Rí niʼnirámáʼ Juan 12:1-50
12 Majun mbiʼi nákha xóó tsérígá Pascua, Jesús ni̱jkha̱nú Betania náa xtáa Lázaro, bi̱ Jesús nikujxi̱i̱* náa majñúnʼ wajinʼ.
2 Ga̱jma̱a̱ ikhí nini̱ májáánʼ rí mi̱khu̱ wañuu. Marta narajkuáa rí mu̱phu̱ ga̱jma̱a̱ Lázaro xtáa ra̱ʼkhu̱ wañuu ga̱jma̱a̱ Jesús.
3 Ikhú María ndiyá mbá tikhu litro* aceite rí ndataun ga̱jma̱a̱ rí minumuu, dí mbawíí nardo,* ga̱jma̱a̱ nixtrámuuʼ náa rajkúu Jesús. Nda̱wa̱á niʼni gujndo̱o̱ʼ ga̱jma̱a̱ xtátsiu̱u̱n. Ga̱jma̱a̱ náa xúgíʼ guʼwá niʼni ndataun.
4 Mú, mbáa xa̱bi̱i̱ bi̱ mbiʼyuu Judas Iscariote bi̱ inu má maxnájxi̱i̱, niʼthí:
5 “Náá numuu rí táxtango̱jo̱o̱ aceite rí ndataun rígi̱ ga̱jma̱a̱ mbá 300 denarios,* mu mbújkha̱a̱ rígi̱ mixnún xa̱bu̱ gíníi rá.”
6 Niʼthí rígi̱ raʼkháa ga̱jma̱a̱ numuu rí naxmiéjuunʼ kaʼñún bi̱ migíníi, numuu rí ikhaa nindxu̱u̱ mbáa kuʼwáʼ; ga̱jma̱a̱ kayá náa kajti mbújkha̱a̱, ma̱ngaa naʼni kúwáʼ mbújkha̱a̱ rí kajti ikhí.
7 Ikhú Jesús niʼthí: “Atatsíñááʼ maʼnimbánuu rí kaʼyoo maguma mbiʼi rí majuiʼdiu̱ún.
8 Numuu rí xa̱bu̱ gíníi makuwá má xúʼko̱ ga̱jma̱á nindxa̱la, mú ikhúúnʼ na̱nguá”.
9 Ikhú mbaʼin xa̱bu̱ judíos nidxawíín rí Jesús xtáa náa Betania ga̱jma̱a̱ niguwáʼ gúyáá, mú raʼkháa i̱ndó ikhaa ma̱ngaa niguwáʼ gúyáá Lázaro, bi̱ ikhaa nikujxi̱i̱* náa majñúnʼ wajinʼ.
10 Ndxajkun bi̱ kuya̱ edxu̱u̱, niri̱ya̱ʼ awan rí muxiyáa Lázaro ma̱ngaa,
11 numuu rí ga̱jma̱a̱ numuu ikhaa mbaʼin judíos nagún ikhí ga̱jma̱a̱ naguáʼdáá fe náa Jesús.
12 Imbo̱o̱ mbiʼi, xa̱bu̱ bi̱ mbaʼin niguwáʼ náa ndxa̱a̱ nidxawíín rí Jesús xtáa ra̱ʼkha̱nú náa Jerusalén.
13 Ikhú nida ñawúunʼ ida ga̱jma̱a̱ nigájnún gutsijníí, ma̱ngaa nigíʼdi̱i̱ nindxa̱ʼwa̱: “¡Gaguma kríya̱a̱ʼ! ¡Gaguma tsajkurámaaʼ bi̱ na̱ʼkha̱ ga̱jma̱a̱ mbiʼyuu Jeobá,* Rey ndrígóo Israel!”.
14 Índo̱ Jesús nixkamaa mbáa a̱ʼdá burru, ikhú niriguii xó má eʼthí náa kiʼnirámáʼ:
15 “Xámiñaaʼ wáxioo Sion. ¡Atayáá! Rey ndrígáaʼ na̱ʼkha̱ gáʼyaaʼ, karíguii mbáa a̱ʼdá burru”.
16 Nákha ginii xa̱bi̱i̱ na̱nguá nikru̱ʼu̱u̱n ndiéjunʼ dí xtáa rarígá. Mú, índo̱ Jesús niguma mba̱a̱, nirmáʼáan a̱jkiu̱ún dí kiʼnirámáʼ ga̱jma̱a̱ numuu ikhaa ga̱jma̱a̱ rígi̱ rí nigumaa.
17 Xa̱bu̱ bi̱ ndiyáá índo̱ Jesús niʼnigabi̱i̱* Lázaro náa majñúnʼ bi̱ nikháñún ga̱jma̱a̱ rí niʼthúu̱n magajnáa náa iñá wajinʼ, xa̱bu̱ bugi̱ nagún ruthún eʼwíinʼ rí ndiyáá dí nirígá.
18 Ikhaa numuu rúʼko̱ rí mbaʼin nigún gútsijníí, numuu rí nidxawíín dí niʼni milagro rúʼko̱.
19 Ikhú fariseos nigíʼdi̱i̱ nitamijná: “Nda̱a̱ rí ejmáánʼlu mu̱ʼni̱. ¡Gu̱ya̱a̱, xúgíinʼ xa̱bu̱ nagún kidxuuʼ ikhaa!”.
20 Náa xa̱bu̱ bi̱ niguwáʼ mu mbuyamajkuíí Dios, ma̱ngaa niguwáʼ tikhuun xa̱bu̱ griegos.
21 Ikhiin nixuʼmamijná náa Felipe bi̱ na̱ʼkha̱ náa Betsaida mbayuuʼ Galilea, ga̱jma̱a̱ nitháán: “Tátá, nanduxu mbuya̱a̱ Jesús”.
22 Felipe ni̱jkha̱ gáʼthúu̱n Andrés, ga̱jma̱a̱ ikhú mbá nájmi̱i̱n nigún gútháán Jesús.
23 Mú Jesús niriʼñúún: “Ni̱jkha̱nú má mbiʼi rí A̱ʼdióo xa̱biya̱ maguma mba̱a̱.
24 Gajkhun rí na̱tala, á mu tsígooʼ trigo tséjpatrígú mbayííʼ ga̱jma̱a̱ tsékháñuu, tsígáʼ má nindxu̱u̱. Mú, á mu nakháñuu, ikhú ma̱jma̱a̱ mbaʼa tsígooʼ.
25 Bi̱ nandoo kaʼyoo vida ndrígóo maʼnimbáti̱ga̱, mú bi̱ nawiyu̱u̱ʼ kaʼyoo vida ndrígóo náa numbaaʼ rígi̱, buʼko̱ bi̱ maxtáa kámuu mbiʼi.
26 Á mu mbáa nandoo maʼni ñajunʼ ndrígóʼ, ga̱ʼkha̱ kidxuʼ, ga̱jma̱a̱ náa maxtáá ikhúúnʼ ikhí má gáxtáa ma̱ngaa. Á mu mbáa naʼni ñajunʼ rígi̱, Anu̱ʼ maʼni tsajkurámáanʼ.
27 Rí xúgi̱ najmúʼ wéñuuʼ. Ga̱jma̱a̱, ndiéjunʼ gátha rá. Anu̱ʼ, atani̱ kríñu̱u̱nʼ náa mbiʼi mingíjyúuʼ rígi̱. Mú, ikhaa má numuu ni̱ʼkhá náa mbiʼi rígi̱.
28 Anu̱ʼ, atani̱ mba̱a̱ mbiʼyaaʼ”. Ikhú asndu mekhuíí nigájnuu mbá aʼwá rí niʼthí: “Ni̱ni̱ mba̱a̱ má ga̱jma̱a̱ ma̱ni̱ mba̱a̱ mbu̱júu̱”.
29 Mbaʼin xa̱bu̱ bi̱ kúwá ikhí nidxawíín rúʼko̱, ga̱jma̱a̱ tikhuun nithi rí nijmídá. Eʼwíinʼ nithi: “Mbáa ángel niʼthúu̱n”.
30 Ikhú Jesús niʼthí: “Aʼwá rígi̱ na̱nguá niwán ga̱jma̱a̱ numuʼ ikhúúnʼ, niwán ga̱jma̱a̱ numala ikháanʼ.
31 Xúgi̱ naxtandi̱ʼi̱i̱n cuenta xa̱bu̱ numbaaʼ; ga̱jma̱a̱ xúgi̱ bi̱ naʼtáñajunʼ náa numbaaʼ majuixkriya̱a̱ʼ.
32 Mú, índo̱ gúxujxu̱u̱n náa ku̱ba̱ʼ,* maguwáʼ mbaʼin enii xa̱bu̱ náa ikhúúnʼ”.
33 Niʼthí rígi̱ mu masngájma xú káʼnii gákháñuu.
34 Ikhú xa̱bu̱ nithi: “Ndu̱ya̱a̱xu rí náa Xtángoo naʼthí rí Cristo maxtáa kámuu mbiʼi. Mú, xú káʼnii rí ikháán naratá rí A̱ʼdióo xa̱biya̱ muxujxi̱i̱, tsáá nindxu̱u̱ A̱ʼdióo xa̱biya̱ buʼko̱ rá.”
35 Ikhú Jesús niʼthún: “Aguʼ marigá nguáthá mbiʼíí xóó náa ikháanʼla. Gaʼgua náa rígá aguʼ mu xákínámáʼánʼla; bi̱ na̱jkha̱ náa kríná tséʼyoo náa ejkha̱.
36 Índo̱ kaʼníí rígá aguʼ náa ikháanʼla, gusngajmá fe náa aguʼ mu xúʼko̱ muʼgua̱nú mani̱ndxa̱la e̱ji̱i̱n aguʼ”.
Nda̱wa̱á rí niʼthí rígi̱, Jesús ni̱jkha̱a̱ ga̱jma̱a̱ nirkaʼwuminaʼ náa ikhiin.
37 Maski ajndu ra̱ʼkhá tháán mbaʼa milagros niʼni náa inún, mú na̱nguá niguáʼdáá fe náa ikhaa,
38 mu mambanúu ajngáa rí niʼthí profeta* Isaías, índo̱ niʼthí: “Jeobá,* tsáá niʼnimbo̱o̱ náa ajngáa rí niʼtálu rá. Ga̱jma̱a̱ tsáá niwasngájmáá tsiakii rí gíʼdoo ñawúunʼ Jeobá* rá.”
39 Isaías má niʼthí ma̱ngaa náá numuu rí táʼndún gúnimbu̱u̱n:
40 “Ikhú nirugoo idún ga̱jma̱a̱ niʼni rí maʼni gújkhúʼ a̱jkiu̱ún, mu xúyáá ga̱jma̱a̱ xákru̱ʼu̱u̱n ni má xúgíiʼ a̱jkiu̱ún ga̱jma̱a̱ xátangi̱i̱n náa Dios, mu ikhúún’ ma̱ni̱ thanún”.
41 Isaías niʼthí rígi̱ numuu rí ndiʼyoo xóo niguma mba̱a̱ Cristo, ga̱jma̱a̱ niʼthí numuu ikhaa.
42 Maski ajndu xúʼko̱, mbaʼin xa̱bu̱ ede̱ judíos niguáʼdáá fe náa ikhaa; mú na̱nguá nindúún gúsngajma pa̱jnu numuu rí nimíñúún dí fariseos muxkawíin náa guʼwá rí bi̱ judíos nuxnáá gamajkhu Dios,
43 numuu rí nanigu̱u̱nʼ itháan rí xa̱bu̱ mbuyamajkún raʼkháa rí Dios maʼni tsajkurámiinʼ.
44 Mú Jesús niʼthí gakhi̱i̱: “Bi̱ nagiʼdoo fe náa ikhúúnʼ raʼkháa náa i̱ndó ikhúúnʼ gíʼdoo fe, ma̱ngaa nagiʼdoo náa bi̱ nikungu̱u̱nʼ;
45 ga̱jma̱a̱ bi̱ ndaʼyoʼ ikhúúnʼ, ndaʼyoo má ma̱ngaa bi̱ nikungu̱u̱nʼ.
46 Ni̱ʼkhá náa numbaaʼ xóo mbá aguʼ, mu asndu tsáá bi̱ gágiʼdoo fe náa ikhúúnʼ ní xáxtáa náa krína.
47 Mú, á mu mbáa naʼdxuun ajngóʼ mú tséʼnimbánuu, ikhúúnʼ xáni rí mamínuuʼ; numuu rí táʼkhá náa numbaaʼ gátha rí xa̱bu̱ mumíniiʼ, ni̱ʼkhá gáni káwíin.
48 Bi̱ tsíyoo gáʼyoʼ ga̱jma̱a̱ bi̱ tségruigú ajngóʼ maxtáa má mbáa bi̱ maʼthí rí mamínuuʼ: Ajngáa rí ni̱tha̱, maʼni rí mamínuuʼ índo̱ gáʼni iwáá mbiʼi.
49 Numuu rí tátha ga̱jma̱a̱ rí xóo nandoʼ ikhúúnʼ, ni̱tha̱ xóo nandoo Anu̱ʼ bi̱ nikungu̱u̱nʼ, numuu rí ikhaa niʼthúnʼ ndiéjunʼ rí gátha ga̱jma̱a̱ ndiéjunʼ rí gásngáa.
50 Ga̱jma̱a̱ nda̱yo̱o̱ rí kiʼtáñajunʼ ndrígóo ma’ni rí maraxtaa kámuu mbiʼi. Ikha jngóo xúgíʼ rí na̱tha̱, na̱tha̱ xó má Anu̱ʼ niʼthúnʼ ma̱tha̱”.
Mbaʼa nota
^ O “niʼnigabi̱i̱”, “niʼni mbaʼya̱a̱”.
^ O “niʼnigabi̱i̱”, “niʼni mbaʼya̱a̱”.
^ O “nikujxi̱i̱”, “niʼni mbaʼya̱a̱”.
^ Xóo muʼthá, miʼdujmaa náa ixi̱.
^ O “gaʼyee”, “bi̱ naʼthí dí marigá”.
