Rí niʼnirámáʼ Juan 14:1-31

  • Jesús, nindxu̱u̱ mbóó kamba̱a̱ rí na̱jkha̱ kaguáánʼ náa Anu̱u̱ (1-14)

    • “Ikhúúnʼ ni̱ndxu̱ʼ kamba̱a̱, rí gajkhun ga̱jma̱a̱ rí ndaʼya” (6)

  • Nakudaminaʼ rí makánún espíritu santo (15-31)

    • “Anu̱ʼ nindxu̱u̱ bi̱ kayá edxu̱u̱ náa ikhúúnʼ” (28)

14  “Xáʼni ngíná a̱jkia̱la. Gusngajmá rí kuaʼdáá fe náa Dios, ga̱jma̱a̱ gusngajmá rí kuaʼdáá fe náa ikhúúnʼ ma̱ngaa. 2  Náa goʼwóo Anu̱ʼ rígá mbaʼa náa makuwá xa̱bu̱. Á mu nda̱a̱, ni̱tala má, ikha jngóo na̱jkháaʼ mu ma̱ni̱ míjñúuʼ náa makuwáanʼla. 3  Ma̱ngaa índo̱ gáʼgáaʼ ga̱jma̱a̱ índo̱ gámbóʼ rani̱ míjñúuʼ náa makuwáanʼ, maʼkháaʼ gáguáanʼ mu magruíguáanʼla guʼwáá, mu náa gáxtáá ikhúúnʼ ikhí má gákuwáanʼla mangáanʼ. 4  Ga̱jma̱a̱ ikháanʼ nuniʼnúuʼ má kamba̱a̱ mu muʼgua náa ikhúúnʼ na̱jkhá”. 5  Tomás niʼthúu̱n: “Tátá, na̱nguá eya̱a̱xu náá edxu̱ʼ. Xú káʼnii gándoo gúniʼnúuʼxu kamba̱a̱ rá.” 6  Jesús niriʼñuu: “Ikhúúnʼ ni̱ndxu̱ʼ kamba̱a̱, rí gajkhun ga̱jma̱a̱ rí ndaʼya. Nimbáa nda̱wa̱a̱ tsáa maʼga̱nú náa Anu̱ʼ á mu raʼkháa ga̱jma̱a̱ numuʼ ikhúúnʼ. 7  Á mu nuniʼniúnʼ ikhúúnʼ, nuniʼníiʼ má Anu̱ʼ ma̱ngaa. Asndu xúgi̱ nuniʼníiʼ ga̱jma̱a̱ ndi̱ya̱a̱ má”. 8  Ikhú Felipe niʼthúu̱n: “Tátá, atasngájmiuxu Ana̱a̱ʼ, i̱ndó rúʼko̱ rí nanduxuʼ mbu̱ya̱a̱”. 9  Jesús niriʼñuu: “Felipe, náa xúgíʼ mbiʼi rí nixtáá ga̱jma̱á nindxa̱laʼ, kaʼníí xóó tsétatsiniúnʼ ráʼ. Bi̱ ndiʼyoʼ ikhúúnʼ ndiʼyoo má Anu̱ʼ ma̱ngaa. Náá numuu rí kaʼníí narathá ‹atasngájmiuxu Ana̱a̱ʼ rá.› 10  Lá tsétatsimbaaʼ rí ikhúúnʼ xtáá mbóó ga̱jmu̱ʼ Anu̱ʼ ga̱jma̱a̱ Anu̱ʼ xtáa mbóó ga̱jma̱á ni̱ndxu̱ʼ ráʼ. Xúgíʼ rí na̱tala na̱nguá e̱ʼkha̱ náa edxu̱ʼ ikhúúnʼ, nindxu̱u̱ ndrígóo Anu̱ʼ bi̱ xtáa mbóó ga̱jmu̱ʼ, mú ikhúúnʼ najmiuu mu maguma rí nandoo. 11  Gunimbala índo̱ na̱tala rí ikhúúnʼ xtáá mbóó ga̱jmu̱ʼ Anu̱ʼ ga̱jma̱a̱ Anu̱ʼ xtáa mbóó ga̱jma̱á ni̱ndxu̱ʼ. Á mu na̱nguá, gunimbala ga̱jma̱a̱ rí na̱ni̱. 12  Na̱tala gajkhun, bi̱ gágiʼdoo fe náa ikhúúnʼ, maʼni má ñajunʼ rí ikhúúnʼ na̱ni̱. Ga̱jma̱a̱ ñajunʼ rí gáʼni mani̱ndxu̱u̱ itháán mba̱a̱ ki xóo rí ni̱ni̱ ikhúúnʼ, numuu rí ikhúúnʼ na̱jkháaʼ má náa Anu̱ʼ. 13  Ma̱ngaa asndu ndiéjunʼ má rí gúnda̱ʼa̱ ga̱jma̱a̱ mbiʼyuʼ, ikhúúnʼ maxna̱la mu xúʼko̱ Anu̱ʼ maguma mba̱a̱ ga̱jma̱a̱ numuu A̱ʼdióo. 14  Á mu rígá rí nunda̱ʼa̱ ga̱jma̱a̱ mbiʼyuʼ, ikhúúnʼ maxna̱la. 15  Á mu nandala ku̱yo̱ʼ, munimbaníí kiʼtáñajunʼ ndrígóʼ. 16  Ga̱jma̱a̱ ikhúúnʼ matakáñuu Anu̱ʼ mu maxniála i̱mba̱a̱ bi̱ mambáyala, ga̱jma̱a̱ maxtáa ga̱jma̱á nindxa̱laʼ asndu kámuu mbiʼi: 17  Espíritu santo* rí nasngájma dí gajkhun, xa̱bu̱ xándoo maguaʼdáá numuu rí tséyáá ni má tséniʼnuuʼ. Mú ikháanʼla nuniʼnúuʼ numuu dí rígá náa ikháanʼla ga̱jma̱a̱ naguanúu náa ikháanʼ. 18  Ikhúúnʼ xániʼñátigáanʼla.* Maʼkháaʼ náa ikháanʼla. 19  Inu má dí numbaaʼ rígi̱ ní xáʼyóʼ, mú ikháanʼ mbu̱yo̱ʼ, numuu rí ikhúúnʼ xtáá, ikha jngóo mangáanʼ makuwáanʼla. 20  Mbiʼi rúʼko̱ mbu̱ya̱a̱ rí xtáá mbóó ga̱jmu̱ʼ Anu̱ʼ, ga̱jma̱a̱ ikháanʼ kuwáanʼ mbóó ga̱jma̱á ni̱ndxu̱ʼ, ga̱jma̱a̱ ikhúúnʼ maxtáá mbóó ga̱jma̱á nindxa̱laʼ. 21  Bi̱ nagruigú* kiʼtáñajunʼ ndrígóʼ ga̱jma̱a̱ naʼnimbánuu buʼko̱ bi̱ nandoo kaʼyoʼ. Ga̱jma̱a̱ bi̱ nandoo kaʼyoʼ, Anu̱ʼ ma̱ndoo kaʼyoo, ga̱jma̱a̱ ikhúúnʼ maʼndoʼ ka̱yo̱o̱, ma̱ngaa masngajmáminaʼ náa ikhaa”. 22  I̱mba̱a̱ Judas, mú raʼkháa Judas Iscariote, nirajxu̱u̱: “Tátá, náá numuu rá. Ndíjkha rí matasngajmáminaʼ náa ikháanʼxu raʼkháa náa numbaaʼ rá.” 23  Jesús niriʼñuu: “Á mu mbáa nandoo kaʼyoʼ, maʼnimbánuu ajngóʼ. Ga̱jma̱a̱ Anu̱ʼ maʼndoo kaʼyoo, ikhú mbá nájmáanʼxuʼ magúwaʼ náa ikhaa ga̱jma̱a̱ makúwáanʼ gajmiúxu. 24  Bi̱ na̱nguá eyoo kaʼyoʼ tséʼnimbánuu ajngóʼ. Ajngáa rí na̱tala, raʼkháa ndrígóʼ ikhúúnʼ, nindxu̱u̱ rí na̱ʼkha̱ náa Anu̱ʼ bi̱ nikungu̱u̱nʼ. 25  Na̱tala rígi̱ nákha xóó xtáá ga̱jma̱á nindxa̱laʼ. 26  Anu̱ʼ maxnála espíritu santo ga̱jma̱a̱ numuu mbiʼyuʼ mu mambáyala, ikhaa maʼsngála xúgíʼ ga̱jma̱a̱ maʼni rí marmáʼáan a̱jkia̱la xúgíʼ rí ni̱tala. 27  Tsímáá ndrígóʼ naniʼñúuʼ; tsímáá ndrígóʼ naxna̱la. Tséxna̱la xóo rí numbaaʼ naxná. Xáxmiéjuanla ni má xámiñala. 28  Nidxawíínla rí ni̱tala: ‹Rí ikhúúnʼ na̱jkháaʼ ga̱jma̱a̱ maʼkháaʼ má náa ikháanʼla›. Á mu nandala ku̱yo̱ʼ maʼdxala rí na̱jkháaʼ náa Anu̱ʼ, numuu rí Anu̱ʼ nindxu̱u̱ bi̱ kayá edxu̱u̱ náa ikhúúnʼ. 29  Na̱tala rígi̱ nákha xóó tsérígá, numuu rí índo̱ gáʼga̱nú marigá, ikháanʼ munimbala. 30  Ní xátamíjná itháan ga̱jma̱á nindxa̱la, numuu rí na̱ʼkha̱ xa̱bu̱ ñajunʼ ndrígóo numbaaʼ rígi̱, maski ajndu má ikhaa ragíʼdoo nditháan tsiakii náa ikhúúnʼ. 31  Mu xa̱bu̱ mbuyáá rí ikhúúnʼ nandoʼ ka̱yo̱o̱ Anu̱ʼ, na̱ni̱ xó má rí naʼthúnʼ Anu̱ʼ ma̱ni̱. Gatujxala guʼgua̱ rá.

Mbaʼa nota

^ O “xi̱ʼ kaʼwu”, “tsiakii ndrígóo Dios”. Atayáá glosario, espíritu santo.
^ O “xóo e̱jín dxuáʼa̱”.
^ Náa ajngáa griego naʼthí, “gíʼdoo”.
TRADUCCIÓN DEL NUEVO MUNDO DE LAS SANTAS ESCRITURAS
Juan 14
me̱ʼpha̱a̱
Araxnuu Biblia náa Internet
https://cms-imgp.jw-cdn.org/img/p/1001061103/univ/art/1001061103_univ_sqr_xl.jpg
nwt