Rí niʼnirámáʼ Juan 7:1-52
7 Nda̱wa̱á rí nirígá rígi̱, Jesús nijnguʼúun náa Galilea numuu rí tándoo gáʼga náa Judea, numuu rí ikhí judíos nduyáaʼ muxiyáa.
2 Mú inu marigá Ndxo̱o̱ guʼwá xtúguá* rí nuniriya̱a̱ʼ judíos.
3 Ikha jngóo gua̱ʼti̱i̱n nitháán: “Agajnáaʼ gi̱i̱ ga̱jma̱a̱ ayuʼ náa Judea mu xúʼko̱ xa̱bia̱a̱ʼ mbuyáá xúgíʼ rí natani̱.
4 Índo̱ mbáa nandoo majmaʼniiʼ, nimbá tséʼni ngu̱ʼwa̱. Á mu ikháán natani̱ rígi̱, atasngájmúún mbuyáá xa̱bu̱”.
5 Mú rí phú gajkhun, gua̱ʼti̱i̱n na̱nguá guáʼdáá fe náa ikhaa.
6 Ikhú Jesús niʼthún: “Mbiʼi ndrígóʼ xóó tséʼkha̱nú, mú ikháanʼ ndu̱ya̱a̱ rí asndu xkáʼnii má mbiʼi nindxu̱u̱ májánʼ.
7 Xa̱bu̱ bi̱ tséni ñajuunʼ Dios nda̱a̱ xóo mawiñu̱u̱nʼ kuyala ikháanʼ, mú ikhúúnʼ nakiʼníin kuyoʼ numuu rí na̱tha̱ dí ra̱májánʼ eni̱.
8 Aʼguala ikháanʼ náa ndxa̱a̱. Mú ikhúúnʼ xóó xáʼgá náa ndxa̱a̱ rígi̱ numuu rí mbiʼi ndrígóʼ xóó tséʼkha̱nú”.
9 Índo̱ guámbóo niʼthún rígi̱ ikhaa niguanúu náa Galilea.
10 Nda̱wa̱á rí gua̱ʼti̱i̱n nitsimún náa ndxa̱a̱, ikhú ma̱ngaa ngu̱ʼwa̱á ni̱jkha̱.
11 Ikhú judíos nigíʼdi̱i̱ ndiyáaʼ náa ndxa̱a̱ ga̱jma̱a̱ nithi: “Náá ni̱jkha̱ xa̱bu̱ buʼko̱ rá.”
12 Náa taphu̱ún xa̱bu̱ kúwá tikhuun bi̱ nutingu̱ʼwa̱míjna̱ ga̱jma̱a̱ numuu ikhaa. Tikhuun nuthi: “Nindxu̱u̱ mbáa májáanʼ xa̱bu̱”. Eʼwíinʼ nuthi: “Na̱nguá, i̱ndó naʼninduwiinʼ xa̱bu̱”.
13 Mú nimbáa tsíyoo gáʼthí pa̱jnu ga̱jma̱a̱ numuu ikhaa, numuu rí namíñúún eni̱ judíos.
14 Ta̱pha̱ ndxa̱a̱, Jesús ni̱jkha̱ gáʼsngáa náa guʼwá rí nduyamajkuíí Dios.
15 Bi̱ judíos niʼniún tsiánguá ga̱jma̱a̱ nithi: “Náá nijmañuu wéñuuʼ xa̱bu̱ bugi̱ rí Kiʼniraʼmáʼ rí asndu na̱nguá ni̱jkha̱ escuela rá.”*
16 Ikhú Jesús niriʼñúún: “Rí nasngáa raʼkháa kiʼsngáa ndrígóʼ ikhúúnʼ, nindxu̱u̱ kiʼsngáa ndrígóo bi̱ nikuʼmún.
17 Á mu mbáa nandoo maʼni rí nanigu̱u̱ʼ Dios, mbaʼyoo rí nasngáa na̱ʼkha̱ náa Dios o á mu nindxu̱u̱ i̱ndó rí nandxa̱ʼwa̱mínáʼ ikhúúnʼ.
18 Bi̱ naʼsngáa xóo eyoo ikhaa, i̱ndó ndayáʼ rí mbuyamajkuíí ikhaa. Mú bi̱ ndayáʼ rí mbuyamajkuíí bi̱ nikungua̱a̱nʼ, buʼko̱ bi̱ naʼthí rí gajkhun ga̱jma̱a̱ nda̱a̱ dí ra̱májánʼ náa ikhaa.
19 Lá ragájkhun rí Moisés nixnála Xtángoo ráʼ. Mú nimbáa rí ikháanʼ tséʼnimbánuu Xtángoo rígi̱. Náá numuu rí nandala muxíñuun rá.”
20 Ikhú xa̱bu̱ nitháán: “¡Xtaʼdaa mbáa xa̱bu̱ wéñiiʼ ján! Tsáá lá eyoo gáxiñaa tayáá.”
21 Ikhú Jesús niʼthún: “Káaʼ mbóó rí ni̱ni̱ ga̱jma̱a̱ xúgiáanʼ ikháanʼla niʼniala tsiánguá.
22 Ikha jngóo Moisés nixná xtángoo rí muthu xtóo xuyuuʼ tsáʼkhún e̱ji̱n (mú raʼkháa náa Moisés e̱ʼkha̱ rígi̱, rígi̱ nini̱ wajin xiʼñála bi̱ nikúwá nákha wájyúuʼ) ga̱jma̱a̱ ikháanʼla nurujtu xtóo xuyuuʼ tsáʼkhúun ada̱ rí mbiʼi sábado.*
23 Ikháanʼ nurujtu xtóo xuyuuʼ tsáʼkhúun ada̱ rí mbiʼi sábado mu xánújngurámala Xtángoo ndrígóo Moisés, náá numuu rí nakiʼnáaʼla ku̱yo̱ʼ dí na̱ni̱ thanuu mbáa xa̱bu̱ rí mbiʼi sábado rá.
24 Guniʼñáánʼ ru̱tha̱ rí mugíʼníín eʼwíinʼ ga̱jma̱a̱ i̱ndó rí ndu̱ya̱a̱: Gu̱tha̱ rí xóo phú nindxu̱u̱ índo̱ gúni rígi̱”.
25 Ikhú tikhuun xa̱bu̱ Jerusalén nigíʼdi̱i̱ nithi: “Ikhaa xa̱bu̱ bugi̱ bi̱ nandún muxiyáa ján.
26 Mú gu̱ya̱a̱ xtáa raʼthí náa inún xúgíinʼ ga̱jma̱a̱ nda̱a̱ rí ethán. Lá xa̱bu̱ ñajunʼ ndrígúlú ninimbu̱u̱n rí ikhaa nindxu̱u̱ Cristo xáʼ.
27 Mú ikháanʼ na̱nguá, nduʼyáá náa e̱ʼkha̱ xa̱bu̱ bugi̱ ga̱jma̱a̱ índo̱ gáʼkha̱ Cristo nimbáa xáʼyoo náá gáʼkha̱”.
28 Ikhú Jesús niʼthí ga̱jma̱a̱ aʼwá gakhi̱i̱ índo̱ xtáa raʼsngáa náa guʼwá rí nduyamajkuíí Dios: “Ikháanʼla nuninuwúnʼ ga̱jma̱a̱ ndu̱ya̱a̱ náa eʼkhá. Mú táʼkhá numuu rí ikhúúnʼ nandoʼ. Bi̱ nikungu̱u̱nʼ gajkhun xtáa, ga̱jma̱a̱ ikháanʼ tséninuwíinʼla.
29 Mú ikhúúnʼ naninuwíinʼ, numuu rí na̱ʼkhá xóo xtiʼkhuu ikhaa ga̱jma̱a̱ ikhaa nindxu̱u̱ bi̱ nikungu̱u̱nʼ ma̱ʼkhá”.
30 Ikha jngóo, ikhú nigíʼdi̱i̱ ndiyáʼ xóo murtuwiin, mú nimbáa tákhi̱i̱ a̱jkiu̱u̱n maʼni, numuu rí xóó tséjkha̱nú mbiʼi ndrígóo.
31 Maski ajndu xúʼko̱, mbaʼin bi̱ kúwá ikhí niguáʼdáá fe náa ikhaa ga̱jma̱a̱ nithi: “Índo̱ gáʼkha̱ Cristo, ni xáʼni itháan milagros xóo eʼni xa̱bu̱ bugi̱ án”.
32 Índo̱ fariseos nidxawíín rí mbaʼin kúwá rutangu̱ʼwa̱míjna̱ ga̱jma̱a̱ numuu ikhaa. Ikhiin gajmiún ndxajkun bi̱ kuya̱ edxu̱u̱ nixuʼmiin bi̱ nuñewa̱a̱n guʼwá náa nduyamajkuíí Dios mu murtuwiin.
33 Ikhú Jesús niʼthún xa̱bu̱: “Maxtáá xóó nguáthá mbiʼi ga̱jma̱á nindxa̱la nákha xóó tséjkháaʼ náa bi̱ nikungu̱u̱nʼ.
34 Ikháanʼ mbuʼñúnʼla, mú xuxkamún. Xándoo muʼgua náa ikhúúnʼ maʼgáaʼ”.
35 Ikha jngóo judíos nitamíjná: “Náá endxa̱ʼwáminaʼ maʼga bugi̱ rí asndu xándoo gúxkamaalú rá. Lá nandxa̱ʼwáminaʼ maʼga gajmíi̱n judíos bi̱ nigún náa kúwá xa̱bu̱ griegos ga̱jma̱a̱ maʼsngúún bi̱ griegos xáʼ.
36 Ndiéjunʼ lá nindoo gáʼthí, índo̱ niʼthí ‹ikháanʼ mbuʼñúnʼla, mú xúxkamún. Xándoo muʼgua náa ikhúúnʼ maʼgáaʼ›”.
37 Iwáá mbiʼi dí narígá ndxa̱a̱ rí gíʼdoo itháán numuu, Jesús niwi̱ji̱ ga̱jma̱a̱ niʼthí gakhi̱i̱: “Á mu mbáa nakándawuuʼ, ga̱ʼkha̱ náa ikhúúnʼ mu maga̱a̱n iyaʼ.
38 Á mu mbáa gágiʼdoo fe náa ikhúúnʼ ‹asndu náa awúu̱n a̱jkiu̱u̱n magajnúu iyaʼ rí ndaʼya›,* xó má eʼthí náa Kiʼniraʼmáʼ”.
39 Índo̱ niʼthí rígi̱ xtáa raʼthí ga̱jma̱a̱ numuu espíritu santo,* rí mundrigú bi̱ gáguáʼdáá fe náa ikhaa. Mú xóó tséndrigú espíritu rígi̱, numuu rí Jesús xóó tséjkha̱a̱ mekhuíí.
40 Índo̱ nidxawíín ajngáa rígi̱, tikhuun bi̱ kúwá náa xa̱bu̱ mbaʼin nigíʼdi̱i̱ nithi: “Nakujmaa kaʼwu rí bigi̱ nindxu̱u̱ Profeta”.*
41 Tikhuun nuthi: “Bugi̱ nindxu̱u̱ Cristo”. Mú eʼwíinʼ nuthi: “Xándoo gáʼkha̱ Cristo náa Galilea.
42 Lá raʼkháa náa Kiʼniraʼmáʼ naʼthí rí Cristo ma̱ʼkha̱ náa e̱ji̱i̱n David ga̱jma̱a̱ ma̱ʼkha̱ náa Belén, náa ninindxu̱u̱ xuajñuu David ráʼ.”
43 Ikhú xa̱bu̱ bi̱ mbaʼin niruiʼta̱mijna̱ ga̱jma̱a̱ numuu ikhaa.
44 Ga̱jma̱a̱ tikhuun nindúún rí murtuwiin, mú nimbáa tákhi̱i̱ a̱jkiu̱u̱n maʼni.
45 Ikhú bi̱ nuñewa̱a̱n guʼwá náa nduyamajkuíí Dios nitangi̱i̱n náa kúwá ndxajkun bi̱ kuya̱ edxu̱u̱ ga̱jma̱a̱ náa fariseos. Ikhiin nirajxu̱u̱n: “Náá numuu rí na̱nguá niguwa̱ʼ ku̱ya̱a̱ xá.”
46 Bi̱ nigún niriʼña̱a̱: “¡Nimbáa xa̱bu̱ tséʼthí xóo eʼthí ikhaa!”.
47 Mú fariseos nithúún: “Lá niniʼñámíjná rí maguma nduwáanʼ mangáanʼ ráʼ.
48 Lá kúwá tikhuun xa̱bu̱ ñajunʼ ndrígúlú o fariseos bi̱ naguáʼdáá fe náa ikhaa xáʼ.
49 Mú xa̱bu̱ bugi̱ bi̱ tséniʼnuuʼ Xtángoo, Dios tsíyoo gáʼñún”.
50 Nicodemo bi̱ nákha ginii ni̱jkha̱ gáʼyoo Jesús nindxu̱u̱ mbáa dí ikhiin, ikhaa niʼthún:
51 “Xó ma eʼthí náa Xtángoo ndrígúlú, rí xándoo mu̱ʼni̱ rí mamínuuʼ mbáa á mu xóó tséʼdxawíín ga̱jma̱a̱ tséʼyáá májánʼ rí naʼni, lá ragájkhun ráʼ.”
52 Índo̱ nidxawíín rígi̱, ikhú nitháán: “Lá ikháán mangáán nindxa̱a̱ʼ xa̱bu̱ Galilea ráʼ. Atayáʼ mu ma̱ta̱ya̱a̱ rí náa Galilea xándoo ma̱ʼkha̱ mbáa profeta”.*
Mbaʼa nota
^ Escuela rígi̱ nindxu̱u̱ náa nunigajma̱a̱ xa̱bu̱ ede̱ judíos.
^ Náa ajngáa griego naʼthí, “iyaʼ mañu rí ndaʼya”.
^ O “gaʼyee”, “bi̱ naʼthí dí marigá”.
^ Versículo 53 ndrígóo capítulo rígi̱ ni má versículo 1 asndu 11 ndrígóo capítulo 8 nda̱a̱ náa mbaʼa rí nigumaraʼmáʼ náa ajngáa griego, mú náa tikhuu Biblia rígá.
