Hechos rí nini̱ apóstoles 9:1-43
9 Saulo tséniñuuʼ raʼnimíñúún xa̱bi̱i̱ Jesús ga̱jma̱a̱ nandoo magudíin. Ikha jngóo ni̱jkha̱ gáʼyoo ndxajkun bi̱ phú kayá edxu̱u̱,
2 nindo̱ʼo̱o̱ i̱yi̱i̱ʼ mu maʼga kagu̱u̱ náa guʼwá rí bi̱ judíos nuxnáá gamajkhu Dios* dí rígá náa Damasco, mu muniña̱a̱ʼ maruʼúún ga̱jma̱a̱ ma̱ʼkha̱ kagui̱i̱n náa Jerusalén xúgíinʼ bi̱ kúwá náa kamba̱a̱ rí gajkhun, asndu tsáa má gáxkamaa, tséʼniuu á mu xa̱biya̱ o a̱ʼgu̱.
3 Índo̱ xtáa ra̱jkha̱nú Damasco, ikhú asndu mekhuíí nixpíbinʼ mbá aguʼ rí nimbiʼijmaa,
4 ikhaa nixpátri̱ga̱a̱ mbayííʼ ga̱jma̱a̱ ikhú nidxaun mbá aʼwá rí niʼthúu̱n: “Saulo, Saulo, náá numuu rí natraxkoʼ rá.”
5 Ikhaa nirajxu̱u̱: “Tátá, tsáá nindxa̱a̱ʼ rá.” Ikhú aʼwá niriʼña̱a̱: “Ikhúúnʼ ni̱ndxu̱ʼ Jesús, bi̱ ikháán naraxkáá.
6 Mú rí xúgi̱ atujxa̱a̱ʼ ga̱jma̱a̱ ataʼa̱a̱ náa xuajen, ikhí gájuiʼtháanʼ ndiéjunʼ gíʼmaa matani̱”.
7 Xa̱bu̱ bi̱ na̱jkha̱ gajmíi̱n niguanún wíí ga̱jma̱a̱ ni̱jkha̱ ajngún, numuu rí nudxawíín aʼwá mú nimbáa na̱nguá eyáá.
8 Ikhú Saulo nitujxi̱i̱, maski má paʼta iduu, mú nánguá krui̱go̱o̱. Ikha jngóo kurajtuun ñawúunʼ nigún kuya̱a̱ náa Damasco.
9 Tákrui̱go̱o̱ mbá ajtsú mbiʼi, nda̱a̱ rí ni̱ʼkhu̱ ni má tágáan nimbá.
10 Náa Damasco xtáa mbáa xa̱bi̱i̱ Jesús bi̱ mbiʼyuu Ananías. Tátá nisngájmaminaʼ* náa inuu ga̱jma̱a̱ niʼthúu̱n: “¡Ananías!”. Ikhaa niriʼñuu: “Gi̱i̱ xtáá Tátá”.
11 Ikhú Tátá niʼthúu̱n: “Ayuʼ náa kamba̱a̱ rí mbiʼyuu Jmbu ga̱jma̱a̱ atayáaʼ náa goʼwóo Judas mbáa xa̱bu̱ bi̱ na̱ʼkha̱ náa Tarso bi̱ mbiʼyuu Saulo. Ikhaa xtáa raʼtájkáan*
12 ga̱jma̱a̱ niwasngájmáá* rí mbáa xa̱bu̱ bi̱ mbiʼyuu Ananías nato̱ʼo̱o̱ ga̱jma̱a̱ naxkrámaaʼ mu maʼni mandáa iduu”.
13 Mú Ananías niriʼñuu: “Tátá, nidxuun rí mbaʼin nuthi ga̱jma̱a̱ numuu xa̱bu̱ bugi̱ ma̱ngaa rí niʼni gíníi wéñuuʼ xa̱bi̱i̱ Dios bi̱ kúwá náa Jerusalén.
14 Ni̱ʼkha̱ gi̱i̱ ga̱jma̱a̱ awan ndrígu̱ún ndxajkun bi̱ kuya̱ edxu̱u̱ mu maruʼwúún* xúgíinʼ bi̱ nuthi ga̱jma̱a̱ numuu mbiʼyaaʼ”.
15 Mú Tátá niʼthúu̱n: “Ayuʼ, numuu rí xa̱bu̱ bugi̱ ndiʼyáaʼ mu majmiuʼ, mu maʼga kayóo mbiʼyuʼ náa xa̱bu̱ numbaaʼ, ga̱jma̱a̱ náa inún reyes ma̱ngaa náa e̱ji̱i̱n Israel.
16 Ikhúúnʼ masngajmúu xúgíʼ rí mbaʼyóoʼ mamínuuʼ ga̱jma̱a̱ numuu mbiʼyuʼ”.
17 Ikhú Ananías ni̱jkha̱, nito̱ʼo̱o̱ náa guʼwá, nixkrámaaʼ ga̱jma̱a̱ niʼthúu̱n: “Ndxájuʼ Saulo, Tátá Jesús, bi̱ nikujmaa náa kamba̱a̱ rí ikháán ni̱dxa̱ʼ, nikuʼmún ma̱ʼkhá mu marmbáʼta̱a̱ idaaʼ ga̱jma̱a̱ mu maraʼdáá espíritu santo”.*
18 Núkhu nijngutígúu náa iduu rí xóo xtá xúwá kaʼnii, ikhú nikrui̱go̱o̱. Nitu̱jxu̱u̱ ga̱jma̱a̱ nijngúun iyááʼ,
19 nikuiʼtsu ga̱jma̱a̱ ndiyáa tsiakii.
Nda̱wa̱á niguanúu nguáthá mbiʼi ikhí gajmíi̱n xa̱bi̱i̱ Jesús bi̱ kúwá náa Damasco,
20 núkhu má niʼtáraʼa ga̱jma̱a̱ numuu Jesús náa guʼwá rí bi̱ judíos nuxnáá gamajkhu Dios, dí Jesús nindxu̱u̱ A̱ʼdióo Dios.
21 Xúgíinʼ bi̱ nudxawíín rí naʼthí naguanún tsiánguá, nuthi: “Lá raʼkháa xa̱bu̱ bugi̱ nindxu̱u̱ bi̱ naʼni gíníi bi̱ nuthi ga̱jma̱a̱ numuu mbiʼyuu Jesús náa xuajen Jerusalén ráʼ. Lá táʼkha̱ gi̱i̱ mu maguguiin ga̱jma̱a̱ maruʼúún mu maʼga kagui̱i̱n náa ndxajkun bi̱ kuya̱ edxu̱u̱ xáʼ.”
22 Mú Saulo ni̱jkha̱ rajmañuu itháán mu maʼtáraʼa ga̱jma̱a̱ niʼni jnga̱wi̱i̱n judíos bi̱ kúwá náa Damasco índo̱ nisngájmúún gajkhun rí Jesús nindxu̱u̱ Cristo.
23 Índo̱ ninújngoo mba̱yu̱u̱ʼ mbiʼi, judíos niri̱ya̱ʼ awan mu muxiyáa.
24 Mú Saulo niʼdxawuun awan dí niri̱ya̱ʼ judíos. Ga̱jma̱a̱ ikhiin má nuñewa̱a̱n xkrugua mbiʼi mbruʼun mu muxiyáa,
25 ikhú xa̱bi̱i̱, mbruʼun nigún kuya̱a̱, ga̱jma̱a̱ náa ventana ndrígóo xtátsí nixruiguíi ga̱jma̱a̱ mbá extuʼ.
26 Índo̱ ni̱jkha̱nú náa Jerusalén, niʼni tsiakimínáʼ rí mambajxíiʼ gajmíi̱n xa̱bi̱i̱ Jesús, mú xúgíinʼ namíñúún kuyáá numuu rí nditháan tsénimbu̱ún rí ikhaa ma̱ngaa nindxu̱u̱ xa̱bi̱i̱ Jesús.
27 Ikha jngóo, Bernabé ni̱jkha̱ gámbáyúu ga̱jma̱a̱ ni̱jkha̱ kayáa náa inún apóstoles. Nda̱wa̱á niʼthún xúgíʼ dí ndiʼyoo Saulo, rí ndiʼyoo Tátá náa kamba̱a̱, ma̱ngaa xúgíʼ rí ikhaa niʼthúu̱n ga̱jma̱a̱ dí Saulo támiñuu maʼtáraʼa ga̱jma̱a̱ numuu mbiʼyuu Jesús náa Damasco.
28 Ikhú Saulo niguanúu gajmíi̱n ikhiin, nagájnuu ma̱ngaa nata̱ʼa̱a̱ náa Jerusalén, tsémiñuu maʼtáraʼa ga̱jma̱a̱ numuu mbiʼyuu Tátá.
29 Ma̱ngaa mijkoo niʼtámíjná gajmíi̱n judíos bi̱ nuthi ajngáa griego. Mú ikhiin mbaʼa nuthu nindúún muxiyáa.
30 Índo̱ a̱ngiu̱xu nidxawíín rígi̱, ikhú nigún kuya̱a̱ náa Cesarea ga̱jma̱a̱ nixuʼmaa maʼga náa Tarso.
31 Ikhú bi̱ nagimbíi̱n* náa Judea, Galilea ga̱jma̱a̱ Samaria, nikúwá tsímáá ga̱jma̱a̱ fe ndrígu̱ún niʼni itháan gújkhúʼ. Ga̱jma̱a̱ nimíñúún kuyáá Jeobá,* ma̱ngaa nindrigú tsiakii rí naxnún espíritu santo ga̱jma̱a̱ ni̱jkha̱ raʼni itháán mbaʼin.
32 Pedro ni̱jkha̱ gáʼñún xa̱bi̱i̱ Jesús bi̱ kúwá náa mbaaʼ rúʼko̱, ma̱ngaa ni̱jkha̱ gáʼñún bi̱ kúwá náa Lida.
33 Ikhí ndiʼyoo mbáa xa̱bu̱ bi̱ mbiʼyuu Eneas, bi̱ naʼni má migiñuʼ tsiguʼ kaʼmáaʼ náa xiawoo numuu rí nikháñuu xuyuuʼ.*
34 Pedro niʼthúu̱n: “Eneas, Jesucristo naʼni thanaaʼ. Atujxa̱a̱ʼ ga̱jma̱a̱ atani̱i̱ xiawaaʼ”. Ikhú mbá nacha̱ nitu̱jxu̱u̱.
35 Índo̱ ndiyáá rígi̱, xúgíinʼ bi̱ kúwíin náa Lida ga̱jma̱a̱ náa Sarón, niguánú ninindxu̱ún xa̱bi̱i̱ Tátá.
36 Náa Jope xtáa mbáa a̱ʼgu̱ bi̱ ma̱ngaa nindxu̱u̱ xa̱bi̱i̱ Jesús bi̱ mbiʼyuu Tabita, rí xóo mbiʼyuu najuiʼtájuíi Dorcas.* Ikhaa naʼni mbaʼa rí májánʼ ga̱jma̱a̱ nambáñun bi̱ ndañúunʼ.
37 Mú, mbiʼi rúʼko̱ niʼniuu nandii ga̱jma̱a̱ nikháñuu. Ikha jngóo, nitsuwaan ga̱jma̱a̱ nigúun kuya̱a̱ náa cuarto dí rijma̱a̱.
38 Lida gíʼ mijngii náa Jope, ikha jngóo índo̱ xa̱bi̱i̱ Jesús nidxawíín rí Pedro xtáa ikhí, nixuʼmiin a̱jmi̱i̱n xa̱bu̱ mu mutakháñii: “Mbá péñu, ayi̱ mbá nacha̱ náa ikháanʼxu”.
39 Pedro mbá nacha̱ nitu̱jxu̱u̱ ni̱jkha̱ gajmíi̱n. Índo̱ ni̱jkha̱nú, nigún kuya̱a̱ náa guʼwá rijma̱a̱. Ga̱jma̱a̱ ikhí mbá xúgíinʼ gu̱ʼú xuáʼa̱ niguwáʼ rumbi̱ya̱ʼ náa ikhaa, ga̱jma̱a̱ nisngajmáá xúgíʼ enii xtíin rí Dorcas niʼni nákha xóó ndaʼya.
40 Pedro niʼthún rí magajnún xúgíinʼ, ikhú nismbáti̱go̱o̱ niʼtájkáan. Nda̱wa̱á nitangayii náa kri̱ga̱a̱ wajinʼ ga̱jma̱a̱ niʼthúu̱n: “Tabita, ¡arajxu̱u̱nʼ!”. Ikhaa nirmbáʼta̱a̱ iduu ga̱jma̱a̱ índo̱ ndiʼyoo Pedro, ikhú nitu̱jxu̱u̱ nigi̱ʼi̱.
41 Pedro niguajtun ñawúunʼ mu mambáyúu matujxi̱i̱. Nda̱wa̱á nindxaʼwún xa̱bi̱i̱ Jesús ga̱jma̱a̱ gu̱ʼú xuáʼa̱ mu masngájmiún rí ndaʼya.
42 Mbá xúgíinʼ xa̱bu̱ bi̱ kúwá náa Jope nidxawíín rígi̱, ikhú mbaʼin ninimbu̱ún náa Tátá.
43 Pedro niguanúu mba̱yu̱u̱ʼ mbiʼi náa Jope, náa goʼwóo Simón bi̱ naʼni mújúunʼ xtá.
Mbaʼa nota
^ O “sinagoga”.
^ O “nikujmaa náa visión”.
^ O “naʼni tsajkuun”.
^ O “nirajtoo iduu”, “visión”.
^ Náa ajngáa griego naʼthí, “maruʼwúún ga̱jma̱a̱ cadena”.
^ O “niʼni jxa̱a̱ʼ”.
^ Xó má náa ajngáa griego Dorcas ga̱jma̱a̱ ajngáa arameo Tabita rí nandoo gáʼthúu̱n xóo mbáa “aña̱ʼ e̱ʼgú”.
