Hechos rí nini̱ apóstoles 6:1-15
6 Nákha mbiʼi rúʼko̱, índo̱ ni̱jkha̱ raʼni mbaʼin xa̱bi̱i̱ Jesús, judíos bi̱ nuthi ajngáa griego nigi̱ʼdi̱i̱ nixieʼkhá ga̱jma̱a̱ numún judíos bi̱ nuthi ajngáa hebreo, numuu rí tséxnún ganitsu gu̱ʼú xuáʼa̱ xó má kaʼyoo índo̱ niruiʼta̱a̱.
2 Ikha jngóo bi̱ mbá Gu̱wi̱i̱nʼ ejmi̱i̱n apóstoles nigímbíin eʼwíinʼ xa̱bi̱i̱ Jesús ga̱jma̱a̱ nithúún: “Raʼkhí gáʼni* dí ikháanʼ muniʼñáaʼxu ajngá rawuunʼ Dios mu murui̱ʼta̱a̱xu ganitsu.
3 Ikha jngóo a̱ngui̱nʼ, guraʼwíinla náa ikháanʼ mbá juwiin xa̱bekha bi̱ najmaʼnuuʼ rí nuni̱ dí májánʼ, bi̱ guáʼdáá espíritu santo* ga̱jma̱a̱ bi̱ najmañún mu muxnu̱u̱nxu ñajunʼ rígi̱, rí ndayóoʼ.
4 Mú ikháanʼxu xúniʼñáánʼ rutajkáan ga̱jma̱a̱ xúniʼñáanʼxu rusngáa ajngá rawuunʼ Dios”.
5 Xúgíinʼ xa̱bi̱i̱ Jesús ndiyáá rí májánʼ dí nithi. Ikha jngóo nigi̱i̱ʼ Esteban, mbáa xa̱bu̱ bi̱ gíʼdoo fe ga̱jma̱a̱ espíritu santo, xó má Felipe, Prócoro, ga̱jma̱a̱ Nicanor, Timón, Parmenas ma̱ngaa Nicolás, bi̱ ni̱ndxu̱u̱ judío bi̱ na̱ʼkha̱ náa Antioquía.
6 Nda̱wa̱á nigún kudiin náa apóstoles índo̱ niguámbu̱u̱n nitajkháan, ikhú nixkrami̱i̱nʼ.
7 Ga̱jma̱a̱ numuu rígi̱ ajngá rawuunʼ Dios nijuiʼtáraʼa itháan, ga̱jma̱a̱ xa̱bi̱i̱ Jesús ni̱jkha̱ raʼni itháan mbaʼin náa Jerusalén. Ga̱jma̱a̱ mbaʼin ndxajkun nigi̱ʼdi̱i̱ niguáʼdáá fe.
8 Numuu rí Dios nindoo kaʼyoo Esteban, ikha jngóo nixnúu tsiakii ga̱jma̱a̱ niʼni milagros dí itháan mba̱ʼu̱ náa xuajen.
9 Mú tikhuun xa̱bu̱ bi̱ niguma káwíin, xó má tikhuun bi̱ naguwáʼ náa Cirene, náa Alejandría, tikhuun náa Cilicia, náa Asia, nigún gági̱ʼdu̱u̱n gajmiún Esteban.
10 Mú ikhiin tájmiin gútháán, numuu rí Esteban najmañuu ga̱jma̱a̱ nambáyúu espíritu santo.
11 Ikha jngóo ikhiin nisngruʼúún ngu̱ʼwa̱á xa̱bu̱ mu rí muthi: “Nidxáwinxu rí niʼthá wéñuuʼ Moisés ga̱jma̱a̱ Dios”.
12 Ikhú nixkajxi̱i̱n xa̱bu̱ xuajen ga̱jma̱a̱ xabuanii ma̱ngaa bi̱ nusngáa xtángoo. Nda̱a̱ tsu̱ma̱ nigún náa ikhaa, nirtuwiin ga̱jma̱a̱ tsiakii ma̱ngaa nigún kuya̱a̱ náa kúwi̱i̱n xa̱bu̱ ede̱.*
13 Ikhí nigún kudiin xa̱bu̱ bi̱ muthi rí minduwaʼ, ga̱jma̱a̱ nithi: “Xa̱bu̱ bugi̱ tséniñuuʼ raʼthí dí raʼkhí ga̱jma̱a̱ numuu guʼwá rí nduyamajkuíí Dios ma̱ngaa náa Xtángoo.
14 Nidxáwinxu dí niʼthí rí Jesús bi̱ na̱ʼkha̱ náa Nazaret, maʼni gámbáa guʼwá rígi̱ ga̱jma̱a̱ mariʼkhu̱u̱ dí naguwaʼ ru̱ʼni̱ dí niʼthúlu Moisés”.
15 Xúgíinʼ bi̱ tri̱gi̱i̱n náa nagimbíi̱n xa̱bu̱ ede̱* ndiyáá rí inuu nakujmaa xóo inuu mbáa ángel.
Mbaʼa nota
^ Náa ajngáa griego naʼthí, “tséʼgui̱i̱”.
