I̱yi̱i̱ʼ rí niʼnirámáʼ Judas 1:1-25
1 Ikhúúnʼ Judas nindxu̱ʼ giʼtio̱o̱ Santiago, ñumbáá ndrígóo Jesucristo, nanirámáʼ i̱yi̱i̱ʼ rígi̱ mu maʼga inala ikháanʼ bi̱ Anu̱lú Dios nandoo kaʼyala ga̱jma̱a̱ nindxaʼwála, bi̱ Jesucristo nañawanla:
2 Ikhúúnʼ natakáñuu má xúʼko̱ Dios rí magáwíinʼ a̱jkiu̱u̱n kaʼyala ga̱jma̱a̱ maʼni rí makuwáanʼ tsímáá ma̱ngaa rí ma̱ndoo kaʼyala má xúʼko̱.
3 A̱ngui̱nʼ, xtáá ra̱ni̱ xúgíʼ xó má eʼngo̱o̱ mu manirámáʼ ga̱jma̱a̱ numuu rí wíji̱ makáwáanʼlú. Numuu rí ndi̱yo̱o̱ dí gíʼdoo numuu manirámáʼ mu mandaʼala rí mu̱ni̱ tsiakimíjna̱ muñewa̱a̱n kiʼsngáa gajkhun dí nikánálá ikháanʼ bi̱ kaxtaʼwáanʼ.*
4 Nanirámáʼ rígi̱ numuu rí náa ikháanʼla nitu̱ʼu̱u̱n nguʼwa̱á xa̱bu̱ bi̱ nákhá ginii nijuiʼthá rí maguáʼníí xó má nitariyaʼ profetas.* Ni̱ndxu̱ún xa̱bu̱ bi̱ nda̱a̱ gamajkhún, bi̱ tséyamajkuíí rí májánʼ wéñuuʼ a̱jkiu̱u̱n Dios* mu muni̱ xúgíʼ enii rí xkawiʼ* ga̱jma̱a̱ tséguajun jmbu náa inuu Jesucristo bi̱ nindxu̱u̱ mbáwíí Tátá ndrígúlú bi̱ niʼtsiwáánʼ.
5 Maski ajndu ikháanʼ má ndu̱ya̱a̱la̱ májánʼ, mú nandoʼ ma̱ni̱ marmáʼáan a̱jkia̱la rí Jeobá* niʼni káwíin xa̱bu̱ náa Egipto, mú nda̱wa̱á niʼni gámbíin bi̱ táguáʼdáá fe.
6 Ga̱jma̱a̱ ángeles bi̱ túñewa̱a̱n ñajunʼ rí niguáʼdáá, bi̱ niniña̱a̱ʼ náa kaʼñún makuwá, nigruiʼíin náa rí mikríná mbiʼ asndu mbiʼi rí maʼni gámbíin.
7 Xúʼko̱ má Sodoma ga̱jma̱a̱ Gomorra ma̱ngaa xuajen dí tri̱ga̱ mbájndi nibúúnʼ xkawiʼ kayuuʼ gajmiún eʼwíinʼ,* ndiya̱ʼ muni̱ ma̱jxa̱a̱ rí nagua̱ʼa̱ xuñúnʼ náa rí na̱nguá kaʼyoo. Dí xóo niguma gámbíin ga̱jma̱a̱ aguʼ, nindxu̱u̱ mbá xkri̱da rí naʼtámuʼulú asndu xúgi̱.
8 Maski ajndu xúʼko̱, xa̱bu̱ buʼko̱ nindxa̱ʼwa̱míjna̱ má xúʼko̱ rí xkawiʼ ga̱jma̱a̱ nini̱ gachímíjná,* túyamajkhún bi̱ kuya̱ edxu̱u̱ ga̱jma̱a̱ nitawéñúúnʼ bi̱ Dios ndaʼyamajkhún.
9 Ma̱ngaa, índo̱ Miguel bi̱ naʼtáñajúúnʼ ángeles nigiʼdoo mbá xkujndu ga̱jma̱a̱ Gixa̱a̱ numuu xuyuuʼ Moisés, ikhaa táʼthúu̱n rí magíʼnuu ga̱jma̱a̱ ajngáa rí maʼni gawúunʼ i̱ndó niʼthúu̱n: “Jeobá* gáxpríguáaʼ”.
10 Mú xa̱bu̱ buʼko̱ nutha numa ga̱jma̱a̱ numuu xúgíʼ rí ni má ikhiin tsékru̱ʼu̱u̱n. Ikhiin ni̱ndxu̱ún xóo xujkhúʼ bi̱ tséndxa̱ʼwa̱míjna, nuni̱ gachímíjná má xúʼko̱ ga̱jma̱a̱ numuu xúgíʼ rí nuni̱.
11 ¡Phú migíníin! Numuu rí nini̱ xóo ni’ni Caín, ma̱ngaa xó má ni’ni Balaam ga̱jma̱a̱ numuu rí nindoo madaa’ ga̱jma̱a̱ niguma gámbíin xóo Coré numuu rí nitanumún bi̱ kuya̱ edxu̱u̱.
12 Xa̱bu̱ bugi̱ ni̱ndxu̱ún xóo itsí ngu̱ʼwa̱ rí tuaʼan náa awúu̱n iyaʼ, índo̱ kuwáanʼ ru̱ni̱ gagimijnála mbá xúgiáanʼ. Bi̱ ni̱ndxu̱ún xóo báxtúu bi̱ i̱ndó nuxniʼtsumijná kaníkhiin rí asndu tsímiñún, bi̱ ni̱ndxu̱ún xóo du̱u̱n rí na̱jkha̱ kayóo giñánʼ asndu náa má eyoo, ni̱ndxu̱ún xóo ixi̱ rí tséxna xndúu mbiʼi rí kaʼyoo, ni̱ndxu̱ún asndu xóo ixi̱ rí nixtuburi̱ya̱ʼ asndu ajmu̱u̱,
13 xa̱bu̱ buʼko̱ ni̱ndxu̱ún xóo lamáa rí naʼbajxu̱u̱ wéñuuʼ ga̱jma̱a̱ naʼni xngoʼóo ga̱jma̱a̱ numuu dí ra̱májánʼ rí nuni̱ rí asndu tsítiñu̱u̱nʼ. Xóo a̱ʼgua̱a̱n bi̱ tséyáá náa egún, ikhiin magún náa mikríná mbiʼ náa mumíniiʼ kámuu mbiʼi.
14 Enoc bi̱ mbá juwiin bi̱ ni̱ʼkha̱ náa Adán, ma̱ngaa niʼtáriyaʼ ga̱jma̱a̱ numún índo̱ niʼthí: “¡Gu̱ya̱a̱la! Jeobá* ni̱ʼkha̱ gajmíi̱n mbaʼin wéñuuʼ ángeles
15 mu manda̱ʼa̱a̱ cuenta náa xúgíinʼ xa̱bu̱ ga̱jma̱a̱ bi̱ túsngajma gamajkhu náa Dios ga̱jma̱a̱ numuu xúgíʼ dí ra̱májánʼ nini̱ ma̱ngaa xúgíʼ rí xkawiʼ dí nithi ga̱jma̱a̱ numuu ikhaa”.
16 Xa̱bu̱ bugi̱ i̱ndó nuxieʼkhá ga̱jma̱a̱ numuu xóo kúwá ma̱ngaa i̱ndó nuni̱ rí nandún ikhiin. Nuni̱ mbaʼumíjna̱ ga̱jma̱a̱ ajngáa rí nuthi. Nduyamajkhún wéñuuʼ eʼwíinʼ mu makhánun rí nandún.
17 A̱ngui̱nʼ, garmáʼáan a̱jkia̱la rí nithala nákhá ginii apóstoles ndrígióo Jesucristo bi̱ nindxu̱u̱ Tátá ndrígúlú.
18 Ikhiin nángi eʼni nithala: “Náa iwáá mbiʼi* makuwá xa̱bu̱ bi̱ mutsijma ga̱jma̱a̱ nda̱a̱ gamajkhún bi̱ muni̱ rí tséjmaa xó má eñún ikhiin”.
19 Xa̱bu̱ bugi̱ nuni̱ rí eʼwíinʼ murkuájimíjná, ni̱ndxu̱ún xóo xujkhúʼ bi̱ tséniñami̱jna̱ maxnún ikha Dios.
20 Mú ikháanʼla a̱ngui̱nʼ, gu̱ni̱ rí maʼni gújkhúʼ má xúʼko̱ fe ndrígála ma̱ngaa gutajkáan ga̱jma̱a̱ espíritu santo,*
21 mu Dios ma̱ndoo kaʼyala má xúʼko̱, índo̱ kuwáanʼ ruguaʼthi̱i̱n rí Jesucristo magáwíinʼ a̱jkiu̱u̱n kaʼyulú mu makuwáanʼ kámuu mbiʼi.
22 Ma̱ngaa agáwíinʼ a̱jkia̱la kuñu̱u̱n bi̱ tsékru̱ʼu̱u̱n májánʼ,
23 gu̱ni̱ káwíin mu xáguma gámbíin. Gagáwíinʼ a̱jkia̱la kuñu̱u̱n eʼwíinʼ, ma̱ngaa guñewumíjna̱ mu xáʼni gacháanʼ dí ra̱májánʼ rí nuni̱.
24 Rí iwáá kayuuʼ, bi̱ ma̱ndoo mañewa̱nla mu xúxuʼdámíjná aʼkhá,* muguajún má xúʼko̱ gújkhúʼ, mu makuwáanʼla kaʼwáanʼ ga̱jma̱a̱ makuwáanʼ gagi náa inuu bi̱ gíʼdoo tsiakii,
25 ikhaa nindxu̱u̱ mbáwíí Dios bi̱ niʼni káwáanʼ ga̱jma̱a̱ numuu Jesucristo bi̱ nindxu̱u̱ Tátá ndrígúlú, náa ikhaa gáʼga gamajkhu, gaguma mba̱a̱, gagiʼdoo tsiakii ga̱jma̱a̱ gáʼtañajunʼ xó má nákha ginii, xúgi̱ ga̱jma̱a̱ kámuu mbiʼi. Xúʼko̱ gáʼni.*
Mbaʼa nota
^ Náa ajngáa griego naʼthí, “bi̱ kaʼwiin”.
^ O “gaʼyee”, “bi̱ nuthi dí marigá”.
^ O “nuni̱ gachímíjná ikhiin ga̱jma̱a̱ nuni̱ gachíin eʼwíinʼ”.
^ Náa ajngáa griego naʼthí, “náa iwáá tiempo”.
^ Náa ajngáa griego naʼthí, “majngrádánʼ”.
^ O “Amén”.
