo.
^ Náa ajngáa griego naʼthí, “mixtiʼkhu xóo najngún iyááʼ”.
^ Náa ajngáa griego naʼthí, “niʼtsiwáánʼ asndu kámuu”.
^ O “mediador”. Náa ajngáa griego nandoo gáʼthúu̱n mbáa xa̱bu̱ bi̱ nambáñún a̱jmi̱i̱n xa̱bu̱ mu mambanún.
^ Náa ajngáa griego naʼthí, “nigu̱ma ndxo̱o̱”.
^ Náa ajngáa griego naʼthí, “hisopo”.
^ O “rollo”.
^ Náa ajngáa griego naʼthí, “maxtagijxíín”.
^ Náa ajngáa griego naʼthí, “ni xáxtáa náa majñu̱u̱ʼ aʼkhá”.
