Rí niʼnirámáʼ Juan 15:1-27
15 Ikhúúnʼ ni̱ndxu̱ʼ ixu̱u̱ uva rí gajkhun, ga̱jma̱a̱ Anu̱ʼ nindxu̱u̱ bi̱ naʼdu.
2 Ikhaa narujturígú xúgíʼ ñawúunʼ rí tséxná xndúu náa ikhúúnʼ, ga̱jma̱a̱ xúgíʼ rí najma̱a̱ xndúu naʼni káʼwi̱i̱ mu maxná itháan xndúu.
3 Ikháanʼ niguma kaʼwáanʼla ga̱jma̱a̱ numuu ajngáa rí ni̱tala.
4 Gakuwa̱a̱nʼ mbóó ga̱jma̱á ni̱ndxu̱ʼ, ga̱jma̱a̱ ikhúúnʼ maxtáá mbóó ga̱jma̱á nindxa̱laʼ. Xó má ñawúunʼ ixi̱, xándoo maxná xndúu á mu na̱nguá gíʼma náa ixu̱u̱, xúʼko̱ má mangáanʼla xándoo marigá dí ma̱jma̱a̱ náa ikháanʼ á mu na̱nguá kuwa̱a̱nʼ mbóó ga̱jma̱á ni̱ndxu̱ʼ.
5 Ikhúúnʼ ni̱ndxu̱ʼ ixu̱u̱ uva ga̱jma̱a̱ ikháanʼ ñajuanla ñawúunʼ. Bi̱ xtáa ga̱jma̱á ni̱ndxu̱ʼ, ikhúúnʼ xtáá ga̱jma̱á nindxu̱u̱ ikhaa, buʼko̱ marigá rí ma̱jma̱a̱ náa ikhaa. Numuu dí á mu nda̱wu̱u̱n ikhúúnʼ nda̱a̱ nditháan rí gájmáanʼla mu̱ni̱.
6 Á mu mbáa tséxtáa mbóó ga̱jma̱á ni̱ndxu̱ʼ, nuturígú xóo ñawúunʼ ixi̱ ga̱jma̱a̱ nujndooʼ. Ñawúunʼ ixi̱ rúʼko̱ naxtágímbóo mu mi̱kha náa aguʼ.
7 Á mu nakuwa̱a̱nʼ mbóó ga̱jma̱á ni̱ndxu̱ʼ ga̱jma̱a̱ ajngóʼ narígá náa ikháanʼla, gunda̱ʼa̱ asndu ndiéjúúnʼ má dí eyála ga̱jma̱a̱ makhánala.
8 Rígi̱ naʼni mba̱a̱ Anu̱ʼ. Rí marigá má xúʼko̱ rí ma̱jma̱a̱ náa ikháanʼla ga̱jma̱a̱ musngajmá rí nindxa̱la xa̱bi̱ʼ.
9 Xó má Anu̱ʼ nandoo kaʼyoʼ, xúʼko̱ má mangúún nandoʼ ka̱ya̱la; gu̱ni̱ rí maʼndoʼ kaya̱la má xúʼko̱.
10 Á mu nunimbala rí natañájunʼ, maʼndoʼ kaya̱la má xúʼko̱, xó má ikhúúnʼ nanimboʼ kiʼtáñajunʼ ndrígóo Anu̱ʼ ga̱jma̱a̱ ikhaa nandoo kaʼyoʼ má xúʼko̱.
11 Na̱tala rígi̱ mu mangáanʼ maʼdxala xó má ikhúúnʼ, ga̱jma̱a̱ gagi ndrígála mani̱ndxu̱u̱ kájxi̱.
12 Rígi̱ nindxu̱u̱ kiʼtáñajunʼ ndrígóʼ: Rí maʼndalá kuyamíjna̱ xó má ikhúúnʼ nandoʼ ka̱ya̱la.
13 Nimbáa na̱nguá gíʼdoo mbá ngajua mba̱a̱ wéñuuʼ, xóo bi̱ naxnájximinaʼ makhañúu ga̱jma̱a̱ numún bi̱ nambájxu̱u̱ gajmíi̱n.
14 Ikháanʼ nindxa̱la bi̱ nambájxuʼ gajmíʼ á mu nunimbáníí dí natañájuanla.
15 Nánguá eta̱la rí nindxa̱la ñumbáá, numuu rí mbáa ñumbáá tséʼyoo rí naʼni patriúun. Na̱tala dí nindxa̱la bi̱ nambájxuʼ gajmíʼ numuu dí na̱tala xúgíʼ rí nidxuun niʼthí Anu̱ʼ.
16 Ikháanʼ túraʼwu̱u̱n ikhúúnʼ. Ikhúúnʼ niraʼwáanʼla ikháanʼ. Ga̱jma̱a̱ nitañájuanla rí muʼgua mu marigá rí ma̱jma̱a̱ náa ikháanʼ rí mbajyúuʼ mba̱yu̱u̱ʼ. Xúʼko̱ Anu̱ʼ maxnála asndu ndiéjunʼ má dí gúnda̱ʼa̱ ga̱jma̱a̱ mbiʼyuʼ.
17 Na̱tala rígi̱ mu maʼndala kuyamíjna̱.
18 Á mu xa̱bu̱ numbaaʼ nawiñu̱u̱nʼ kuyala, garmáʼáan a̱jkia̱la rí gi̱núún niwiñu̱u̱nʼ ku̱yo̱ʼ ki xóo ikháanʼla.
19 Á mu nindxa̱la xóo xa̱bu̱ numbaaʼ, xa̱bu̱ maʼndún kuyala. Mú ikhúúnʼ niraʼwáanʼla náa xa̱bu̱ numbaaʼ, ikha jngóo nawiñu̱u̱nʼ kuyala.
20 Garmáʼáan a̱jkia̱la dí ni̱tala: Dí ñumbáá na̱nguá gíʼdoo itháan numuu ki xóo patriúun. Á mu ikhiin nixkoʼ, mangáanʼ má muxkala; á mú ikhiin ninimbu̱ún rí ni̱tha̱ xúʼko̱ má ma̱ngaa munimbu̱ún dí muthu̱u̱n.
21 Ga̱jma̱a̱ numuu mbiʼyuʼ, ikhiin muniala xúgíʼ rígi̱, numuu dí tséniʼniiʼ bi̱ nikungu̱u̱nʼ.
22 Á mu ikhúúnʼ táʼkhá ga̱jma̱a̱ táthu̱u̱n ikhiin xáguáʼdáá aʼkhúún. Mú xúgi̱ na̱nguá xóo muthi rí nda̱a̱ aʼkhúún.
23 Bi̱ nawiyu̱u̱ʼ kaʼyoʼ ikhúúnʼ nawiyu̱u̱ʼ má kaʼyoo Anu̱ʼ ma̱ngaa.
24 Á mu ikhúúnʼ táni milagro rí nimbáa táʼni náa ikhiin, xáguaʼdáá aʼkhúún; mú xúgi̱ ndiyoʼ ga̱jma̱a̱ niwiñu̱u̱nʼ kuyoʼ xúʼko̱ má Anu̱ʼ ma̱ngaa.
25 Mú rígi̱ nirígá mu mambanúu ajngáa dí kiʼnirámáʼ náa Xtángoo ndrígu̱ún: ‹Asndu nda̱a̱ mbá numuu rí niwiñu̱u̱nʼ kuyoʼ›.
26 Makuʼnguáanʼ bi̱ mambáyala rí na̱ʼkha̱ náa Anu̱ʼ, rí nindxu̱u̱ espíritu santo* rí nasngájma rí gajkhun, ikhaa maʼthí ga̱jma̱a̱ numuʼ;
27 ikháanʼ mangáanʼ gíʼmaa mu̱tha̱ ga̱jma̱a̱ numuʼ, numuu dí nikuwa̱a̱nʼ ga̱jma̱á ni̱ndxu̱ʼ asndu nákha nigi̱ʼdu̱u̱.
