Jueces 13:1-25
13 Israelitas nitangiín mbu̱júu̱ nini̱ dí ra̱májánʼ náa iduu Jeobá. Ikha jngóo Jeobá niniñúúnʼ náa ñawúúnʼ filisteos mbá 40 tsiguʼ.
2 Mbiʼi rúʼko̱ nixtáa mbáa xa̱bu̱ bi̱ mbiʼyuu Manóah, bi̱ na̱ʼkha̱ náa Zorá, bi̱ naguwáʼ náa goʼwóo Dan. A̱ʼgiu̱u̱ na̱nguá eyoo magiʼdiin e̱ji̱n* ga̱jma̱a̱ ragíʼdíin e̱ji̱i̱n.
3 Mbóo mbiʼi ángel ndrígióo Jeobá nisngájmaminaʼ náa a̱ʼgu̱ ga̱jma̱a̱ niʼthúu̱n: “Tsíyoo maraʼdiin e̱ji̱n ga̱jma̱a̱ táraʼdíin e̱ji̱n, mú dí xúgi̱ midewáan mbáa ada̱,* maraʼdaa mbáa dxámá.
4 Tsumáá gátani̱, xágíin nditháan vino ni má i̱ʼwáʼ iya najnga̱a̱, ma̱ngaa xátsu nditháan dí tsaga.
5 Midewáan mbáa ada̱, maraʼdaa mbáa dxámá. Nditháan ragíʼmaa muthu xtátsúun edxu̱u̱, numuu dí mani̱ndxu̱u̱ nazareo* ndrígóo Dios asndu nákhi kuaʼa̱a̱n awáán, ikhaa magíʼdu̱u̱ maʼni káwíin xa̱bu̱ Israel náa ñawúúnʼ xa̱bu̱ filisteos”.
6 Ikhú a̱ʼgu̱ ni̱jkha̱a̱ gáʼyoo ajmbio̱o̱.* Niʼthúu̱n: “Mbáa xa̱bi̱i̱ Dios bi̱ gajkhun ni̱ʼkha̱ gáʼyoʼ. Naxpíbiinʼ kri̱ga̱a̱, xóo ángel ndrígióo Dios bi̱ gajkhun kaʼnii. Tárajxu̱u̱ náá e̱ʼkha̱ ni má ikhaa táʼthúnʼ dí mbiʼyuu.
7 Mú niʼthúnʼ: ‹Midewáan mbáa ada̱, maraʼdaa mbáa dxámá. Xágíin nditháan vino ni má i̱ʼwáʼ iya najnga̱a̱, ga̱jma̱a̱ xátsu nditháan dí tsaga, numuu dí ada̱ mani̱ndxu̱u̱ nazareo ndrígóo Dios asndu nákhi kua̱ʼa̱a̱n awáán, asndu mbiʼi dí makhañúu›”.
8 Manóah niʼtákáñuu Jeobá: “Atani̱ mba̱a̱ a̱jkia̱a̱nʼ Jeobá, mú mbá péñu,* ataxúʼmaa ma̱ʼkha̱ mbu̱júu̱ xa̱bi̱i̱ Dios bi̱ gajkhun bi̱ niguámbáa nitaxúʼmaa ma̱ʼkha̱ mu maʼtúxu̱ xú kaʼnii gúni̱ gajmiúxu̱ ada̱ bi̱ gágumaa”.
9 Dios bi̱ gajkhun niʼdxawuun Manóah, ikha jngóo índo̱ a̱ʼgiu̱u̱ ni̱jkha̱ xanáá, ángel ndrígióo Dios bi̱ gajkhun ni̱ʼkha̱ gáʼyoo mbu̱júu̱. Mú Manóah bi̱ nindxu̱u̱ ajmbio̱o̱ ndawa̱a̱ ikhí.
10 Ikhú a̱ʼgu̱ ni̱jkha̱a̱ ragáyúu gáʼthúu̱n ajmbio̱o̱, niʼthúu̱n. “¡Nisngájmaminaʼ mbu̱júu̱ xa̱bu̱ bi̱ ni̱ʼkha̱ gáʼyoʼ nákha ikhú!”.
11 Manóah nitu̱jxu̱u̱ ni̱jkha̱ ga̱jma̱a̱ a̱ʼgiu̱u̱ náa xtáa xa̱bu̱, ikhú nirajxu̱u̱: “Ikháán ñajuaanʼ xa̱bu̱ bi̱ niʼtáminaʼ ga̱jma̱a̱ a̱ʼgiu̱ʼ ráʼ.” “Aan, ikhúún”, niriʼña.
12 Ikhú Manóah niʼthúu̱n: “¡Gambanúu dí naratá! Mú aratúxu̱ʼ, xú káʼnii gáxtáa ada̱ rá. Ga̱jma̱a̱ ndiéjunʼ gáʼni xá.”
13 Ángel ndrígióo Jeobá niʼthúu̱n Manóah: “A̱ʼgia̱a̱ʼ gíʼmaa maʼnimbánuu xúgíʼ dí ni̱thu̱u̱n.
14 Xágáan nditháan dí naguma ga̱jma̱a̱ iyooʼ uva, ni má vino ga̱jma̱a̱ i̱ʼwáʼ iya najnga̱a̱, ma̱ngaa nditháan xákhu dí tsaga. Gíʼmaa maʼnimbánuu xúgíʼ dí ni̱thu̱u̱n”.
15 Ikhú Manóah niʼthúu̱n ángel ndrígióo Jeobá: “Mbá péñu, xóó xádxuuʼ. Mu̱ni̱ májáanʼxu̱ mbáa a̱ʼdá tsújtuunʼ miʼtsíí”.
16 Mú ángel ndrígióo Jeobá niʼthúu̱n Manóah: “Maguanúʼ, mú xákhu dí gátani̱ májáánʼ. Á mu nandaaʼ ma̱ndoo maraxnaxí náa inuu Jeobá xóo tsigijñaʼ dí nakarámáʼ”. Manóah na̱nguá eʼyoo á mu nindxu̱u̱ ángel ndrígióo Jeobá.
17 Ikhú Manóah niʼthúu̱n ángel ndrígióo Jeobá: “Xú kaʼnii mbiʼyaaʼ rá. Nanduxuʼ mbu̱ya̱a̱ mu mu̱ni̱xu̱ʼ mba̱a̱n índo̱ gámbánúu dí niratá”.
18 Mú ángel ndrígióo Jeobá niʼthúu̱n: “Náá numuu dí natrajxu̱ʼ mbiʼyuʼ rá. Lá tsétayáá dí mitsaanʼ* ráʼ.”
19 Manóah niguajtuwiin a̱ʼdá tsújtuunʼ ga̱jma̱a̱ tsigijñaʼ rí tsígáʼ, nixnájxi̱ náa Jeobá náa mbá tsu̱du̱u̱ itsí. Ikhú Dios niʼni mbá dí niʼni maguanúu tsiánguá Manóah ga̱jma̱a̱ a̱ʼgiu̱u̱ índo̱ kúwíin ruyáá.
20 Índo̱ riʼyu̱u̱ aguʼ dí nakarámáʼ náa tsigijñaʼ natsimuu mekhuíí, Manóah ga̱jma̱a̱ a̱ʼgiu̱u̱ ndiyáá dí ángel ndrígióo Jeobá nitsima̱a̱ náa awúu̱n riʼyu̱u̱ aguʼ. Ikhú mbá nacha̱ nismbati̱gu̱u̱n mbayííʼ.
21 Ikhú Manóah ni̱jkha̱nú ndiʼyoo dí nindxu̱u̱ ángel ndrígióo Jeobá. Ángel ndrígióo Jeobá nánguá nitanga̱a̱ masngájmaminaʼ náa Manóah ga̱jma̱a̱ náa a̱ʼgiu̱u̱.
22 Ikhú Manóah niʼthúu̱n a̱ʼgiu̱u̱: “Dios nindxu̱u̱ bi̱ ndiʼyáá. ¡Makañúlú rá!”.
23 Mú a̱ʼgiu̱u̱ niʼthúu̱n: “Á mu Jeobá nindoo magudiáanʼlú, tágruigú má tsigijñaʼ dí nakarámáʼ ni má tsigijñaʼ rí tsígáʼ dí nixnáálú. Ma̱ngaa tásngájmulú má xúgíʼ dí ndiʼyáá ga̱jma̱a̱ táʼtulú má xúgíʼ dí niʼthúlú á mu xúʼko̱”.
24 Nda̱wa̱á a̱ʼgu̱ nigiʼdaa mbáa ada̱ ga̱jma̱a̱ nixná mbiʼyuu Sansón. Xóo ejkha̱ ragaja̱a̱ ada̱ xúʼko̱ eʼni tsajkurámaaʼ Jeobá.
25 Índo̱ ninújngoo mbiʼi, espíritu santo* ndrígóo Jeobá nigíʼdu̱u̱ nixkajxi̱i̱ mu maʼni náa Mahané-Dan, náa Zorá ga̱jma̱a̱ Estaol.
Mbaʼa nota
^ O “nindxu̱u̱ estéril”.
^ O “maʼni endi̱i̱n”.
^ O “jmba̱yi̱i̱”.
^ O “ataniu̱ʼ mbá rí májánʼ”.
^ O “nagui̱i̱”.
