Rí niʼnirámáʼ Juan 20:1-31
20 Timbá mbiʼi rí ndayáa xmáná,* María Magdalena ni̱jkha̱ miʼcha̱ náa iñá wajinʼ, índo̱ kaʼníí xóó mikrína ga̱jma̱a̱ ndiʼyoo rí niyejxingaa itsí rí gíʼma náa iñá wajinʼ.
2 Ikha jngóo nigáyúu ni̱jkha̱ gáʼyoo Simón Pedro ga̱jma̱a̱ i̱mba̱a̱ xa̱bi̱i̱ Jesús, bi̱ nandoo kaʼyoo, ga̱jma̱a̱ niʼthún: “¡Ni̱ri̱ya̱a̱ʼ Tátá náa iñá wajinʼ ma̱ngaa tséya̱a̱xu náá nigún kuya̱a̱!”.
3 Ikhú Pedro ga̱jma̱a̱ i̱mba̱a̱ xa̱bi̱i̱ Jesús nigún náa iñá wajinʼ.
4 Ikhú nájmi̱i̱n nigíʼdi̱i̱ nigáñún, mú i̱mba̱a̱ xa̱bi̱i̱ Jesús nigáyúu itháan nacha̱ ki xóo Pedro ga̱jma̱a̱ ni̱jkha̱nú ginii náa iñá wajinʼ.
5 Índo̱ nigiʼnduti̱ga̱ niyejxi̱ra̱ʼa̱ awúu̱n, ikhú ndiʼyoo xtíin dí nindxu̱u̱ lino, mú na̱nguá nito̱ʼo̱o̱.
6 Ikhú Simón Pedro bi̱ na̱ʼkha̱ kidxuuʼ ni̱ʼkha̱nú ga̱jma̱a̱ nito̱ʼo̱o̱ náa iñá wajinʼ. Ikhú ndiʼyoo xtíin dí nindxu̱u̱ lino.
7 Xtíin rí kambróʼoo edxu̱u̱ Jesús na̱nguá tri̱ga̱ mbóó ga̱jma̱a̱ i̱ʼwáʼ xtíin, kambújxi̱ ga̱jma̱a̱ gíʼ kaníí.
8 Nda̱wa̱á nito̱ʼo̱o̱ ma̱ngaa xa̱bi̱i̱ Jesús bi̱ ni̱jkha̱nú ginii náa iñá wajinʼ, ga̱jma̱a̱ índo̱ ndiʼyoo ikhú niʼnimbo̱o̱.
9 Numuu rí xóó tsíkru̱ʼu̱u̱n ajngáa rí Kiʼniraʼmáʼ náa naʼthí rí ikhaa ndayóoʼ matujxi̱i̱ náa majñúnʼ wajinʼ.
10 Ikha jngóo xa̱bi̱i̱ nitangiín nigúun guʼwún.
11 Mú María Magdalena wíji̱ rexa̱a̱ rambi̱ya̱ʼ náa rawuunʼ iñá wajinʼ. Índo̱ xtáa rambi̱ya̱ʼ, nigiʼnduti̱ga̱ mu mayejxira̱ʼa̱ náa iñá wajinʼ
12 ga̱jma̱a̱ ndiʼñún a̱jmi̱i̱n ángeles kugíʼ xtíin miʼxá, mbáa gíʼ náa niʼni edxu̱u̱ ga̱jma̱a̱ i̱mba̱a̱ gíʼ náa niʼni rajkúu, náa nibóoʼ Jesús.
13 Ga̱jma̱a̱ ikhiin nirajxi̱i̱: “A̱ʼgu̱, náá numuu tambi̱ya̱ʼ rá.” Ikhaa niriʼña̱a̱: “Numuu rí niriya̱a̱ʼ Tátá ga̱jma̱a̱ tséyóo náa nigún kuya̱a̱”.
14 Índo̱ guámbóo niʼthí rígi̱, ikhú ikhaa nitangayii ga̱jma̱a̱ ndiʼyoo rí ikhí wíji̱ Jesús, mú táʼninuwiinʼ á mu ikhaa nindxu̱u̱.
15 Jesús nirajxu̱u̱: “A̱ʼgu̱, náá numuu tambi̱ya̱ʼ rá. Tsáá etayáaʼ rá.” Ikhaa nikumu̱u̱ rí nindxu̱u̱ mbáa bi̱ nañewu̱u̱n ixi̱ ri̱ʼi̱, niʼthúu̱n: “Tátá, á mu ikháán nidxu̱ʼ jcháa, arathúnʼ náa nitani̱i̱ʼ ga̱jma̱a̱ ikhúúnʼ maʼgáaʼ ka̱ya̱a̱”.
16 Jesús niʼthúu̱n “¡María!”. Ikhaa nitangayii ga̱jma̱a̱ niriʼñuu náa ajngáa hebreo: “¡Rabbóni!” (rí nandoo gáʼthúu̱n “maestro”).
17 Jesús niʼthúu̱n: “Atatsíñúʼ numuu rí xóó tséjkháaʼ náa Anu̱ʼ. Ayuʼ náa kúwá a̱ngui̱nʼ ga̱jma̱a̱ arathún: ‹Maʼgáaʼ náa Anu̱ʼ ga̱jma̱a̱ Ana̱la mangáanʼ, Dios ndrígóʼ ga̱jma̱a̱ Dios ndrígála mangáanʼ›”.
18 Ikhú María Magdalena ni̱jkha̱a̱ gáʼñún xa̱bi̱i̱ Jesús ga̱jma̱a̱ niʼthún rígi̱: “¡Ndi̱yo̱o̱ Tátá!”. Ga̱jma̱a̱ niʼthún rí ikhaa niʼthí.
19 Wakíʼ má mbiʼi rúʼko̱, timbá mbiʼi rí ndayáa xmáná, ga̱jma̱a̱ xa̱bi̱i̱ Jesús nimíñúún kuñún judíos, ikha jngóo nirugua̱a̱ xa̱ʼ xkrugua náa ikhiin nigimbíin. Ikhú Jesús niwi̱ji̱ taphu̱ún ikhiin ga̱jma̱a̱ niʼthún: “Gakuwáanʼla tsímáá”.
20 Nda̱wa̱á dí niʼthí rígi̱, ikhú nisngájmúún ñawúunʼ ga̱jma̱a̱ itsu̱ tsoxto̱o̱. Ga̱jma̱a̱ xa̱bi̱i̱ nidxún wéñuuʼ índo̱ ndiyáá Tátá.
21 Jesús niʼthún mbu̱júu̱ʼ: “Tsímáá gákuwáanʼla. Xó má Anu̱ʼ nikuʼmún ikhúúnʼ, xúʼko̱ má gákuʼmáanʼla mangáanʼ”.
22 Nda̱wa̱á dí niʼthí rígi̱, nindiyujmiin ga̱jma̱a̱ niʼthí: “Gundrígula espíritu santo.*
23 Á mu ikháanʼ ni̱ni̱ mba̱a̱ a̱jkia̱la* ku̱ya̱a̱ mbáa bi̱ niʼni aʼkhá, Dios niʼni má mba̱a̱ a̱jkiu̱u̱n kaʼyoo, á mu ikháanʼ tséni mba̱a̱ a̱jkia̱la kuya̱a̱ bi̱ niʼni aʼkhá, Dios xáʼni mba̱a̱ a̱jkiu̱u̱n kaʼyoo”.
24 Mú Tomás, mbáa bi̱ Gu̱wi̱i̱nʼ ejmi̱i̱n, bi̱ nutháán Cuateʼ, na̱nguá xtáa gajmíi̱n índo̱ ni̱ʼkha̱ Jesús.
25 Ikha jngóo eʼwíinʼ xa̱bi̱i̱ Jesús nitháán: “¡Ndiya̱a̱xu Tátá!”. Mú ikhaa niʼthún: “Á mu tséyóo ñawúunʼ náa ni̱jkha̱ clavo ga̱jma̱a̱ á mu tsékuʼdáaʼ a̱ʼdióo ñawúnʼ náa ni̱jkha̱ clavo ma̱ngaa á mu tsékuʼdáaʼ ñawúnʼ náa itsu̱ tsoxto̱o̱, nditháan xánimbo̱ʼ”.
26 Migiñuʼ mbiʼi nda̱wa̱á xa̱bi̱i̱ Jesús nigimbíin mbu̱júu̱ʼ náa guʼwá, mú ikhú Tomás xtáa gajmíi̱n. Maski ajndu xkrugua kúgoo xa̱ʼ, mú Jesús niwi̱ji̱ náa taphu̱ún ikhiin ga̱jma̱a̱ niʼthún: “Gakuwáanʼla tsímáá”.
27 Nda̱wa̱á niʼthúu̱n Tomás: “Ayi̱ jcháaʼ a̱ʼdióo ñawáanʼ gi̱i̱ ga̱jma̱a̱ atiejma ñawúnʼ; ataxúdaaʼ ñawáanʼ náa itsu̱ tsoxto̱ʼ. Ní xátani̱ a̱jma̱ a̱jkia̱a̱nʼ ga̱jma̱a̱ atanimbaaʼ”.
28 Ikhú Tomás niʼthúu̱n: “¡Tátá ndrígióʼ ga̱jma̱a̱ Dios ndrígióʼ!”.
29 Jesús niʼthúu̱n: “Lá nitatsimbaaʼ numuu rí nitayoʼ ráʼ. Gagi kúwá bi̱ na̱nguá ndiyoʼ mú maski ajndu xúʼko̱ ninimbu̱u̱n”.
30 Mú Jesús niʼni mbaʼa milagro náa inún xa̱bi̱i̱ dí na̱nguá kiʼniraʼmáʼ náa rollo rígi̱.
31 Mú nigumaraʼmáʼ rígi̱ mu ikháanʼ munimbala rí Jesús nindxu̱u̱ Cristo, A̱ʼdióo Dios, ga̱jma̱a̱ á mu nunimbala, ma̱ndoo makuwáanʼ kámuu mbiʼi ga̱jma̱a̱ numuu mbiʼyuu.
