Jueces 14:1-20
14 Sansón nigajtaa náa Timná ga̱jma̱a̱ ikhí ndiʼyoo mbáa a̱ʼgú filistea.*
2 Nda̱wa̱á nitsima̱a̱ náa xtáa anu̱u̱ ga̱jma̱a̱ ru̱dúu̱,* niʼthúún: “Ndi̱yo̱o̱ mbáa a̱ʼgú filistea náa Timná bi̱ ninigiu̱ʼ. Nandoʼ dí muʼgua̱la gúnda̱ʼa̱a̱ mu dí mba̱ya̱a̱”.
3 Mú anu̱u̱ ga̱jma̱a̱ ru̱dúu̱ nirajxi̱i̱: “Lá ndawa̱a̱ nimbáa kayuuʼ a̱ʼgu̱ náa a̱ngia̱a̱nʼ o náa mbá xúgíʼ xuajñulú ráʼ. Náá numuu dí natayáaʼ mbi̱ya̱a̱ mbáa a̱ʼgu̱ náa majñu̱únʼ filisteos bi̱ tséni̱ ñajuunʼ Dios* rá.” Mú Sansón niʼthúu̱n anu̱u̱: “Ayuʼ gátanda̱ʼa̱a̱ mba̱ya̱a̱, ikhaa kaʼnii mba̱ya̱a̱”.
4 Anu̱u̱ ga̱jma̱a̱ ru̱dúu̱ na̱nguá eyáá á mu rígi̱ na̱ʼkha̱ náa Jeobá, bi̱ xtáa rayáʼ xóo maxmína̱ʼ gajmíi̱n filisteos, numuu dí nákha ikhú filisteos nutañajúúnʼ xa̱bu̱ Israel.
5 Ikha jngóo Sansón nigajtaa ga̱jma̱a̱ anu̱u̱ ma̱ngaa ru̱dúu̱ náa Timná. Índo̱ ni̱jkha̱nú náa kiʼdu ixu̱u̱ uva náa Timná, nijkatíya̱a̱ʼ randxaʼwá mbáa león náa ikhaa.
6 Ikhú mbá nacha̱ espíritu santo* ndrígóo Jeobá nixnúu tsiaki̱i̱ Sansón, ga̱jma̱a̱ ikhaa nikuíʼtá jngayii león káaʼ ga̱jma̱a̱ ñawúunʼ, nikuíʼtá jngayii xóo wiʼtáa mbáa a̱ʼdá tsújtuunʼ. Mú táʼthúu̱n rígi̱ anu̱u̱ ni má ru̱dúu̱.
7 Nda̱wa̱á Sansón nigajtaa náa Timná ga̱jma̱a̱ niʼtámínáʼ ga̱jma̱a̱ a̱ʼgu̱, Sansón ndaʼyoo má xúʼko̱ dí ikhaa kaʼnii mbayáa.
8 Nda̱wa̱á índo̱ nitanga̱a̱ gáyáaʼ dxáʼgú mu maʼga̱ kayáa náa goʼwóo, ni̱jkha̱ gáʼyoo león bi̱ nikháñúu. Ikhú ndiʼyoo dí náa awúu̱n león bi̱ nikháñúu gídíinʼ mbaʼin a̱ʼma ga̱jma̱a̱ jyááʼ.
9 Ikha jngóo Sansón nixprígú ga̱jma̱a̱ ñawúunʼ jyááʼ, ni̱jkha̱a̱ ra̱ʼkhu̱ mbá kamba̱a̱. Índo̱ ni̱jkha̱núu náa xtáa anu̱u̱ ga̱jma̱a̱ ru̱dúu̱ nixnúún jyááʼ mu̱phu̱ mangiin. Mú táʼthún dí náa león bi̱ nikháñúu nixprígú jyááʼ.
10 Anu̱u̱ nigajtaa náa xtáa a̱ʼgu̱. Ikhí Sansón niʼni mbá ndxa̱a̱, xó má dí naguʼwún nuni̱ jiámá.
11 Índo̱ xa̱bu̱ ndiyáá, ikhú niguwáʼ kudiin mbá 30 xa̱bekha mu maxtáa gajmíi̱n náa ndxa̱a̱.
12 Ikhú Sansón niʼthún maʼni gajmíi̱n rígi̱: “Guniʼñúnʼla ma̱ta̱la mbá adivinanza. Á mu najmáanʼla nuriʼña̱a̱ ga̱jma̱a̱ nuthu̱nʼ ndiéjunʼ eyoo gáʼthúu̱n náa awúu̱n dí mbá juwan mbiʼi dí narígá ndxa̱a̱, ikhú maxna̱la mbá 30 xtíin dí lino, ga̱jma̱a̱ mbá 30 edi̱i̱ xtíin.
13 Mú á mu tséthu̱nʼla dí eyoo gáʼthúu̱n, ikháanʼla mu̱xnu̱ʼ mbá 30 xtíin lino ga̱jma̱a̱ mbá 30 edi̱i̱ xtíin”. Ikhiin nitháán: “Aratúxu̱ʼ adivinanza, nanduxuʼ mudxáwíín”.
14 Ikhaa niʼthún:
“Náa bi̱ nakuiʼtsu nigájnuu ganitsu,náa bi̱ gújkuiiʼ nigájnuu dí taun”. Dí ñajuunʼ e̱ya̱a̱ rá.
Ninújngoo mbá ajtsú mbiʼi ga̱jma̱a̱ ikhiin xóó tséjmiin gúriʼña̱a̱ adivinanza.
15 Mú índo̱ niʼni a̱jkhu̱ mbiʼi nitháán a̱ʼgiu̱u̱* Sansón: “Atani̱ nduwaaʼ ajmbia̱a̱ʼ* mu maʼtháanʼ ndiéjunʼ eyoo gáʼthúu̱n adivinanza. Á mu tsétani̱ mutsika̱a̱nʼxu̱ ikháán ga̱jma̱a̱ bi̱ kúwá náa goʼwóo ana̱a̱ʼ. O lá nituxu̱ʼ magúwáʼ mu dí mundrígú káʼyuxu̱ dí guáʼdááxu ráʼ.”
16 Ikhú a̱ʼgiu̱u̱ Sansón nimbi̱ya̱ʼ náa inuu ga̱jma̱a̱ niʼthúu̱n: “Nawiya̱a̱ʼ xtayoʼ ga̱jma̱a̱ tsíyaaʼ xtayoʼ. Nirathúún mbá adivinanza xa̱bi̱ʼ, mú ikhúún tárathu̱nʼ ndiéjunʼ eyoo gáʼthúu̱n”. Índo̱ niʼdxuun rígi̱, ikhú niʼthúu̱n: “Xú kaʼnii lá gátha̱a̱n ikháán dí asndu anu̱ʼ ga̱jma̱a̱ ru̱dúʼ táthúun rá.”
17 Mú ikhaa nimbi̱ya̱ʼ, nimbi̱ya̱ʼ má xúʼko̱ náa inuu asndu índo̱ niʼni juwan mbiʼi dí ndxa̱a̱. Índo̱ niʼni juwan mbiʼi, ikhaa niskoo eʼni. Ikha jngóo niʼthúu̱n má dí eyoo gáʼthúu̱n, nda̱wa̱á a̱ʼgu̱ niʼthúún xa̱bi̱i̱.
18 Índo̱ niʼni juwan mbiʼi nákha xóó tsérámaaʼ a̱jkha̱ʼ,* xa̱bu̱ bi̱ kúwá náa xuajin nitháán Sansón:
“Ndiéjunʼ lá itháan taun ki xóo jyááʼ rá.ga̱jma̱a̱ tsáá lá itháan gújkuiiʼ ki xóo mbáa león rá.”
Ikhú ikhaa niʼthún:
“Á mu dí túxna̱a̱ xku̱bi̱ gajmiála a̱ʼdá xédiúʼ,xájmáanʼla má gúriʼña̱a̱ adivinanza dí ninia̱la”.
19 Ikhú espíritu santo ndrígóo Jeobá nixnúu tsiaki̱i̱, ga̱jma̱a̱ ikhaa nigajtaa náa Asquelón, nigudíin mbá 30 xa̱bekha bi̱ kúwá ikhí, niguwíi xtíñún ga̱jma̱a̱ nixnúún bi̱ nijmiin niriʼña̱a̱ adivinanza. Nda̱wa̱á asndu nakásngañu̱u̱ʼ nitsima̱a̱ náa goʼwóo anu̱u̱.
20 A̱ʼgiu̱u̱ Sansón nixnán mbayáa mbáa dxámá bi̱ nixtáa ga̱jma̱a̱ náa ndxa̱a̱.
Mbaʼa nota
^ Náa ajngáa hebreo naʼthí, “wa̱ʼxiúnʼ filisteos”.
^ O “tátée ga̱jma̱a̱ nánée”.
^ Náa ajngáa hebreo naʼthí, “bi̱ tútu xtóo xuyuuʼ tsáʼkhún”.
^ Xa̱bu̱ hebreos nuthán dí a̱ʼgiu̱u̱ o ajmbio̱o̱ mbáa bi̱ inu mbayáa.
^ O “jmba̱yaaʼ”.
^ O mbáa “nákha xóó ikhaa tséta̱ʼa̱a̱ náa awúu̱n cuarto dí awúún”.
