Rí niʼnirámáʼ Juan 3:1-36
3 Náa ikhiin nixtáa mbáa fariseo bi̱ mbiʼyuu Nicodemo, mbáa bi̱ gíʼdoo numuu náa xa̱bu̱ judíos.
2 Mbruʼun ni̱jkha̱ gáʼyoo Jesús ga̱jma̱a̱ niʼthúu̱n: “Maestro,* ndu̱ya̱a̱xu rí ikháán nindxa̱a̱ʼ mbáa maestro bi̱ Dios nikungua̱a̱nʼ, numuu rí nda̱wa̱a̱ i̱mba̱a̱ xa̱bu̱ bi̱ majmaa maʼni milagro rí natani̱ á mu Dios na̱nguá xtáa ga̱jma̱á nindxu̱u̱”.
3 Jesús niriʼñuu: “Natha̱nʼ gajkhun, á mu mbáa tségumaa mbu̱júu̱ʼ, xándoo mbaʼyoo Xa̱bu̱ Ñajunʼ ndrígóo Dios”.*
4 Nicodemo niʼthúu̱n: “Xú káʼnii gándoo mata̱nga̱a̱ maxtáa mbáa bi̱ nikhi̱i̱ má rá. Lá ma̱ndoo majnguáaʼ náa awúu̱n ru̱dúu̱ ga̱jma̱a̱ mata̱nga̱a̱ maxtáa rí maʼni a̱jma̱ nuthu xáʼ.”
5 Jesús niriʼñuu: “Natha̱nʼ gajkhun, rí á mu mbáa tséjngúun iyááʼ* ga̱jma̱a̱ tségruigú espíritu santo* ma̱ngaa tségumaa mbu̱júu̱ʼ, xándoo mata̱ʼa̱a̱ náa naʼtáñajunʼ Xa̱bu̱ Ñajunʼ ndrígóo Dios.*
6 Bi̱ nagumiin náa xa̱bu̱, xa̱bu̱ ni̱ndxu̱ún, bi̱ nagumiin náa espíritu santo, ni̱ndxu̱ún e̱ji̱i̱n Dios.
7 Xáʼniaaʼ tsiánguá ga̱jma̱a̱ numuu rí nitha̱nʼ ‹rí ikháanʼ ndayóoʼ magumáanʼ mbu̱júu̱ʼ›.
8 Giñánʼ naxnúu asndu náa má eyoo, maski má natadxawíín mú tsétayáá náa e̱ʼkha̱ ni má náa ejkha̱. Xúʼko̱ erígá ga̱jma̱a̱ numún bi̱ nagumiin náa espíritu santo”.
9 Ikhú Nicodemo nirajxu̱u̱: “Xú káʼnii gándoo marigá rígi̱ rá.”
10 Jesús niriʼñuu: “Ikháán nindxa̱a̱ʼ maestro náa Israel, na̱nguá etayáá ga̱jma̱a̱ numuu rígi̱ ráʼ.
11 Gajkhun natha̱nʼ rí ikháanʼxu nu̱ta̱ rí najmañuxu ga̱jma̱a̱ rí ndi̱ya̱a̱, mú ikháanʼ tsénimbala rí nu̱taxu̱.
12 Ikhúúnʼ nita̱la ga̱jma̱a̱ dí rígá náa numbaaʼ, maski ajndu xúʼko̱ na̱nguá enimbala, xú káʼnii gúnimbala á mu na̱tala ga̱jma̱a̱ numuu dí rígá mekhuíí rá.
13 Ma̱ngaa nimbáa xa̱bu̱ numbaaʼ tátsimuu mekhuíí, i̱ndó bi̱ nigajtaa mekhuíí nindxu̱u̱ A̱ʼdióo xa̱biya̱.
14 Xó má Moisés nirájkhaa a̱bu̱nʼ náa mbá ixi̱ náa ku̱ba̱ʼ mijxooʼ,* xúʼko̱ má gáfruajkaa A̱ʼdióo xa̱biya̱ ma̱ngaa
15 mu xúʼko̱ bi̱ gákumu̱u̱ kaʼyoo ikhaa maxtáa kámuu mbiʼi.
16 Numuu rí Dios ra̱ʼkhá tháán nindoo kaʼñún xa̱bu̱ numbaaʼ, ikha jngóo nixnájxi̱i̱ A̱ʼdióo bi̱ mbáwíí mu xúʼko̱ bi̱ gágiʼdoo fe náa ikhaa xákháñuu, maxtáa kámuu mbiʼi.
17 Numuu rí Dios na̱nguá nikuʼmaa A̱ʼdióo náa numbaaʼ mu ma̱ʼkha̱ gáráʼwiin xa̱bu̱ bi̱ mumíniiʼ, nikuʼmaa mu xa̱bu̱ makáwíin ga̱jma̱a̱ numuu ikhaa.
18 Bi̱ gágiʼdoo fe náa ikhaa xáminuuʼ. Mú bi̱ xágiʼdoo fe náa ikhaa xtáa má rí mamínu̱u̱ʼ, numuu rí tásngájma fe náa A̱ʼdióo Dios bi̱ mbáwíí.
19 Aguʼ ni̱ʼkha̱ náa numbaaʼ, mú xa̱bu̱ nindúún kuyáá itháan rí mikrína raʼkháa aguʼ, numuu rí xúgíʼ dí nuni̱ nindxu̱u̱ ra̱májánʼ, ikha jngóo mumíníinʼ.
20 Numuu rí bi̱ naʼni dí ra̱májánʼ tsíyoo gáʼyoo aguʼ, ga̱jma̱a̱ tséjkha̱ náa rígá aguʼ, mu xúʼko̱ xákujmaa xúgíʼ rí naʼni.
21 Mú bi̱ naʼni rí májánʼ na̱jkha̱ náa rígá aguʼ, mu xúʼko̱ makujmaa kaʼwu rí xúgíʼ dí naʼni nindxu̱u̱ rí nandoo Dios”.
22 Nda̱wa̱á dí nirígá xúgíʼ rígi̱, Jesús ni̱jkha̱ gajmíi̱n xa̱bi̱i̱ náa rawuunʼ mbayuuʼ Judea, ikhí nixtáa nguáthá mbiʼi gajmíi̱n ga̱jma̱a̱ nikumíinʼ iyááʼ xa̱bu̱.
23 Mú ma̱ngaa Juan xtáa rakumíinʼ iyááʼ xa̱bu̱ náa Enón, mijngii Salim, numuu rí ikhí rígá mbaji̱nʼ iyaʼ, ga̱jma̱a̱ xa̱bu̱ nagún mu majngún iyááʼ;
24 numuu rí Juan kaʼníí xóó tséjkha̱ guʼwá e̱jua̱nʼ.
25 Ikhú xa̱bi̱i̱ Juan nigiʼdu̱u̱n gajmiún mbáa judío ga̱jma̱a̱ numuu xóo gánindxu̱ún mikaʼwiin náa inuu Dios.
26 Nda̱wa̱á nigúun gútháán Juan: “Maestro, natayáá ráʼ, xa̱bu̱ bi̱ niraxtaa ga̱jma̱a̱ʼ náa i̱mba̱ ridoo Jordán, bi̱ ikháán niratá ga̱jma̱a̱ numuu, xtáa rakumíinʼ iyááʼ xa̱bu̱, ga̱jma̱a̱ xúgíinʼ nagún náa ikhaa”.
27 Juan niriʼñúún: “Nimbáa xándoo makhánáá nimbá i̱ndó á mu Dios gáxnúu.
28 Ikháanʼla má ndi̱ya̱a̱ rí ikhúúnʼ nitha̱ ‹dí na̱nguá ni̱ndxu̱ʼ Cristo, ikhúúnʼ ginún nijuaxúngu̱u̱nʼ mu maʼgá náa ikhaa›.
29 Bi̱ mbayáa dxáʼgú ikhaa nindxu̱u̱ dxámá bi̱ manigúnʼ. Mú bi̱ nambájxu̱u̱ ga̱jma̱a̱ dxámá bi̱ manigúnʼ xtáa mijngii náa ikhaa ga̱jma̱a̱ nadxuu índo̱ nadxawuun aʼwóo. Ikha jngóo rí xúgi̱ ikhúúnʼ nadxuʼ wéñuuʼ.
30 Ikhaa ndayóoʼ maʼga ratsimuu má xúʼko̱, mú ikhúúnʼ mbaʼyóoʼ maʼgá ragájta̱a̱ʼ”.
31 Bi̱ na̱ʼkha̱ rijma̱a̱ gíʼdoo itháán numuu ki xóo eʼwíinʼ. Bi̱ xtáa náa tsu̱du̱u̱ ku̱ba̱ʼ, naʼthí dí rígá náa ku̱ba̱ʼ. Bi̱ na̱ʼkha̱ mekhuíí gíʼdoo itháán numuu ki xóo eʼwíinʼ.
32 Ga̱jma̱a̱ naʼthí dí ndiʼyoo ga̱jma̱a̱ rí niʼdxuun, mú nimbáa tségruigú rí naʼthí.
33 Bi̱ nagruigú dí naʼthí nasngájma* rí Dios nindxu̱u̱ jmbii náa rí gajkhun.
34 Numuu rí bi̱ nikungua̱a̱nʼ Dios naʼthí ajngóo Dios, numuu rí Dios naxná espíritu santo ga̱jma̱a̱ xúgíʼ a̱jkiu̱u̱n.*
35 Anu̱u̱ nandoo kaʼyoo A̱ʼdióo ga̱jma̱a̱ ikhaa nixnájxu̱u̱ xúgíʼ dí rígá.
36 Bi̱ gágiʼdoo fe náa Ada̱ maxtáa kámuu mbiʼi, mú bi̱ xáʼnimbo̱o̱ kaʼyoo Ada̱ ni xáxtáa, ga̱jma̱a̱ Dios makiʼnáa kaʼyoo.
Mbaʼa nota
^ Náa ajngáa griego naʼthí, “tségumaa náa iyaʼ”.
^ O “desierto”.
^ Náa ajngáa griego naʼthí, “nigíʼmuu sello”.
^ Náa ajngáa griego naʼthí, “tséxna awa̱án espíritu santo”.
