Rí niʼnirámáʼ Juan 2:1-25
2 Índo̱ niʼni ajtsú mbiʼi nda̱wa̱á nirígá mbá ndxa̱a̱ gatsigúnʼ náa Caná náa mbayuuʼ Galilea, ikhí ma̱ngaa nixtáa ru̱dúu̱ Jesús.
2 Ma̱ngaa nitháán maʼga Jesús gajmíi̱n xa̱bi̱i̱ náa ndxa̱a̱ gatsigúnʼ.
3 Índo̱ ru̱dúu̱ Jesús ndiʼyoo dí na̱jkha̱ raguámbá vino, ikhú niʼthúu̱n Jesús: “Nánguá guáʼdáá mbaji̱ʼ vino”.
4 Mú Jesús niriʼñuu: “Ndiéjunʼ lá eʼniulú ikháanʼ rúʼko̱ rá. Mbiʼi ndrígóʼ xóó tséjkha̱nú”.
5 Ikhú ru̱dúu̱ niʼthún xúgíinʼ bi̱ kúwá ruruguambáá: “Gu̱ni̱ xúgíʼ rí ikhaa gáʼtala”.
6 Ga̱jma̱a̱ ikhí rígá mbá majun rayaʼ dí ki̱ʼni̱ ga̱jma̱a̱ itsí náa na̱jnu̱ʼ iyaʼ rí najmún mu mujña̱a̱ ñawúúnʼ xó má naguʼwún nuni̱ judíos. Náa mámbá naʼngo̱o̱ najni̱ʼ 44 o 66 litro* iyaʼ.
7 Jesús niʼthún: “Guxíñáʼ iyaʼ náa rayaʼ”. Ikhú ikhiin ninimajnííʼ iyaʼ.
8 Nda̱wa̱á niʼthún: “Guríyáʼ mbá chíʼgíiʼ ga̱jma̱a̱ guʼgua ku̱ya̱la maga̱a̱n bi̱ kayá edxu̱u̱ náa ndxa̱a̱”. Ga̱jma̱a̱ ikhú nigún kuñu̱u̱n.
9 Índo̱ bi̱ kayá edxu̱u̱ náa ndxa̱a̱ niʼga̱a̱n iyaʼ rí nigutajxi̱i̱ vino, numuu rí na̱nguá eʼyoo náa e̱ʼkha̱ ikha jngóo nindxa̱ʼóo bi̱ nanigúnʼ (mú bi̱ niguwáʼ kuñu̱u̱n vino nduyáá má rí iyaʼ nigutajxi̱i̱ vino)
10 ga̱jma̱a̱ niʼthúu̱n: “Xúgíinʼ xa̱bu̱ nuxna ginii vino rí májánʼ asndu índo̱ najngi̱i̱n xa̱bu̱, ndiʼkhún eri̱ya̱ʼ vino dí ra̱májánʼ, mú ikháán nitiéjxi̱i̱ vino rí májánʼ asndu xúgi̱ ndiʼkhún etríya̱ʼ”.
11 Rí niʼni Jesús náa Caná náa mbayuuʼ Galilea nindxu̱u̱ timbá milagro rí niʼni. Xúʼko̱ nisngájma tsiakii rí gíʼdoo, ga̱jma̱a̱ xa̱bi̱i̱ niguáʼdáá fe náa ikhaa.
12 Nda̱wa̱á ni̱jkha̱ náa Capernaúm ga̱jma̱a̱ ru̱dúu̱, xó má a̱ngui̱i̱n gajmíi̱n xa̱bi̱i̱, mú na̱nguá niguanún mbayuuʼ mbiʼi ikhí.
13 Índo̱ inu marigá ndxa̱a̱ Pascua ndrígu̱ún judíos, Jesús nitsimuu náa Jerusalén.
14 Náa guʼwá rí nduyamajkuíí Dios nixkamiin rí kúwá ragujui̱i̱n xede̱, mugu̱, palomas, ga̱jma̱a̱ bi̱ nuriʼkhuíí mbújkha̱a̱ tri̱gi̱i̱n náa xíliu̱ún.*
15 Nda̱wa̱á rí niʼni mbá jñuu, nixkawíin mbá xúgíinʼ, gajmiún mugiuún, xediún, ma̱ngaa nixídíí mbújku̱ún bi̱ nuriʼkhuíí mbújkha̱a̱ ga̱jma̱a̱ nirngájxi̱i̱ mésu̱ún.
16 Ga̱jma̱a̱ niʼthún bi̱ nugujui̱i̱n paloma: “¡Gurawíi xúgíʼ rígi̱ gi̱i̱! ¡Guniʼñáánʼ ru̱ni̱ xua̱ náa goʼwóo Anu̱ʼ!”.
17 Ikhú xa̱bi̱i̱ nirmáʼáan a̱jkiu̱ún dí kiʼniraʼmáʼ: “Ra̱ʼkhá tháán eyoʼ ka̱yo̱o̱ guʼwáaʼ rí asndu nindxu̱u̱ xóo aguʼ rí nakha náa a̱jkiu̱nʼ”.
18 Índo̱ judíos ndiyáá rígi̱ ikhú nirajxi̱i̱: “Ndiéjunʼ milagro gándoo gatasngajmúxuʼ rí ikháán nikhánaaʼ matani̱ rígi̱ rá.”
19 Jesús niriʼñúún: “Gu̱ni̱ gámbáala guʼwá rígi̱ náa nduyamajkuíí Dios ga̱jma̱a̱ káaʼ ajtsú e̱jkha̱ʼ gáníi”.
20 Ikhú bi̱ judíos nitháán: “Ndijyúuʼ mbá 46 tsiguʼ mu maguma guʼwá rígi̱ ga̱jma̱a̱ káaʼ ajtsú e̱jkha̱ʼ gátani̱i̱ ikháán ráʼ.”
21 Mú guʼwá rí ikhaa nindoo gáʼthí nindxu̱u̱ xuyuuʼ.
22 Índo̱ nitujxi̱i̱* náa majñúnʼ wajinʼ, xa̱bi̱i̱ nirmáʼáan a̱jkiu̱ún rí niʼthí ga̱jma̱a̱ ninimbu̱ún dí naʼthí náa Kiʼnirámáʼ ga̱jma̱a̱ rí niʼthí Jesús.
23 Índo̱ xtáa náa Jerusalén náa ndxa̱a̱ Pascua, mbaʼin xa̱bu̱ niguáʼdáá fe náa ikhaa, índo̱ ndiyáá milagro rí naʼni.
24 Mú Jesús na̱nguá niʼnimbo̱o̱ kaʼñún numuu rí xúgíinʼ naniniúnʼ májánʼ,
25 tséyóoʼ má mbáa tsáa maʼthúu̱n xú káʼnii ni̱ndxu̱ún xa̱bu̱ numbaaʼ, numuu rí ikhaa ndaʼyoo májánʼ xóo phú ni̱ndxu̱ún.
