Hechos rí nini̱ apóstoles 12:1-25
12 Mbiʼi má rúʼko̱, rey Herodes* nigíʼdu̱u̱ niʼni gíníi tikhuun a̱ngiu̱xu bi̱ nagimbíi̱n.*
2 Nixíyáa ga̱jma̱a̱ espada Santiago, ndxájuu* Juan,
3 índo̱ ndiʼyoo rí judíos ninigu̱u̱nʼ rígi̱, ma̱ngaa nikudaaʼ Pedro náa guʼwá e̱jua̱nʼ. (Xúgíʼ rígi̱ nirígá índo̱ nagumariya̱a̱ʼ Ndxo̱o̱ Pan dí ragíʼdoo Levadura).*
4 Ikhú nigujtuwiin Pedro ga̱jma̱a̱ nikudaaʼ náa guʼwá e̱jua̱nʼ ga̱jma̱a̱ nigruigi̱i̱n a̱jkhui̱i̱n soldado náa mbá a̱jkhu̱ turnos* mu muñewa̱a̱n, numuu rí nikumu̱u̱ dí maxnájxi̱i̱ náa inún xa̱bu̱ xuajen nda̱wa̱á rí gájngoo Pascua.
5 Ikha jngóo, Pedro nigi̱da̱a̱ʼ náa guʼwá e̱jua̱nʼ. Mú bi̱ nagimbíi̱n nitakháñii* mbiʼíí mbruʼun Dios ga̱jma̱a̱ numuu ikhaa.
6 Ikhaa má mbruʼun rí majtsi dí Herodes maxnájxi̱i̱ náa inún xa̱bu̱ xuajen, Pedro xtáa raʼgu ma̱ngaa kaxtoʼóo ga̱jma̱a̱ a̱jma̱ cadenas náa a̱jmi̱i̱n soldado, ma̱ngaa kúwíin bi̱ nuñewa̱a̱n xkrugua ndrígóo guʼwá e̱jua̱nʼ.
7 Nda̱a̱ tsu̱ma̱ nikujmaa mbáa ángel ndrígóo Jeobá* ikhí, ga̱jma̱a̱ mbá aguʼ nimbiʼitaʼa náa kraʼaa Pedro. Ikhú ángel nixkajma tso̱xto̱o̱ Pedro mu maxka̱jui̱i̱ ga̱jma̱a̱ niʼthúu̱n: “¡Nacha̱! ¡Arajxu̱nʼ!”. Ikhú cadenas rí kaxtoʼóo ga̱jma̱a̱ ñawúunʼ nijngutígú.
8 Ángel niʼthúu̱n: “Atagíiʼ xtíñaaʼ ga̱jma̱a̱ atajngráʼa̱a̱ʼ raxtáaʼ”.* Ikhaa niʼnimbo̱o̱. Nda̱wa̱á niʼthúu̱n: “Atagíiʼ xtíñaaʼ rí mbájnii ga̱jma̱a̱ ayi̱ kidxuʼ”.
9 Pedro nigájnuu ga̱jma̱a̱ ni̱jkha̱ kidxuuʼ, mú ikhaa na̱nguá eʼyoo á mu rí xtáa raʼni ángel nindxu̱u̱ gajkhun. Ikhaa nikumu̱u̱ dí rígá mbá rí nawasngájmáá.*
10 Nda̱wa̱á rí ninújngún náa gíinʼ timbíin bi̱ nuñewa̱a̱n ga̱jma̱a̱ nda̱wa̱á ninújngún náa gíinʼ bi̱ riajmi̱i̱n, ikhú niguánú náa xkrugua ajua̱nʼ rí na̱jkha̱ náa xuajen ga̱jma̱a̱ xkrugua rígi̱ nimbaʼtoo ikháá. Ikha jngóo nigájnún ga̱jma̱a̱ nigún náa mbá calle. Nda̱wa̱á ángel nda̱a̱ tsu̱ma̱ niniñuuʼ.
11 Ikhú Pedro ndiʼyoo dí xtáa rarígá ga̱jma̱a̱ niʼthí: “Rí xúgi̱ nda̱yo̱o̱ gajkhun rí Jeobá* nikuʼmaa ángel ndrígóo mu maʼni kríñu̱u̱nʼ náa ñawúunʼ Herodes ga̱jma̱a̱ náa xúgíʼ rí bi̱ judíos niguaʼti̱i̱n magíʼnuʼ”.
12 Nda̱wa̱á dí ndiʼyoo rígi̱, ni̱jkha̱ náa goʼwóo María ru̱dúu̱ Juan, bi̱ ma̱ngaa nuxna mbiʼíí Marcos, ga̱jma̱a̱ ikhí gídíinʼ mbaʼin xa̱bi̱i̱ Jesús rutajkáan.
13 Índo̱ ni̱ʼdu̱u̱ xkrugua, ikhú mbáa wáxá bi̱ nañajunʼ ikhí bi̱ mbiʼyuu Rode ni̱jkha̱ gáʼyoo tsáa nindxu̱u̱.
14 Índo̱ niʼdxawun rí aʼwóo Pedro, nidxuu wéñuuʼ rí asndu támbáʼtoo xkrugua, ni̱jkha̱a̱ ragáyúu awúu̱n gáʼthí rí Pedro wíji̱ náa riejun.
15 Ikhiin nitháán: “Lá nakáguaanʼ ráʼ.” Mú, ikhaa niʼthí má xúʼko̱ rí gajkhun nindxu̱u̱, ikhú nigíʼdi̱i̱ nithi: “Nindxu̱u̱ ángel ndrígóo”.
16 Mú Pedro kamaa má xúʼko̱ rexa̱a̱ raʼdu̱u̱ xkrugua. Índo̱ ikhiin nirmbaʼtáá ga̱jma̱a̱ ndiyáá, ikhú niguanún tsiánguá.
17 Ikhaa niʼniún ñawúunʼ rí maguanún wíí ga̱jma̱a̱ niʼthún xúgíʼ rí xú káʼnii Jeobá* niríya̱a̱ʼ náa guʼwá e̱jua̱nʼ. Nda̱wa̱á niʼthún: “Gutha̱a̱nla xúgíʼ rígi̱ Santiago ga̱jma̱a̱ a̱ngiu̱lú”. Nda̱wa̱á dí niʼthí rígi̱ nigájnuu ni̱jkha̱ i̱mba̱ níʼkhá.
18 Índo̱ nijtsi, ikhú soldado nigiʼdu̱u̱n numuu rí túyáá xóo nikríya̱a̱ʼ Pedro.
19 Ikhú Herodes ndiyáaʼ náa xúgíʼ xuajen; mú, numuu rí táxkamaa ikha jngóo nirajxu̱u̱n soldado bi̱ niñewa̱a̱n ga̱jma̱a̱ nikuʼma rí muni gíníin. Nda̱wa̱á Herodes nigájnáa náa Judea ni̱jkha̱ náa Cesarea ga̱jma̱a̱ niguanúu ikhí mbá nguáthá mbiʼi.
20 Herodes nikiʼnáa kaʼñún xa̱bu̱ Tiro ga̱jma̱a̱ Sidón. Ikha jngóo ikhiin nigimbúmíjná mu magún náa ikhaa, nda̱wa̱á rí nini̱ wabaaʼ a̱jkiu̱u̱n Blasto, bi̱ gíʼdoo ñajunʼ náa goʼwóo rey,* ninda̱ʼa̱a̱ rí mambajxíiʼ, numuu rí ganitsu dí rígá náa xuajñún na̱ʼkha̱ náa xuajen rí naʼtáñajunʼ rey Herodes.
21 Índo̱ ni̱jkha̱nú mbiʼi, Herodes nigúwu̱nʼ xtíin kiejunʼ ga̱jma̱a̱ nigi̱ʼi̱ náa guʼwá ñajunʼ, ma̱ngaa nigíʼdu̱u̱ niʼthí náa inún xa̱bu̱.
22 Ikhú xa̱bu̱ bi̱ nigimbíin ikhí nigíʼdi̱i̱ nindxa̱ʼwa̱: “¡Aʼwóo mbáa dios, raʼkháa aʼwóo mbáa xa̱bu̱ú!”.
23 Núkhu mbáa ángel ndrígióo Jeobá* niʼni rí maʼniuu nandii, numuu rí táxnúu gamajkhu Dios. Ikhú ni̱ʼphi̱i̱ ñu̱u̱ asndu nikháñuu.
24 Mú ajngóo Jeobá* ni̱jkha̱ rajoo ga̱jma̱a̱ niwán ri̱go̱o̱.
25 Índo̱ Bernabé ga̱jma̱a̱ Saulo, niguámbu̱u̱n rumbañúún a̱ngiu̱xu náa Jerusalén, nitangiín ga̱jma̱a̱ nigún gajmiún Juan, bi̱ nutháán Marcos.
Mbaʼa nota
^ Náa Biblia tséʼthí tsáa nindxu̱u̱ giʼtáá o giʼnii náa bi̱ a̱jmi̱i̱n bugi̱.
^ O “a̱jkhu̱ tungoo”.
^ O “nini̱ tsajkuun”.
^ O “chádaaʼ”.
^ O “nirajtoo iduu”, “visión”.
^ Náa ajngáa griego naʼthí, “bi̱ nañewu̱u̱n náa naʼgu rey”.
