Jueces 15:1-20
-
Sansón nagudíin filisteos (1-20)
15 Nda̱wa̱á mbiʼi dí nurajxi̱i̱ trigo, Sansón ni̱jkha̱ gáʼyoo a̱ʼgiu̱u̱, kayáa ni̱jkha̱ mbáa a̱ʼdá tsújtuunʼ. Niʼthí: “Nandoʼ mato̱ʼo̱ʼ náa naʼgu* a̱ʼgiu̱ʼ”. Mú anu̱u̱* dxáʼgú tániñuuʼ mato̱ʼo̱o̱.
2 Anu̱u̱ dxáʼgú niʼthúu̱n: “Ndi̱yo̱o̱ má dí nawiya̱a̱ʼ xtayáá, ikha jngóo ni̱xnu̱u̱ mbayáa bi̱ niraxtaa ga̱jma̱a̱ʼ náa ndxa̱a̱. Lá itháan na̱nguá tsiʼyáa giʼtio̱o̱ tayáá xáʼ. Natakháñaaʼ dí mbi̱ya̱a̱ ikhaa”.
3 Ikhú Sansón niʼthí: “Dí xúgi̱ nda̱a̱ má dí gúthi filisteos ga̱jma̱a̱ dí gániu̱u̱”.
4 Ikhú Sansón ni̱jkha̱a̱ ga̱jma̱a̱ niguajtuun mbá 300 igi̱. Nda̱wa̱á ni̱jkha̱ gágú ixi̱ nigruaʼmáʼ xtíin náa edxu̱u̱ ga̱jma̱a̱ nixtájmuu aceite, ikhú niroʼóo náa tsiñúúnʼ igi̱, mbá nájmi̱i̱n igi̱ niroʼóo mbóó ixi̱ náa tsiñúúnʼ.
5 Nda̱wa̱á niskámuu ixi̱ ga̱jma̱a̱ niniñúúnʼ igi̱ magún náa nudu trigo filisteos. Nigídóoʼ agiuuʼ nikha̱a̱ mbá xúgíʼ: Dí jngúti̱ga̱ xtajxuuʼ, dí xóó tsérajxi̱i̱, xúgíʼ ixu̱u̱ uva ga̱jma̱a̱ ixi̱ olivo.
6 Filisteos nirajxi̱: “Tsáá lá niʼni rígi̱ rá.” Ikhú niriʼñúún: “Sansón nigiúunʼ xa̱bu̱ Timná niʼni. Ikhaa niríya kaʼyuuʼ a̱ʼgiu̱u̱ nixnúu ndiyáa xa̱bu̱ bi̱ nixtáa ga̱jma̱a̱ náa ndxa̱a̱”. Índo̱ filisteos nidxawíín rígi̱, nitsimún gútsika̱a̱ a̱ʼgu̱ ga̱jma̱a̱ anu̱u̱.
7 Ikhú Sansón niʼthún: “Á mu dí xúʼko̱ kaʼnii eniu̱ʼla, xágúnʼ wíí asndu índo̱ gámbóʼ ra̱niala xó má eniu̱ʼla”.
8 Nigíʼdúu nixnúu mámbáa. Ra̱ʼkhá tháán mbaʼin nigudíin. Nda̱wa̱á nigajta̱a̱ ga̱jma̱a̱ ni̱jkha̱ gáxtáa náa iñúuʼ itsí dí rígá náa Etam.
9 Nda̱wa̱á filisteos nitsimún náa Judá ga̱jma̱a̱ nigi̱ʼi̱i̱n ikhí. Nigún runi̱ dí ra̱májánʼ náa Lehí.
10 Ikhú xa̱bu̱ Judá nirajxu̱u̱n: “Náá numuu eguwáʼla rá. Dí eyalaʼ.” Ikhiin niriʼña̱a̱: “Nagúwaʼxu gúrtuwíin Sansón ga̱jma̱a̱ muni̱i̱ xó má ikhaa niʼniuxu̱”.
11 Ikhú mbá 3,000 xa̱bu̱ Judá niguájtaan náa iñúuʼ itsí dí rígá náa Etam ga̱jma̱a̱ nirajxi̱i̱ Sansón: “Lá tsétayáá dí filisteos nindxu̱ún bi̱ nutañajunlú ráʼ. Náá numuu dí xígi̱ nitaniu̱xu.” Ikhaa niriʼñúún: “Ikhúún niniu̱u̱n xó má ikhiin niniu̱ʼ”.
12 Ikhiin nitháán: “Niguájtáaxu̱ mu dí murugua̱a̱nʼxu ga̱jma̱a̱ muxnajxíínxu náa filisteos”. Ikhú Sansón nindu̱ʼu̱u̱n: “Gutu̱nʼla dí ikháanʼ nda̱a̱ dí gúniu̱ʼ”.
13 Ikhiin nitháán: “Nda̱a̱ má dí gúniáanʼxu, i̱ndó má muruʼwa̱a̱xu ga̱jma̱a̱ muʼguá kuña̱a̱nxu náa ikhiin. Xúxíña̱a̱nxu má”.
Ikhú niruʼwa̱a̱ ga̱jma̱a̱ a̱jma̱ ñuñuu dí nuxi̱ʼ, niri̱ya̱a̱ʼ náa itsí ga̱jma̱a̱ nigún kuya̱a̱.
14 Índo̱ ndiyáá dí nikráʼáan náa Lehí, ikhú filisteos nigi̱ʼdi̱i̱ nindxa̱ʼwa̱ dí niʼngu̱u̱n. Núkhu má espíritu santo* ndrígóo Jeobá niʼni dí Sansón magiʼdoo tsiaki̱i̱, ñuñuu dí kaxtoʼóo ga̱jma̱a̱ ñawúunʼ nithu xóo índo̱ gúmúu lino ndaʼyoo aguʼ, ga̱jma̱a̱ cadenas dí kaxtoʼóo ñawúunʼ nijngutígú asndu xó dí nijuiya̱a̱ʼ kaʼnii.
15 Ikhaa nixkamaa mbá jxaráwuunʼ búrru dí kaʼníí gújkhúʼ, rúʼko̱ nigudíin ga̱jma̱a̱ mbá 1,000 xa̱bekha.
16 Ikhú Sansón niʼthí:
“¡Ga̱jma̱a̱ mbá jxaráwuunʼ búrru..., nigúdíin mbá ru̱tsu̱u̱, a̱jma̱ ru̱tsu̱u̱ xa̱bu̱!
Ga̱jma̱a̱ mbá jxaráwuunʼ búrru niʼngo̱ʼ nigúdíin mbá 1,000 xa̱bu̱”.
17 Índo̱ niguámbóo niʼthí rígi̱, ikhú nidaʼ jxaráwuunʼ búrru ga̱jma̱a̱ nixná mbiʼyuu mbaaʼ rúʼko̱ Ramat-Lehí.*
18 Ikhú nikándawuuʼ ga̱jma̱a̱ niʼthúu̱n Jeobá: “Ikháán nindxa̱a̱ʼ bi̱ nitambáyíí xa̱bia̱a̱ʼ mu maʼngo̱o̱ madaaʼ. Ga̱jma̱a̱ dí xúgi̱ makhañúʼ i̱ndó dí makándawuʼ ga̱jma̱a̱ makhañúʼ náa ñawúúnʼ xa̱bu̱ bi̱ túthu xtóo xuyuuʼ tsáʼkhún ráʼ.”
19 Ikhú Dios niʼni dí mbá iñáʼ dí rígá náa Lehí mambaʼtoo, ga̱jma̱a̱ nigíʼdu̱u̱ nigájnuu iyaʼ. Sansón niʼga̱a̱n iyaʼ, ndiyáa tsiaki̱i̱ ga̱jma̱a̱ niʼni̱i̱ a̱jkiu̱u̱n. Ikha jngóo iyaʼ dí rígá náa Lehí nixná mbiʼyuu En-Hacore* asndu dí mbiʼi xúgi̱.
20 Sansón niʼnimbánuu numún xa̱bu̱ Israel mbá 20 tsiguʼ nákha mbiʼi dí nikúwá filisteos.
Mbaʼa nota
^ O “cuarto dí rígá awúún”.
^ O “tátée”.
^ Rí nandoo gáʼthúu̱n ‹bíjní jxaráwuunʼ búrru›.
^ Rí nandoo gáʼthúu̱n ‹iduu iyaʼ dí nandxaʼwóo›.
