Rí niʼnirámáʼ Juan 18:1-40
-
Judas naxnájxi̱i̱ Jesús (1-9)
-
Pedro najmuu espada (10, 11)
-
Nagún kuya̱a̱ Jesús náa Anás (12-14)
-
Timbá a̱ʼphu̱ rí Pedro naʼthí rí tséʼninuwiinʼ Jesús (15-18)
-
Jesús wíji̱ náa inuu Anás (19-24)
-
A̱jma̱, ajtsú nuthu Pedro naʼthí rí tséʼninuwiinʼ Jesús (25-27)
-
Jesús wíji̱ náa inuu Pilato (28-40)
-
“Náa Matañájunʼ na̱nguá rígá náa numbaaʼ rígi̱” (36)
-
18 Nda̱wa̱á dí niʼthí rígi̱, Jesús ni̱jkha̱ gajmíi̱n xa̱bi̱i̱ náa i̱mba̱ ridoo mata ndrígóo Cedrón, ga̱jma̱a̱ nigún náa mbá huerta dí rígá ikhí.
2 Judas bi̱ inu maxnájxi̱i̱ ndaʼya má ikhí ma̱ngaa, numuu rí Jesús naguʼwuun na̱jkha̱ ikhí gajmíi̱n xa̱bi̱i̱.
3 Ikhú Judas ni̱jkha̱nú gajmíi̱n mbaʼin soldados ma̱ngaa bi̱ nuñewa̱a̱n guʼwá rí nduyamajkuíí Dios ga̱jma̱a̱ fariseos. Niguáʼnu ga̱jma̱a̱ aguʼ ma̱ngaa ajua̱nʼ.
4 Jesús ndaʼyoo má rí magíʼnuu, ikhú niwi̱ji̱ inún ga̱jma̱a̱ nirajxu̱u̱n: “Tsáa eʼyáaʼla rá.”
5 Ikhú niriʼñáán: “Jesús bi̱ na̱ʼkha̱ náa Nazaret”. Ikhú ikhaa niʼthún, “ikhúúnʼ ni̱ndxu̱ʼ”. Ga̱jma̱a̱ ikhí wíji̱ gajmíi̱n Judas bi̱ nixnájxi̱i̱ ma̱ngaa.
6 Mú índo̱ Jesús niʼthún “ikhúún ni̱ndxu̱ʼ”, ikhú nigúun skidiʼ ga̱jma̱a̱ nijnguti̱gi̱i̱n mbayííʼ.
7 Ikha jngóo nirajxu̱u̱n mbu̱júu̱ʼ: “Tsáa eʼyáaʼla rá.” Ikhiin nitháán: “Jesús bi̱ na̱ʼkha̱ náa Nazaret”.
8 Jesús niriʼñúún: “Ni̱tala má rí ikhúúnʼ ni̱ndxu̱ʼ. Á mu ikhúúnʼ eʼñúnʼ, guniʼñúúnʼ rí magúun xa̱bu̱ bugi̱”.
9 Nirígá rígi̱ mu mambanúu rí ikhaa má niʼthí: “Nimbáa tánimbáti̱ga̱a̱ bi̱ ikháán niraxniúʼ”.
10 Ikhú Simón Pedro bi̱ kayá espada niríyaʼ ga̱jma̱a̱ nirígú cháʼwuun mújúunʼ Malco, bi̱ nindxu̱u̱ ñumbáá ndrígóo ndxajkun bi̱ phú kayá edxu̱u̱.
11 Ikhú Jesús niʼthúu̱n Pedro: “Ataxúmáaʼ espada náa xtóo. Lá xáʼyóoʼ ma̱ga̱nʼ rí ga̱jnu̱ʼ náa copa dí nixnúʼ Anu̱ʼ ráʼ.”
12 Ikhú soldados ga̱jma̱a̱ bi̱ kayá edxu̱u̱ náa ikhiin, ma̱ngaa bi̱ nuñewa̱a̱n guʼwá rí nduyamajkuíí Dios, nirtuwiin Jesús ga̱jma̱a̱ niruʼwa̱a̱.
13 Ginii nigún kuya̱a̱ náa Anás numuu rí nindxu̱u̱ jmégiu̱u̱ Caifás, bi̱ nindxu̱u̱ ndxajkun bi̱ phú kayá edxu̱u̱ tsiguʼ rúʼko̱.
14 Ikhaa má Caifás bugi̱ nindxu̱u̱ bi̱ niʼthún judíos rí itháan májánʼ rí makhañúu mbáwíí xa̱bu̱, raʼkháa rí xúgíinʼ xa̱bu̱ xuajen makhañún.
15 Ikhú Simón Pedro ga̱jma̱a̱ i̱mba̱a̱ xa̱bi̱i̱ Jesús nigún kidxuuʼ ikhaa. Ga̱jma̱a̱ bi̱ i̱mba̱a̱ xa̱bi̱i̱ naniniiʼ ndxajkun bi̱ phú kayá edxu̱u̱, ikha jngóo nito̱ʼo̱o̱ ga̱jma̱a̱ Jesús náa rexo̱o̱ ndxajkun bi̱ phú kayá edxu̱u̱,
16 mú Pedro niguanúu rexa̱a̱ náa xkrugua. Ikha jngóo bi̱ i̱mba̱a̱ xa̱bi̱i̱ Jesús bi̱ naniniiʼ ndxajkun bi̱ phú kayá edxu̱u̱, nigájnuu gáʼthúu̱n a̱ʼgu̱ bi̱ nañewu̱u̱n xkrugua rí maniñuuʼ mato̱ʼo̱o̱ Pedro.
17 Ikhú a̱ʼgu̱ bi̱ nañewu̱u̱n xkrugua nirajxu̱u̱ Pedro: “Lá raʼkháa mangáán nindxa̱a̱ʼ xa̱bi̱i̱ xa̱bu̱ buʼko̱ ráʼ.” Ikhú Pedro niriʼña: “Jáʼan na̱nguá ni̱ndxu̱ʼ jún”.
18 Numuu rí naʼni migúwán, ikha jngóo ñumbáá ga̱jma̱a̱ bi̱ nuñewa̱a̱n guʼwá nigíʼ aguʼ ga̱jma̱a̱ wájun mbájndi náa gíʼ aguʼ rataguún’. Ma̱ngaa ikhí wíji̱ Pedro rataguu’ gajmíi̱n.
19 Ikhú ndxajkun bi̱ kayá edxu̱u̱* nirajxu̱u̱ Jesús ga̱jma̱a̱ numún xa̱bi̱i̱, ma̱ngaa ga̱jma̱a̱ numuu rí naʼsngáa.
20 Jesús niriʼñuu: “Ikhúúnʼ ni̱tha̱ má xúʼko̱ náa inún xa̱bu̱. Nisngáa má xúʼko̱ náa guʼwá rí bi̱ judíos nuxnáá gamajkhu Dios, ga̱jma̱a̱ náa guʼwá rí nduyamajkuíí Dios, náa judíos nagimbíi̱n ga̱jma̱a̱ nimbá tátha̱ ngu̱ʼwa̱á.
21 Náá numuu rí ikhúúnʼ etrajxu̱ʼ rá. Atrajxu̱u̱n bi̱ nidxawíín rí nitha̱. Aʼkhu kúwá ikhiin nduyáá májánʼ ndiéjunʼ ni̱tha̱”.
22 Índo̱ Jesús niʼthí rígi̱, ikhú mbáa bi̱ nañewu̱u̱n guʼwá bi̱ wíji̱ ikhí, nikúbóo inuu ga̱jma̱a̱ niʼthúu̱n: “Lá xúʼko̱ etriʼñáá ndxajkun bi̱ kayá edxu̱u̱ ráʼ.”
23 Ikhú Jesús niriʼñuu: “Á mu ni̱tha̱ mbá dí raʼkhí, arathúnʼ ndiéjunʼ ninindxu̱u̱; á mu gajkhun nindxu̱u̱ rí ni̱tha̱, náá numuu dí naraxnúʼ rá.”
24 Nda̱wa̱á Anás, kaxtoʼóo nikuʼmaa náa inuu Caifás, bi̱ nindxu̱u̱ ndxajkun bi̱ phú kayá edxu̱u̱.
25 Mú Simón Pedro kaʼnííʼ wíji̱ ikhí rataguuʼ. Ikhú nirajxi̱i̱: “Lá raʼkháa ikháán nindxa̱a̱ʼ mbáa xa̱bi̱i̱ xáʼ.” Ikhú ikhaa niʼni gaʼduunʼ. Ga̱jma̱a̱ niʼthún: “Jáʼan na̱nguá ni̱ndxu̱ʼ jún”.
26 Ikhú mbáa ñumbáá ndrígióo ndxajkun bi̱ phú kayá edxu̱u̱, bi̱ kaʼyoo xa̱bu̱, bi̱ Pedro nirígú cháʼwuun, ga̱jma̱a̱ niʼthúu̱n: “Lá raʼkháa mangáán ndi̱ya̱a̱ʼ ga̱jma̱a̱ʼ náa huerta xáʼ.”
27 Mú mbu̱júu̱ʼ Pedro niʼni gaʼduunʼ, núkhu nindxa̱ʼwá mbáa mbaxtá.
28 Ikhú nigájnaán kuya̱a̱ Jesús náa goʼwóo Caifás ga̱jma̱a̱ nigún kuya̱a̱ náa goʼwóo xa̱bu̱ ñajunʼ bi̱ nindxu̱u̱ Pilato, kaʼníí xóó miʼcha̱, ga̱jma̱a̱ ikhiin tátu̱ʼu̱u̱n náa goʼwóo xa̱bu̱ ñajunʼ mu xúni̱ tsagamijná, mu xúʼko̱ ma̱ndoo mu̱phu̱ Pascua.
29 Ikha jngóo Pilato nigájnuu náa gíinʼ ikhiin ga̱jma̱a̱ nirajxu̱u̱n: “Náá numuu rí nuxruíga̱a̱ xa̱bu̱ bugi̱ rá.”
30 Ikhú niriʼñáán: “Á mu xa̱bu̱ bugi̱ nda̱a̱ aʼkhúun, xúxnajxíixu náa ikháán”.
31 Ikha jngóo Pilato niʼthún: “Aʼgua̱a̱ʼla kuya̱a̱ ga̱jma̱a̱ ikháanʼ má gúya̱a̱ rí gúni̱i̱ xó má naʼthí náa xtángoo ndrígála”. Ikhú judíos nitháán: “Ikháanʼ rakáʼyuxu muxiyáa nimbáa”.
32 Rígi̱ nirígá mu mambanúu ajngáa rí niʼthí má Jesús rí xú káʼnii gákháñuu.
33 Ikhú Pilato nita̱ʼa̱a̱ náa guʼwá ñajunʼ, ga̱jma̱a̱ nindxa̱ʼóo Jesús ma̱ngaa nirajxu̱u̱: “Lá ikháán nindxa̱a̱ʼ rey ndrígu̱ún judíos ráʼ.”
34 Jesús niʼthúu̱n: “Lá natrajxi̱ rígi̱ numuu rí ikháán nandaaʼ ma̱ta̱ya̱a̱ ráʼ. O ga̱jma̱a̱ numuu rí eʼwíinʼ nithaanʼ ga̱jma̱a̱ numuʼ dxe̱ʼ.”
35 Ikhú Pilato niʼthúu̱n: “Lá judío ni̱ndxu̱ʼ tayáá ráʼ. Xa̱bu̱ xuajñaanʼ má exnajxi̱i̱n náa ikhúúnʼ ga̱jma̱a̱ ndxajkun bi̱ kuya̱ edxu̱u̱. Ndiéjunʼ lá nitani̱ jngóo.”
36 Jesús niriʼñuu: “Náa Matañájunʼ* na̱nguá rígá náa numbaaʼ rígi̱. Á mu rígá náa numbaaʼ rígi̱, xa̱bi̱ʼ muxmijná mu ikhúúnʼ xájuixnájxu̱u̱n náa judíos. Mú raʼkháa gi̱i̱ gátañajunʼ”.
37 Ikha jngóo Pilato niʼthúu̱n: “Lá nandaaʼ gárata rí nindxa̱a̱ʼ rey ráʼ.” Jesús niriʼñuu: “Xúʼko̱, ikháán má rathá rí ikhúúnʼ ni̱ndxu̱ʼ rey. Ikhaa rúʼko̱ numuu rí nixtáá, ga̱jma̱a̱ ikhaa rúʼko̱ numuu rí ni̱ʼkhá náa numbaaʼ mu ma̱ta̱ rí gajkhun. Ga̱jma̱a̱ asndu tsáa bi̱ gáʼnimbo̱o̱ kaʼyoo rí gajkhun, naʼdxawuun rí na̱tha̱”.
38 Ikhú Pilato nirajxu̱u̱: “Ndiéjunʼ nindxu̱u̱ rí gajkhun rá.”
Nda̱wa̱á dí niʼthí rígi̱, ikhú nigájnuu mbu̱júu̱ʼ gáʼñúún judíos ga̱jma̱a̱ niʼthún: “Ikhúúnʼ tséxkamaa nimbá aʼkhúun xa̱bu̱ bugi̱.
39 Ma̱ngaa ikháanʼ naguʼwanla rí ikhúúnʼ naríya̱a̱ʼ mbáa bi̱ xtáa náa guʼwá ejua̱a̱nʼ índo̱ narígá Pascua. Lá nandala ma̱ni̱ kríya̱a̱ʼ rey ndrígu̱ún judíos ráʼ.”
40 Ikhiin gakhi̱i̱ nindxa̱ʼwa̱: “¡Na̱nguá, xátatsiʼñááʼ ikhaa! ¡Atríyáaʼ Barrabás!”. Barrabás nindxu̱u̱ mbáa kuʼwáʼ.
