Jueces 10:1-18
10 Nda̱wa̱á dí nikháñúu Abimélec, nixtáa Tolá mu maʼni káwíin xa̱bu̱ Israel. Nindxu̱u̱ a̱ʼdióo Pua, a̱ʼdióo Dodó, bi̱ na̱ʼkha̱ náa xuajin chíʼgíiʼ* ndrígóo Isacar. Nixtáa náa Samir, náa kúbá Efraín.
2 Niʼnimbánuu numún xa̱bu̱ Israel mbá 23 tsiguʼ. Ikhú nikháñúu ga̱jma̱a̱ nijuiʼdi̱i̱ náa xuajin Samir.
3 Nda̱wa̱á dí nikháñúu Tolá, nixtáa Jaír xa̱bu̱ bi̱ na̱ʼkha̱ náa Galaad, ikhaa niʼnimbánuu numún israelitas mbá 22 tsiguʼ.
4 Nigiʼdiin mbá 30 e̱ji̱i̱n, bi̱ nundrúwíin mbá 30 búrru ga̱jma̱a̱ kúwá náa mbá 30 xuajin. Xuajin rígi̱ mbiʼyuu Havot-Jaír asndu dí mbiʼi xúgi̱ ga̱jma̱a̱ rígá náa ku̱ba̱ʼ dí rígá náa Galaad.
5 Ikhú Jaír nikháñúu ga̱jma̱a̱ nijuiʼdi̱i̱ náa Camón.
6 Mbu̱júu̱ israelitas nitangiín nini̱ dí ra̱májánʼ náa iduu Jeobá, nigi̱ʼdi̱i̱ ndiyamajkhún Baal, xtiʼkúún Astoret, dioses bi̱ kúwá náa Aram,* Sidón, Moab, ga̱jma̱a̱ dioses ndrígu̱ún ammonitas ma̱ngaa filisteos. Nini̱ tsíngumijná náa Jeobá ga̱jma̱a̱ niniña̱a̱nʼ ruyamajkuíí.
7 Ikha jngóo Jeobá nikásnga̱ñu̱u̱nʼ kaʼñún israelitas, niniñúúnʼ* náa ñawúúnʼ xa̱bu̱ filisteos ga̱jma̱a̱ ammonitas.
8 Ikhiin nini̱ ngíníi israelitas dí asndu nikumu̱ún dí nixujmbiri̱gi̱i̱n náa mbá xúgíʼ tsiguʼ rúʼko̱. Mbá 18 tsiguʼ nini̱ ngíníi mbá xúgíinʼ israelitas bi̱ kúwá náa i̱mba̱ ridoo mañu Jordán, náa Galaad ku̱ba̱ʼ náa nikúwá amorreos.
9 Ma̱ngaa ammonitas nikidiin náa mañu Jordán mu muxmijná gajmiún xuajin chíʼgíiʼ* ndrígóo Judá, Benjamín ga̱jma̱a̱ bi̱ kúwá náa goʼwóo Efraín. Israelitas ra̱ʼkhá tháán nimíniiʼ.
10 Ikha jngóo israelitas nitakáñíí Jeobá dí mambáñún. Nitháán: “Nixuʼdámíjnáxu̱ aʼkhá náa ikháán, numuu dí niniʼñáánʼxu̱ Dios ndrígúxu̱ ga̱jma̱a̱ ndiyamajkúnxu̱ Baal”.
11 Mú Jeobá niʼthún israelitas: “Lá raʼkháa ikhúún ni̱ni̱ káwáanʼla náa Egipto, náa xa̱bu̱ amorreos, ammonitas, filisteos,
12 sidonios, amalequitas ga̱jma̱a̱ náa madianitas índo̱ nini̱ gínáanʼla ráʼ. Índo̱ ikháanʼ nitakáñúʼ dí mambáyala, ikhúún ni̱ni̱ káwáanʼla náa ñawúúnʼ ikhiin.
13 Mú ikháanʼla niniʼñúʼ, ndiyamajkhún eʼwíinʼ dioses. Ikha jngóo ni xátangu̱ún ma̱ni̱ káwáanʼla.
14 Gaʼgua gúndu̱ʼu̱u̱n mumba̱ya̱la dioses bi̱ niraʼwi̱i̱nla, ikhiin gúni̱ káwáanʼla náa dí kuwáanʼla rumíniiʼ”.
15 Mú israelitas nitháán Jeobá: “Nixuʼdámíjnáxu̱ aʼkhá. Ataniuxu̱ dí májánʼ xó má gáta̱ya̱a̱ ikháán. Mú atani̱ káwáanʼxu̱ xúgi̱, mbá péñu”.
16 Ikhiin nixidíin dioses bi̱ ragájkhun ga̱jma̱a̱ nitangiín ndiyamajkuíí Jeobá. Ikhú ikhaa ni táʼngo̱o̱ a̱jkiu̱u̱n mbaʼyoo xóo emíniiʼ israelitas.
17 Nda̱wa̱á ammonitas nigimbúmíjná ga̱jma̱a̱ nigi̱ʼi̱i̱n náa Galaad. Náa i̱mba̱ ridoo, ikhí nigimbúmíjná israelitas ga̱jma̱a̱ nigi̱ʼi̱i̱n náa Mizpá.
18 Xa̱bu̱ ga̱jma̱a̱ príncipes bi̱ kúwá náa Galaad nitamíjná: “Tsáá lá gáxnulú ikha náa mu̱ʼgua̱ gúxmijná gajmiúlú ammonitas rá. Ganindxu̱u̱ ikhaa bi̱ mayéʼga edxu̱u̱ náa mbá xúgíinʼ xa̱bu̱ Galaad”.
