Hechos rí nini̱ apóstoles 25:1-27
25 Ajtsú mbiʼi nda̱wa̱á dí nigíʼdu̱u̱ niʼtáñajunʼ náa mbayuuʼ Judea, Festo nigájnuu náa Cesarea mu maʼga náa Jerusalén.
2 Ikhú ndxajkun bi̱ kuya̱ edxu̱u̱ gajmiún judíos bi̱ guáʼdáá itháán numún nixrui̱ga̱a̱ Pablo. Ga̱jma̱a̱ nitakáñii Festo
3 rí maʼniún péñu maguwáʼ kuya̱a̱ Pablo náa Jerusalén. Mú ikhiin niri̱ya̱ʼ awan dí muguáʼti̱i̱n náa kamba̱a̱ mu muxiyáa Pablo.
4 Mú Festo niʼthún rí Pablo maguanúu má náa guʼwá e̱jua̱nʼ dí rígá náa Cesarea ga̱jma̱a̱ dí ikhaa má mína̱a̱nʼ mata̱nga̱a̱ má nacha̱ ikhí.
5 Ga̱jma̱a̱ xóó niʼthí: “Gaguajtaa ga̱jma̱á ni̱ndxu̱ʼ ikháanʼla bi̱ guáʼdáá mbá ñajunʼ ga̱jma̱a̱ á mu xa̱bu̱ bugi̱ gajkhun niʼni mbá dí raʼkhí, ikhí ma̱ndoo mu̱tala náá numuu dí nuxruíga̱a̱”.
6 Xóó tséʼni migiñuʼ o gu̱wa̱ʼ mbiʼi rí nixtáa gajmíi̱n índo̱ nitanga̱a̱ náa Cesarea. I̱mba̱ néjtsuu nigi̱ʼi̱ náa guʼwá ñajunʼ ga̱jma̱a̱ nikuʼma dí maguwáʼ kuya̱a̱ Pablo náa ikhaa.
7 Índo̱ nito̱ʼo̱o̱ Pablo, judíos bi̱ niguwáʼ náa Jerusalén niruguama̱ʼa̱a̱n ga̱jma̱a̱ nigíʼdi̱i̱ nixrui̱ga̱a̱ ga̱jma̱a̱ numuu mbaʼa dí raʼkhí dí niʼni, mú nda̱a̱ xóo musngajma á mu gajkhun rí nuthi.
8 Mú Pablo nimbáyuminaʼ índo̱ niʼthí rígi̱: “Tákiéʼkhúnʼ ga̱jma̱a̱ numuu Xtángoo ndrígu̱ún judíos ni má ga̱jma̱a̱ numuu guʼwá rí nduyamajkuíí Dios, ni má ga̱jma̱a̱ numuu César”.*
9 Numuu rí Festo nindoo maguanúu májánʼ gajmíi̱n judíos, ikha jngóo niʼthúu̱n Pablo: “Lá nandaaʼ matatsimaaʼ náa Jerusalén ga̱jma̱a̱ rí ikhúúnʼ manimbánuu numaaʼ ikhí ga̱jma̱a̱ numuu xúgíʼ rígi̱ ráʼ.”
10 Mú Pablo niʼthúu̱n: “Xtáá náa guʼwá ñajunʼ ndrígóo César ga̱jma̱a̱ gi̱i̱ náa phú gíʼmaa mambanúu xkujndu ndrígóʼ. Tániu̱u̱ nimbá dí raʼkhí xa̱bu̱ judíos, xó má ikháán xtaa ratayáá xúgi̱.
11 Á mu gajkhun dí ni̱ndxu̱ʼ mbáa xa̱bu̱ ra̱májáanʼ ga̱jma̱a̱ ni̱ni̱ mbá dí kaʼyoʼ makhañúʼ, tsénda̱ʼa̱a̱ʼ dí maxáxóo makhañúʼ. Mú, á mu ragájkhun ga̱jma̱a̱ numuu dí nixrui̱gu̱u̱n xa̱bu̱ bugi̱, nimbáa ragíʼmaa maxnájxu̱u̱n náa ikhiin mu maguanún májánʼ gajmiún judíos. ¡Na̱nda̱ʼa̱ dí maʼgá náa César mu maʼnimbánuu xkujndu ndrígóʼ!”.
12 Nda̱wa̱á dí niʼtámíjná gajmíi̱n xa̱bu̱ bi̱ nutháán xóo maʼni, Festo niriʼñuu: “Náa César nitanda̱ʼa̱ mi̱dxu̱ʼ, náa César má gídxúʼ”.
13 Índo̱ ninújngoo mbiʼi, rey Agripa ga̱jma̱a̱ Berenice nigún náa Cesarea mu magún gúra̱xi̱i̱ Festo.
14 Numuu dí maguanún ikhí nguáthá mbiʼi, Festo niʼthúu̱n rey ga̱jma̱a̱ numuu Pablo. Niʼthí rígi̱:
“Xtáa mbáa xa̱bu̱ gi̱i̱ bi̱ Félix niniñuuʼ náa guʼwá e̱jua̱nʼ
15 ga̱jma̱a̱ índo̱ nixtáá náa Jerusalén, ndxajkun bi̱ kuya̱ edxu̱u̱ gajmiún xabuanii bi̱ ni̱ndxu̱ún judíos nithu̱nʼ ga̱jma̱a̱ numuu, ma̱ngaa nindo̱ʼo̱ʼ rí maxíyáa.
16 Mú ikhúúnʼ ni̱thu̱u̱n, dí xó má eʼthí náa xtángoo ndrígu̱ún xa̱bu̱ Roma, rí xándoo mixnájxi̱i̱ mbáa xa̱bu̱ náa bi̱ nuxrui̱ga̱a̱ á mu xóó tsémbáyuminaʼ ga̱jma̱a̱ numuu dí nuxrui̱ga̱a̱.
17 Ikha jngóo índo̱ niguáʼnu gi̱i̱ tájyúuʼ má, i̱mba̱ néjtsuu niʼgúnʼ náa guʼwá ñajunʼ ga̱jma̱a̱ nikuʼmá dí maguwáʼ kuya̱a̱ xa̱bu̱ bugi̱ náa inuʼ.
18 Ikhú niguájxu bi̱ nuxrui̱ga̱a̱, mú túxrui̱ga̱a̱ ga̱jma̱a̱ numuu nimbá dí ra̱májánʼ rí ikhúúnʼ niku̱mu̱ʼ dí niʼni.
19 Ikhiin nakiʼníin kuyáá i̱ndó numuu dí mixtiʼkhu xóo eyamajkuíí dios* ndrígu̱ún, ma̱ngaa ga̱jma̱a̱ numuu mbáa xa̱bu̱ bi̱ mbiʼyuu Jesús bi̱ nikháñuu má, mú Pablo naʼthí rí xtáa.
20 Ikhúúnʼ na̱nguá e̱yo̱o̱ xú káʼnii gánimbánuu xkujndu rígi̱, ikhaa jngóo nirajxu̱u̱ á mu nandoo maʼga náa Jerusalén mu ikhí mambanúu xkujndu ndrígóo ga̱jma̱a̱ numuu rígi̱.
21 Numuu rí Pablo ninda̱ʼa̱ maʼga náa César ga̱jma̱a̱ ninda̱ʼa̱ rí maguanúu náa guʼwá e̱jua̱nʼ asndu índo̱ César* maʼthí xkáʼnii gágíʼnuu, nitañájunʼ dí maxtáa má náa guʼwá e̱jua̱nʼ asndu índo̱ gákuʼnguáanʼ náa César”.
22 Ikhú Agripa niʼthúu̱n Festo: “Mangúún manigu̱ʼ madxawun xa̱bu̱ buʼko̱”. Ikhú ikhaa niriʼñuu: “Matadxawíín má gájtsii”.
23 I̱mba̱ néjtsuu ni̱jkha̱nú Agripa ga̱jma̱a̱ Berenice rí asndu nunimbaʼwumíjna̱ nitu̱ʼu̱u̱n náa guʼwá ñajunʼ gajmiún bi̱ nutañajúúnʼ soldado mangiin xa̱bu̱ bi̱ guáʼdáá numún náa xuajen. Ikhú Festo niʼtáñajunʼ dí magún kuya̱a̱ Pablo náa ikhaa.
24 Ga̱jma̱a̱ Festo niʼthí: “Rey Agripa ga̱jma̱a̱ xúgiáanʼla bi̱ kuwáanʼ gi̱i̱ ga̱jma̱á ni̱ndxu̱xu̱ʼ, gu̱ya̱a̱ xa̱bu̱ bugi̱. Xó má náa Jerusalén ga̱jma̱a̱ gi̱i̱, xúgíinʼ judíos asndu nundxa̱ʼwa̱ nithunʼ dí gíʼmaa makhañúu xa̱bu̱ bugi̱.
25 Mú ni̱jkhánú ndi̱yo̱o̱ dí xa̱bu̱ bugi̱ táʼni nimbá rí kaʼyoo makhañúu. Ikha jngóo índo̱ xa̱bu̱ bugi̱ ninda̱ʼa̱ maʼga náa César,* niraʼwi̱i̱ makuʼnguáanʼ náa ikhaa.
26 Mú ragúʼdoo nimbá rí maniraʼmáʼ náa inuu xa̱bu̱ ñajunʼ* ndrígóʼ ga̱jma̱a̱ numuu ikhaa. Ikha jngóo, naxnajxíi náa ikháanʼla, mú itháan náa ikháán rey Agripa, mu nda̱wa̱á dí matrajxi̱i̱, ikhú magúʼdoo dí maniraʼmáʼ.
27 Numuu dí raʼkhí e̱yo̱o̱ dí makuʼnguáanʼ mbáa bi̱ gídáʼ náa guʼwá e̱jua̱nʼ ga̱jma̱a̱ rí xáta náa dí raʼkhí niʼni”.
Mbaʼa nota
^ O “xa̱bu̱ ñajunʼ bi̱ nixtáa náa Roma”.
^ O “religión”.
^ Náa ajngáa griego naʼthí, “Augusto”. Xúgi̱ kaʼnii exna mbiʼñún bi̱ nutañajunʼ náa Roma.
^ Náa ajngáa griego naʼthí, “Augusto”. Xúgi̱ kaʼnii exna mbiʼñún bi̱ nutañajunʼ náa Roma.
^ Náa ajngáa griego naʼthí, “Tátá”.
