Rí niʼnirámáʼ Juan 1:1-51
1 Nákha nigi̱ʼdu̱u̱ nirígá xúgíʼ, Ajngáa nixtáa má, Ajngáa xtáa ga̱jma̱a̱ Dios ga̱jma̱a̱ Ajngáa nindxu̱u̱ mbáa dios.
2 Ikhaa nixtáa ga̱jma̱a̱ Dios asndu nákha nigi̱ʼdu̱u̱.
3 Xúgíʼ nirígá ga̱jma̱a̱ numuu ikhaa, á mu raʼkháa ga̱jma̱a̱ numuu ikhaa nimbá tárígá.
Dí ni̱jkha̱nú nirígá
4 ga̱jma̱a̱ numuu ikhaa nindxu̱u̱ rí ndaʼya, ga̱jma̱a̱ rí ndaʼya nindxu̱u̱ xóo aguʼ náa xa̱bu̱ numbaaʼ.
5 Aguʼ nambiʼi náa majñu̱u̱ʼ rí mikrína, mú rí mikrína táʼngo̱o̱ gáʼndijuíyuuʼ.
6 Dios nikungua̱a̱nʼ mbáa xa̱bu̱, bi̱ nigumbiʼyuu Juan.
7 Xa̱bu̱ bugi̱ ni̱ʼkha̱ gáʼtaraʼa ga̱jma̱a̱ numuu aguʼ, mu xúgíinʼ enii xa̱bu̱ munimbu̱ún.
8 Juan tánindxu̱u̱ aguʼ rúʼko̱, i̱ndó ni̱ʼkha̱ gáʼthí ga̱jma̱a̱ numuu aguʼ rúʼko̱.
9 Aguʼ dí gajkhun rí nambiʼñún xúgíinʼ enii xa̱bu̱ inu má ma̱ʼkha̱ náa numbaaʼ.
10 Dí phú gajkhun, ikhaa* xtáa má náa xa̱bu̱ numbaaʼ, xa̱bu̱ numbaaʼ nikúwá ga̱jma̱a̱ numuu ikhaa, mú ikhiin na̱nguá nini nuwiinʼ.
11 Ni̱ʼkha̱ náa xuajñuu, mú xa̱bu̱ xuajñuu túndriguíi.
12 Mbá xúgíinʼ bi̱ nindriguíi nixnúún rí mani̱ndxu̱ún e̱ji̱i̱n Dios, numuu rí nisngajma fe náa ikhaa.
13 Ikhiin na̱nguá ni̱ndxu̱ún e̱jñún xa̱bu̱ numbaaʼ ni má raʼkháa xóo nindoo mbáa xa̱bu̱, ikhiin ni̱ndxu̱ún e̱ji̱i̱n Dios.
14 Ajngáa ni̱jkha̱nú ninindxu̱u̱ xuwiʼ ga̱jma̱a̱ nixtáa náa majñulú, ga̱jma̱a̱ ndiya̱a̱xu tsiakii ndrígóo, rí kaʼyoo magruigú bi̱ a̱ʼdá mbáwíí dí naxnúu anu̱u̱. Ga̱jma̱a̱ náa ikhaa rígá rí májánʼ a̱jkiu̱u̱n Dios ma̱ngaa rí gajkhun.
15 (Juan niʼthí ga̱jma̱a̱ numuu ikhaa: “¡Bugi̱ bi̱ ni̱tala ‹bi̱ na̱ʼkha̱ kidxuʼ nindxu̱u̱ giʼnii, numuu rí xtáa má nákha xóó tséxtáá ikhúúnʼ›!”).
16 Numuu rí Dios ra̱ʼkhá tháán nindoo kaʼyoo ikhaa, ikha jngóo asndu mangáanʼlu nindrígú rí májánʼ wéñuuʼ a̱jkiu̱u̱n Dios.
17 Numuu rí Xtángoo nikánáá Moisés, mú rí májánʼ wéñuu’ a̱jkiu̱u̱n Dios ga̱jma̱a̱ rí gajkhun ni̱jkha̱nú nirígá ga̱jma̱a̱ numuu Jesucristo.
18 Nimbáa xa̱bu̱ táʼyoo Dios nimbá miʼtsú. I̱ndó bi̱ a̱ʼdá mbáwíí, bi̱ xtáa náa níjñúu Anu̱u̱,* ikhaa niʼthúlu xú káʼnii nindxu̱u̱ Dios.
19 Rígi̱ rí niʼthí Juan índo̱ bi̱ judíos nixuʼmiin ndxajkun gajmiún levitas bi̱ kúwá náa Jerusalén mu murajxi̱i̱: “Tsáá nindxa̱a̱ʼ ikháán rá.”
20 Ikhaa tárkaʼwumuʼúun, niʼthí: “Ikhúúnʼ na̱nguá ni̱ndxu̱ʼ Cristo”.
21 Ga̱jma̱a̱ nirajxi̱i̱ xóó: “Tsáá nindxa̱a̱ʼ rá. Nindxa̱a̱ʼ Elías ráʼ.” Ikhaa niʼthí: “Na̱nguá ni̱ndxu̱ʼ jún”. “Nindxa̱a̱ʼ Profeta* dxe̱ʼ.” Ikhaa niriʼña̱a̱: “¡Na̱nguá!”.
22 Ikha jngóo nirajxi̱i̱: “Aratúxu tsáá nindxa̱a̱ʼ, mu ma̱ndoo muthu̱u̱n bi̱ nixuʼmáanʼxu. Tsáá nindxa̱a̱ʼ rathá ikháán rá.”
23 Ikhaa niriʼña: “Ikhúúnʼ ni̱ndxu̱ʼ aʼwá rí nawáán náa ku̱ba̱ʼ mijxooʼ ‹¡Gu̱ni̱ májáanʼ kambo̱o̱ Jeobá!›,* xó má niʼthí profeta Isaías”.
24 Fariseos* nixuʼmiin xa̱bu̱ bi̱ nigún.
25 Ga̱jma̱a̱ nirajxi̱i̱: “Á mu na̱nguá nindxa̱a̱ʼ Cristo, ni má Elías, ni má Profeta. Náá numuu rí nataxúmíinʼ iyááʼ xa̱bu̱ rá.”
26 Juan niriʼñúún: “Ikhúúnʼ nakuʼmíinʼ náa iyaʼ. Xtáa mbáa náa majñala ikháanʼ bi̱ tséninuwíinʼla.
27 Ikhaa nindxu̱u̱ bi̱ na̱ʼkha̱ kidxuʼ, ga̱jma̱a̱ ikhúúnʼ rakáʼyoʼ marajkúuʼ raxtóo”.*
28 Rígi̱ nirígá náa Betania náa i̱mba̱ ridoo Jordán, náa Juan nikumíinʼ iyááʼ xa̱bu̱.
29 Imbo̱o̱ néjtsuu, índo̱ Juan ndiʼyoo rí na̱ʼkha̱ Jesús náa ikhaa, ikhú niʼthí: “¡Gu̱ya̱a̱, A̱ʼdá múgiúu Dios bi̱ narígúu aʼkhúún xa̱bu̱ numbaaʼ!
30 Bugi̱ bi̱ ni̱tala bi̱ na̱ʼkha̱ kidxuʼ ‹nindxu̱u̱ giʼnii numuu rí xtáa má nákha xóó tséxtáá ikhúúnʼ›.
31 Asndu má ikhúúnʼ tséniʼníiʼ, mú rí nakuʼmíinʼ iyááʼ xa̱bu̱, nindxu̱u̱ mu majmaʼniiʼ náa Israel”.
32 Juan ma̱ngaa niʼthí: “Ndi̱yo̱o̱ espíritu santo* nagajtaa mekhuíí xóo mbáa paloma ga̱jma̱a̱ niguanúu náa ikhaa.
33 Asndu má ikhúúnʼ tséniʼníiʼ, mú bi̱ nikuʼmún makuʼmíinʼ iyááʼ xa̱bu̱ niʼthúnʼ: ‹Ma̱ta̱ya̱a̱ tsáa gátsuwiin xa̱bu̱ ga̱jma̱a̱ espíritu santo, índo̱ gáta̱ya̱a̱ espíritu santo gajtaa mu maguanúu náa ikhaa›.
34 Ga̱jma̱a̱ rúʼko̱ rí ndi̱yo̱o̱, ikha jngóo nitha̱ rí bugi̱ nindxu̱u̱ A̱ʼdióo Dios”.
35 I̱mba̱ néjtsuu, Juan xtáa ikhí mbu̱júu̱ʼ, gajmíi̱n a̱jmi̱i̱n xa̱bi̱i̱,
36 índo̱ ndiʼyoo dí Jesús xtáa ra̱jkha̱, niʼthí: “¡Gu̱ya̱a̱, A̱ʼdá múgiúu Dios!”.
37 Índo̱ a̱jmi̱i̱n xa̱bi̱i̱ nidxawíín rígi̱, ikhú nigún kidxuuʼ Jesús.
38 Ikhú Jesús nitangayii ga̱jma̱a̱ ndiʼyoo rí nagún kidxuuʼ, ikhú nirajxu̱u̱n: “Ndiéjunʼ eʼyáʼ rá.” Ikhiin niriʼña: “Rabí, dí nandoo gáʼthúu̱n ‹maestro›, náá eguanáaʼ rá.”
39 Niʼthún: “Aguwaʼla mbu̱ya̱a̱”. Ikhú nigún, ndiyáá náa xtáa raguanúu ga̱jma̱a̱ niguanún gajmiún wakíʼ má rúʼko̱, numuu rí naʼni má xóo mbá las 4 dí wakíʼ.
40 Andrés, bi̱ ni̱ndxu̱u̱ giʼtio̱o̱ Simón Pedro, nindxu̱u̱ mbáa bi̱ niʼdxuun rí niʼthí Juan bi̱ nigún kidxuuʼ Jesús.
41 Ginii nixkamaa ndxájuu, bi̱ nindxu̱u̱ Simón ga̱jma̱a̱ niʼthúu̱n: “Nixkamaaxu Mesías” (rí nandoo gáʼthúu̱n Cristo),
42 ikhú ni̱jkha̱ kayáa náa xtáa Jesús. Índo̱ Jesús ndiʼyoo, niʼthúu̱n: “Ikháán nindxa̱a̱ʼ Simón a̱ʼdióo Juan. Ikháán magumbiʼyaaʼ Cefas” (rí nandoo gáʼthúu̱n Pedro).
43 Imbo̱o̱ néjtsuu Jesús nindoo maʼga náa Galilea. Ikhú nixkamaa Felipe ga̱jma̱a̱ niʼthúu̱n: “Ayi̱ mu̱ʼgua̱”.
44 Xuajñuu Felipe nindxu̱u̱ Betsaida, náa xuajñuu Andrés ga̱jma̱a̱ Pedro.
45 Ga̱jma̱a̱ Felipe nixkamaa Natanael ga̱jma̱a̱ niʼthúu̱n: “Nixkamaaxu bi̱ Moisés niʼnirámáʼ ga̱jma̱a̱ numuu náa Xtángoo, ma̱ngaa bi̱ profetas nithi ga̱jma̱a̱ numuu: Nindxu̱u̱ Jesús a̱ʼdióo José bi̱ na̱ʼkha̱ náa Nazaret”.
46 Mú Natanael niʼthúu̱n: “Lá ma̱ndoo ma̱ʼkha̱ mbá dí májánʼ náa Nazaret ráʼ.” Ikhú Felipe niriʼñuu: “Ayi̱ mu ma̱ta̱ya̱a̱”.
47 Índo̱ Jesús ndiʼyoo Natanael xtáa ra̱ʼkha̱ náa ikhaa, niʼthí: “Gu̱ya̱a̱ mbáa israelita bi̱ nda̱a̱ rí minduwaʼ náa ikhaa”.
48 Ikhú Natanael nirajxu̱u̱: “Náá nitátsiniún’ rá.” Jesús niriʼñuu: “Ndi̱ya̱a̱ʼ nákha xtaʼwún náa agoo ixi̱ higo, nákha Felipe xóó tséndxaʼwáaʼ”.
49 Natanael niriʼñuu: “Maestro, ikháán nindxa̱a̱ʼ A̱ʼdióo Dios, ikháán nindxa̱a̱ʼ Rey náa Israel”.
50 Jesús niʼthúu̱n: “Lá natanimba̱a̱ʼ* xtayoʼ numuu rí nitha̱nʼ rí xtaʼwún náa agoo ixi̱ higo ráʼ. Nda̱wa̱á ma̱ta̱ya̱a̱ dí itháan mitsaanʼ ki xóo rígi̱”.
51 Ga̱jma̱a̱ niʼthí xóó: “Na̱tala gajkhun rí mbu̱ya̱a̱ mambaʼtoo mekhu ga̱jma̱a̱ mbuñu̱u̱n ángeles ndrígióo Dios bi̱ natsimún ga̱jma̱a̱ naguájta̱án náa A̱ʼdióo xa̱biya̱”.
Mbaʼa nota
^ Nandoo gáʼthúu̱n “Ajngáa”.
^ O “náa tsoxto̱o̱ Anu̱u̱”. Rígi̱ nandoo gáʼthúu̱n dí nindxu̱u̱ kiejuunʼ náa Anu̱u̱.
^ O “gaʼyee”, “bi̱ naʼthí dí marigá”.
^ O “chádoo”.
^ O “naku̱ma̱a̱ʼ”.
