Hechos rí nini̱ apóstoles 3:1-26
3 Pedro ga̱jma̱a̱ Juan kúwá ratsimún náa guʼwá rí nduyamajkuíí Dios, naʼni xóo mbá las 3 rí wakíʼ mu mutajkáan,*
2 ga̱jma̱a̱ ikhí xtáa mbáa xa̱bu̱ bi̱ gúʼxúʼ má nigumaa, ma̱ngaa nagún kudaa asndu náa xkrugua ndrígóo guʼwá rí nduyamajkuíí Dios rí nuxná mbiʼíí Mitsaanʼ. Tsejtsí mbiʼi nugíiʼ ikhí mu mandu̱ʼu̱u̱n mbújkha̱a̱ bi̱ natu̱ʼu̱u̱n náa guʼwá rí nduyamajkuíí Dios.
3 Mbá nacha̱ índo̱ ndiʼyoo Pedro ga̱jma̱a̱ Juan rí inu matu̱ʼu̱u̱n náa guʼwá rí nduyamajkuíí Dios, nigíʼdu̱u̱ nindu̱ʼu̱u̱n mbújkha̱a̱.
4 Mú Pedro bi̱ na̱jkha̱ ga̱jma̱a̱ Juan, ndiʼyoo ga̱jma̱a̱ niʼthúu̱n: “Atayuxu̱”.
5 Ikha jngóo ikhaa ndiʼñún ga̱jma̱a̱ nigi̱ʼthu̱u̱n magruigú rí muxnáá.
6 Mú Pedro niʼthúu̱n: “Ragúʼdoo plata ni má oro, mú maxna̱a̱ʼ rí gúʼdoo. ¡Ga̱jma̱a̱ mbiʼyuu Jesucristo bi̱ na̱ʼkha̱ náa Nazaret, ayuʼ kruíga̱a̱ʼ!”.
7 Índo̱ niʼthúu̱n rígi̱, ikhú niguajthun ñawún mújúunʼ ga̱jma̱a̱ nikujxi̱i̱. Mbá nacha̱ nikuma̱a̱ niʼni̱i̱ gújkhúʼ rajkhúu,
8 ga̱jma̱a̱ mbá nacha̱ nitu̱jxu̱u̱, nigíʼdu̱u̱ ni̱jkha̱ kruígo̱o̱ ma̱ngaa nito̱ʼo̱o̱ gajmíi̱n náa guʼwá rí nduyamajkuíí Dios, ga̱jma̱a̱ asndu nakijxi̱i̱ eʼni mba̱a̱ Dios.
9 Ga̱jma̱a̱ xúgíinʼ xa̱bu̱ nduyáá rí na̱jkha̱ kruígo̱o̱ ga̱jma̱a̱ naʼni mba̱a̱ Dios.
10 Ikhú niguánu ndiyáá rí nindxu̱u̱ xa̱bu̱ bi̱ nagi̱ʼi̱ randa̱ʼa̱ mbújkha̱a̱ náa Xkrugua rí mbiʼyuu Mitsaanʼ, náa guʼwá rí nduyamajkuíí Dios, ga̱jma̱a̱ niguanún tsiánguá ga̱jma̱a̱ numuu dí nirígá.
11 Nákha xa̱bu̱ xóó kaguajtuwiin Pedro ga̱jma̱a̱ Juan, ikhú xa̱bu̱ nigáñun nigún gúñún náa rí mbiʼyuu corredor ndrígóo Salomón. Xa̱bu̱ niguanún tsiánguá ga̱jma̱a̱ rí ndiyáá.
12 Índo̱ Pedro ndiʼyoo rígi̱, ikhú niʼthún: “Xa̱bu̱ Israel, náá numuu rí naʼniala tsiánguá rá. Náá numuu rí nduyuxu̱ xóo asndu ikháanʼ ni̱nixu̱ maʼga kruígo̱o̱ xa̱bu̱ bugi̱ ga̱jma̱a̱ tsiakii ndrígúxu̱ o ga̱jma̱a̱ rí nduyamajkuííxu Dios rá.
13 Dios ndrígóo Abrahán, Isaac ga̱jma̱a̱ Jacob, Dios ndrígu̱ún wajin xiʼñúlú, niʼni mba̱a̱ Xa̱bi̱i̱, Jesús, bi̱ ikháanʼ nixnajxíi náa inuu Pilato ga̱jma̱a̱ táʼndala gúya̱a̱ ma̱ngaa táʼndala gúni̱ kríyaaʼ índo̱ ikhaa nindoo maʼni kríya̱a̱ʼ.
14 Ikháanʼ táʼndala gúya̱a̱ mbáa xa̱bu̱ bi̱ kaʼwu a̱jkiu̱u̱n ga̱jma̱a̱ jmbii, ninda̱ʼala rí maguma kríya̱a̱ mbáa bi̱ nagudíin xa̱bu̱
15 ga̱jma̱a̱ nixíya̱a̱la bi̱ kayá edxu̱u̱ bi̱ naxná rí ndaʼya. Mú Dios niʼnigabi̱i̱* náa majñúnʼ wajinʼ ga̱jma̱a̱ ikháanʼ ndi̱ya̱a̱xu̱ rígi̱.
16 Ga̱jma̱a̱ numuu mbiʼyuu Jesús, ga̱jma̱a̱ fe rí kuaʼdááxu náa mbiʼyuu ikhaa niʼni rí xa̱bu̱ bugi̱ maʼni̱i̱ gújkuiiʼ bi̱ ikháanʼla ndu̱ya̱a̱ ga̱jma̱a̱ nuniʼníiʼ. Fe rí kuaʼdááxu ga̱jma̱a̱ numuu mbiʼyuu Jesús, niʼni thanuu xa̱bu̱ bugi̱ bi̱ ikháanʼla ndu̱ya̱a̱ xúgi̱.
17 A̱ngui̱nʼ, nda̱yo̱o̱ má dí tséya̱a̱ rí nini̱la, ikháá má xóo nini̱ xa̱bu̱ ñajunʼ ndrígála.
18 Mú xúgi̱ kaʼnii Dios niʼnimbánuu rí nithi nákhi wapháá xúgíinʼ profetas:* Dí Cristo ndrígiála mamínuuʼ.
19 Gatanga̱a̱ a̱jkia̱la ga̱jma̱a̱ aguwa̱ʼla mu aʼkhá ndrígála majngudi̱i̱, ga̱jma̱a̱ mínaaʼ má Jeobá* gáʼni rí ma̱ʼkha̱ mbiʼi rí maʼni̱i̱ a̱jkia̱la
20 ga̱jma̱a̱ ikhaa makungua̱a̱nʼ Cristo bi̱ nigíiʼ náa ikháanʼla: Jesús.
21 Ikhaa gíʼmaa maxtáa mekhuíí asndu índo̱ gáʼganúu mbiʼi rí Dios maʼni májáanʼ xúgíʼ, xó má ikhaa niʼthún profetas bi̱ nikúwá nákha wájyúuʼ.
22 Ga̱jma̱a̱ Moisés niʼthí: ‹Jeobá* Dios magíiʼ náa ikháanʼla mbáa profeta xó má ikhúúnʼ náa majñúúnʼ a̱ngia̱la. Gíʼmaa mudxa̱wíín ga̱jma̱a̱ mu̱ni̱ xúgíʼ rí ikhaa gáʼtala.
23 Mú, asndu tsáa bi̱ xáʼdxawun Profeta bugi̱ makhañúu náa xuajen›.
24 Xúgíinʼ profetas bi̱ niguwáʼ rakúwá, asndu nákha nixtáa Samuel, ma̱ngaa nithi ga̱jma̱a̱ numuu mbiʼi xúgi̱.
25 Ikháanʼ nindxa̱la e̱jñu̱ún profetas ga̱jma̱a̱ rí Dios nimbánuu gajmíi̱n wajin xiʼñála índo̱ niʼthúu̱n Abrahán: ‹Ga̱jma̱a̱ xúgíinʼ xa̱bu̱* bi̱ makuwá náa ku̱ba̱ʼ, maguma tsajkurámiinʼ ga̱jma̱a̱ numuu bi̱ ma̱ʼkha̱* náa ikháán›.
26 Nda̱wa̱á rí nigíiʼ Xa̱bi̱i̱, Dios nikungua̱a̱nʼ ginii náa ikháanʼla mu maʼni tsajkurámáanʼla mámbáa rí ikháanʼ, mu xúʼko̱ ikháanʼ muniʼñááʼ ru̱ni̱ dí raʼkhí”.
Mbaʼa nota
^ O “muni̱ tsajkuun”.
^ O “nikujxi̱i̱”, “niʼni mbaʼya̱a̱”.
^ O “gaʼyee”, “bi̱ nuthi dí marigá”.
^ Náa ajngáa griego naʼthí, “mbaʼa guʼwíin xa̱bu̱”.
