Jueces 1:1-36
1 Nda̱wa̱á dí nikháñúu Josué, israelitas* nirajxi̱i̱ Jeobá: “Tsáá dí ikháanʼxu̱ gátsimuu ginii gáxmína̱ʼ gajmíi̱n cananeos rá.”
2 Jeobá niriʼñúún: “Matsimuu xuajin chíʼgíiʼ* ndrígóo Judá. Maniʼñúuʼ ku̱ba̱ʼ rígi̱ náa ñawánla”.
3 Ikhú xuajin chíʼgíiʼ* ndrígóo Judá niʼthúu̱n xuajin chíʼgíiʼ ndrígóo Simeón, bi̱ nindxu̱ún a̱ngui̱i̱n: “Atatsimaaʼ ga̱jma̱á ni̱ndxu̱ʼ náa mbaaʼ dí nikhánuʼ,* guxmijná gajmiúlú cananeos. Nda̱wa̱á mu̱ʼgua̱lú náa mbaaʼ dí nikhánáaʼ ikháán”. Ikhú Simeón ni̱jkha̱ ga̱jma̱a̱ Judá.
4 Índo̱ Judá nitsimuu, Jeobá nixnájxi̱i̱n cananeos ga̱jma̱a̱ perizitas náa ñawúunʼ. Niradíin mbá 10,000 xa̱bu̱ náa Bézec.
5 Nixkamaa Adoni-Bézec náa Bézec, nixmijná gajmiún ga̱jma̱a̱ niradíin cananeos ma̱ngaa perizitas.
6 Índo̱ Adoni-Bézec nigáyúu, nigún ruxkáá niʼngu̱u̱n nirtuwiin, ikhú nindrigú e̱ji̱i̱n ñawúunʼ dí mba̱ʼu̱ ga̱jma̱a̱ e̱ji̱i̱n rajkhúu dí mba̱ʼu̱.
7 Ikhú Adoni-Bézec niʼthí: “Kúwá mbá 70 reyes bi̱ nigruígú e̱ji̱i̱n ñawúúnʼ dí mba̱ʼu̱ ga̱jma̱a̱ e̱ji̱i̱n rajkúún dí mba̱ʼu̱, nurajxi̱i̱ dí naʼphu̱ náa agoo mesoʼ. Dí xóo ikhúún niniu̱u̱n ikhiin, dí xúgi̱ Dios naʼniuʼ ikhúún”. Nda̱wa̱á dí rúʼko̱ nigún kuya̱a̱ náa Jerusalén, ikhí má nikháñúu.
8 Xa̱bu̱ Judá nixmijná gajmiún bi̱ kúwá náa Jerusalén, nitu̱ʼu̱u̱n náa xuajin nini̱ gámbáa ga̱jma̱a̱ espada, ma̱ngaa nitsikha̱a̱.
9 Nda̱wa̱á xa̱bu̱ Judá niguájtaan mu muxmijná gajmiún cananeos bi̱ kúwá náa kúbá Négueb ga̱jma̱a̱ Sefelá.
10 Ikha jngóo Judá ni̱jkha̱ gáxmína̱ʼ gajmíi̱n cananeos bi̱ kúwá náa Hebrón (nákha ginii Hebrón mbiʼyuu Quiryat-Arbá) niʼngo̱o̱ niʼni gajmíi̱n xa̱bu̱ bi̱ kúwá náa Sesái, Ahimán ga̱jma̱a̱ Talmái.
11 Ikhú nitsimún gúxmijná gajmiún xa̱bu̱ bi̱ kúwá náa Debir (nákha ginii Debir mbiʼyuu Quiryat-Séfer).
12 Ikhú Caleb niʼthí: “Xa̱bu̱ bi̱ gáto̱ʼo̱o̱ ga̱jma̱a̱ maʼni gámbáa Quiryat-Séfer maxniu̱u̱ wáxióʼ* Acsá mu maʼni a̱ʼgiu̱u̱”.
13 Otniel a̱ʼdióo Quenaz bi̱ nindxu̱u̱ giʼtio̱o̱ Caleb, niʼngo̱o̱ nigudíin xa̱bu̱ xuajin. Ikha jngóo Caleb nixniúu wáxióo Acsá mu maʼni a̱ʼgiu̱u̱.
14 Índo̱ kúwá ragúun kamba̱a̱, ikhaa niʼtákáñuu Otniel dí ma̱ndo̱ʼo̱o̱ Caleb dí maxnúu mbá mbaaʼ. Ikhú Acsá nigajtaa náa búrru bi̱ kríguii ra̱jkha̱a̱,* ga̱jma̱a̱ Caleb nirajxu̱u̱: “Ndiéjunʼ eyaaʼ rá.”
15 Ikhaa niʼthúu̱n: “Mbá péñu,* araxnúʼ mbá regalo náa natasngájma dí natani̱ tsajkurámúúnʼ. Niraxnúʼ má mbaaʼ xígií náa sur,* mú ma̱ngaa araxnúʼ Gulot-Maim”.* Ikha jngóo Caleb nixnúu Gulot Alto ga̱jma̱a̱ Gulot Bajo.
16 Bi̱ naguwáʼ náa quenita, jmégiu̱u̱ Moisés, nitsimún náa xuajin Jericó gajmiún xa̱bu̱ xuajin Judá, nigún náa ku̱ba̱ʼ mijxooʼ* náa Judá, náa Arad dí naguanúu xígií náa sur. Nigún gákúwá ikhí gajmiún xa̱bu̱ xuajin.
17 Mú xuajin chíʼgíiʼ ndrígóo Judá ga̱jma̱a̱ xuajin chíʼgíiʼ ndrígóo Simeón, bi̱ nindxu̱ún a̱ngui̱i̱n, nigún ga̱jma̱a̱ niradíin cananeos bi̱ kúwá náa Zefat, ma̱ngaa nini̱ gámbáa xuajin. Ikha jngóo xuajin rúʼko̱ nixna mbiʼíí Hormá.*
18 Nda̱wa̱á dí rúʼko̱ Judá nito̱ʼo̱o̱ náa Gaza ga̱jma̱a̱ xuajin dí rígá mijngii, Asquelón ga̱jma̱a̱ xuajin dí rígá mijngii, Ecrón ga̱jma̱a̱ xuajin dí rígá mijngii.
19 Jeobá nixtáa rambáyúu má xúʼko̱ Judá, ga̱jma̱a̱ ikhiin nini̱ gámbáa xuajin dí rígá náa kúbá. Mú táʼngu̱u̱n gúxkawíin xa̱bu̱ bi̱ kúwá náa mata,* numuu dí ikhiin guáʼdáá carro dí nuxmijná ga̱jma̱a̱ dí juáʼwíi ajua̱nʼ xíníʼ.*
20 Xó má nikudaminaʼ Moisés, nixnáá Caleb mbaaʼ Hebrón, ikhaa nixkawíin ikhí mbá ajtsíin e̱ji̱i̱n Anac.
21 Mú bi̱ naguwáʼ náa Benjamín túxkawíin jebuseos náa Jerusalén. Ikha jngóo jebuseos kúwá má xúʼko̱ gajmiún benjaminitas náa Jerusalén asndu dí mbiʼi xúgi̱.
22 Bi̱ kúwá náa goʼwóo José nitsimún gúxmijná gajmiún xa̱bu̱ Betel, ga̱jma̱a̱ Jeobá nimbáñún.
23 Bi̱ kúwá náa goʼwóo José nixuʼmiin bi̱ magún gúyama náa Betel. (Nákha ginii xuajin rígi̱ mbiʼyuu Luz).
24 Bi̱ nigún gúyama ndiyáá dí nagájnuu mbáa xa̱bu̱ náa xuajin, ikhú nirajxi̱i̱: “Mbá péñu, aratúxu̱ʼ náá gándoo gátuʼuxu̱ ga̱jma̱a̱ náa xuajin, munia̱a̱ʼxu̱ dí májánʼ* á mu naratúxu̱ʼ”.
25 Ikhú xa̱bu̱ niʼthúún náá gándoo gátu̱ʼu̱u̱n ga̱jma̱a̱. Ikhiin nitu̱ʼu̱u̱n náa xuajin, nini̱ gámbáa ga̱jma̱a̱ espada, mú niniña̱a̱nʼ dí xa̱bu̱ buʼko̱ gajmíi̱n bi̱ kúwíi̱n náa goʼwóo magajnún.
26 Xa̱bu̱ bugi̱ ni̱jkha̱ gáxtáa náa mbañúúnʼ hititas, ikhí nigíʼ mbá xuajin dí nixná mbiʼyuu Luz, xúʼko̱ mbiʼyuu asndu dí mbiʼi xúgi̱.
27 Xuajin chíʼgíiʼ ndrígóo Manasés táxkawíin xa̱bu̱ bi̱ kúwá náa Bet-Seán ga̱jma̱a̱ xuajin dí rígá mijngii, ni má náa Taanac, Dor, Ibleam, Meguidó ga̱jma̱a̱ xuajin dí rígá mijngii. Bi̱ cananeos táʼndún gúniña̱a̱nʼ rakúwá náa ku̱ba̱ʼ rúʼko̱.
28 Índo̱ israelitas niguáʼdáá itháan tsiaki̱i̱, nixtumiin cananeos muñajunʼ gakhi̱i̱, mú táʼngu̱u̱n gúxkawíin mbá kayuuʼ.
29 Xúʼko̱ má xuajin chíʼgíiʼ ndrígóo Efraín táxkawíin cananeos bi̱ kúwá náa Guézer. Ikha jngóo kúwá má xúʼko̱ gajmiún cananeos náa Guézer.
30 Xuajin chíʼgíiʼ ndrígóo Zabulón táxkawíin xa̱bu̱ bi̱ kúwá náa Quitrón ni má bi̱ kúwá náa Nahalol. Nikúwá má xúʼko̱ gajmiún ikhí cananeos ga̱jma̱a̱ nixtumiin mu muñejunʼ gakhi̱i̱.
31 Xuajin chíʼgíiʼ ndrígóo Aser táxkawíin xa̱bu̱ bi̱ kúwá náa Akkó ni má bi̱ kúwá náa Sidón, Ahlab, Aczib, Helbá, Afic ga̱jma̱a̱ Rehob.
32 Numuu dí túxkawíin cananeos bi̱ kúwá náa mbaaʼ rúʼko̱, ikha jngóo aseritas nikúwá gajmiún.
33 Xuajin chíʼgíiʼ ndrígóo Neftalí táxkawíin xa̱bu̱ bi̱ kúwá náa Bet-Semes ni má bi̱ kúwá náa Bet-Anat. Nikúwá gajmiún cananeos bi̱ kúwá náa mbaaʼ rúʼko̱, ma̱ngaa nixtumiin xa̱bu̱ bi̱ kúwá náa Bet-Semes ga̱jma̱a̱ Bet-Anat mu muñejunʼ gakhi̱i̱.
34 Amorreos nitsudiin bi̱ naguwáʼ náa Dan dí maguanún má náa kúbá, túniñu̱u̱nʼ dí muguajtáan náa mata.
35 Amorreos táʼndún gúniña̱a̱nʼ rakúwá náa kúbá Heres, náa xuajin Ayalón ga̱jma̱a̱ Saalbim. Mú índo̱ bi̱ kúwá náa goʼwóo José niguáʼdáá itháan tsiaki̱i̱, ikhú nixtumiin amorreos dí muñejunʼ gakhi̱i̱.
36 Mbañúúnʼ amorreos nagi̱ʼdu̱u̱ xígií náa natsimuu Acrabim asndu náa Sela dí na̱jkha̱ xígií rijma̱a̱.
Mbaʼa nota
^ Náa ajngáa hebreo naʼthí, “e̱ji̱i̱n Israel”.
^ O “tribu”.
^ O “lajuíin”.
^ O “dí nikhánuʼ xó má nigájnuu náa suerte”.
^ O “a̱ʼdéʼ dxáʼgú”.
^ O mbáa “nixnúu ñawúunʼ índo̱ kríguii búrru”.
^ O “ataniu̱ʼ mbá rí májánʼ”.
^ O “Négueb”.
^ Rí nandoo gáʼthúu̱n, ‹náa najnu ma̱ʼa̱nʼ iyaʼ›.
^ O “desierto”.
^ Rí nandoo gáʼthúu̱n ‹dí nijuixnájxi̱ mu maguma gámbáa›.
^ O “bóo”.
^ Náa ajngáa hebreo naʼthí, “carros dí hierros”.
