Hechos rí nini̱ apóstoles 24:1-27
24 Witsu mbiʼi nda̱wa̱á, Ananías ndxajkun bi̱ phú kayá edxu̱u̱ nigajtaa gajmíi̱n tikhuun xabuanii bi̱ kúwá náa xuajen gajmiún mbáa abogado bi̱ mbiʼyuu Tértulo, ga̱jma̱a̱ ikhiin nigíʼdi̱i̱ nithi ga̱jma̱a̱ numuu Pablo náa inuu xa̱bu̱ ñajunʼ.
2 Índo̱ nitháán Tértulo rí ma̱ndoo maʼthí, ikhú nigíʼdu̱u̱ niʼthí:
“Ndu̱ya̱a̱xu rí ga̱jma̱a̱ numaaʼ ikháán nandoo nakúwáanʼxu tsímáá ga̱jma̱a̱ numuu rí naratáñajunʼ májánʼ, ikha jngóo nandoo narígá dí májánʼ náa xuajen rígi̱.
3 Asndu náá má mbi̱ʼi̱i̱ ga̱jma̱a̱ asndu náá má mina̱a̱ʼ nandoo ndu̱ya̱a̱xu rígi̱ ga̱jma̱a̱ nuxna̱ʼxu núma̱aʼ, xa̱bu̱ ñajunʼ Félix.
4 Mú xúrígú káʼyáʼxu wéñuuʼ mbiʼi, ndu̱ya̱a̱xu rí nindxa̱a̱ʼ mbáa xa̱bu̱ májáanʼ, ikha jngóo nutakáñaaʼxu̱ rí matadxawíín mbá chíʼgíiʼ rí mutha̱xu.
5 Ndi̱ya̱a̱xu̱ xa̱bu̱ bugi̱ bi̱ nindxu̱u̱ asndu xóo mbá nandii. Rí naxkajxi̱i̱n xúgíinʼ judíos bi̱ kúwá náa xúgíʼ tsu̱du̱u̱ ku̱ba̱ʼ rí muxujximíjna̱ náa inuu xa̱bu̱ ñajunʼ ga̱jma̱a̱ rí nindxu̱u̱ mbáa bi̱ kayá edxu̱u̱ náa mbá grupo ndrígu̱ún nazarenos.
6 Ma̱ngaa nigíʼ maʼni tsagoo náa guʼwá rí nduyamajkuíí Dios, ikha jngóo nirtúwíinxu.
7 *
8 Índo̱ ikháán mína̱a̱nʼ má gátrajxi̱i̱, ma̱ta̱ya̱a̱ rí gajkhun nindxu̱u̱ rí xúgíʼ dí kuwáanʼ ruxruíga̱a̱xu”.
9 Ikhú, xúgíinʼ judío nigixi̱i̱n nithi rí gajkhun nindxu̱u̱ rígi̱.
10 Ikhú xa̱bu̱ ñajunʼ niʼni edxu̱u̱ mu maʼthúu̱n Pablo rí ma̱ndoo maʼthí. Ikhú ikhaa niʼthí:
“Ikhúúnʼ nda̱yo̱o̱ májánʼ rí mba̱yu̱u̱ʼ má tsiguʼ natanimbáníí xkujndu náa xuajen rígi̱, ikha jngóo ga̱jma̱a̱ xúgíʼ a̱jkiu̱nʼ ma̱ta̱ mu mambáyuminaʼ.
11 Xó má ikháán ma̱ndoo ma̱ta̱ya̱a̱ rí naʼni má mbá 12 mbiʼi rí ni̱jkhá náa Jerusalén mu ma̱ni̱ mba̱a̱ Dios.
12 Ikhiin túxkamún rí xtáá ragi̱ʼdu̱ʼ ga̱jmu̱ʼ mbáa náa guʼwá rí nduyamajkuíí Dios, ni má na̱nguá nixkajxi̱i̱n xa̱bu̱ muni̱ dí raʼkhí náa guʼwá rí bi̱ judíos nuxnáá gamajkhu Dios, ni má náa xuajen.
13 Ni má xándoo musngajma rí gajkhun nindxu̱u̱ rí kúwá ruxrui̱gu̱u̱n xúgi̱.
14 Mú na̱tha̱a̱nʼ rí ikhúúnʼ na̱jkhá náa kamba̱a̱ rí ikhiin nuxna mbiʼíí grupo, na̱ni̱ ñajuunʼ Dios ndrígu̱ún wajin xiʼñúnʼ, numuu rí nanimbo̱ʼ xúgíʼ rí naʼthí náa Xtángoo ga̱jma̱a̱ rí ninirámáʼ profetas.*
15 Gúʼthu̱u̱n náa Dios, xó má rí guáʼti̱i̱n xa̱bu̱ bugi̱ ma̱ngaa, rí magabiín* xa̱bu̱ bi̱ nini̱ rí májánʼ ga̱jma̱a̱ bi̱ túni̱ rí májánʼ.
16 Numuu rí naniminaʼ magúʼdoo mbá ku̱ma̱ kaʼwu náa Dios xúʼko̱ má náa xa̱bu̱ ma̱ngaa.
17 Nda̱wa̱á rí mba̱yu̱u̱ʼ tsiguʼ ni̱ʼkhá kagu̱ʼ mbújkha̱a̱ mu mambáñun xa̱bu̱ xuajñunʼ ga̱jma̱a̱ mu maxnaxí tsigijñaʼ.
18 Ikhúún’ ni̱ni̱ kaʼwumina̱a̱ʼ má índo̱ xtáá náa guʼwá rí nduyamajkuíí Dios ga̱jma̱a̱ xtáá ra̱ni̱ rígi̱ índo̱ nixkamún. Na̱nguá xtáá gajmíʼ mbaʼin xa̱bu̱ ni má na̱nguá eʼyáʼ xkujndu. Mú ikhí nikúwá tikhuun judíos bi̱ naguwáʼ náa Asia
19 bi̱ mangiin ndayóoʼ makuwá gi̱i̱ náa inaaʼ mu muxruigu̱u̱n, á mu ndiyáá mbá dí raʼkhí rí ni̱ni̱.
20 O á mu na̱nguá, xa̱bu̱ bi̱ kúwá gi̱i̱ xúgi̱, guthi á mu nixkamaa rí gúʼdoo aʼkhúnʼ nákhi nixtáá náa majñúnʼ xa̱bu̱ ede̱,
21 i̱ndó nákha nixtáá ikhí nindxa̱ʼwa̱: ‹¡Xúgi̱ nuxruigu̱u̱n náa inala ga̱jma̱a̱ numuu rí ni̱tha̱ rí magabiín* bi̱ nikáñún!›”.
22 Mú Félix, naninuuʼ májánʼ má ga̱jma̱a̱ numuu kiʼsngáa rígi̱,* ikha jngóo niʼni rí xkujndu mambanúu nda̱wa̱á ga̱jma̱a̱ niʼthún xúgíinʼ: “Maraʼwi̱i̱ xú káʼnii gámbanúu xkujndu rígi̱ índo̱ gáʼkha̱ bi̱ naʼtáñajúúnʼ soldado bi̱ mbiʼyuu Lisias”.
23 Ikha jngóo niʼtáñajuunʼ mbáa soldado rí mañewu̱u̱n mú maniñuuʼ má majngruigo̱o̱, ga̱jma̱a̱ rí ma̱ndoo maguwáʼ gúyáá bi̱ nambáxu̱u̱ gajmíi̱n mu mumbayíí náa rí ndayóoʼ.
24 Nguáthá mbiʼi nda̱wa̱á ni̱ʼkha̱nú Félix ga̱jma̱a̱ Drusila bi̱ nindxu̱u̱ a̱ʼgiu̱u̱, ikhaa nindxu̱u̱ judía, ga̱jma̱a̱ nikuʼma rí maguwáʼ kuya̱a̱ Pablo mu madxawun rí gáʼthí ga̱jma̱a̱ numuu kiʼsngáa ndrígóo Cristo Jesús.
25 Mú índo̱ Pablo niʼthí ga̱jma̱a̱ numuu rí ndayóoʼ maguma rí jmbu, muñewa̱a̱n rí muni̱ ga̱jma̱a̱ rí nda̱wa̱á mixtandi̱ʼi̱i̱n cuenta xa̱bu̱, Félix nimíñuu ga̱jma̱a̱ niʼthí: “Rí xúgi̱ ma̱ndoo midxu̱u̱ʼ. Mú matha̱nʼ má aʼkho̱ índo̱ ma̱ndoo mi̱dxa̱ʼ mbu̱júu̱ʼ”.
26 Numuu rí nigi̱ʼthu̱u̱n rí Pablo maxnúu mbújkha̱a̱. Ikha jngóo nángí eʼni endxa̱ʼóo maʼga mu maʼtámíjná ga̱jma̱a̱.
27 Ninújngoo a̱jma̱ tsiguʼ ga̱jma̱a̱ Félix nixtiʼkuriya̱a̱ʼ nigida̱a̱ʼ Porcio Festo. Mú, numuu rí Félix nindoo maguanúu májánʼ gajmíi̱n judíos, ikha jngóo táríyáa̱ʼ Pablo náa guʼwá e̱jua̱nʼ.
Mbaʼa nota
^ Versículo rígi̱ rígá náa tikhuu Biblia, mú nda̱a̱ náa mbaʼa rí nigumarámáʼ náa ajngáa griego.
^ O “gaʼyee”, “bi̱ nuthi dí marigá”.
^ O “matujxi̱ín”, “mbuya̱a̱”.
^ O “matujxi̱ín”, “mbuya̱a̱”.
^ Náa ajngáa griego naʼthí, “kamba̱a̱”.
