Jueces 12:1-15
12 Xa̱bu̱ bi̱ naguwáʼ náa Efraín nigimbúmíjná. Ninújngún náa Zafón* ga̱jma̱a̱ nitháán Jefté: “Náá numuu dí táratuxu índo̱ nidxu̱ʼ gátaxmína̱ʼ gajmiáanʼ xa̱bu̱ ammonitas rá. Kraʼáán náa awúu̱n guʼwáaʼ gútsika̱a̱n”.
2 Mú Jefté nigawúúnʼ: “Ikhúún ga̱jma̱a̱ xuajñunʼ niguáʼdááxu̱ mbá xkujndu gakhi̱i̱ gajmiúxu̱ ammonitas. Ikhúún ninda̱ʼa̱la dí mumbáyúxu̱, mú ikháanʼ táguwa̱ʼ gúni̱ káwáanʼxu̱ náa ñawúúnʼ.
3 Índo̱ ndi̱yo̱o̱ dí tséguwala gúni̱ kríñu̱u̱nʼ, nixtáá xawii mu makhañúʼ, nigájnuʼ gáxmína̱ʼ gajmíʼ ammonitas, ga̱jma̱a̱ Jeobá niʼni dí maʼngo̱ʼ magúdíin. Náá numuu dí naguwáʼ gúyoʼ mu muxmijná rá.”
4 Nda̱wa̱á Jefté nigimbíin xúgíinʼ xa̱bu̱ Galaad ni̱jkha̱ gáxmína̱ʼ gajmíi̱n bi̱ naguwáʼ náa Efraín. Xa̱bu̱ Galaad niʼngu̱u̱n nixmijná gajmiún xa̱bu̱ bi̱ naguwáʼ náa Efraín, bi̱ nithúún: “Ikháanʼla galaaditas bi̱ kuwáanʼ náa ku̱bo̱o̱ʼ Efraín ga̱jma̱a̱ Manasés, nindxa̱la xa̱bu̱ Efraín bi̱ mbaʼ nagún rajnguʼwún ragáñúún”.
5 Xa̱bu̱ Galaad niruguáá náa dí nanújngúún ga̱jma̱a̱ náa mañu Jordán, nákha xóó tséguánú xa̱bu̱ Efraín. Índo̱ Efraín nunimíjna̱ magáñún, nuthúún “Atatsíñúnʼ manújngoʼ”. Ikhú xa̱bu̱ Galaad nuraxu̱u̱n mámbíin “nindxa̱a̱ʼ efraimita ráʼ.” Ikhiin nuriʼña̱a̱ “¡Na̱nguá!”,
6 nutháán “Arathá shibolet”. Mú ikhaa naʼthí “Sibolet”, ga̱jma̱a̱ numuu dí tséjmañuu gáʼthí májánʼ ajngáa rígi̱. Ikha jngóo nurajtuwiin ga̱jma̱a̱ nuxiyáa má ikhí, náa dí nanújngúún ga̱jma̱a̱ náa mañu Jordán. Ikhú nikháñún mbá 42,000 efraimitas.
7 Jefté xa̱bu̱ bi̱ na̱ʼkha̱ náa Galaad niʼnimbánuu numún israelitas mbá majun tsiguʼ. Nda̱wa̱á nikháñúu ga̱jma̱a̱ nijuiʼdi̱i̱ náa xuajñuu, náa Galaad.
8 Ibzán bi̱ na̱ʼkha̱ náa Belén niʼnimbánuu numún xa̱bu̱ Israel nda̱wa̱á dí nikháñúu Jefté.
9 Nigiʼdiin mbá 30 e̱ji̱i̱n jiámá ga̱jma̱a̱ mbá 30 wa̱ʼxa̱ʼ.* Nikuʼmiin waʼxiinʼ mudiin xa̱bu̱ bi̱ tséguwáʼ náa bi̱ kúwíi̱n náa goʼwóo ga̱jma̱a̱ ni̱ʼkha̱ kagui̱i̱n mbá 30 gu̱ʼu̱ mu mudiin e̱ji̱i̱n. Niʼnimbánuu numún xa̱bu̱ Israel mbá juwan tsiguʼ.
10 Ikhú nikháñúu Ibzán ga̱jma̱a̱ nijuiʼdi̱i̱ náa Belén.
11 Elón bi̱ nindxu̱u̱ zabulonita niʼnimbánuu numún xa̱bu̱ Israel nda̱wa̱á dí nikháñúu Ibzán. Niʼnimbánuu numún xa̱bu̱ Israel mbá gu̱wa̱ʼ tsiguʼ.
12 Ikhú nikháñúu Elón bi̱ nindxu̱u̱ zabulonita ga̱jma̱a̱ nijuiʼdi̱i̱ náa Ayalón, náa mbayuuʼ Zabulón.
13 Abdón a̱ʼdióo Hilel bi̱ nindxu̱u̱ piratonita niʼnimbánuu numún xa̱bu̱ Israel nda̱wa̱á dí nikháñúu Elón.
14 Ikhaa nigiʼdiin mbá 40 e̱ji̱i̱n ga̱jma̱a̱ mbá 30 e̱jín xíñiiʼ, bi̱ nudrúwíin mbá 70 búrru. Niʼnimbánuu numún xa̱bu̱ Israel mbá migiñuʼ tsiguʼ.
15 Ikhú nikháñúu Abdón a̱ʼdióo Hilel bi̱ nindxu̱u̱ piratonita ga̱jma̱a̱ nijuiʼdi̱i̱ náa Piratón, náa ku̱bu̱únʼ xa̱bu̱ Efraín, náa kúbá ndrígu̱ún amalequitas.
