Hechos rí nini̱ apóstoles 10:1-48
-
Cornelio rígá mbá rí nawasngájmáá (1-8)
-
Pedro nawasngájmáá náa ndiʼñún xujkhúʼ bi̱ niguma kaʼwi̱ín (9-16)
-
Pedro na̱jkha̱ gáʼyoo Cornelio (17-33)
-
Pedro naʼtarúʼúún ajngáa rí májánʼ xa̱bu̱ bi̱ raʼkhíin judíos (34-43)
-
“Dios tséraʼwíin xa̱bu̱” (34, 35)
-
-
Nundrigú espíritu santo bi̱ raʼkhíin judíos ga̱jma̱a̱ najngún iyááʼ (44-48)
10 Náa xuajen Cesarea nixtáa mbáa xa̱bu̱ mbiʼyuu Cornelio, nindxu̱u̱ mbáa bi̱ naʼtáñajúúnʼ soldado* ga̱jma̱a̱ bugi̱ najmaʼniúnʼ xóo mbá grupo soldado italiano.*
2 Nindxu̱u̱ mbáa xa̱bu̱ bi̱ naʼni ñajuunʼ Dios, xúʼko̱ má xúgíinʼ bi̱ kúwá náa goʼwóo ma̱ngaa. Nambáñun xa̱bu̱ bi̱ nda̱ñúunʼ ga̱jma̱a̱ naʼtákáñuu* má xúʼko̱ Dios.
3 Mú naʼni xóo mbá las 3 rí wakíʼ niwasngájmáá,* náa ndiʼyoo mbáa ángel ndrígóo Dios bi̱ nato̱ʼo̱o̱ náa ikhaa ga̱jma̱a̱ niʼthúu̱n: “¡Cornelio!”.
4 Ikhú Cornelio nimíñuu índo̱ ndiʼyoo ga̱jma̱a̱ nirajxu̱u̱: “Tátá, dí rígá rá.” Ikhaa niʼthúu̱n: “Dios niʼdxawuun dí naratájkáan ma̱ngaa xóo natambáñun xa̱bu̱ gíníi ga̱jma̱a̱ narmáʼáan má xúʼko̱ a̱jkiu̱u̱n rí natani̱.
5 Ikha jngóo, ataxúʼmiin tikhuun xa̱bu̱ náa Jope mu maguwáʼ kuya̱a̱ Simón, bi̱ najmaʼniiʼ xóo Pedro.
6 Xtáa raguanúu náa goʼwóo Simón bi̱ naʼni mújúunʼ xtá, goʼwóo gíʼ náa rawuunʼ lamáa”.
7 Índo̱ ángel ni̱jkha̱a̱, ikhú nindxaʼwúún a̱jmi̱i̱n bi̱ numbayíí ma̱ngaa mbáa soldado bi̱ naʼtáñajuunʼ ikhaa ma̱ngaa ndaʼyamajkuu Dios,
8 niʼthún xúgíʼ rí ndiʼyoo, nda̱wa̱á nikuʼmiin magún náa Jope.
9 Imbo̱o̱ mbiʼi, índo̱ kúwá ragún kamba̱a̱ ga̱jma̱a̱ kúwá raguánú má náa xuajen, Pedro nitsimuu náa tsu̱du̱u̱ guʼwá mu maʼtájkáan, naʼni xóo mbá las 12 rí wakhaʼ.
10 Mú ikhaa nixkidxu̱u̱ wéñuuʼ. Índo̱ kúwá runi̱ májáánʼ ganitsu, ikhú ndiʼyoo mbá rí niwasngájmáá,
11 ndiʼyoo mekhu paʼta ga̱jma̱a̱ nagajtaa náa tsu̱du̱u̱ ku̱ba̱ʼ mbá rí nindxu̱u̱ xóo xtíin wajpa rí asndu xóo kurajtuun náa mámbá inuu.
12 Náa tsu̱du̱u̱ xtíin rúʼko̱ jngutámiinʼ xujkhúʼ bi̱ a̱jkhu̱ rajkhúún, ma̱ngaa ñu̱ʼu̱ bi̱ jngruigu̱u̱n rijma̱a̱ ga̱jma̱a̱ xujkhúʼ bi̱ nuxmajtamijná bi̱ kúwá náa tsu̱du̱u̱ ku̱ba̱ʼ.
13 Ikhú niʼdxaun mbá aʼwá rí niʼthúu̱n: “¡Pedro, atujxa̱a̱ʼ aradíin xujkhúʼ buʼko̱ mu miʼtsúún!”.
14 Mú Pedro niriʼñuu: “Tátá, xákhu jún. Numuu rí nimbá miʼtsú tiʼkhu rí mitsaga, ni má rí naʼthí náa xtángoo dí ragíʼmaa miʼkhu”.
15 Ikhú aʼwá niʼthúu̱n rí maʼni a̱jma̱ nuthu: “Xárata rí nindxu̱u̱ mitsaga rí Dios niʼni káʼwi̱i̱”.
16 Nda̱wa̱á rí aʼwá niwán dí maʼni ajtsú nuthu, ikhú xtíin wajpa nitanga̱a̱ mekhuíí.
17 Mú Pedro tséniñuuʼ randxa̱ʼwáminaʼ ndiéjunʼ eyoo gáʼthúu̱n rí ndiʼyoo índo̱ niwasngájmáá. Mú xa̱bu̱ bi̱ Cornelio nikungui̱i̱nʼ kúwá rurajxi̱ náá eguanúu goʼwóo Simón índo̱ ikhiin guájun má náa xkrugua.
18 Ikhú nirajxi̱ á mu Simón bi̱ nutháán Pedro, xtáa ikhí.
19 Índo̱ Pedro kaʼníí xóó xtáa randxa̱ʼwáminaʼ ga̱jma̱a̱ rí ndiʼyoo náa niwasngájmáá, ikhú Dios nijmuu espíritu santo* ndrígóo mu maʼthúu̱n: “¡Atayáá! Ajtsíin xa̱bu̱ kúwá ruñáanʼ.
20 Ikha jngóo arajtaa ga̱jma̱a̱ xátani̱ a̱jma̱ a̱jkia̱a̱nʼ mi̱dxu̱ʼ gajmiáanʼ, numuu rí ikhúúnʼ má nikuʼngui̱i̱nʼ maguwáʼ gúñáanʼ”.
21 Ikhú Pedro nigajtaa gáʼñúún xa̱bu̱ ga̱jma̱a̱ niʼthún: “Gi̱i̱ xtáá. Ikhúúnʼ ni̱ndxu̱ʼ bi̱ nduʼyáaʼla. Náá numuu rí niguwaʼla rá.”
22 Ikhiin nitháán: “Cornelio nindxu̱u̱ mbáa bi̱ naʼtáñajúúnʼ soldado, nindxu̱u̱ mbáa xa̱bu̱ májáanʼ ga̱jma̱a̱ namíñuu kaʼyoo Dios, ma̱ngaa xúgíinʼ xa̱bu̱ judíos nuthi dí májánʼ ga̱jma̱a̱ numuu. Mú, mbáa ángel niʼthúu̱n ajngáa rí na̱ʼkha̱ náa Dios rí ikháán mi̱dxu̱ʼ náa goʼwóo ga̱jma̱a̱ maʼdxaun dí ikháán gáratha̱a̱n”.
23 Ikhú Pedro niʼthún rí matu̱ʼu̱u̱n ga̱jma̱a̱ nixnúún náa maguanún mbruʼun rúʼko̱.
I̱mba̱ néjtsuu nigi̱jxi̱i̱ ga̱jma̱a̱ ni̱jkha̱ gajmíi̱n, mangiin nigún gajmiún tikhuun a̱ngiu̱xu bi̱ kúwá náa Jope.
24 Mbá mbiʼi nda̱wa̱á niguánú náa Cesarea. Ga̱jma̱a̱ Cornelio xtáa má ragíʼthu̱u̱n, ma̱ngaa nigímbíin bi̱ kaʼñún ga̱jma̱a̱ bi̱ nambájxu̱u̱ gajmíi̱n.
25 Índo̱ Pedro nito̱ʼo̱o̱ náa goʼwóo, ikhú Cornelio ni̱jkha̱ gátsijnuu ga̱jma̱a̱ nismbáti̱go̱o̱ náa inuu.
26 Mú Pedro nikujxi̱i̱ ga̱jma̱a̱ niʼthúu̱n: “Añejún. Ikhúúnʼ mangúún ni̱ndxu̱ʼ xa̱bu̱ xó má ikháán”.
27 Índo̱ kúwá rutamíjná, nitu̱ʼu̱u̱n awúu̱n guʼwá ga̱jma̱a̱ ndiʼñún mbaʼin wéñuuʼ xa̱bu̱ bi̱ nigimbíin.
28 Ikhaa niʼthún: “Ikháanʼ má ndu̱ya̱a̱la májánʼ rí náa xtángoo ndrígúxu̱ naʼthí rí mbáa judío xándoo mambajxúu ga̱jma̱a̱ i̱mba̱a̱ xa̱bu̱ bi̱ raʼkháa judío ni má rí maʼga kanuu náa ikhaa. Mú Dios nisngájmuʼ mba̱yo̱o̱ rí xáʼyóoʼ mathu̱u̱n tsagaa nimbáa xa̱bu̱.
29 Ikha jngóo, mbá nacha̱ má ni̱ʼkhá índo̱ nigún gúñúunʼ. Dí xúgi̱ rá, guthu̱nʼla, náá numuu rí nindxa̱ʼo̱ʼ ma̱ʼkhá”.
30 Ikhú Cornelio niʼthúu̱n: “Naʼni má a̱jkhu̱ mbiʼi índo̱ ikhúúnʼ xtáá ratajkáan náa goʼwóʼ hora má rígi̱, xóo mbá las 3 rí wakíʼ, nda̱a̱ tsu̱ma̱ nisngájmaminaʼ náa ikhúúnʼ mbáa xa̱bu̱ bi̱ kagíʼ mbá xtíin rí naxpíbinʼ,
31 niʼthúnʼ: ‹Dios niʼdxaun dí naratájkáan ma̱ngaa ndiʼyoo rí xóo natambáñúún xa̱bu̱ gíníi, ga̱jma̱a̱ narmáʼáan a̱jkiu̱u̱n má xúʼko̱ rí natani̱.
32 Ikha jngóo, ataxúʼmiin tikhuun xa̱bu̱ náa Jope mu maguwáʼ kuya̱a̱ Simón bi̱ najmaʼniiʼ xóo Pedro. Xtáa raguanúu náa goʼwóo Simón, bi̱ naʼni mújúunʼ xtá, goʼwóo gíʼ náa rawuunʼ lamáa›.
33 Ikha jngóo, mbá nacha̱ nikuʼmíin xa̱bu̱ rí magún gúñáanʼ, májánʼ tani rí ni̱dxa̱ʼ. Xúgiáanʼxu kúwáanʼ gi̱i̱ náa inuu Dios mu mudxáwíínxu xúgíʼ rí Jeobá* niʼtháanʼ maratuxu”.
34 Índo̱ Pedro nidxawun rígi̱ ikhú niʼthí: “Rí xúgi̱ nakro̱ʼo̱ʼ rí Dios tséraʼwíin xa̱bu̱,
35 ikhaa nagruiguíin xúgíinʼ bi̱ namíñúún kuyáá, bi̱ nuni̱ rí májánʼ, tséʼniuu má náá xuajen eguwáʼ.
36 Ikhaa nikuʼma ajngóo náa xa̱bu̱ Israel, mu maʼthúún mbá ajngáa rí májánʼ rí maʼni makuwá tsímáá ga̱jma̱a̱ numuu Jesucristo. Ikhaa bugi̱ bi̱ nindxu̱u̱ Tátá náa xúgíinʼ xa̱bu̱.
37 Ikháanʼla má ndu̱ya̱a̱ rí nijuiʼthá náa xúgíʼ mbayuuʼ Judea, mbá rí nigíʼdu̱u̱ náa Galilea, nda̱wa̱á rí Juan niʼtáraʼaʼ ga̱jma̱a̱ numuu rí xa̱bu̱ majngún iyááʼ:
38 Nindxu̱u̱ ga̱jma̱a̱ numuu Jesús bi̱ na̱ʼkha̱ náa Nazaret, bi̱ Dios niraʼwíi ga̱jma̱a̱ espíritu santo ga̱jma̱a̱ nixnúu tsiakii, ikhaa nijngruigo̱o̱ raʼni dí májánʼ ga̱jma̱a̱ niʼni thanún bi̱ Gixa̱a̱ niʼni gíníi, numuu rí Dios nixtáa ga̱jma̱a̱ ikhaa.
39 Ikháanʼxu ndiya̱a̱ xúgíʼ rí ikhaa niʼni náa xuajen ndrígu̱ún judíos ga̱jma̱a̱ náa Jerusalén, mú ikhiin nixiyáa índo̱ nidujmaa náa ixi̱.
40 Mú Dios nikujxi̱i̱* índo̱ niʼni ajtsú mbiʼi, ga̱jma̱a̱ niniñuuʼ rí masngájmaminaʼ
41 mú raʼkháa náa xúgíinʼ xa̱bu̱ xuajen, i̱ndó náa bi̱ ndiyáá, bi̱ Dios má niraʼwíin wapháá, náa ikháanʼxu bi̱ nipiʼtsu ga̱jma̱a̱ niwán gajmiúxu nda̱wa̱á rí ikhaa nitujxi̱i̱* náa majñúnʼ wajinʼ.
42 Ma̱ngaa niʼtáñajunxu rí mutarúʼunxu xúgíinʼ xa̱bu̱ xuajen ga̱jma̱a̱ rí muthu̱u̱nxu kuduun rí ikhaa nindxu̱u̱ bi̱ Dios nigíiʼ mu maʼnimbánuu xkujndu ndrígu̱ún bi̱ nduya ga̱jma̱a̱ bi̱ nikháñun.
43 Xúgíinʼ profetas* nithi ga̱jma̱a̱ numuu ikhaa, rí xúgíinʼ bi̱ gúguáʼdáá fe náa ikhaa majngudi̱i̱ aʼkhúún ga̱jma̱a̱ numuu mbiʼyuu”.
44 Índo̱ Pedro kaʼníí xóó xtáa raʼthí rígi̱, ikhú espíritu santo nigajtaa náa xúgíinʼ bi̱ kúwá rudxawíín ajngáa rígi̱.
45 Judíos bi̱ nunimbu̱ún* kuyáá Jesús bi̱ ni̱jkha̱ gajmíi̱n Pedro niʼniún tsiánguá numuu rí xa̱bu̱ bi̱ raʼkhíin judíos mangiin nundrigú espíritu santo,
46 numuu rí ikhiin nidxawíín rí nuthi mbaʼa enii ajngáa ma̱ngaa nuni̱ mba̱a̱ Dios. Ikhú Pedro niʼthí:
47 “Bugi̱ ma̱ngaa nindrigú espíritu santo xó má ikháanʼla. Á mu xúʼko̱, nimbáa xárikhún rí majngún iyááʼ”.
48 Ikhú nikuʼma rí majngún iyááʼ ga̱jma̱a̱ mbiʼyuu Jesucristo. Nda̱wa̱á ninda̱ʼa̱a̱ Pedro rí maguanúu nguáthá mbiʼi ga̱jma̱a̱ ni̱ndxu̱ún.
Mbaʼa nota
^ O “centurión”, bi̱ naʼtáñajúúnʼ mbá 100 soldado.
^ Náa mbá grupo soldado bugi̱, kúwá mbá 600 soldado romanos.
^ O “naʼni tsajkuun”.
^ O “nirajtoo iduu”, “visión”.
^ O “niʼnigabi̱i̱”, “niʼni mbaʼya̱a̱”.
^ O “nigabi̱i̱”, “ndiʼya̱a̱”.
^ O “gaʼyee”, “bi̱ nuthi dí marigá”.
^ Náa ajngáa griego naʼthí, “bi̱ nunimbu̱ún bi̱ nithu xtóo xuyuuʼ tsáʼkhún”.
