Hechos rí nini̱ apóstoles 5:1-42
5 Mú mbáa xa̱bu̱ bi̱ mbiʼyuu Ananías ga̱jma̱a̱ a̱ʼgiu̱u̱ Safira nigujua̱ mbóo mbaaʼ.
2 Mú ikhaa niguanúu ga̱jma̱a̱ tháan mbújkha̱a̱ ga̱jma̱a̱ táʼthúu̱n nimbáa i̱ndó a̱ʼgiu̱u̱. Ikhú ni̱jkha̱ kayóo mbújkha̱a̱ dí nipíduunʼ náa inún apóstoles.
3 Mú Pedro niʼthúu̱n: “Ananías, náá numuu nitatsíñaminaʼ dí Gixa̱a̱* maʼniaaʼ matani̱ nduwaaʼ espíritu santo* ma̱ngaa maguanáaʼ ga̱jma̱a̱ ngu̱ʼwáá mbá ta̱pha̱ mbújkha̱a̱ dí nitagujua̱ mbaaʼ rá.
4 Lá raʼkháa mbayaaʼ ráʼ. Ga̱jma̱a̱ índo̱ niguámbáa nitagujua̱, lá raʼkháa ikháán gándoo gáta̱ya̱a̱ káʼnii gátani̱ ga̱jma̱a̱ mbújkha̱a̱ ráʼ. Ndíjkha nitani̱ xúʼko̱ kaʼnii rá. Tátani nduwiinʼ xa̱bu̱, Dios nitani̱ nduwaaʼ”.
5 Índo̱ Ananías niʼdxawuun ajngáa rígi̱, núkhu nixpátri̱ga̱a̱ mbayííʼ ga̱jma̱a̱ nikháñuu. Ikhú xúgíinʼ bi̱ nidxawíín rígi̱ nimíñúún wéñuuʼ.
6 Ikhú jiámá nitujxu̱u̱n nimbraʼaa xtíin, niriya̱a̱ʼ ga̱jma̱a̱ nigún gúdíi.
7 Xóo ajtsú hora nda̱wa̱á nito̱ʼo̱o̱ a̱ʼgiu̱u̱, ikhaa táʼyoo dí nirígá.
8 Pedro niʼthúu̱n: “Arathúnʼ, lá xúgíʼ má mbújkha̱a̱ rígi̱ rí nigu̱juala ga̱jma̱a̱ mbaaʼ ráʼ.” Ikhaa niriʼñuu: “Aan, xúʼko̱ má nigujua̱xu ga̱jma̱a̱”.
9 Ikhú Pedro niʼthúu̱n: “Náá numuu dí nimbánala muni̱ nduwaaʼ espíritu santo ndrígóo Jeobá* rá. ¡Atayáá! Wájun náa xkrugua bi̱ nigún gúdíi ajmbia̱a̱ʼ,* ga̱jma̱a̱ xúʼko̱ má gúriña̱a̱nʼ mangáán”.
10 Núkhu ikhaa nixpátri̱ga̱a̱ náa inuu Pedro ga̱jma̱a̱ nikháñuu. Índo̱ jiámá nitu̱ʼu̱u̱n ndiyáá rí nikháñuu, ikhú niriya̱a̱ʼ ga̱jma̱a̱ nigún gúdíi náa níjniúu nidi̱i̱ ajmbio̱o̱.
11 Ikhú xúgíinʼ bi̱ nigimbíin* nimíñúún wéñuuʼ ga̱jma̱a̱ xúgíinʼ eʼwíinʼ bi̱ nidxawíín rígi̱.
12 Ga̱jma̱a̱ apóstoles nini̱ milagros dí itháan mba̱ʼu̱, náa xuajen ga̱jma̱a̱ nagimbíi̱n náa rí mbiʼyuu corredor ndrígóo Salomón.
13 Gajkhun dí xúgíinʼ xa̱bu̱ nuthi rí májánʼ ga̱jma̱a̱ numún, mú tikhun namíñúún rí magún kidxu̱únʼ.
14 Itháan ni̱jkha̱ raʼni mbaʼin bi̱ ninimbu̱ún kuyáá Tátá, mbaʼin wéñuuʼ xa̱bekha ga̱jma̱a̱ gu̱ʼu̱.
15 Xa̱bu̱, asndu nurawíin bi̱ naʼniún nandii náa kamba̱a̱ a̱pha̱, ga̱jma̱a̱ nusnguta̱mi̱i̱nʼ náa xiyoo, mu índo̱ gánújngoo Pedro, maski ajndu i̱ndó ndájkhoo gánújngoo náa ikhiin.
16 Ma̱ngaa mbaʼin xa̱bu̱ bi̱ kúwá mbájndi náa xuajen Jerusalén naguwáʼ kudiin bi̱ naʼniún nandii, bi̱ nuni̱ gíníi xa̱bu̱ wéñiiʼ* ga̱jma̱a̱ xúgíinʼ naguma thanún.
17 Mú ndxajkun bi̱ phú kayá edxu̱u̱ ga̱jma̱a̱ xúgíinʼ bi̱ xtáa gajmíi̱n, bi̱ nagún kidxu̱únʼ saduceos,* nikiʼníin wéñuuʼ.
18 Ikha jngóo nirugui̱i̱n apóstoles ga̱jma̱a̱ nixudi̱i̱nʼ náa guʼwá e̱jua̱nʼ.
19 Mú índo̱ niʼni mbruʼun, mbáa ángel ndrígóo Jeobá* nimbáʼtoo xkrugoo guʼwá e̱jua̱nʼ niguwíin ga̱jma̱a̱ niʼthún:
20 “Aʼgua̱ náa guʼwá rí nduyamajkuíí Dios, ga̱jma̱a̱ ikhí gútarúʼúún xúgíinʼ xa̱bu̱ xuajen ga̱jma̱a̱ numuu rí xóo makuwáanʼ kámuu”.
21 Nda̱wa̱á dí nidxawíín rígi̱, índo̱ nijtsi nitu̱ʼu̱u̱n náa guʼwá rí nduyamajkuíí Dios ga̱jma̱a̱ nigíʼdi̱i̱ nisngáa.
Ikhú ndxajkun bi̱ phú kayá edxu̱u̱ ga̱jma̱a̱ bi̱ xtáa gajmíi̱n nigimbúun xa̱bu̱ ede̱* ma̱ngaa xúgíinʼ xabuanii bi̱ kúwá náa Israel. Ikhú nitañajúúnʼ dí maguwáʼ kudiin apóstoles bi̱ kajtiin náa guʼwá e̱jua̱nʼ.
22 Mú índo̱ bi̱ nuñewa̱a̱n guʼwá rí nduyamajkuíí Dios niguánú ikhí, túxkamiin náa guʼwá e̱jua̱nʼ. Ikha jngóo nitangiín ga̱jma̱a̱ nithi dí ndiyáá.
23 Nithi: “Kúgoo jxa̱ʼ guʼwá e̱jua̱nʼ, ga̱jma̱a̱ bi̱ nuñewa̱a̱n guʼwá e̱jua̱nʼ guájun riejuíín, mú índo̱ nimbáʼtááxu túya̱a̱xu̱ nimbáa awúu̱n”.
24 Mú índo̱ bi̱ naʼtáñajúúnʼ bi̱ nuñewa̱a̱n guʼwá rí nduyamajkuíí Dios ga̱jma̱a̱ ndxajkun bi̱ kuya̱ edxu̱u̱ niguánu nidxawíín rígi̱, niguanún tsiánguá numuu rí tséyáá ndiéjunʼ gáʼga̱nú marigá ga̱jma̱a̱ numuu rígi̱.
25 Mú mbáa ni̱ʼkha̱nú ga̱jma̱a̱ niʼthún: “¡Gu̱ya̱a̱! Xa̱bu̱ bi̱ ikháanʼ nixuʼdíinʼ náa guʼwá e̱jua̱nʼ, kúwá rusngúún xa̱bu̱ náa guʼwá rí nduyamajkuíí Dios”.
26 Ikhú bi̱ naʼtáñajúúnʼ ni̱jkha̱ gajmíi̱n xa̱bi̱i̱ ga̱jma̱a̱ nigún kudiin, mú túxnún numuu dí nimíñúún rí xa̱bu̱ xuajen muxnún ga̱jma̱a̱ itsí.
27 Ikha jngóo nigún kudiin náa xa̱bu̱ ede̱.* Ikhú ndxajkun bi̱ phú kayá edxu̱u̱ nitsudiin muthi.
28 Niʼthún: “Lá tútañájuanla dí ní xúsngáa ga̱jma̱a̱ numuu mbiʼyuu xa̱bu̱ bugi̱ ráʼ. Mú náa xúgíʼ Jerusalén ni̱tala ga̱jma̱a̱ numuu kiʼsngáa ndrígóo. Nandala dí muguaʼdáá aʼkhúxu dí nikháñuu xa̱bu̱ bugi̱”.*
29 Pedro gajmíi̱n eʼwíinʼ apóstoles niriʼña: “Gíʼmaa munimbuxu ku̱ya̱a̱ Dios xóo xa̱bu̱ ñajunʼ ki xóo xa̱bu̱ numbaaʼ.
30 Dios ndrígu̱ún wajin xiʼñúxu niʼniga̱bi̱i̱* Jesús, bi̱ ikháanʼ nixíyáala índo̱ nidujmaa náa ixi̱.
31 Dios nigíiʼ náa ñawún mújúunʼ xóo mbáa bi̱ kayá edxu̱u̱ ga̱jma̱a̱ bi̱ maʼni káwáanʼ, mu xa̱bu̱ Israel ma̱ndoo mata̱nga̱a̱ a̱jkiu̱ún ga̱jma̱a̱ majngudi̱i̱ aʼkhúún.
32 Ikháanʼxu ndi̱ya̱a̱ xúgíʼ rígi̱ ma̱ngaa espíritu santo rí Dios nixnúún bi̱ nunimbu̱ún kuyáá xóo mbáa xa̱bu̱ ñajunʼ mba̱a̱”.
33 Índo̱ xa̱bu̱ bugi̱ nidxawíín rígi̱, nikiʼníin wéñuuʼ rí asndu nindúún muradíin.
34 Mú mbáa fariseo* bi̱ mbiʼyuu Gamaliel, bi̱ naʼsngáa Xtángoo ga̱jma̱a̱ nduyamajkuíí xúgíinʼ xa̱bu̱ xuajen, nitu̱jxu̱u̱ náa gíinʼ xa̱bu̱ ede̱* ga̱jma̱a̱ niʼtáñajúúnʼ dí murawíin mbá xngaa xa̱bu̱ buʼko̱.
35 Nda̱wa̱á niʼthún eʼwíinʼ: “Xa̱bu̱ Israel, tsumáá gúni ga̱jma̱a̱ numuu rí nundxa̱ʼwa̱míjna̱ muniu̱u̱n xa̱bu̱ bugi̱.
36 Mbá xkri̱da, nixtáa mbáa xa̱bu̱ bi̱ nigumbiʼyuu Teudas bi̱ niʼthí dí ikhaa gíʼdoo wéñuuʼ numuu, ga̱jma̱a̱ 400 xa̱bu̱ nigún kidxuuʼ. Mú índo̱ nixiyáa, xúgíinʼ xa̱bu̱ bugi̱ nigáñun ga̱jma̱a̱ ikhí niguámbá xúgíʼ.
37 Nda̱wa̱á nixtáa i̱mba̱a̱ xa̱bu̱ bi̱ mbiʼyuu Judas bi̱ na̱ʼkha̱ náa Galilea nákha mbiʼi dí naguma̱a̱ censo, ga̱jma̱a̱ niʼni dí xa̱bu̱ magún kidxuuʼ. Mú índo̱ xa̱bu̱ bugi̱ nikháñuu, xúgíinʼ xa̱bu̱ bi̱ nagún kidxuuʼ mámbáa tsáa ni̱jkha̱.
38 Ga̱jma̱a̱ numuu rígi̱ na̱tala dí xúrugui̱i̱n xa̱bu̱ bugi̱ ga̱jma̱a̱ guniʼñúnʼla. Á mu ñajunʼ rígi̱ na̱ʼkha̱ náa mbáa xa̱bu̱, mambáa.
39 Á mu na̱ʼkha̱ náa Dios, ikháanʼla xáʼngala gúni gámbáa. Ga̱jma̱a̱ asndu makujmaa dí ikháanʼla kuwáanʼ ruxmíjná gajmiála Dios”.
40 Ikha jngóo ninimbu̱ún dí niʼthí. Nindxa̱ʼwu̱u̱n apóstoles ga̱jma̱a̱ nini̱ gawúúnʼ, nda̱wa̱á nitañajúúnʼ dí muniña̱a̱ʼ ruthi ga̱jma̱a̱ numuu mbiʼyuu Jesús ikhú niniñu̱u̱nʼ magúun.
41 Ikhiin asndu gagi nigájni̱i̱n náa kúwá xa̱bu̱ ede̱,* nidxún numuu rí ndiyáá dí ikhiin kaʼñún mumíniiʼ ga̱jma̱a̱ numuu mbiʼyuu Jesús.
42 Xúgíʼ mbiʼi túniña̱a̱ʼ rusngáa ga̱jma̱a̱ nitaraʼa má xúʼko̱ ajngáa rí májánʼ ga̱jma̱a̱ numuu Cristo Jesús, náa guʼwá rí nduyamajkuíí Dios ma̱ngaa náa mámbá guʼwá.
Mbaʼa nota
^ O “jmba̱yaaʼ”.
^ Náa ajngáa griego naʼthí, “marigu eʼdiuu xa̱bu̱ bugi̱ náa ikháanʼxu”.
^ O “nikujxi̱i̱”, “niʼni mbaʼya̱a̱”.
