Hechos rí nini̱ apóstoles 11:1-30
11 Índo̱ apóstoles ga̱jma̱a̱ a̱ngiu̱xu bi̱ kúwá náa Judea nidxawíín rí mangiin xa̱bu̱ bi̱ raʼkhíin judíos nindrigú ajngá rawuunʼ Dios.
2 Ikha jngóo, índo̱ Pedro ni̱jkha̱ náa Jerusalén, xa̱bu̱ bi̱ nandún rí xúgíinʼ muthu xtóo xuyuuʼ tsáʼkhún nitamijná mijkoo gajmiún Pedro.
3 Nitháán: “Nita̱ʼa̱a̱ʼ náa guʼwún xa̱bu̱ bi̱ na̱nguá nithu xtóo xuyuuʼ tsáʼkhún ga̱jma̱a̱ nitatsiʼtsu gajmiáanʼ”.
4 Ikhú Pedro niʼthún xúgíʼ dí nirígá:
5 “Ikhúúnʼ xtáá ratajkáan* náa xuajen Jope índo̱ rígá mbá rí niwasngájmuʼ.* Ndi̱yo̱o̱ rí asndu xóo mbá xtíin wajpa rí nigajtaa mekhuíí, asndu xóo kurajtuun náa nájkhu̱ inuu, nigajtaa mbájmbu náa xtáá ikhúúnʼ.
6 Ikhú ndi̱yo̱o̱ májánʼ rí ikhí jngútamiinʼ xujkhúʼ bi̱ a̱jkhu̱ rajkhúún bi̱ kúwá náa ku̱ba̱ʼ, xujkhú xáná, bi̱ nuxmajtamijná, ga̱jma̱a̱ ñu̱ʼu̱ bi̱ nagún rijma̱a̱.
7 Ma̱ngaa nidxawun mbá aʼwá rí niʼthúnʼ: ‹¡Pedro, atujxa̱a̱ʼ aradíin xujkhúʼ buʼko̱ ga̱jma̱a̱ atsúún!›.
8 Mú ikhúúnʼ ni̱thu̱u̱n: ‹Na̱nguá Tátá. Xákhu jún, numuu rí nimbá miʼtsu tiʼkhu rí mitsaga, ni má rí naʼthí náa xtángoo dí ragíʼmaa miʼkhu›.
9 Ikhú aʼwá rí niwáán mekhuíí dí maʼni a̱jma̱ nuthu niʼthúnʼ: ‹Xárata rí nindxu̱u̱ mitsaga rí Dios niʼni káʼwi̱i̱›.
10 Nda̱wa̱á rí maʼni ajtsú nuthu niwáán aʼwá, ikhú xtíin nigijxi̱i̱ ni̱jkha̱a̱ mekhuíí.
11 Núkhu má, ajtsíin xa̱bu̱ bi̱ naguwáʼ gúñúunʼ bi̱ naguwáʼ náa Cesarea niguáʼnu náa guʼwá rí niguanúxu.
12 Ikhú Dios nijmuu espíritu santo* ndrígóo, mu maʼthúnʼ rí xáni a̱jma̱ a̱jkiu̱nʼ maʼgá gajmíʼ xa̱bu̱ bugi̱. Ma̱ngaa nigún mbá majuiin a̱ngiu̱lú bugi̱, nitu̱ʼu̱xu náa goʼwóo xa̱bu̱.
13 Ikhaa niʼthúnʼ rí ndiʼyoo mbáa ángel náa goʼwóo ma̱ngaa rí niʼthúu̱n: ‹Ataxúngui̱i̱nʼ tikhuun xa̱bu̱ náa Jope mu maguwáʼ kuya̱a̱ Simón, bi̱ najmaʼniiʼ xóo Pedro,
14 ikhaa gáʼtháanʼ xú káʼnii ikháán gátani̱ kríyaminaʼ ga̱jma̱a̱ bi̱ kúwá náa guʼwáaʼ›.
15 Mú índo̱ ikhúúnʼ nigíʼdu̱u̱ ni̱thu̱u̱n, espíritu santo nigajtaa náa ikhiin, xó má nigajtaa náa ikháanʼlu nákha ginii.
16 Ikhú nirmáʼáan a̱jkiu̱nʼ rí niʼthí Tátá: ‹Rí Juan nakumíinʼ iyááʼ xa̱bu̱, mú ikháanʼla matsúwáanʼ ga̱jma̱a̱ espíritu santo›.
17 Á mu Dios naxnún ikhiin ikháá má xóo rí nixnúlú ikháanʼ, bi̱ niʼnimbulú kuʼyáá Tátá Jesucristo, tsáá ñajunʼ ikhúúnʼ rí magúju̱n jtu̱u̱n rí naʼni Dios rá.”
18 Índo̱ ikhiin nidxawíín rígi̱ nándáa rí nithi ga̱jma̱a̱ nini̱ mba̱a̱ Dios. Ma̱ngaa nithi: “¡Nakujmaa kaʼwu rí Dios naʼni rí xa̱bu̱ bi̱ raʼkhíin judíos magutanga̱a̱ a̱jkiu̱ún mu ma̱ndoo makuwá má xúʼko̱!”.
19 Bi̱ nigáñun, índo̱ niguma gíníin ga̱jma̱a̱ numuu Esteban niguánu asndu náa Fenicia, Chipre ga̱jma̱a̱ Antioquía. Mú ikhiin i̱ndó judíos nitarúʼún.
20 Náa ikhiin nikúwá tikhuun xa̱bu̱ bi̱ naguwáʼ náa Chipre, náa Cirene bi̱ nigún náa Antioquía ga̱jma̱a̱ nitarúʼún xúgíinʼ xa̱bu̱ bi̱ nuthi ajngáa griego, ma̱ngaa nithúún ajngáa rí májánʼ ga̱jma̱a̱ numuu Tátá Jesús.
21 Jeobá* nixtáa gajmíi̱n ikhiin ma̱ngaa mbaʼin xa̱bu̱ ninimbu̱ún ga̱jma̱a̱ ninindxu̱ún xa̱bi̱i̱ Tátá Jesús.
22 Rígi̱ ni̱jkha̱nú nidxawíín bi̱ nagimbíi̱n* náa Jerusalén, ga̱jma̱a̱ ikhiin nixuʼmaa Bernabé náa Antioquía.
23 Índo̱ ni̱jkha̱nú ikhí ga̱jma̱a̱ ndiʼyoo rí Dios májáanʼ wéñuuʼ a̱jkiu̱u̱n gajmíi̱n ikhiin, nixnúún tsiakii mbá xúgíinʼ mu maguajún jmbu náa Tátá ga̱jma̱a̱ xúgíʼ a̱jkiu̱ún,
24 numuu dí Bernabé nindxu̱u̱ mbáa májáanʼ xa̱bu̱ bi̱ gíʼdoo fe ga̱jma̱a̱ espíritu santo. Mbaʼin xa̱bu̱ nigíʼdi̱i̱ ninimbu̱ún náa Tátá.
25 Ikhú ni̱jkha̱ náa xúgíʼ Tarso mu mbayáaʼ Saulo.
26 Índo̱ nixkamaa, ni̱jkha̱ kayáa náa Antioquía. Mbá tsiguʼ kañiiʼ nikúwá gajmiún bi̱ nagimbíi̱n* ga̱jma̱a̱ nisngúún mbaʼin wéñuuʼ xa̱bu̱. Ginii náa Antioquía, Dios nixná ikha timbá miʼtsú rí xa̱bi̱i̱ Jesús magumbiʼñúún cristianos.
27 Mbóo mbiʼi, tikhuun profetas* nigájnún náa Jerusalén mu magún náa Antioquía.
28 Mbáa dí ikhiin bi̱ mbiʼyuu Ágabo nitu̱jxu̱u̱, ga̱jma̱a̱ espíritu santo nixkajxi̱i̱ maʼthí rí náa xúgíʼ numbaaʼ inu ma̱ʼkha̱ ewiʼ, rígi̱ nirígá nákha mbiʼi rí nixtáa raʼtáñajunʼ Claudio.
29 Ikha jngóo, xa̱bi̱i̱ Jesús niri̱ya̱ʼ awan rí muxu̱ʼma̱ rí mumbañún a̱ngiu̱xu bi̱ kúwá náa Judea, mámbáa nixná xó má rí gíʼdoo.
30 Xúʼko̱ má nini̱. Ikhú Bernabé ga̱jma̱a̱ Saulo nigún kudúún náa bi̱ kuya̱ edxu̱u̱ mu mumbañún a̱ngiu̱xu.
Mbaʼa nota
^ O “ra̱ni̱ tsajkuun”.
^ O “nirajtoo iduʼ”, “visión”.
^ O “gaʼyee”, “bi̱ nuthi dí marigá”.
